Utshovসর্গ 90
90.1
যুধ্যমানৌ তু তৌ দৃষ্ট্বা প্রসক্তৌ নরাক্ষসৌ।
প্রভিন্নাবিব মাতঙ্গৌ পরস্পরবধৈষিণৌ ।। ৬.৯০.১ ।।
90.2
তৌ দ্রষ্টুকামঃ সঙ্গ্রামে পরস্পরগতৌ বলী।
শূরঃ স রাবণভ্রাতা তস্থৌ সঙ্গ্রামমূর্ধনি ।। ৬.৯০.২ ।।
90.3
ততো বিস্ফারয়ামাস মহদ্ধনুরবস্থিতঃ।
উত্সসর্জ চ তীক্ষ্ণাগ্রান্ রাক্ষসেষু মহাশরান্ ।। ৬.৯০.৩ ।।
90.4
তে শরাঃ শিখিসঙ্কাশা নিপতন্তঃ সমাহিতাঃ।
রাক্ষসান্ দারয়ামাসুর্বজ্রাণীব মহাগিরীন্ ।। ৬.৯০.৪ ।।
90.5
বিভীষণস্যানুচরাস্তে ঽপি শূলাসিপট্টিশৈঃ।
চিচ্ছিদুঃ সমরে বীরান্ রাক্ষসান্ রাক্ষসোত্তমাঃ ।। ৬.৯০.৫ ।।
90.6
রাক্ষসৈস্তৈঃ পরিবৃতঃ স তদা তু বিভীষণঃ।
বভৌ মধ্যে প্রহৃষ্টানাং কলভানামিব দ্বিপঃ ।। ৬.৯০.৬ ।।
90.7
ততঃ সঞ্চোদয়ানো বৈ হরীন্ রক্ষো রণপ্রিয়ান্।
উবাচ বচনং কালে কালজ্ঞো রক্ষসাং বরঃ ।। ৬.৯০.৭ ।।
90.8
একো ঽয়ং রাক্ষসেন্দ্রস্য পরায়ণমিব স্থিতঃ।
এতচ্ছেষং বলং তস্য কিং তিষ্ঠত হরীশ্বরাঃ ।। ৬.৯০.৮ ।।
90.9
অস্মিন্ বিনিহতে পাপে রাক্ষসে রণমূর্ধনি।
রাবণং বর্জয়িত্বা তু শেষমস্য হতং বলম্ ।। ৬.৯০.৯ ।।
90.10
প্রহস্তো নিহতো বীরো নিকুম্ভশ্চ মহাবলঃ।
কুম্ভকর্ণশ্চ কুম্ভশ্চ ধূম্রাক্ষশ্চ নিশাচরঃ ।। ৬.৯০.১০ ।।
90.11
জম্বুমালী মহামালী তীক্ষ্ণবেগো ঽশনিপ্রভঃ।
সুপ্তঘ্নো যজ্ঞকোপশ্চ বজ্রদংষ্ট্রশ্চ রাক্ষসঃ ।। ৬.৯০.১১ ।।
90.12
সংহ্রাদী বিকটো নিঘ্নস্তপনো দম এব চ।
প্রঘাসঃ প্রঘসশ্চৈব প্রজঙ্ঘো জঙ্ঘ এব চ ।। ৬.৯০.১২ ।।
90.13
অগ্নিকেতুশ্চ দুর্ধর্ষো রশ্মিকেতুশ্চ বীর্যবান্।
বিদ্যুজ্জিহ্বো দ্বিজিহ্বশ্চ সূর্যশত্রুশ্চ রাক্ষসঃ ।। ৬.৯০.১৩ ।।
90.14
অকম্পনঃ সুপার্শ্বশ্চ চক্রমালী চ রাক্ষসঃ।
কম্পনঃ সত্ত্ববন্তৌ তৌ দেবান্তকনরান্তকৌ ।। ৬.৯০.১৪ ।।
90.15
এতান্নিহত্যাতিবলান্ বহূন্ রাক্ষসসত্তমান্।
বাহুভ্যাং সাগরং তীর্ত্বা লঙ্ঘ্যতাং গোষ্পদং লঘু ।। ৬.৯০.১৫ ।।
90.16
এতাবদেব শেষং বো জেতব্যমিহ বানরাঃ।
হতাঃ সর্বে সমাগম্য রাক্ষসা বলদর্পিতাঃ ।। ৬.৯০.১৬ ।।
90.17
অয়ুক্তং নিধনং কর্তুং পুত্রস্য জনিতুর্মম।
ঘৃণামপাস্য রামার্থে নিহন্যাং ভ্রাতুরাত্মজম্ ।। ৬.৯০.১৭ ।।
90.18
হন্তুকামস্য মে বাষ্পং চক্ষুশ্চৈব নিরুদ্ধ্যতি।
তমেবৈষ মহাবাহুর্লক্ষ্মণঃ শময়িষ্যতি।বানরা ঘ্নত সম্ভূয় ভৃত্যানস্য সমীপগান্ ।। ৬.৯০.১৮ ।।
