Utshovসর্গ 94
94.1
স প্রবিশ্য সভাং রাজা দীনঃ পরমদুঃখিতঃ।
নিষসাদাসনে সিংহঃ ক্রুদ্ধ ইব শ্বসন্ ।। ৬.৯৪.১ ।।
94.2
অব্রবীচ্চ স তান্ সর্বান্ বলমুখ্যান্ মহাবলঃ।
রাবণঃ প্রাঞ্জলির্বাক্যং পুত্রব্যসনকর্শিতঃ ।। ৬.৯৪.২ ।।
94.3
সর্বে ভবন্তঃ সর্বেণ হস্ত্যশ্বেন সমাবৃতাঃ।
নির্যান্তু রথসঙ্ঘৈশ্চ পাদাতৈশ্চোপশোভিতাঃ ।। ৬.৯৪.৩ ।।
94.4
একং রামং পরিক্ষিপ্য সমরে হন্তুমর্হথ।
বর্ষন্তঃ শরবর্ষেণ প্রাবৃট্কাল ইবাম্বুদাঃ ।। ৬.৯৪.৪ ।।
94.5
অথবা ঽহং শরৈস্তীক্ষ্ণৈর্ভিন্নগাত্রং মহারণে।
ভবদ্ভিঃ শ্বো নিহন্তাস্মি রামং লোকস্য পশ্যতঃ ।। ৬.৯৪.৫ ।।
94.6
ইত্যেতদ্রাক্ষসেন্দ্রস্য বাক্যমাদায় রাক্ষসাঃ।
নির্যয়ুস্তে রথৈঃ শীঘ্রৈর্নানানীকৈঃ সুসংবৃতাঃ ।। ৬.৯৪.৬ ।।
94.7
পরিঘান্ পট্টিশাংশ্চৈব শরখড্গপরশ্বধান্।
শরীরান্তকরান্ সর্বে চিক্ষিপুর্বানরান্ প্রতি ।। ৬.৯৪.৭ ।।
94.8
বানরাশ্চ দ্রুমান্ শৈলান্ রাক্ষসান্ প্রতি চিক্ষিপুঃ ।
। ৬.৯৪.৮ ।।
94.9
স সঙ্গ্রামো মহান্ ভীমঃ সূর্যস্যোদয়নং প্রতি।
রক্ষসাং বানরাণাং চ তুমুলঃ সমপদ্যত ।। ৬.৯৪.৯ ।।
94.10
তে গদাভির্বিচিত্রাভিঃ প্রাশৈঃ খড্গৈঃ পরশ্বধৈঃ।
অন্যোন্যং সমরে জঘ্নুস্তদা বানররাক্ষসাঃ ।। ৬.৯৪.১০ ।।
94.11
এবং প্রবৃত্তে সঙ্গ্রামে হ্যুদ্ভূতং সুমহদ্রজঃ।
রক্ষসাং বানরাণাং চ শান্তং শোণিতবিস্রবৈঃ ।। ৬.৯৪.১১ ।।
94.12
মাতঙ্গরথকূলাশ্চ বাজিমত্স্যা ধ্বজদ্রুমাঃ।
শরীরসঙ্ঘাটবহাঃ প্রসস্রুঃ শোণিতাপগাঃ ।। ৬.৯৪.১২ ।।
94.13
ততস্তে বানরাঃ সর্বে শোণিতৌঘপরিপ্লুতাঃ।
ধ্বজবর্মরথানশ্বান্নানাপ্রহরণানি চ।আপ্লুত্যাপ্লুত্য সমরে রাক্ষসানাং বভঞ্জিরে ।। ৬.৯৪.১৩ ।।
94.14
কেশান্ কর্ণললাটাংশ্চ নাসিকাশ্চ প্লবঙ্গমাঃ।
রক্ষসাং দশনৈস্তীক্ষ্ণৈর্নখৈশ্চাপি ন্যকর্তয়ন্ ।। ৬.৯৪.১৪ ।।
94.15
একৈকং রাক্ষসং সঙ্খ্যে শতং বানরপুঙ্গবাঃ।
অভ্যধাবন্ত ফলিনং বৃক্ষং শকুনয়ো যথা ।। ৬.৯৪.১৫ ।।
94.16
তথা গদাভির্গুর্বীভিঃ প্রাসৈঃ খড্গৈঃ পরশ্বধৈঃ।
নিজঘ্নুর্বানরান্ ঘোরান্ রাক্ষসাঃ পর্বতোপমাঃ ।। ৬.৯৪.১৬ ।।
94.17
রাক্ষসৈর্যুদ্ধ্যামানানাং বানরাণাং মহাচমূঃ।
শরণ্যং শরণং যাতা রামং দশরথাত্মজম্ ।। ৬.৯৪.১৭ ।।
94.18
ততো রামো মহাতেজা ধনুরাদায় বীর্যবান্।
প্রবিশ্য রাক্ষসং সৈন্যং শরবর্ষং ববর্ষ হ ।। ৬.৯৪.১৮ ।।
94.19
প্রবিষ্টং তু তদা রামং মেঘাঃ সূর্যমিবাম্বরে।
নাভিজগ্মুর্মহাঘোরং নির্দহন্তং শরাগ্নিনা ।। ৬.৯৪.১৯ ।।
94.20
কৃতান্যেব সুঘোরাণি রামেণ রজনীচরাঃ।
রণে রামস্য দদৃশুঃ কর্মাণ্যসুকরাণি চ ।। ৬.৯৪.২০ ।।
