Utshovসর্গ 91
91.1
স হতাশ্বো মহাতেজা ভূমৌ তিষ্ঠন্নিশাচরঃ।
ইন্দ্রজিৎ পরমক্রুদ্ধঃ সম্প্রজজ্বাল তেজসা ।। ৬.৯১.১ ।।
91.2
তৌ ধন্বিনৌ জিঘাংসন্তাবন্যোন্যমিষুভির্ভৃশম্।
বিজয়েনাভিনিষ্ক্রান্তৌ বনে গজবৃষাবিব ।। ৬.৯১.২ ।।
91.3
নিবর্হয়ন্তশ্চান্যোন্যং তে রাক্ষসবনৌকসঃ।
ভর্তারং ন জহুর্যুদ্ধে সম্পতন্তস্ততস্ততঃ ।। ৬.৯১.৩ ।।
91.4
ততস্তান্ রাক্ষসান্ সর্বান্ হর্ষয়ন্ রাবণাত্মজঃ।
স্তুবানো হর্ষমাণশ্চ ইদং বচনমব্রবীৎ ।। ৬.৯১.৪ ।।
91.5
তমসা বহুলেনেমাঃ সংসক্তাঃ সর্বতো দিশঃ।
নেহ বিজ্ঞায়তে স্বো বা পরো বা রাক্ষসোত্তমাঃ ।। ৬.৯১.৫ ।।
91.6
ধৃষ্টং ভবন্তো যুধ্যন্তু হরীণাং মোহনায় বৈ।
অহং তু রথমাস্থায় আগমিষ্যামি সংয়ুগম্ ।। ৬.৯১.৬ ।।
91.7
তথা ভবন্তঃ কুর্বন্তু যথেমে কাননৌকসঃ।
ন যুদ্ধ্যেয়ুর্দুরাত্মানঃ প্রবিষ্টে নগরং ময়ি ।। ৬.৯১.৭ ।।
91.8
ইত্যুক্ত্বা রাবণসুতো বঞ্চয়িত্বা বনৌকসঃ।
প্রবিবেশ পুরীং লঙ্কাং রথহেতোরমিত্রহা ।। ৬.৯১.৮ ।।
91.9
স রথং ভূষয়িত্বা তু রুচিরং হেমভূষিতম্।
প্রাসাসিশতসম্পূর্ণং যুক্তং পরমবাজিভিঃ ।। ৬.৯১.৯ ।।
91.10
অধিষ্ঠিতং হয়জ্ঞেন সূতেনাপ্তোপদেশিনা।
আরুরোহ মহাতেজা রাবণিঃ সমিতিঞ্জয়ঃ ।। ৬.৯১.১০ ।।
91.11
স রাক্ষসগণৈর্মুখ্যৈর্বৃতো মন্দোদরীসুতঃ।
নির্যয়ৌ নগরাত্তূর্ণং কৃতান্তবলচোদিতঃ ।। ৬.৯১.১১ ।।
91.12
সো ঽভিনিষ্ক্রম্য নগরাদিন্দ্রজিৎ পরবীরহা।
আভ্যয়াজ্জবনৈরশ্বৈর্লক্ষ্মণং সবিভীষণম্ ।। ৬.৯১.১২ ।।
91.13
ততো রথস্তমালোক্য সৌমিত্রী রাবণাত্মজম্।
বানরাশ্চ মহাবীর্যা রাক্ষসশ্চ বিভীষণঃ।বিস্ময়ং পরমং জগ্মুর্লাঘবাত্তস্য ধীমতঃ ।। ৬.৯১.১৩ ।।
91.14
রাবণিশ্চাপি সঙ্ক্রুদ্ধো রণে বানরয়ূথপান্।
পাতয়ামাস বাণৌঘৈঃ শতশো ঽথ সহস্রশঃ ।। ৬.৯১.১৪ ।।
91.15
