Utshovসর্গ 97
97.1
তথা তৈঃ কৃত্তগাত্রৈস্তু দশগ্রীবেণ মার্গণৈঃ।
বভূব বসুধা তত্র প্রকীর্ণা হরিভিস্তদা ।। ৬.৯৭.১ ।।
97.2
রাবণস্যাপ্রসহ্যং তং শরসম্পাতমেকতঃ।
ন শেকুঃ সহিতুং দীপ্তং পতঙ্গা জ্বলনং যথা ।। ৬.৯৭.২ ।।
97.3
তে ঽর্দিতা নিশিতৈর্বাণৈঃ ক্রোশন্তো বিপ্রদুদ্রুবুঃ।
পাবকার্চিস্সমাবিষ্টা দহ্যমানা যথা গজাঃ ।। ৬.৯৭.৩ ।।
97.4
প্লবঙ্গানামনীকানি মহাভ্রাণীব মারুতঃ।
স যয়ৌ সমরে তস্মিন্ বিধমন্ রাবণঃ শরৈঃ ।। ৬.৯৭.৪ ।।
97.5
কদনং তরসা কৃত্বা রাক্ষসেন্দ্রো বনৌকসাম্।
আসসাদ ততো যুদ্ধে রাঘবং ত্বরিতস্তদা ।। ৬.৯৭.৫ ।।
97.6
সুগ্রীবস্তান্ কপীন্ দৃষ্ট্বা ভগ্নান্ বিদ্রবতো রণে।
গুল্মে সুষেণং নিক্ষিপ্য চক্রে যুদ্ধে ঽদ্ভুতং মনঃ ।। ৬.৯৭.৬ ।।
97.7
আত্মনঃ সদৃশং বীরঃ স তং নিক্ষিপ্য বানরম্।
সুগ্রীবো ঽভিমুখঃ শত্রুং প্রতস্থে পাদপায়ুধঃ ।। ৬.৯৭.৭ ।।
97.8
পার্শ্বতঃ পৃষ্টতশ্চাস্য সর্বে যূথপাধিপাঃ স্বয়ম্।
অনুজহ্রুর্মহাশৈলান্ বিবিধাংশ্চ মহাদ্রুমান্ ।। ৬.৯৭.৮ ।।
97.9
স নর্দন্ যুধি সুগ্রীবঃ স্বরেণ মহতা মহান্।
পাতয়ন্ বিবিধাংশ্চান্যান্ জগামোত্তমরাক্ষসান্ ।। ৬.৯৭.৯ ।।
97.10
মমন্থ চ মহাকায়ো রাক্ষসান্ বানরেশ্বরঃ।
যুগান্তসময়ে বায়ুঃ প্রবৃদ্ধানগমানিব ।। ৬.৯৭.১০ ।।
97.11
রাক্ষসানামনীকেষু শৈলবর্ষং ববর্ষ হ।
অশ্মবর্ষং যথা মেঘঃ পক্ষিসঙ্ঘেষু কাননে ।। ৬.৯৭.১১ ।।
97.12
কপিরাজবিমুক্তৈস্তৈঃ শৈলবর্ষৈস্তু রাক্ষসাঃ।
বিকীর্ণশিরসঃ পেতুর্নিকৃত্তা ইব পর্বতাঃ ।। ৬.৯৭.১২ ।।
97.13
অথ সঙ্ক্ষীয়মাণেষু রাক্ষসেষু সমন্ততঃ।
সুগ্রীবেণ প্রভগ্নেষু পতত্সু নিনদত্সু চ ।। ৬.৯৭.১৩ ।।
97.14
বিরূপাক্ষঃ স্বকং নাম ধন্বী বিশ্রাব্য রাক্ষসঃ।
রথাদাপ্লুত্য দুর্ধর্ষো গজস্কন্ধমুপারুহৎ ।। ৬.৯৭.১৪ ।।
97.15
স তং দ্বিরদমারুহ্য বিরূপাক্ষো মহারথঃ।
বিনদন্ ভীমনির্হ্রাদং বানরানভ্যধাবত ।। ৬.৯৭.১৫ ।।
97.16
সুগ্রীবে স শরান্ ঘোরান্ বিসসর্জ চমূমুখে।
স্থাপয়ামাস চোদ্বিগ্নান্ রাক্ষসান্ সম্প্রহর্ষয়ন্ ।। ৬.৯৭.১৬ ।।
97.17
স তু বিদ্ধঃ শিতৈর্বাণৈঃ কপীন্দ্রস্তেন রক্ষসা।
চক্রোধ স মহাক্রোধো বধে চাস্য মনো দধে ।। ৬.৯৭.১৭ ।।
97.18
ততঃ পাদপমুদ্ধৃত্য শূরঃ সম্প্রধনো হরিঃ।
অভিপত্য জঘানাস্য প্রমুখে তু মহাগজম্ ।। ৬.৯৭.১৮ ।।
97.19
স তু প্রহারাভিহতঃ সুগ্রীবেণ মহাগজঃ।
অপাসর্পদ্ধনুর্মাত্রং নিষসাদ ননাদ চ ।। ৬.৯৭.১৯ ।।
