Utshovসর্গ 88
88.1
বিভীষণবচঃ শ্রুত্বা রাবণিঃ ক্রোধমূর্চ্ছিতঃ।
অব্রবীৎ পরুষং বাক্যং বেগেনাভ্যুত্পপাত হ ।। ৬.৮৮.১ ।।
88.2
উদ্যতায়ুধনিস্ত্রিংশো রথে সুসমলঙ্কৃতে।
কালাশ্বয়ুক্তে মহতি স্থিতঃ কালান্তকোপমঃ ।। ৬.৮৮.২ ।।
88.3
মহাপ্রমাণমুদ্যম্য বিপুলং বেগবদ্দৃঢম্।
ধনুর্ভীমং পরামৃশ্য শরাংশ্চামিত্রশাতনান্ ।। ৬.৮৮.৩ ।।
88.4
তং দদর্শ মহেষ্বাসো রথে সুসমলঙ্কৃতঃ।
অলঙ্কৃতমমিত্রঘ্নং রাঘবস্যানুজং বলী।হনুমত্পৃষ্ঠমাসীনমুদয়স্থরবিপ্রভম্ ।। ৬.৮৮.৪ ।।
88.5
উবাচৈনং সমারব্ধঃ সৌমিত্রিং সবিভীষণম্।
তাংশ্চ বানরশার্দূলান্ পশ্যধ্বং মে পরাক্রমম্ ।। ৬.৮৮.৫ ।।
88.6
অদ্য মত্কার্মুকোত্সৃষ্টং শরবর্ষং দুরাসদম্।
মুক্তং বর্ষমিবাকাশে বারয়িষ্যথ সংয়ুগে ।। ৬.৮৮.৬ ।।
88.7
অদ্য বো মামকা বাণা মহাকার্মুকনিস্সৃতাঃ।
বিধমিষ্যন্তি গাত্রাণি তূলরাশিমিবানলঃ ।। ৬.৮৮.৭ ।।
88.8
তীক্ষ্ণসায়কনির্ভিন্নান্ শূলশক্ত্যষ্টিতোমরৈঃ।
অদ্য বো গময়িষ্যামি সর্বানেব যমক্ষয়ম্ ।। ৬.৮৮.৮ ।।
88.9
ক্ষিপতঃ শরবর্ষাণি ক্ষিপ্রহস্তস্য মে যুধি।
জীমূতস্যেব নদতঃ কঃ স্থাস্যতি মমাগ্রতঃ ।। ৬.৮৮.৯ ।।
88.10
রাত্রিয়ুদ্ধে ময়া পূর্বং বজ্রাশনিসমৈঃ শরৈঃ।
শায়িতৌ স্থো ময়া ভূমৌ বিসঞ্জ্ঞৌ সপুরস্সরৌ ।। ৬.৮৮.১০ ।।
88.11
স্মৃতির্ন তে ঽস্তি বা মন্যে ব্যক্তং বা যমসাদনম্।
আশীবিষমিব ক্রুদ্ধং যন্মাং যোদ্ধুং ব্যবস্থিতঃ ।। ৬.৮৮.১১ ।।
88.12
তচ্ছুত্বা রাক্ষসেন্দ্রস্য গর্জিতং লক্ষ্ণস্তদা।
অভীতবদনঃ ক্রুদ্ধো রাবণিং বাক্যমব্রবীৎ ।। ৬.৮৮.১২ ।।
88.13
উক্তশ্চ দুর্গমঃ পারঃ কার্যাণাং রাক্ষস ত্বয়া।
কার্যাণাং কর্মণা পারং যো গচ্ছতি স বুদ্ধিমান্ ।। ৬.৮৮.১৩ ।।
88.14
স ত্বমর্থস্য হীনার্থো দুরবাপস্য কেনচিৎ।
বচো ব্যাহৃত্য জানীষে কৃতার্থো ঽস্মীতি দুর্মতে ।। ৬.৮৮.১৪ ।।
88.15
অন্তর্ধানগতেনাজৌ যস্ত্বয়া ঽ ঽচরিতস্তদা।
তস্করাচরিতো মার্গো নৈষ বীরনিষেবিতঃ ।। ৬.৮৮.১৫ ।।
88.16
যথা বাণপথং প্রাপ্য স্থিতো ঽহং তব রাক্ষস।
দর্শয়স্বাদ্য তত্তেজো বাচা ত্বং কিং বিকত্থসে ।। ৬.৮৮.১৬ ।।
88.17
এবমুক্তো ধনুর্ভীমং পরামৃশ্য মহাবলঃ।
সসর্জ নিশিতান্ বাণানিন্দ্রজিৎ সমিতিঞ্জয়ঃ ।। ৬.৮৮.১৭ ।।
88.18
তে নিসৃষ্টা মহাবেগাঃ শরাঃ সর্পবিষোপমাঃ।
সম্প্রাপ্য লক্ষ্মণং পেতুঃ শ্বসন্ত ইব পন্নগাঃ ।। ৬.৮৮.১৮ ।।
88.19
শরৈরতিমহাবেগৈর্বেগবান্ রাবণাত্মজঃ।
সৌমিত্রিমিন্দ্রজিদ্যুদ্ধে বিব্যাধ শুভলক্ষণম্ ।। ৬.৮৮.১৯ ।।
88.20
স শরৈরতিবিদ্ধাঙ্গো রুধিরেণ সমুক্ষিতঃ।
শুশুভে লক্ষ্মণঃ শ্রীমান্ বিধূম ইব পাবকঃ ।। ৬.৮৮.২০ ।।