স মণ্ডলীকৃতধনূ রাবণিঃ সমিতিঞ্জয়ঃ।
হরীনভ্যহনৎ ক্রুদ্ধঃ পরং লাঘবমাস্থিতঃ ।। ৬.৯১.১৫ ।।
91.16
তে বধ্যমানা হরয়ো নারাচৈর্ভীমবিক্রমাঃ।
সৌমিত্রিং শরণং প্রাপ্তাঃ প্রজাপতিমিব প্রজাঃ ।। ৬.৯১.১৬ ।।
91.17
ততঃ সমরকোপেন জ্বলিতো রঘুনন্দনঃ।
চিচ্ছেদ কার্মুকং তস্য দর্শয়ন্ পাণিলাঘবম্ ।। ৬.৯১.১৭ ।।
91.18
সো ঽন্যৎ কার্মুকমাদয় সজ্যং চক্রে ত্বরন্নিব।
তদপ্যস্য ত্রিভির্বাণৈর্লক্ষ্মণো নিরকৃন্তত ।। ৬.৯১.১৮ ।।
91.19
অথৈনং ছিন্নধন্বানমাশীবিষবিষোপমৈঃ।
বিব্যাধোরসি সৌমিত্রী রাবণিং পঞ্চভিঃ শরৈঃ ।। ৬.৯১.১৯ ।।
91.20
তে তস্য কায়ং নির্ভিদ্য মহাকার্মুকনিস্সৃতাঃ।
নিপেতুর্ধরণীং বাণা রক্তা ইব মহোরগাঃ ।। ৬.৯১.২০ ।।
91.21
স ভিন্নবর্মা রুধিরং বমন্ বক্ত্রেণ রাবণিঃ।
জগ্রাহ কার্মুকশ্রেষ্ঠং দৃঢজ্যং বলবত্তরম্ ।। ৬.৯১.২১ ।।
91.22
স লক্ষ্মণং সমুদ্দিশ্য পরং লাঘবমাস্থিতঃ।
ববর্ষ শরবর্ষাণি বর্ষাণীব পুরন্দরঃ ।। ৬.৯১.২২ ।।
91.23
মুক্তমিন্দ্রজিতা তত্তু শরবর্ষমরিন্দমঃ।
অবারয়দসম্ভ্রান্তো লক্ষ্মণঃ সুদুরাসদম্ ।। ৬.৯১.২৩ ।।
91.24
দর্শয়ামাস চ তদা রাবণিং রঘুনন্দনঃ।
অসম্ভ্রান্তো মহাতেজাস্তদদ্ভুতমিবাভবৎ ।। ৬.৯১.২৪ ।।
91.25
ততস্তান্ রাক্ষসান্ সর্বাংস্ত্রিভিরেকৈকমাহবে ।
। ৬.৯১.২৫ ।।
91.26
অবিধ্যৎ পরমক্রুদ্ধঃ শীঘ্রাস্ত্রং সম্প্রদর্শয়ন্।
রাক্ষসেন্দ্রসুতং চাপি বাণৌঘৈঃ সমতাডয়ৎ ।। ৬.৯১.২৬ ।।
91.27
সো ঽতিবিদ্ধো বলবতা শত্রুণা শত্রুঘাতিনা।
অসক্তং প্রেষয়ামাস লক্ষ্মণায় বহূন্ শরান্ ।। ৬.৯১.২৭ ।।
91.28
তানপ্রাপ্তান্ শিতৈর্বাণৈশ্চিচ্ছেদ রঘুনন্দনঃ।
সারথেরস্য চ রণে রথিনো রথসত্তমঃ।শিরো জহার ধর্মাত্মা ভল্লেনানতপর্বণা ।। ৬.৯১.২৮ ।।
91.29
অসূতাস্তে হয়াস্তত্র রথমূহুরবিক্লবাঃ।
