Utshovসর্গ 86
86.1
অথ তস্যামবস্থায়াং লক্ষ্মণং রাবণানুজঃ।
পরেষামহিতং বাক্যমর্থসাধকমব্রবীৎ ।। ৬.৮৬.১ ।।
86.2
যদেতদ্রাক্ষসানীকং মেঘশ্যামং বিলোক্যতে।
এতদায়োধ্যতাং শীঘ্রং কপিভিঃ পাদপায়ুধৈঃ ।। ৬.৮৬.২ ।।
86.3
অস্যানীকস্য মহতো ভেদনে যত লক্ষ্মণ।
রাক্ষসেন্দ্রসুতো ঽপ্যত্র ভিন্নে দৃশ্যো ভবিষ্যতি ।। ৬.৮৬.৩ ।।
86.4
স ত্বমিন্দ্রাশনিপ্রখ্যৈঃ শরৈরবকিরন্ পরান্।
অভিদ্রবাশু যাবদ্বৈ নৈতৎ কর্ম সমাপ্যতে ।। ৬.৮৬.৪ ।।
86.5
জহি বীর দুরাত্মানং মায়াপরমধার্মিকম্।
রাবণিং ক্রূরকর্মাণং সর্বলোকভয়াবহম্ ।। ৬.৮৬.৫ ।।
86.6
বিভীষণবচঃ শ্রুত্বা লক্ষ্মণঃ শুভলক্ষণঃ।
ববর্ষ শরবর্ষাণি রাক্ষসেন্দ্রসুতং প্রতি ।। ৬.৮৬.৬ ।।
86.7
ঋক্ষাঃ শাখামৃগাশ্চাপি দ্রুমাদ্রিনখয়োধিনঃ।
অভ্যধাবন্ত সহিতাস্তদনীকমবস্থিতম্ ।। ৬.৮৬.৭ ।।
86.8
রাক্ষসাশ্চ শিতৈর্বাণৈরসিভিঃ শক্তিতোমরৈঃ।
উদ্যতৈঃ সমবর্তন্ত কপিসৈন্যজিঘাংসবঃ ।। ৬.৮৬.৮ ।।
86.9
স সম্প্রহারস্তুমুলঃ সঞ্জজ্ঞে কপিরাক্ষসাম্।
শব্দেন মহতা লঙ্কাং নাদয়ন্ বৈ সমন্ততঃ ।। ৬.৮৬.৯ ।।
86.10
শস্ত্রৈশ্চ বহুধাকারৈঃ শিতৈর্বাণৈশ্চ পাদপৈঃ।
উদ্যতৈর্গিরিশৃঙ্গৈশ্চ ঘোরৈরাকাশমাবৃতম্ ।। ৬.৮৬.১০ ।।
86.11
তে রাক্ষসা বানরেষু বিকৃতাননবাহবঃ।
নিবেশয়ন্তঃ শস্ত্রাণি চক্রুস্তে সুমহদ্ভয়ম্ ।। ৬.৮৬.১১ ।।
86.12
তথৈব সকলৈর্বৃক্ষৈর্গিরিশৃঙ্গৈশ্চ বানরাঃ।
অভিজঘ্নুর্নিজঘ্নুশ্চ সমরে রাক্ষসর্ষভান্ ।। ৬.৮৬.১২ ।।
86.13
ঋক্ষবানরমুখ্যৈশ্চ মহাকায়ৈর্মহাবলৈঃ।
রক্ষসাং বধ্যমানানাং মহদ্ভয়মজায়ত ।। ৬.৮৬.১৩ ।।
86.14
স্বমনীকং বিষণ্ণং তু শ্রুত্বা শত্রুভিরার্দিতম্।
উদতিষ্ঠত দুর্ধর্ষস্তত্কর্মণ্যননুষ্ঠিতে ।। ৬.৮৬.১৪ ।।
86.15
বৃক্ষান্ধকারান্নির্গত্য জাতক্রোধঃ স রাবণিঃ।
আরুরোহ রথং সজ্জং পূর্বয়ুক্তং সরাক্ষসঃ ।। ৬.৮৬.১৫ ।।
86.16
স ভীমকার্মুকধরঃ কালমেঘসমপ্রভঃ।
রক্তাস্যনয়নঃ ক্রুদ্ধো বভৌ মৃত্যুরিবান্তকঃ ।। ৬.৮৬.১৬ ।।
86.17
দৃষ্ট্বৈব তু রথস্থং তং পর্যবর্তত তদ্বলম্।
রক্ষসাং ভীমবেগানাং লক্ষ্মণেন যুয়ুত্সতাম্ ।। ৬.৮৬.১৭ ।।
86.18
তস্মিন্ কালে তু হনুমানুদ্যম্য সুদুরাসদম্।
ধরণীধরসঙ্কাশো মহাবৃক্ষমরিন্দমঃ ।। ৬.৮৬.১৮ ।।
86.19
স রাক্ষসানাং তত্সৈন্যং কালাগ্নিরিব নির্দহন্।