88.21
ইন্দ্রজিত্ত্বাত্মনঃ কর্ম প্রসমীক্ষ্যাধিগম্য চ।
বিনদ্য সুমহানাদমিদং বচনমব্রবীৎ ।। ৬.৮৮.২১ ।।
88.22
পত্রিণঃ শিতধারাস্তে শরা মত্কার্মুকচ্যুতাঃ।
আদাস্যন্তে ঽদ্য সৌমিত্রে জিবিতং জিবিতান্তগাঃ ।। ৬.৮৮.২২ ।।
88.23
অদ্য গোমায়ুসঙ্ঘাশ্চ শ্যেনসঙ্ঘাশ্চ লক্ষ্মণ।
গৃধ্রাশ্চ নিপতন্তু ত্বাং গতাসুং নিহতং ময়া ।। ৬.৮৮.২৩ ।।
88.24
ক্ষত্রবন্ধুং সদানার্যং রামঃ পরমাদুর্মতিঃ।
ভক্তং ভ্রাতরমদ্যৈব ত্বাং দ্রক্ষ্যতি ময়া হতম্ ।। ৬.৮৮.২৪ ।।
88.25
বিশস্তকবচং ভূমৌ ব্যপবিদ্ধশরাসনম্।
হৃতোত্তমাঙ্গং সৌমিত্রে ত্বামদ্য নিহতং ময়া ।। ৬.৮৮.২৫ ।।
88.26
ইতি ব্রুবাণং সংরব্ধং পরুষং রাবণাত্মজম্।
হেতুমদ্বাক্যমত্যর্থং লক্ষ্মণঃ প্রত্যুবাচ হ ।। ৬.৮৮.২৬ ।।
88.27
বাগ্বলং ত্যজ দুর্বুদ্ধে ক্রূরকর্মা ঽসি রাক্ষস।
অথ কস্মাদ্বদস্যেতৎ সম্পাদয় সুকর্মণা ।। ৬.৮৮.২৭ ।।
88.28
অকৃত্বা কত্থসে কর্ম কিমর্থমিহ রাক্ষস।
কুরু তত্কর্ম যেনাহং শ্রদ্দধ্যাং তব কত্থনম্ ।। ৬.৮৮.২৮ ।।
88.29
অনুক্ত্বা পরুষং বাক্যং কিঞ্চিদপ্যনবাক্ষিপন্।
অবিকত্থন্ বধিষ্যামি ত্বাং পশ্য পুরুষাধম ।। ৬.৮৮.২৯ ।।
88.30
ইত্যুক্ত্বা পঞ্চ নারাচানাকর্ণাপূরিতান্ শিতান্।
নিজঘান মহাবেগান্ লক্ষ্মণো রাক্ষসোরসি ।। ৬.৮৮.৩০ ।।
88.31
সুপত্রবাজিতা বাণা জ্বলিতা ইব পন্নগাঃ।
নৈর্ঋতোরস্যভাসন্ত সবিতূ রশ্ময়ো যথা ।। ৬.৮৮.৩১ ।।
88.32
স শরৈরাহতস্তেন সরোষো রাবণাত্মজঃ।
সুপ্রয়ুক্তৈস্ত্রিভির্বাণৈঃ প্রতিবিব্যাধ লক্ষ্মণম্ ।। ৬.৮৮.৩২ ।।
88.33
স বভূব তদা ভীমো নররাক্ষসসিংহয়োঃ।
বিমর্দস্তুমুলো যুদ্ধে পরস্পরজয়ৈষিণোঃ ।। ৬.৮৮.৩৩ ।।
88.34
উভৌ হি বলসম্পন্নাবুভৌ বিক্রমশালিনৌ ।
। ৬.৮৮.৩৪ ।।
88.35
উভাবপি সুবিক্রান্তৌ সর্বশস্ত্রাস্ত্রকোবিদৌ।
উভৌ পরমদুর্জেয়াবতুল্যবলতেজসৌ ।। ৬.৮৮.৩৫ ।।
88.36
যুয়ুধাতে তদা বীরৌ গ্রহাবিব নভোগতৌ ।
। ৬.৮৮.৩৬ ।।
88.37
বলবৃত্রাবিবাভীতৌ যুধি তৌ দুষ্প্রধর্ষণৌ।
যুয়ুধাতে মহাত্মানৌ তদা কেসরিণাবিব ।। ৬.৮৮.৩৭ ।।
88.38
বহূনবসৃজন্তৌ হি মার্গণৌঘানবস্থিতৌ।
নররাক্ষসসিংহৌ তৌ প্রহৃষ্টাবভ্যয়ুধ্যতাম্ ।। ৬.৮৮.৩৮ ।।
88.39
সুসম্প্রহৃষ্টৌ নররাক্ষসোত্তমৌ জয়ৈষিণৌ মার্গণচাপধারিণৌ।
পরস্পরং তৌ প্রববর্ষতুর্ভৃশং শরৌঘবর্ষেণ বলাহকাবিব ।। ৬.৮৮.৩৯ ।।
88.40
অভিপ্রবৃদ্ধৌ যুধি যুদ্ধকোবিদৌ শরাসিচণ্ডৌ শিতশস্ত্রধারিণৌ।
অভীক্ষ্ণমাবিব্যধতুর্মহাবলৌ মহাহবে শম্বরবাসবাবিব ।। ৬.৮৮.৪০ ।।
88.41
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে অষ্টাশীতিতমঃ সর্গঃ ।
। ৮৮ ।।