Utshovসর্গ 92
92.1
রুধিরক্লিন্নগাত্রস্তু লক্ষ্মণঃ শুভলক্ষণঃ।
বভূব হৃষ্টস্তং হত্বা শক্রজেতারমাহবে ।। ৬.৯২.১ ।।
92.2
ততঃ স জাম্ববন্তং চ হনুমন্তং চ বীর্যবান্।
সন্নিহত্য মহাতেজাস্তাংশ্চ সর্বান্ বনৌকসঃ ।। ৬.৯২.২ ।।
92.3
আজগাম ততস্তীব্রং যত্র সুগ্রীবরাঘবৌ।
বিভীষণমবষ্টভ্য হনূমন্তং চ লক্ষ্মণঃ ।। ৬.৯২.৩ ।।
92.4
ততো রামমভিক্রম্য সৌমিত্রিরভিবাদ্য চ।
তস্থৌ ভ্রাতৃসমীপস্থ ইন্দ্রস্যেব বৃহস্পতিঃ ।। ৬.৯২.৪ ।।
92.5
নিষ্টনন্নিব চাগম্য রাঘবায় মহাত্মনে।
আচচক্ষে তদা বীরো ঘোরমিন্দ্রজিতো বধম্ ।। ৬.৯২.৫ ।।
92.6
রাবণেস্তু শিরশ্ছিন্নং লক্ষ্মণেন মহাত্মনা।
ন্যবেদয়ত রামায় তদা হৃষ্টো বিভীষণঃ ।। ৬.৯২.৬ ।।
92.7
শ্রুত্বৈতত্তু মহাবীর্যো লক্ষ্মণেনেন্দ্রজিদ্বধম্।
প্রহর্ষমতুলং লেভে রামো বাক্যমুবাচ হ ।। ৬.৯২.৭ ।।
92.8
সাধু লক্ষ্মণ তুষ্টো ঽস্মি কর্মণা সুকৃতং কৃতম্।
রাবণের্হি বিনাশেন জিতমিত্যুপধারয় ।। ৬.৯২.৮ ।।
92.9
স তং শিরস্যুপাঘ্রায় লক্ষ্মণং লক্ষ্মিবর্ধনম্।
লজ্জমানং বলাৎ স্নেহাদঙ্কমারোপ্য বীর্যবান্ ।। ৬.৯২.৯ ।।
92.10
উপবেশ্য তমুত্সঙ্গে পরিষ্বজ্যাবপীডিতম্।
ভ্রাতরং লক্ষ্মণং স্নিগ্ধং পুনঃপুনরুদৈক্ষত ।। ৬.৯২.১০ ।।
92.11
শল্যসম্পীডিতং শস্তং নিশ্বসন্তং তু লক্ষ্মণম্।
রামস্তু দুঃখসন্তপ্তস্তদা নিশ্বসিতো ভৃশম্ ।। ৬.৯২.১১ ।।
92.12
মূর্ধ্নি চৈনমুপাঘ্রায় ভূয়ঃ সংস্পৃশ্য চ ত্বরন্।
উবাচ লক্ষ্মণং বাক্যমাশ্বস্য পুরুষর্ষভঃ ।। ৬.৯২.১২ ।।
92.13
কৃতং পরমকল্যাণং কর্ম দুষ্করকর্মণা।
অদ্য মন্যে হতে পুত্রে রাবণং নিহতং যুধি।অদ্যাহং বিজয়ী শত্রৌ হতে তস্মিন্ দুরাত্মনি ।। ৬.৯২.১৩ ।।
92.14
রাবণস্য নৃশংসস্য দিষ্ট্যা বীর ত্বয়া রণে।
ছিন্নো হি দক্ষিণো বাহুঃ স হি তস্য ব্যাপশ্রয়ঃ ।। ৬.৯২.১৪ ।।
92.15
বিভীষণহনূমদ্ভয়াং কৃতং কর্ম মহদ্রণে।