মণ্ডলান্যভিধাবন্তস্তদদ্ভুতমিবাভবৎ ।। ৬.৯১.২৯ ।।
91.30
অমর্ষবশমাপন্নঃ সৌমিত্রির্দ্দঢবিক্রমঃ।
প্রত্যবিদ্ধ্যদ্ধয়াংস্তস্য শরৈর্বিত্রাসয়ন্ রণে ।। ৬.৯১.৩০ ।।
91.31
অমৃষ্যমাণস্তত্কর্ম রাবণস্য সুতো বলী।
বিব্যাধ দশভির্বাণৈঃ সৌমিত্রিং তমমর্ষণম্ ।। ৬.৯১.৩১ ।।
91.32
তে তস্য বজ্রপ্রতিমাঃ শরাঃ সর্পবিষোপমাঃ।
বিলয়ং জগ্মুরাহত্য কবচং কাঞ্চনপ্রভম্ ।। ৬.৯১.৩২ ।।
91.33
অভেদ্যকবচং মত্বা লক্ষ্মণং রাবণাত্মজঃ।
ললাটে লক্ষ্মণং বাণৈঃ সুপুঙ্খৈস্ত্রিভিরিন্দ্রজিৎ।অবিধ্যৎ পরমক্রুদ্ধঃ শীঘ্রাস্ত্রং চ প্রদর্শয়ন্ ।। ৬.৯১.৩৩ ।।
91.34
তৈঃ পৃষত্কৈর্ললাটস্থৈঃ শুশুভে রঘুনন্দনঃ।
রণাগ্রে সমরশ্লাঘী ত্রিশৃঙ্গ ইব পর্বতঃ ।। ৬.৯১.৩৪ ।।
91.35
স তথা হ্যর্দিতো বাণৈ রাক্ষসেন মহামৃধে।
তমাশু প্রতিবিব্যাধ লক্ষ্মণঃ পঞ্চভিঃ শরৈঃ।বিকৃষ্যেন্দ্রজিতো যুদ্ধে বদনে শুভকুণ্ডলে ।। ৬.৯১.৩৫ ।।
91.36
লক্ষ্মণেন্দ্রজিতৌ বীরৌ মহাবলশরাসনৌ।
অন্যোন্যং জঘ্নতুর্বাণৈর্বিশিখৈর্ভীমবিক্রমৌ ।। ৬.৯১.৩৬ ।।
91.37
ততঃ শোণিতদিগ্ধাঙ্গৌ লক্ষ্মণেন্দ্রজিতাবুভৌ।
রণে তৌ রেজতুর্বীরৌ পুষ্পিতাবিব কিংশুকৌ ।। ৬.৯১.৩৭ ।।
91.38
তৌ পরস্পরমভ্যেত্য সর্বগাত্রেষু ধন্বিনৌ।
ঘোরৈর্বিব্যধতুর্বাণৈঃ কৃতভাবাবুভৌ জয়ে ।। ৬.৯১.৩৮ ।।
91.39
ততঃ সমরকোপেন সংয়ুক্তো রাবণাত্মজঃ।
বিভীষণং ত্রিভির্বাণৈর্বিব্যাধ বদনে শুভে ।। ৬.৯১.৩৯ ।।
91.40
অয়োমুখৈস্ত্রির্ভির্বিদ্ধ্বা রাক্ষসেন্দ্রং বিভীষণম্।
একৈকেনাভিবিব্যাধ তান্ সর্বান্ হরিয়ূথপান্ ।। ৬.৯১.৪০ ।।
91.41
তস্মৈ দৃঢতরং ক্রুদ্ধো জঘান গদয়া হয়ান্।
বিভীষণো মহাতেজা রাবণেঃ স দুরাত্মনঃ ।। ৬.৯১.৪১ ।।
91.42
স হতাশ্বাদবপ্লুত্য রথান্নিহতসারথেঃ।
রথশক্তিং মহাতেজাঃ পিতৃব্যায় মুমোচ হ ।। ৬.৯১.৪২ ।।
91.43