94.21
চালয়ন্তং মহানীকং বিধমন্তং মহারথান্।
দদৃশুস্তে ন বৈ রামং বাতং বনগতং যথা ।। ৬.৯৪.২১ ।।
94.22
ছিন্নং ভিন্নং শরৈর্দগ্ধং প্রভগ্নং শস্ত্রপীডিতম্।
বলং রামেণ দদৃশুর্ন রামং শীঘ্রকারিণম্ ।। ৬.৯৪.২২ ।।
94.23
প্রহরন্তং শরীরেষু ন তে পশ্যন্তি রাঘবম্।
ইন্দ্রিয়ার্থেষু তিষ্ঠন্তং ভূতাত্মানমিব প্রজাঃ ।। ৬.৯৪.২৩ ।।
94.24
এষ হন্তি গজানীকমেষ হন্তি মহারথান্।
এষ হন্তি শরৈস্তীক্ষ্ণৈঃ পদাতীন্ বাজিভিঃ সহ ।। ৬.৯৪.২৪ ।।
94.25
ইতি তে রাক্ষসাঃ সর্বে রামস্য সদৃশান্ রণে।
অন্যোন্যং কুপিতা জঘ্নুঃ সাদৃশ্যাদ্রাঘবস্য তে ।। ৬.৯৪.২৫ ।।
94.26
ন তে দদৃশিরে রামং দহন্তমরিবাহিনীম্।
মোহিতাঃ পরমাস্ত্রেণ গান্ধর্বেণ মহাত্মনা ।। ৬.৯৪.২৬ ।।
94.27
তে তু রামসহস্রাণি রণে পশ্যন্তি রাক্ষসাঃ।
পুনঃ পশ্যন্তি কাকুত্স্থমেকমেব মহাহবে ।। ৬.৯৪.২৭ ।।
94.28
ভ্রমন্তীং কাঞ্চনীং কোটিং কার্মুকস্য মহাত্মনঃ।
অলাতচক্রপ্রতিমাং দদৃশুস্তে ন রাঘবম্ ।। ৬.৯৪.২৮ ।।
94.29
শরীরনাভিসত্ত্বার্চিঃ শরীরং নেমিকার্মুকম্।
জ্যাঘোষতলনির্ঘোষং তেজোবুদ্ধিগুণপ্রভম্ ।। ৬.৯৪.২৯ ।।
94.30
দিব্যাস্ত্রগুণপর্যন্তং নিঘ্নন্তং যুধি রাক্ষসান্।
দদৃশূ রামচক্রং তৎ কালচক্রমিব প্রজাঃ ।। ৬.৯৪.৩০ ।।
94.31
অনীকং দশসাহস্রং রথানাং বাতরংহসাম্।
অষ্টাদশ সহস্রাণি কুঞ্জরাণাং তরস্বিনাম্ ।। ৬.৯৪.৩১ ।।
94.32
চতুর্দশ সহস্রাণি সারোহাণাং চ বাজিনাম্।
পূর্ণে শতসহস্রে দ্বে রাক্ষসানাং পদাতিনাম্ ।। ৬.৯৪.৩২ ।।
94.33
দিবসস্যাষ্টমে ভাগে শরৈরগ্নিশিখোপমৈঃ।
হতান্যেকেন রামেণ রক্ষসাং কামরূপিণাম্ ।। ৬.৯৪.৩৩ ।।
94.34
তে হতাশ্বা হতরথাঃ শান্তা বিমথিতধ্বজাঃ।
অভিপেতুঃ পুরীং লঙ্কাং হতশেষা নিশাচরাঃ ।। ৬.৯৪.৩৪ ।।
94.35
হতৈর্গজপদাত্যশ্বৈস্তদ্বভূব রণাজিরম্।
আক্রীডমিব রুদ্রস্য ক্রুদ্ধস্য সুমহাত্মনঃ ।। ৬.৯৪.৩৫ ।।
94.36
ততো দেবাঃ সগন্ধর্বাঃ সিদ্ধাশ্চ পরমর্ষয়ঃ।
সাধু সাধ্বিতি রামস্য তৎ কর্ম সমপূজয়ন্ ।। ৬.৯৪.৩৬ ।।
94.37
অব্রবীচ্চ তদা রামঃ সুগ্রীবং প্রত্যনন্তরম্।
বিভীষণং চ ধর্মাত্মা হনূমন্তং চ বানরম্ ।। ৬.৯৪.৩৭ ।।
94.38
জাম্ববন্তং হরিশ্রেষ্ঠং মৈন্দং দ্বিবিদমেব চ।
এতদস্ত্রবলং দিব্যং মম বা ত্র্যম্বকস্য বা ।। ৬.৯৪.৩৮ ।।
94.39
নিহত্য তাং রাক্ষসবাহিনীং তু রামস্তদা শক্রসমো মহাত্মা।
অস্ত্রেষু শস্ত্রেষু জিতক্লমশ্চ সংস্তূয়তে দেবগণৈঃ প্রহৃষ্টৈঃ ।। ৬.৯৪.৩৯ ।।
94.40
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে চতুর্নবতিতমঃ সর্গঃ ।
। ৯৪ ।।