চকার বহুভির্বৃক্ষৈর্নিস্সঞ্জ্ঞং যুধি বানরঃ ।। ৬.৮৬.১৯ ।।
86.20
বিধ্বংসয়ন্তং তরসা দৃষ্ট্বৈব পবনাত্মজম্।
রাক্ষসানাং সহস্রাণি হনুমন্তমবাকিরন্ ।। ৬.৮৬.২০ ।।
86.21
শিতশূলধরাঃ শূলৈরসিভিশ্চাসিপাণয়ঃ।
শক্তিভিঃ শক্তিহস্তাশ্চ পট্টিশৈঃ পট্টিশায়ুধাঃ ।। ৬.৮৬.২১ ।।
86.22
পরিধৈশ্চ গদাভিশ্চ চক্রৈশ্চ শুভদর্শনৈঃ।
শতশশ্চ শতঘ্নীভিরায়সৈরপি মুদ্গরৈঃ ।। ৬.৮৬.২২ ।।
86.23
ঘৌরৈঃ পরশ্বধৈশ্চৈব ভিন্দিপালৈশ্চ রাক্ষসাঃ।
মুষ্টিভির্বজ্রকল্পৈশ্চ তলৈরশনিসন্নিভৈঃ।অভিজঘ্নুঃ সমাসাদ্য সমন্তাৎ পর্বতোপমম্ ।। ৬.৮৬.২৩ ।।
86.24
তেষামপি চ সঙ্ক্রুদ্ধশ্চকার কদনং মহৎ ।
। ৬.৮৬.২৪ ।।টিভির্বজ্রকল্পৈশ্চ তলৈরশনিসন্নিভৈঃ।স দদর্শ কপিশ্রেষ্ঠমচলোপমমিন্দ্রজিৎ।সূদয়ন্তমভিত্রঘ্নমমিত্রান্ পবনাত্মজম্ ।। ৬.৮৬.২৫ ।।
86.25
স সারথিমুবাচেদং যাহি যত্রৈষ বানরঃ।
ক্ষয়মেষ হি নঃ কুর্যাদ্রাক্ষসানামুপেক্ষিতঃ ।। ৬.৮৬.২৬ ।।
86.26
ইত্যুক্তঃ সারথিস্তেন যয়ৌ যত্র স মারুতিঃ।
বহন্ পরমদুর্ধর্ষং স্থিতমিন্দ্রজিতং রথে ।। ৬.৮৬.২৭ ।।
86.27
সো ঽভ্যুপেত্য শরান্ খড্গান্ পট্টিশাংশ্চ পরশ্বধান্।
অভ্যবর্ষত দুর্দ্ধর্ষঃ কপিমূর্ধ্নি স রাক্ষসঃ ।। ৬.৮৬.২৮ ।।
86.28
তানি শস্ত্রাণি ঘোরাণি প্রতিগৃহ্য স মারুতিঃ।
রোষেণ মহতা ঽ ঽবিষ্টো বাক্যং চেদমুবাচ হ ।। ৬.৮৬.২৯ ।।
86.29
যুদ্ধ্যস্ব যদি শূরো ঽসি রাবণাত্মজ দুর্মতে।
বায়ুপুত্রং সমাসাদ্য জীবন্ন প্রতিয়াস্যসি ।। ৬.৮৬.৩০ ।।
86.30
বাহুভ্যাং প্রতিয়ুধ্যস্ব যদি মে দ্বন্দ্বমাহবে।
বেগং সহস্ব দুর্বুদ্ধে ততস্ত্বং রক্ষসাং বরঃ ।। ৬.৮৬.৩১ ।।
86.31
হনুমন্তং জিঘাংসন্তং সমুদ্যতশরাসনম্।
রাবণাত্মজমাচষ্টে লক্ষ্মণায় বিভীষণঃ ।। ৬.৮৬.৩২ ।।
86.32
যঃ স বাসবনির্জেতা রাবণস্যাত্মসম্ভবঃ।
স এষ রথমাস্থায় হনুমন্তং জিঘাংসতি ।। ৬.৮৬.৩৩ ।।
86.33
তমপ্রতিমসংস্থানৈঃ শরৈঃ শত্রুবিদারণৈঃ।
জীবিতান্তকরৈর্ঘোরৈঃ সৌমিত্রে রাবণিং জহি ।। ৬.৮৬.৩৪ ।।
86.34
ইত্যেবমুক্তস্তু তদা মহাত্মা বিভীষণেনারিবিভীষণেন।
দদর্শ তং পর্বতসন্নিকাশং রণে স্থিতং ভীমবলং নদন্তম্ ।। ৬.৮৬.৩৫ ।।
86.35
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে ষডশীতিতমঃ সর্গঃ ।
। ৮৬ ।।