তামাপতন্তীং সম্প্রেক্ষ্য সুমিত্রানন্দবর্ধনঃ।
চিচ্ছেদ নিশিতৈর্বাণৈর্দশধা সা ঽপতদ্ভুবি ।। ৬.৯১.৪৩ ।।
91.44
তস্মৈ দৃঢধনুঃ ক্রুদ্ধো হতাশ্বায় বিভীষণঃ।
বজ্রস্পর্শসমান্ পঞ্চ সসর্জোরসি মার্গণান্ ।। ৬.৯১.৪৪ ।।
91.45
তে তস্য কায়ং নির্ভিদ্য রুক্মপুঙ্খা নিমিত্তগাঃ।
বভূবুর্লোহিতাদিগ্ধা রক্তা ইব মহোরগাঃ ।। ৬.৯১.৪৫ ।।
91.46
স পিতৃব্যায় সঙ্ক্রুদ্ধ ইন্দ্রজিচ্ছরমাদদে।
উত্তমং রক্ষসাং মধ্যে যমদত্তং মহাবলঃ ।। ৬.৯১.৪৬ ।।
91.47
তং সমীক্ষ্য মহাতেজা মহেষুং তেন সংহিতম্।
লক্ষ্মণো ঽপ্যাদদে বাণমন্যং ভীমপরাক্রমঃ ।। ৬.৯১.৪৭ ।।
91.48
কুবেরেণ স্বয়ং স্বপ্নে স্বস্মৈ দত্তং মহাত্মনা।
দুর্জয়ং দুর্বিষহ্যং চ সেন্দ্রৈরপি সুরাসুরৈঃ ।। ৬.৯১.৪৮ ।।
91.49
তয়োস্তে ধনুষী শ্রেষ্ঠে বাহুভিঃ পরিঘোপমৈঃ।
বিকৃষ্যমাণে বলবৎ ক্রৌঞ্চাবিব চুকূজতুঃ ।। ৬.৯১.৪৯ ।।
91.50
তাভ্যাং তৌ ধনুষি শ্রেষ্ঠে সংহিতৌ সায়কোত্তমৌ।
বিকৃষ্যমাণৌ বীরাভ্যাং ভৃশং জজ্বলতুঃ শ্রিয়া ।। ৬.৯১.৫০ ।।
91.51
তৌ ভাসয়ন্তাবাকাশং ধনুর্ভ্যাং বিশিখৌ চ্যুতৌ।
মুখেন মুখমাহত্য সন্নিপেততুরোজসা ।। ৬.৯১.৫১ ।।
91.52
সন্নিপাতস্তয়োরাসীচ্ছরয়োর্ঘোররূপয়োঃ।
সধূমবিস্ফুলিঙ্গশ্চ তজ্জো ঽগ্নির্দারুণো ঽভবৎ ।। ৬.৯১.৫২ ।।
91.53
তৌ মহাগ্রহসঙ্কাশাবন্যোন্যং সন্নিপত্য চ।
সঙ্গ্রামে শতধা যান্তৌ মেদিন্যাং বিনিপেততুঃ ।। ৬.৯১.৫৩ ।।
91.54
শরৌ প্রতিহতৌ দৃষ্ট্বা তাবুভৌ রণমূর্ধনি।
ব্রীডিতৌ জাতরোষৌ চ লক্ষ্মণেন্দ্রজিতৌ তদা ।। ৬.৯১.৫৪ ।।
91.55
সুসংরব্ধস্তু সৌমিত্রিরস্ত্রং বারুণমাদদে ।
। ৬.৯১.৫৫ ।।
91.56
রৌদ্রং মহেন্দ্রজিদ্যুদ্ধে ব্যসৃজদ্যুধি নিষ্ঠিতঃ।
তেন তদ্বিহতং ত্বস্ত্রং বারুণং পরমাদ্ভুতম্ ।। ৬.৯১.৫৬ ।।
91.57
ততঃ ক্রুদ্ধো মহাতেজা ইন্দ্রজিৎ সমিতিঞ্জয়ঃ।
