Utshovসর্গ 93
93.1
ততঃ পৌলস্ত্যসচিবাঃ শ্রুত্বা চেন্দ্রজিতং হতম্।
আচচক্ষুরভিজ্ঞায় দশগ্রীবায় সব্যথাঃ ।। ৬.৯৩.১ ।।
93.2
যুদ্ধে হতো মহারাজ লক্ষ্মণেন তবাত্মজঃ।
বিভীষণসহায়েন মিষতাং নো মহাদ্যুতিঃ ।। ৬.৯৩.২ ।।
93.3
শূরঃ শূরেণ সঙ্গম্য সংয়ুগেষ্বপরজিতঃ।
লক্ষ্মণেন হতঃ শূরঃ পুত্রস্তু বিবুধেন্দ্রজিৎ।গতঃ স পরমান্ লোকান্ শরৈঃ সন্তাপ্য লক্ষ্মণম্ ।। ৬.৯৩.৩ ।।
93.4
স তং প্রতিভয়ং শ্রুত্বা বধং পুত্রস্য দারুণম্।
ঘোরমিন্দ্রজিতঃ সঙ্খ্যে কশ্মলং চাবিশন্মহৎ ।। ৬.৯৩.৪ ।।
93.5
উপলভ্য চিরাৎ সঞ্জ্ঞাং রাজা রাক্ষসপুঙ্গবঃ।
পুত্রশোকার্দিতো দীনো বিললাপাকুলেন্দ্রিয়ঃ ।। ৬.৯৩.৫ ।।
93.6
হা রাক্ষসচমূমুখ্য মম বত্স মহারথ।
জিত্বেন্দ্রং কথমদ্য ত্বং লক্ষ্মণস্য বশং গতঃ ।। ৬.৯৩.৬ ।।
93.7
ননু ত্বমিষুভিঃ ক্রুদ্ধো ভিন্দ্যাঃ কালান্তকাবপি।
মন্দরস্যাপি শৃঙ্গাণি কিং পুনর্লক্ষ্মণং যুধি ।। ৬.৯৩.৭ ।।
93.8
অদ্য বৈবস্বতো রাজা ভূয়ো বহুমতো মম।
যেনাদ্য ত্বং মহাবাহো সংয়ুক্তঃ কালধর্মণা ।। ৬.৯৩.৮ ।।
93.9
এষ পন্থাঃ সুয়োধানাং সর্বামরগণেষ্বপি ।
। ৬.৯৩.৯ ।।
93.10
যঃ কৃতে হন্যতে ভর্তুঃ স পুমান্ স্বর্গমৃচ্ছতি।
অদ্য দেবগণাঃ সর্বে লোকপালাস্তথর্ষয়ঃ।হতমিন্দ্রজিতং শ্রুত্বা সুখং স্বপ্স্যন্তি নির্ভয়াঃ ।। ৬.৯৩.১০ ।।
93.11
অদ্য লোকাস্ত্রয়ঃ কৃত্স্না পৃথিবী চ সকাননা।
একেনেন্দ্রজিতা হীনা শূন্যেব প্রতিভাতি মে ।। ৬.৯৩.১১ ।।
93.12
অদ্য নৈর্ঋতকন্যানাং শ্রোষ্যাম্যন্তঃপুরে রবম্।
করেণুসঙ্ঘস্য যথা নিনাদং গিরিগহ্বরে ।। ৬.৯৩.১২ ।।
93.13
যৌবরাজ্যং চ লঙ্কাং চ রক্ষাংসি চ পরন্তপ।
মাতরং মাং চ ভার্যাং চ ক্ব গতো ঽসি বিহায় নঃ ।। ৬.৯৩.১৩ ।।
93.14
মম নাম ত্বয়া বীর গতস্য যমসাদনম্।
প্রেতকার্যাণি কার্যাণি বিপরীতে হি বর্তসে ।। ৬.৯৩.১৪ ।।
93.15
স ত্বং জীবতি সুগ্রীবে লক্ষ্মণে চ সরাঘবে।
মম শল্যমনুদ্ধৃত্য ক্ব গতো ঽসি বিহায় নঃ ।। ৬.৯৩.১৫ ।।
93.16
এবমাদিবিলাপার্তং রাবণং রাক্ষসাধিপম্।
আবিবেশ মহান্ কোপঃ পুত্রব্যসনসম্ভবঃ ।। ৬.৯৩.১৬ ।।
93.17
প্রকৃত্যা কোপনং হ্যেনং পুত্রস্য পুনরাধয়ঃ।
দীপ্তং সন্দীপয়ামাসুর্ঘর্মে ঽর্কমিব রশ্ময়ঃ ।। ৬.৯৩.১৭ ।।