90.19
ইতি তেনাতিয়শসা রাক্ষসেনাভিচোদিতাঃ।
বানরেন্দ্রা জহৃষিরে লাঙ্গূলানি চ বিব্যধুঃ ।। ৬.৯০.১৯ ।।
90.20
ততস্তে কপিশার্দূলাঃ ক্ষ্বেলন্তশ্চ মুহুর্মুহুঃ।
মুমুচুর্বিবিধান্নাদান্ মেঘান্ দৃষ্ট্বেব বর্হিণঃ ।। ৬.৯০.২০ ।।
90.21
জাম্ববানপি তৈঃ সর্বৈঃ স্বয়ূথৈরপি সংবৃতঃ।
অশ্মভিস্তাডয়ামাস নখৈর্দন্তৈশ্চ রাক্ষসান্ ।। ৬.৯০.২১ ।।
90.22
নিঘ্নন্তমৃক্ষাধিপতিং রাক্ষসাস্তে মহাবলাঃ।
পরিবব্রুভয়ং ত্যক্ত্বা তমনেকবিধায়ুধাঃ ।। ৬.৯০.২২ ।।
90.23
শরৈঃ পরশুভিস্তীক্ষ্ণৈঃ পট্টিশৈর্যষ্টিতোমরৈঃ।
জাম্ববন্তং মৃধে জঘ্নুর্নিঘ্নন্তং রাক্ষসীং চমূম্ ।। ৬.৯০.২৩ ।।
90.24
স সম্প্রহারস্তুমুলঃ সঞ্জজ্ঞে কপিরক্ষসাম্।
দেবাসুরাণাং ক্রুদ্ধানাং যথা ভীমো মহাস্বনঃ ।। ৬.৯০.২৪ ।।
90.25
হনুমানপি সঙ্ক্রুদ্ধঃ সালমুত্পাট্য বীর্যবান্।
রক্ষসাং কদনং চক্রে সমাসাদ্য সহস্রশঃ ।। ৬.৯০.২৫ ।।
90.26
স দত্ত্বা তুমুলং যুদ্ধং পিতৃব্যস্যেন্দ্রজিদ্যুধি।
লক্ষ্মণং পরবীরঘ্নং পুনরেবাভ্যধাবত ।। ৬.৯০.২৬ ।।
90.27
তৌ প্রয়ুদ্ধৌ তদা বীরৌ মৃধে লক্ষ্মণরাক্ষসৌ।
শরৌঘানভিবর্ষন্তৌ জঘ্নতুস্তৌ পরস্পরম্ ।। ৬.৯০.২৭ ।।
90.28
অভীক্ষ্ণমন্তর্দধতুঃ শরজালৈর্মহাবলৌ।
চন্দ্রাদিত্যাবিবোষ্ণান্তে যথা মেঘৈস্তরস্বিনৌ ।। ৬.৯০.২৮ ।।
90.29
ন হ্যাদানং ন সন্ধানং ধনুষো বা পরিগ্রহঃ।
ন বিপ্রমোক্ষো বাণানাং ন বিকর্ষো ন বিগ্রহঃ ।। ৬.৯০.২৯ ।।
90.30
ন মুষ্টিপ্রতিসন্ধানং ন লক্ষ্যপ্রতিপাদনম্।
অদৃশ্যত তয়োস্তত্র যুধ্যতোঃ পাণিলাঘবাৎ ।। ৬.৯০.৩০ ।।
90.31
চাপবেগবিনির্মুক্তবাণজালৈঃ সমন্ততঃ।
অন্তরিক্ষে হি সঞ্ছন্নে ন রূপাণি চকাশিরে ।। ৬.৯০.৩১ ।।
90.32
লক্ষ্মণো রাবণিং প্রাপ্য রাবণিশ্চাপি লক্ষ্মণম্।
অব্যবস্থা ভবত্যুগ্রা তাভ্যামন্যোন্যবিগ্রহে ।। ৬.৯০.৩২ ।।
90.33
তাভ্যামুভাভ্যাং তরসা বিসৃষ্টৈর্বিশিখৈঃ শিতৈঃ।
নিরন্তরমিবাকাশং বভূব তমসাবৃতম্ ।। ৬.৯০.৩৩ ।।
90.34
তৈঃ পতদ্ভিশ্চ বহুভিস্তয়োঃ শরশতৈঃ শিতৈঃ।
দিশশ্চ প্রদিশশ্চৈব বভূবুঃ শরসঙ্কুলাঃ ।। ৬.৯০.৩৪ ।।
90.35
তমসা সংবৃতং সর্বমাসীদ্ভীমতরং মহৎ।
অস্তং গতে সহস্রাংশৌ সংবৃতং তমসেব হি ।। ৬.৯০.৩৫ ।।
90.36
রুধিরৌঘমহানদ্যঃ প্রাবর্তন্ত সহস্রশঃ।
ক্রব্যাদা দারুণা বাগ্ভিশ্চিক্ষিপুর্ভীমনিস্বনম্ ।। ৬.৯০.৩৬ ।।