আগ্নেয়ং সন্দধে দীপ্তং স লোকং সঙ্ক্ষিপন্নিব ।। ৬.৯১.৫৭ ।।
91.58
সৌরেণাস্ত্রেণ তদ্বীরো লক্ষ্মণঃ প্রত্যবারয়ৎ ।
। ৬.৯১.৫৮ ।।
91.59
অস্ত্রং নিবারিতং দৃষ্ট্বা রাবণিঃ ক্রোধমূর্চ্ছিতঃ।
আসুরং শত্রুনাশায় ঘোরমস্ত্রং সমাদদে ।। ৬.৯১.৫৯ ।।
91.60
তস্মাচ্চাপাদ্বিনিষ্পেতুর্ভাস্বরাঃ কূটমুদ্গরাঃ।
শূলানি চ ভুশুণ্ড্যশ্চ গদাঃ খড্গাঃ পরশ্বধাঃ ।। ৬.৯১.৬০ ।।
91.61
তদ্দৃষ্ট্বা লক্ষ্মণঃ সঙ্খ্যে ঘোরমস্ত্রমথাসুরম্।
অবার্যং সর্বভূতানাং সর্বশত্রুবিনাশনম্।মাহেশ্বরেণ দ্যুতিমাংস্তদস্ত্রং প্রত্যবারয়ৎ ।। ৬.৯১.৬১ ।।
91.62
তয়োঃ সুতুমুলং যুদ্ধং সম্বভূবাদ্ভুতোপমম্।
গগনস্থানি ভূতানি লক্ষ্মণং পর্যবারয়ন্ ।। ৬.৯১.৬২ ।।
91.63
ভৈরবাভিরুতে ভীমে যুদ্ধে বানররক্ষসাম্।
ভূতৈর্বহুভিরাকাশং বিস্মিতৈরাবৃতং বভৌ ।। ৬.৯১.৬৩ ।।
91.64
ঋষয়ঃ পিতরো দেবা গন্ধর্বা গরুডোরগাঃ।
শতক্রতুং পুরস্কৃত্য ররক্ষুর্লক্ষ্মণং রণে ।। ৬.৯১.৬৪ ।।
91.65
অথান্যং মার্গণশ্রেষ্ঠং সন্দধে রাঘবানুজঃ।
হুতাশনসমস্পর্শং রাবণাত্মজদারণম্ ।। ৬.৯১.৬৫ ।।
91.66
সুপত্রমনুবৃত্তাঙ্গং সুপর্বাণং সুসংস্থিতম্।
সুবর্ণবিকৃতং বীরঃ শরীরান্তকরং শরম্ ।। ৬.৯১.৬৬ ।।
91.67
দুরাবারং দুর্বিষহ্যং রাক্ষসানাং ভয়াবহম্।
আশীবিষবিষপ্রখ্যং দেবসঙ্ঘৈঃ সমর্চিতম্ ।। ৬.৯১.৬৭ ।।
91.68
যেন শক্রো মহাতেজা দানবানজয়ৎ প্রভুঃ।
পুরা দৈবাসুরে যুদ্ধে বীর্যবান্ হরিবাহনঃ ।। ৬.৯১.৬৮ ।।
91.69
তদৈন্দ্রমস্ত্রং সৌমিত্রিঃ সংয়ুগেষ্বপরাজিতম্।
শরশ্রেষ্ঠং ধনুঃ শ্রেষ্ঠে নরশ্রেষ্ঠো ঽভিসন্দধে ।। ৬.৯১.৬৯ ।।
91.70
সন্ধায়ামিত্রদলনং বিচকর্ষ শরাসনম্।
সজ্যমায়ম্য দুর্ধর্ষং কালো লোকক্ষয়ে যথা ।। ৬.৯১.৭০ ।।
91.71
সন্ধায় ধনুষি শ্রেষ্ঠে বিকর্ষন্নিদমব্রবীৎ।