93.18
ললাটে ভ্রুকুটীভিশ্চ সঙ্গতাভির্ব্যারোচত।
যুগান্তে সহ নক্রৈস্তু মহোর্মিভিরিবোদধিঃ ।। ৬.৯৩.১৮ ।।
93.19
কোপাদ্বিজৃম্ভমাণস্য বক্ত্রাদ্ ব্যক্তমভিজ্বলন্।
উত্পপাত স ভূয়ো ঽগ্নির্বৃত্রস্য বদনাদিব ।। ৬.৯৩.১৯ ।।
93.20
স পুত্রবধসন্তপ্তঃ শূরঃ ক্রোধবশং গতঃ।
সমীক্ষ্য রাবণো বুদ্ধ্যা বৈদেহ্যা রোচয়দ্বধম্ ।। ৬.৯৩.২০ ।।
93.21
তস্য প্রকৃত্যা রক্তে চ রক্তে ক্রোধাগ্নিনা ঽপি চ।
রাবণস্য মহাঘোরে দীপ্তে নেত্রে বভূবতুঃ ।। ৬.৯৩.২১ ।।
93.22
ঘোরং প্রকৃত্যা রূপং তত্তস্য ক্রোধাগ্নিমূর্চ্ছিতম্।
বভূব রূপং ক্রুদ্ধস্য রুদ্ধস্যেব দুরাসদম্ ।। ৬.৯৩.২২ ।।
93.23
তস্য ক্রুদ্ধস্য নেত্রাভ্যাং প্রাপ্ততন্নস্রবিন্দবঃ।
দীপ্তাভ্যামিব দীপাভ্যাং সার্চিষঃ স্নেহবিন্দবঃ ।। ৬.৯৩.২৩ ।।
93.24
দন্তান্ বিদশতস্তস্য শ্রূয়তে দশনস্বনঃ।
যন্ত্রস্যাবেষ্ট্যমানস্য মহতো দানবৈরিব ।। ৬.৯৩.২৪ ।।
93.25
কালাগ্নিরিব সঙ্ক্রুদ্ধো যাং যাং দিশমবৈক্ষত।
তস্যাং তস্যাং ভয়ত্রস্তা রাক্ষসাঃ সংবিলিল্যিরে ।। ৬.৯৩.২৫ ।।
93.26
তমন্তকমিব ক্রুদ্ধং চরাচরচিখাদিষুম্।
বীক্ষমাণং দিশঃ সর্বা রাক্ষসা নোপচক্রমুঃ ।। ৬.৯৩.২৬ ।।
93.27
ততঃ পরমসঙ্ক্রুদ্ধো রাবণো রাক্ষসাধিপঃ।
অব্রবীদ্রক্ষসাং মধ্যে সংস্তম্ভয়িষুরাহবে ।। ৬.৯৩.২৭ ।।
93.28
ময়া বর্ষসহস্রাণি চরিত্বা দুশ্চরং তপঃ।
তেষু তেষ্ববকাশেষু স্বয়ম্ভূঃ পরিতোষিতঃ ।। ৬.৯৩.২৮ ।।
93.29
তস্যৈব তপসো ব্যুষ্ট্যা প্রসাদাচ্চ স্বয়ম্ভুবঃ।
নাসুরেভ্যো ন দেবেভ্যো ভয়ং মম কদাচন ।। ৬.৯৩.২৯ ।।
93.30
কবচং ব্রহ্মদত্তং মে যদাদিত্যসমপ্রভম্।
দেবাসুরবিমর্দেষু ন ভিন্নং বজ্রশক্তিভিঃ ।। ৬.৯৩.৩০ ।।
93.31
তেন মামদ্য সংয়ুক্তং রথস্থমিহ সংয়ুগে।
প্রতীয়াৎ কো ঽদ্য মামাজৌ সাক্ষাদপি পুরন্দরঃ ।। ৬.৯৩.৩১ ।।
93.32
যত্তদা ঽভিপ্রসন্নেন সশরং কার্মুকং মহৎ।
দেবাসুরবিমর্দেষু মম দত্তং স্বয়ম্ভুবা ।। ৬.৯৩.৩২ ।।
93.33
অদ্য তূর্যশতৈর্ভীমং ধনুরুত্থাপ্যতাং মম।
রামলক্ষ্মণয়োরেব বধায় পরমাহবে ।। ৬.৯৩.৩৩ ।।
93.34
স পুত্রবধসন্তপ্তঃ শূরঃ ক্রোধবশং গতঃ।
সমীক্ষ্য রাবণো বুদ্ধ্যা সীতাং হন্তুং ব্যবস্যত ।। ৬.৯৩.৩৪ ।।
93.35