অহোরাত্রৈস্ত্রিভির্বীরঃ কথঞ্চিদ্বিনিপাতিতঃ ।। ৬.৯২.১৫ ।।
92.16
নিরমিত্রঃ কৃতো ঽস্ম্যদ্য নির্যাস্যতি হি রাবণঃ।
বলব্যূহেন মহতা শ্রুত্বা পুত্রং নিপাতিতম্ ।। ৬.৯২.১৬ ।।
92.17
তং পুত্রবধসন্তপ্তং নির্যান্তং রাক্ষসাধিপম্।
বলেনাবৃত্য মহতা নিহনিষ্যামি দুর্জয়ম্ ।। ৬.৯২.১৭ ।।
92.18
ত্বয়া লক্ষ্মণ নাথেন সীতা চ পৃথিবী চ মে।
ন দুষ্প্রাপা হতে ত্বদ্য শক্রজেতরি চাহবে ।। ৬.৯২.১৮ ।।
92.19
স তং ভ্রাতরমাশ্বাস্য পরিষ্বজ্য চ রাঘবঃ।
রামঃ সুষেণং মুদিতঃ সমাভাষ্যেদমব্রবীৎ ।। ৬.৯২.১৯ ।।
92.20
সশল্যো ঽয়ং মহাপ্রাজ্ঞ সৌমিত্রির্মিত্রবত্সলঃ।
যথা ভবতি সুস্বস্থস্তথা ত্বং সমুপাচর ।। ৬.৯২.২০ ।।
92.21
বিশল্যঃ ক্রিয়তাং ক্ষিপ্রং সৌমিত্রিঃ সবিভীষণঃ।
ঋক্ষবানরসৈন্যানাং শূরাণাং দ্রুময়োধিনাম্ ।। ৬.৯২.২১ ।।
92.22
যে চাপ্যন্যে ঽত্র যুধ্যন্তি সশল্যা ব্রণিনস্তথা।
তে ঽপি সর্বে প্রয়ত্নেন ক্রিয়ন্তাং সুখিনস্ত্বয়া ।। ৬.৯২.২২ ।।
92.23
এবমুক্তস্তু রামেণ মহাত্মা হরিয়ূথপঃ।
লক্ষ্মণায় দদৌ নস্তঃ সুষেণঃ পরমৌষধিম্ ।। ৬.৯২.২৩ ।।
92.24
স তস্যা গন্ধমাঘ্রায় বিশল্যঃ সমপদ্যত।
তথা নির্বেদনশ্চৈব সংরূঢব্রণ এব চ ।। ৬.৯২.২৪ ।।
92.25
বিভীষণমুখানাং চ সুহৃদাং রাঘবাজ্ঞয়া।
সর্ববানরমুখ্যানাং চিকিত্সাং স তদা ঽকরোৎ ।। ৬.৯২.২৫ ।।
92.26
ততঃ প্রকৃতিমাপন্নো হৃতশল্যো গতব্যথঃ।
সৌমিত্রির্মুদিতস্তত্র ক্ষণেন বিগতজ্বরঃ ।। ৬.৯২.২৬ ।।
92.27
তথৈব রামঃ প্লবগাধিপস্তদা বিভীষণশ্চর্ক্ষপতিশ্চ জাম্ববান্।
অবেক্ষ্য সৌমিত্রিমরোগমুত্থিতং মুদা সসৈন্যাঃ সুচিরং জহর্ষিরে ।। ৬.৯২.২৭ ।।
92.28
অপূজয়ৎ কর্ম স লক্ষ্মণস্য সুদুষ্করং দাশরথির্মহাত্মা।
হৃষ্টা বভূবুর্যুধি যূথপেন্দ্রা নিপাতিতং শক্রজিতং নিশম্য ।। ৬.৯২.২৮ ।।
92.29
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে দ্বিনবতিতমঃ সর্গঃ ।
। ৯২ ।।