লক্ষ্মীবাঁল্লক্ষ্মণো বাক্যমর্থসাধকমাত্মনঃ ।। ৬.৯১.৭১ ।।
91.72
ধর্মাত্মা সত্যসন্ধশ্চ রামো দাশরথির্যদি।
পৌরুষে চাপ্রতিদ্বন্দ্বঃ শরৈনং জহি রাবণিম্ ।। ৬.৯১.৭২ ।।
91.73
ইত্যুক্ত্বা বাণমাকর্ণং বিকৃষ্য তমজিহ্মগম্।
লক্ষ্মণঃ সমরে বীরঃ সসর্জেন্দ্রজিতং প্রতি।ঐন্দ্রাস্ত্রেণ সমায়োজ্য লক্ষ্মণঃ পরবীরহা ।। ৬.৯১.৭৩ ।।
91.74
স শিরঃ সশিরস্ত্রাণং শ্রীমজ্জ্বলিতকুণ্ডলম্।
প্রমথ্যেন্দ্রজিতঃ কায়াৎ পাতয়ামাস ভূতলে ।। ৬.৯১.৭৪ ।।
91.75
তদ্রাক্ষসতনূজস্য ছিন্নস্কন্ধং শিরো মহৎ।
তপনীয়নিভং ভূমৌ দদৃশে রুধিরোক্ষিতম্ ।। ৬.৯১.৭৫ ।।
91.76
হতস্তু নিপপাতাশু ধরণ্যাং রাবণাত্মজঃ।
কবচী সশিরস্ত্রাণো বিধ্বস্তঃ সশরাসনঃ ।। ৬.৯১.৭৬ ।।
91.77
চুক্রুশুস্তে ততঃ সর্বে বানরাঃ সবিভীষণাঃ।
হৃষ্যন্তো নিহতে তস্মিন্ দেবা বৃত্রবধে যথা ।। ৬.৯১.৭৭ ।।
91.78
অথান্তরিক্ষে দেবানামৃষীণাং চ মহাত্মনাম্।
অভিজজ্ঞে চ সন্নাদো গন্ধর্বাপ্সরসামপি ।। ৬.৯১.৭৮ ।।
91.79
পতিতং তমভিজ্ঞায় রাক্ষসী সা মহাচমূঃ।
বধ্যমানা দিশো ভেজে হরিভির্জিতকাশিভিঃ ।। ৬.৯১.৭৯ ।।
91.80
বানরৈর্বধ্যমানাস্তে শস্ত্রাণ্যুত্সৃজ্য রাক্ষসাঃ।
লঙ্কামভিমুখাঃ সস্ত্রুর্নষ্টসঞ্জ্ঞাঃ প্রধাবিতাঃ ।। ৬.৯১.৮০ ।।
91.81
দুদ্রুবুর্বহুধা ভীতা রাক্ষসাঃ শতশো দিশঃ।
ত্যক্ত্বা প্রহরণান্ সর্বে পট্টিশাসিপরশ্বধান্ ।। ৬.৯১.৮১ ।।
91.82
কেচিল্লঙ্কাং পরিত্রস্তাঃ প্রবিষ্টা বানরার্দিতাঃ।
সমুদ্রে পতিতাঃ কেচিৎ কেচিৎ পর্বতমাশ্রিতাঃ ।। ৬.৯১.৮২ ।।
91.83
হতমিন্দ্রজিতং দৃষ্ট্বা শয়ানং সমরক্ষিতৌ।
রাক্ষসানাং সহস্রেষু ন কশ্চিৎ প্রত্যদৃশ্যত ।। ৬.৯১.৮৩ ।।
91.84
যথা ঽস্তং গত আদিত্যে নাবতিষ্ঠন্তি রশ্ময়ঃ।
তথা তস্মিন্নিপতিতে রাক্ষসাস্তে গতা দিশঃ ।। ৬.৯১.৮৪ ।।
91.85