প্রত্যবেক্ষ্য তু তাম্রাক্ষঃ সুঘোরো ঘোরদর্শনঃ।
দীনো দীনস্বরান্ সর্বাংস্তানুবাচ নিশাচরান্ ।। ৬.৯৩.৩৫ ।।
93.36
মায়য়া মম বত্সেন বঞ্চনার্থং বনৌকসাম্।
কিঞ্চিদেব হতং তত্র সীতেয়মিতি দর্শিতম্ ।। ৬.৯৩.৩৬ ।।
93.37
তদিদং তথ্যমেবাহং করিষ্যে প্রিয়মাত্মনঃ।
বৈদেহীং নাশয়িষ্যামি ক্ষত্রবন্ধুমনুব্রতাম্ ।। ৬.৯৩.৩৭ ।।
93.38
ইত্যেবমুক্ত্বা সচিবান্ খড্গমাশু পরামৃশৎ ।
। ৬.৯৩.৩৮ ।।
93.39
উদ্ধৃত্য গুণসম্পন্নং বিমলাম্বরবর্চসম্।
নিষ্পপাত স বেগেন সভার্যঃ সচিবৈর্বৃতঃ ।। ৬.৯৩.৩৯ ।।
93.40
রাবণঃ পুত্রশোকেন ভৃশমাকুলচেতনঃ।
সঙ্ক্রুদ্ধঃ খড্গমাদায় সহসা যত্র মৈথিলী ।। ৬.৯৩.৪০ ।।
93.41
ব্রজন্তং রাক্ষসং প্রেক্ষ্য সিংহনাদং প্রচুক্রুশুঃ।
ঊচুশ্চান্যোন্যমাশ্লিষ্য সঙ্ক্রুদ্ধং প্রেক্ষ্য রাক্ষসাঃ ।। ৬.৯৩.৪১ ।।
93.42
অদ্যৈনং তাবুভৌ দৃষ্ট্বা ভ্রাতরৌ প্রব্যথিষ্যতঃ।
লোকপালা হি চত্বারঃ ক্রুদ্ধেনানেন নির্জিতাঃ ।। ৬.৯৩.৪২ ।।
93.43
বহবঃ শত্রবশ্চাপি সংয়ুগেষু নিপাতিতাঃ।
ত্রিষু লোকেষু রত্নানি ভুঙ্ক্তে চাহৃত্য রাবণঃ ।। ৬.৯৩.৪৩ ।।
93.44
বিক্রমে চ বলে চৈব নাস্ত্যস্য সদৃশো ভুবি ।
। ৬.৯৩.৪৪ ।।
93.45
তেষাং সঞ্জল্পমানানামশোকবনিকাং গতাম্।
অভিদুদ্রাব বৈদেহীং রাবণঃ ক্রোধমূর্চ্ছিতঃ ।। ৬.৯৩.৪৫ ।।
93.46
বার্যমাণঃ সুসঙ্ক্রুদ্ধঃ সুহৃদ্ভির্হিতবুদ্ধিভিঃ।
অভ্যধাবত সঙ্ক্রুদ্ধঃ খে গ্রহো রোহিণীমিব ।। ৬.৯৩.৪৬ ।।
93.47
মৈথিলী রক্ষ্যমাণা তু রাক্ষসীভিরনিন্দিতা।
দদর্শ রাক্ষসং ক্রুদ্ধং নিস্ত্রিংশবরধারিণম্ ।। ৬.৯৩.৪৭ ।।
93.48
তং নিশাম্য সনিস্ত্রিংশং ব্যথিতা জনকাত্মজা।
নিবার্যমাণং বহুশঃ সুহৃদ্ভিরনুবর্তিনম্।সীতা দুঃখসমাবিষ্টা বিলপন্তীদমব্রবীৎ ।। ৬.৯৩.৪৮ ।।
93.49
যথা ঽয়ং মামভিক্রুদ্ধঃ সমভিদ্রবতি স্বয়ম্।
বধিষ্যতি সনাথাং মামনাথামিব দুর্মতিঃ ।। ৬.৯৩.৪৯ ।।
93.50
বহুশশ্চোদয়ামাস ভর্তারং মামনুব্রতাম্।
ভার্যা ভব রমস্বেতি প্রত্যাখ্যাতো ধ্রুবং ময়া ।। ৬.৯৩.৫০ ।।
93.51
সো ঽয়ং মমানুপস্থানে ব্যক্তং নৈরাশ্যমাগতঃ।
ক্রোধমোহসমাবিষ্টো নিহন্তুং মাং সমুদ্যতঃ ।। ৬.৯৩.৫১ ।।
93.52
অথবা তৌ নরব্যাঘ্রৌ ভ্রাতরৌ রামলক্ষ্মণৌ।