97.20
গজাত্তু মথিতাত্তূর্ণমপক্রম্য স বীর্যবান্।
রাক্ষসো ঽভিমুখঃ শত্রুং প্রত্যুদ্গম্য ততঃ কপিম্ ।। ৬.৯৭.২০ ।।
97.21
আর্ষভং চর্ম খড্গং চ প্রগৃহ্য লঘুবিক্রমঃ।
ভর্ত্সয়ন্নিব সুগ্রীবমাসসাদ ব্যবস্থিতম্ ।। ৬.৯৭.২১ ।।
97.22
স হি তস্যাভিসঙ্ক্রুদ্ধঃ প্রগৃহ্য বিপুলাং শিলাম্।
বিরূপাক্ষায় চিক্ষেপ সুগ্রীবো জলদোপমাম্ ।। ৬.৯৭.২২ ।।
97.23
স তাং শিলামাপতন্তীং দৃষ্ট্বা রাক্ষসপুঙ্গবঃ।
অপক্রম্য সুবিক্রান্তঃ খড্গেন প্রাহরত্তদা ।। ৬.৯৭.২৩ ।।
97.24
তেন খড্গপ্রহারেণ রক্ষসা বলিনা হতঃ।
মুহূর্তমভবদ্বীরো বিসঞ্জ্ঞ ইব বানরঃ ।। ৬.৯৭.২৪ ।।
97.25
স তদা সহসোত্পত্য রাক্ষসস্য মহাহবে।
মুষ্টিং সংবর্ত্য বেগেন পাতয়ামাস বক্ষসি ।। ৬.৯৭.২৫ ।।
97.26
মুষ্টিপ্রহারাভিহতো বিরূপাক্ষো নিশাচরঃ।
তেন খড্গেন সঙ্ক্রুদ্ধঃ সুগ্রীবস্য চমূমুখে।কবচং পাতয়ামাস পদ্ভ্যামভিহতো ঽপতৎ ।। ৬.৯৭.২৬ ।।
97.27
স সমুত্থায় পতিতঃ কপিস্তস্য ব্যসর্জয়ৎ।
তলপ্রহারমশনেঃ সমানং ভীমনিস্বনম্ ।। ৬.৯৭.২৭ ।।
97.28
তলপ্রহারং তদ্রক্ষঃ সুগ্রীবেণ সমুদ্যতম্।
নৈপুণ্যান্মোচয়িত্বৈনং মুষ্টিনোরস্যতাডয়ৎ ।। ৬.৯৭.২৮ ।।
97.29
ততস্তু সঙ্ক্রুদ্ধতরঃ সুগ্রীবো বানরেশ্বরঃ।
মোক্ষিতং চাত্মনো দৃষ্ট্বা প্রহারং তেন রক্ষসা।স দদর্শান্তরং তস্য বিরূপাক্ষস্য বানরঃ ।। ৬.৯৭.২৯ ।।
97.30
ততো ন্যপাতয়ৎ ক্রোধাচ্ছঙ্খদেশে মহত্তলম্ ।
। ৬.৯৭.৩০ ।।দীপ্তং পতঙ্গা জ্বলনং যথা ।। ৬.৯৭.২ ।।
97.31
মহেন্দ্রাশনিকল্পেন তলেনাভিহতঃ ক্ষিতৌ ।
। ৬.৯৭.৩১ ।।।।দীপ্তং পতঙ্গা জ্বলনং যথা ।। ৬.৯৭.২ ।।
97.32
পপাত রুধিরক্লিন্নঃ শোণিতং চ সমুদ্বমন্।
স্রোতোভ্যস্তু বিরূপাক্ষো জলং প্রস্রবণাদিব ।। ৬.৯৭.৩২ ।।
97.33
বিবৃত্তনয়নং ক্রোধাৎ সফেনং রুধিরাপ্লুতম্।
দদৃশুস্তে বিরূপাক্ষং বিরূপাক্ষতরং কৃতম্ ।। ৬.৯৭.৩৩ ।।
97.34
স্ফুরন্তং পরিবর্তন্তং পার্শ্বেন রুধিরোক্ষিতম্।
করুণং চ বিনর্দন্তং দদৃশুঃ কপয়ো রিপুম্ ।। ৬.৯৭.৩৪ ।।
97.35
তথা তু তৌ সংয়তি সম্প্রয়ুক্তৌ তরস্বিনৌ বানররাক্ষসানাম্।
বলার্ণবৌ সস্বনতুঃ সুভীমং মহার্ণবৌ দ্বাবিব ভিন্নবেলৌ ।। ৬.৯৭.৩৫ ।।
97.36
বিনাশিতং প্রেক্ষ্য বিরূপনেত্রং মহাবলং তং হরিপার্থিবেন।
বলং সমস্তং কপিরাক্ষসানামুন্মত্তগঙ্গাপ্রতিমং বভূব ।। ৬.৯৭.৩৬ ।।
97.37
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে সপ্তনবতিতমঃ সর্গঃ ।
। ৯৭ ।।