শান্তরশ্মিরিবাদিত্যো নির্বাণ ইব পাবকঃ।
স বভূব মহাতেজা ব্যপাস্তগতজীবিতঃ ।। ৬.৯১.৮৫ ।।
91.86
প্রশান্তপীডাবহুলো নষ্টারিষ্টঃ প্রতাপবান্।
বভূব লোকঃ পতিতে রাক্ষসেন্দ্রসুতে তদা ।। ৬.৯১.৮৬ ।।
91.87
হর্ষং চ শক্রো ভগবান্ সহ সর্বৈঃ সুরর্ষভৈঃ।
জগাম নিহতে তস্মিন্ রাক্ষসে পাপকর্মণি ।। ৬.৯১.৮৭ ।।
91.88
আকাশে চাপি দেবানাং শুশ্রুবে দুন্দুভিস্বনঃ ।
। ৬.৯১.৮৮ ।।
91.89
নৃত্যদ্ভিরপ্সরোভিশ্চ গন্ধর্বৈশ্চ মহাত্মভিঃ ।
। ৬.৯১.৮৯ ।।
91.90
ববৃষুঃ পুষ্পবর্ষাণি তদদ্ভুতমভূত্তদা।
প্রশশংসুর্হতে তস্মিন্ রাক্ষসে ক্রূরকর্মণি ।। ৬.৯১.৯০ ।।
91.91
শুদ্ধা আপো দিশশ্চৈব জহৃষুর্দৈত্যদানবাঃ ।
। ৬.৯১.৯১ ।।
91.92
আজগ্মুঃ পতিতে তস্মিন্ সর্বলোকভয়াবহে।
ঊচুশ্চ সহিতাঃ সর্বে দেবগন্ধর্বদানবাঃ।বিজ্বরাঃ শান্তকলুষা ব্রাহ্মণা বিচরন্ত্বিতি ।। ৬.৯১.৯২ ।।
91.93
ততো ঽভ্যনন্দন্ সংহৃষ্টাঃ সমরে হরিয়ূথপাঃ।
তমপ্রতিবলং দৃষ্ট্বা হতং নৈর্ঋতপুঙ্গবম্ ।। ৬.৯১.৯৩ ।।
91.94
বিভীষণো হনূমাংশ্চ জাম্ববাংশ্চর্ক্ষয়ূথপঃ।
বিজয়েনাভিনন্দন্তস্তুষ্টুবুশ্চাপি লক্ষ্মণম্ ।। ৬.৯১.৯৪ ।।
91.95
ক্ষ্বেলন্তশ্চ নদন্তশ্চ গর্জন্তশ্চ প্লবঙ্গমাঃ।
লব্ধলক্ষা রঘুসুতং পরিবার্যোপতস্থিরে ।। ৬.৯১.৯৫ ।।
91.96
লাঙ্গূলানি প্রবিধ্যন্তঃ স্ফোটয়ন্তশ্চ বানরাঃ।
লক্ষ্মণো জয়তীত্যেবং বাক্যং বিশ্রাবয়ংস্তদা ।। ৬.৯১.৯৬ ।।
91.97
অন্যোন্যং চ সমাশ্লিষ্য কপয়ো হৃষ্টমানসাঃ।
চক্রুরুচ্চাবচগুণা রাঘবাশ্রয়জাঃ কথাঃ ।। ৬.৯১.৯৭ ।।
91.98
তদসুকরমথাভিবীক্ষ্য হৃষ্টাঃ প্রিয়সুহৃদো যুধি লক্ষ্মণস্য কর্ম।
পরমমুপলভন্ মনঃ প্রহর্ষং বিনিহতমিন্দ্ররিপুং নিশম্য দেবাঃ ।। ৬.৯১.৯৮ ।।
91.99
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে একনবতিতমঃ সর্গঃ ।
। ৯১ ।।