মন্নিমিত্তমনার্যেণ সমরে ঽদ্য নিপাতিতৌ।অহো ধিঙ্মন্নিমিত্তো ঽয়ং বিনাশো রাজপুত্রয়োঃ ।। ৬.৯৩.৫২ ।।
93.53
অথবা পুত্রশোকেন অহত্বা রামলক্ষ্মণৌ।
বিধমিষ্যতি মাং রৌদ্রো রাক্ষসঃ পাপনিশ্চয়ঃ ।। ৬.৯৩.৫৩ ।।
93.54
হনূমতো ঽপি যদ্বাক্যং ন কৃতং ক্ষুদ্রয়া ময়া ।
। ৬.৯৩.৫৪ ।।
93.55
যদ্যহং তস্য পৃষ্ঠেন তদা যায়ামনিন্দিতা।
নাদ্যৈবমনুশোচেয়ং ভর্তুরঙ্কগতা সতী ।। ৬.৯৩.৫৫ ।।
93.56
মন্যে তু হৃদয়ং তস্যাঃ কৌসল্যায়াঃ ফলিষ্যতি।
একপুত্রা যদা পুত্রং বিনষ্টং শ্রোষ্যতে যুধি ।। ৬.৯৩.৫৬ ।।
93.57
সা হি জন্ম চ বাল্যং চ যৌবনং চ মহাত্মনঃ।
ধর্মকার্যানুরূপং চ রুদন্তী সংস্মরিষ্যতি ।। ৬.৯৩.৫৭ ।।
93.58
নিরাশা নিহতে পুত্রে দত্ত্বা শ্রাদ্ধমচেতনা।
অগ্নিমারোক্ষ্যতে নূনমপো বা ঽপি প্রবেক্ষ্যতি ।। ৬.৯৩.৫৮ ।।
93.59
ধিগস্তু কুব্জামসতীং মন্থরাং পাপনিশ্চয়াম্।
যন্নিমিত্তমিদং দুঃখং কৌসল্যা প্রতিপত্স্যতে ।। ৬.৯৩.৫৯ ।।
93.60
ইত্যেবং মৈথিলীং দৃষ্ট্বা বিলপন্তীং তপস্বিনীম্।
রোহিণীমিব চন্দ্রেণ বিনা গ্রহবশং গতাম্ ।। ৬.৯৩.৬০ ।।
93.61
এতস্মিন্নন্তরে তস্য অমাত্যো বুদ্ধিমান্ শুচিঃ।
সুপার্শ্বো নাম মেধাবী রাক্ষসো রাক্ষসেশ্বরম্।নিবার্যমাণং সচিবৈরিদং বচনমব্রবীৎ ।। ৬.৯৩.৬১ ।।
93.62
কথং নাম দশগ্রীব সাক্ষাদ্বৈশ্রবণানুজ।
হন্তুমিচ্ছসি বৈদেহীং ক্রোধাদ্ধর্মমপাস্য হি ।। ৬.৯৩.৬২ ।।
93.63
বেদবিদ্যাব্রতস্নাতঃ স্বকর্মনিরতঃ সদা।
স্ত্রিয়াঃ কস্মাদ্বধং বীর মন্যসে রাক্ষসেশ্বর ।। ৬.৯৩.৬৩ ।।
93.64
মৈথিলীং রূপসম্পন্নাং প্রত্যবেক্ষস্ব পার্থিব।
ত্বমেব তু সহাস্মাভী রাঘবে ক্রোধমুত্সৃজ ।। ৬.৯৩.৬৪ ।।
93.65
অভ্যুত্থানং ত্বমদ্যৈব কৃষ্ণপক্ষচতুর্দশীম্।
কৃত্বা নির্যাহ্যমাবাস্যাং বিজয়ায় বলৈর্বৃতঃ ।। ৬.৯৩.৬৫ ।।
93.66
শূরো ধীমান্ রথী খড্গী রথপ্রবরমাস্থিতঃ।
হত্বা দশরথিং রামং ভবান্ প্রাপ্স্যতি মৈথিলীম্ ।। ৬.৯৩.৬৬ ।।
93.67
স তদ্দুরাত্মা সুহৃদা নিবেদিতং বচঃ সুধর্ম্যং প্রতিগৃহ্য রাবণঃ।
গৃহং জগামাথ ততশ্চ বীর্যবান্ পুনঃ সভাং চ প্রয়য়ৌ সুহৃদ্বৃতঃ ।। ৬.৯৩.৬৭ ।।
93.68
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে ত্রিনবতিতমঃ সর্গঃ ।
। ৯৩ ।।