90.37
ন তদানীং ববৌ বায়ুর্ন চ জজ্বাল পাবকঃ।
স্বস্ত্যস্তু লোকেভ্য ইতি জজল্পুশ্চ মহর্ষয়ঃ ।। ৬.৯০.৩৭ ।।
90.38
সম্পেতুশ্চাত্র সম্প্রাপ্তা গন্ধর্বাঃ সহ চারণৈঃ ।
। ৬.৯০.৩৮ ।।
90.39
অথ রাক্ষসসিংহস্য কৃষ্ণান্ কনকভূষণান্।
শরৈশ্চতুর্ভিঃ সৌমিত্রির্বিব্যাধ চতুরো হয়ান্ ।। ৬.৯০.৩৯ ।।
90.40
ততো ঽপরেণ ভল্লেন শিতেন নিশিতেন চ।
সম্পূর্ণায়তমুক্তেন সুপত্রেণ সুবর্চসা ।। ৬.৯০.৪০ ।।
90.41
মহেন্দ্রাশনিকল্পেন সুতস্য বিচরিষ্যতঃ।
স তেন বাণাশনিনা তলশব্দানুনাদিনা ।। ৬.৯০.৪১ ।।
90.42
লাঘবাদ্রাঘবঃ শ্রীমান্ শিরঃ কায়াদপাহরৎ ।
। ৬.৯০.৪২ ।।
90.43
স যন্তরি মহাতেজা হতে মন্দোদরীসুতঃ ।
। ৬.৯০.৪৩ ।।
90.44
স্বয়ং সারথ্যমকরোৎ পুনশ্চ ধনুরস্পৃশৎ।
তদদ্ভুতমভূত্তত্র সামর্থ্যং পশ্যতাং যুধি ।। ৬.৯০.৪৪ ।।
90.45
হয়েষু ব্যগ্রহস্তং তং বিব্যাধ নিশিতৈঃ শরৈঃ।
ধনুষ্যথ পুনর্ব্যগ্রে হয়েষু মুমুচে শরান্ ।। ৬.৯০.৪৫ ।।
90.46
ছিদ্রেষু তেষু বাণেষু সৌমিত্রিঃ শীঘ্রবিক্রমঃ।
অর্দয়ামাস বাণৌঘৈর্বিচরন্তমভীতবৎ ।। ৬.৯০.৪৬ ।।
90.47
নিহতং সারথিং দৃষ্ট্বা সমরে রাবণাত্মজঃ।
প্রজহৌ সমরোদ্ধর্ষং বিষণ্ণঃ স বভূব হ ।। ৬.৯০.৪৭ ।।
90.48
বিষণ্ণবদনং দৃষ্ট্বা রাক্ষসং হরিয়ূথপাঃ।
ততঃ পরমসংহৃষ্টা লক্ষ্মণং চাভ্যপূজয়ন্ ।। ৬.৯০.৪৮ ।।
90.49
ততঃ প্রমাথী শরভো রভসো গন্ধমাদনঃ।
অমৃষ্যমাণাশ্চত্বারশ্চক্রুর্বেগং হরীশ্বরাঃ ।। ৬.৯০.৪৯ ।।
90.50
তে চাস্য হয়মুখ্যেষু তূর্ণমুত্প্লুত্য বানরাঃ।
চতুর্ষু সমহাবীর্যা নিপেতুর্ভীমবিক্রমাঃ ।। ৬.৯০.৫০ ।।
90.51
তেষামধিষ্ঠিতানাং তৈর্বানরৈঃ পর্বতোপমৈঃ।
মুখেভ্যো রুধিরং রক্তং হয়ানাং সমবর্তত ।। ৬.৯০.৫১ ।।
90.52
তে হয়া মথিতা ভগ্না ব্যসবো ধরণীং গতাঃ।
তে নিহত্য হয়াংস্তস্য প্রমথ্য চ মহারথম্ ।। ৬.৯০.৫২ ।।
90.53
পুনরুত্পত্য বেগেন তস্থুর্লক্ষ্মণপার্শ্বতঃ।
স হতাশ্বাদবপ্লুত্য রথান্মথিতসারথেঃ।শরবর্ষেণ সৌমিত্রিমভ্যধাবত রাবণিঃ ।। ৬.৯০.৫৩ ।।
90.54
ততো মহেন্দ্রপ্রতিমঃ স লক্ষ্মণঃ পদাতিনং তং নিশিতৈঃ শরোত্তমৈঃ।
সৃজন্তমাজৌ নিশিতান্ শরোত্তমান্ ভৃশং তদা বাণগণৈর্ন্যবারয়ৎ ।। ৬.৯০.৫৪ ।।
90.55
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে নবতিতমঃ সর্গঃ ।
। ৯০ ।।