Utshovসর্গ 85
85.1
তস্য তদ্বচনং শ্রুত্বা রাঘবঃ শোককর্শিতঃ।
নোপধারয়তে ব্যক্তং যদুক্তং তেন রক্ষসা ।। ৬.৮৫.১ ।।
85.2
ততো ধৈর্যমবষ্টভ্য রামঃ পরপুরঞ্জয়ঃ।
বিভীষণমুপাসীনমুবাচ কপিসন্নিধৌ ।। ৬.৮৫.২ ।।
85.3
নৈর্ঋতাধিপতে বাক্যং যদুক্তং তে বিভীষণ।
ভূয়স্তচ্ছ্রোতুমিচ্ছামি ব্রূহি যত্তে বিবক্ষিতম্ ।। ৬.৮৫.৩ ।।
85.4
রাঘবস্য বচঃ শ্রুত্বা বাক্যং বাক্যবিশারদঃ।
যত্তত্পুনরিদং বাক্যং বভাষে স বিভীষণঃ ।। ৬.৮৫.৪ ।।
85.5
যথাজ্ঞপ্তং মহাবাহো ত্বয়া গুল্মনিবেশনম্।
তত্তথা ঽনুষ্ঠিতং বীর ত্বদ্বাক্যসমনন্তরম্ ।। ৬.৮৫.৫ ।।
85.6
তান্যনীকানি সর্বাণি বিভক্তানি সমন্ততঃ।
বিন্যস্তা যূথপাশ্চৈব যথান্যায়ং বিভাগশঃ ।। ৬.৮৫.৬ ।।
85.7
ভূয়স্তু মম বিজ্ঞাপ্যং তচ্ছৃণুষ্ব মহায়শঃ ।
। ৬.৮৫.৭ ।।
85.8
ত্বয্যকারণসন্তপ্তে সন্তপ্তহৃদয়া বয়ম্।
ত্যজ রাজন্নিমং শোকং মিথ্যা সন্তাপমাগতম্ ।। ৬.৮৫.৮ ।।
85.9
তদিয়ং ত্যজ্যতাং চিন্তা শত্রুহর্ষবিবর্ধনী।
উদ্যমঃ ক্রিয়তাং বীর হর্ষঃ সমুপসেব্যতাম্ ।। ৬.৮৫.৯ ।।
85.10
প্রাপ্তব্যা বদি তে সীতা হন্তব্যাশ্চ নিশাচরাঃ।
রঘুনন্দন বক্ষ্যামি শ্রূয়তাং মে হিতং বচঃ ।। ৬.৮৫.১০ ।।
85.11
সাধ্বয়ং যাতু সৌমিত্রির্বলেন মহতা বৃতঃ।
নিকুম্ভিলায়াং সম্প্রাপ্য হন্তুং রাবণিমাহবে ।। ৬.৮৫.১১ ।।
85.12
ধনুর্মণ্ডলনির্মুক্তৈরাশীবিষবিষোপমৈঃ।
শরৈর্হন্তুং মহেষ্বাসো রাবণিং সমিতিঞ্জয়ঃ ।। ৬.৮৫.১২ ।।
85.13
তেন বীর্যেণ তপসা বরদানাৎ স্বয়ম্ভুবঃ।
অস্ত্রং ব্রহ্মশিরঃ প্রাপ্তং কামগাশ্চ তুরঙ্গমাঃ ।। ৬.৮৫.১৩ ।।
85.14
স এষ সহ সৈন্যেন প্রাপ্তঃ কিল নিকুম্ভিলাম্।
যদ্যুত্তিষ্ঠেৎ কৃতং কর্ম হতান্ সর্বাংশ্চ বিদ্ধি নঃ ।। ৬.৮৫.১৪ ।।
85.15
নিকুম্ভিলামসম্প্রাপ্তমহুতাগ্নিং চ যো রিপুঃ।
ত্বামাততায়িনং হন্যাদিন্দ্রশত্রোঃ স তে বধঃ।বরো দত্তো মহাবাহো সর্বলোকেশ্বরেণ বৈ ।। ৬.৮৫.১৫ ।।
85.16
ইত্যেবং বিহিতো রাজন্ বধস্তস্যৈষ ধীমতঃ।
বধায়েন্দ্রজিতো রাম সন্দিশস্ব মহাবল।হতে তস্মিন্ হতং বিদ্ধি রাবণং সসুহৃজ্জনম্ ।। ৬.৮৫.১৬ ।।
85.17
বিভীষণবচঃ শ্রুত্বা রাঘবো বাক্যমব্রবীৎ ।
। ৬.৮৫.১৭ ।।
85.18
জানামি তস্য রৌদ্রস্য মায়াং সত্যপরাক্রম।
স হি ব্রহ্মাস্ত্রবিৎ প্রাজ্ঞো মহামায়ো মহাবলঃ।করোত্যসঞ্জ্ঞান্ সঙ্গ্রামে দেবান্ সবরুণানপি ।। ৬.৮৫.১৮ ।।
85.19
তস্যান্তরিক্ষে চরতো রথস্থস্য মহায়শঃ।
ন গতির্জ্ঞায়তে তস্য সূর্যস্যেবাভ্রসম্প্লবে ।। ৬.৮৫.১৯ ।।
85.20
রাঘবস্তু রিপোর্জ্ঞাত্বামায়াবীর্যং দুরাত্মনঃ।
লক্ষ্মণং কীর্তিসম্পন্নমিদং বচনমব্রবীৎ ।। ৬.৮৫.২০ ।।
85.21
যদ্বানরেন্দ্রস্য বলং তেন সর্বেণ সংবৃতঃ।
হনুমত্প্রমুখৈশ্চৈব যূথপৈঃ সহ লক্ষ্মণ ।। ৬.৮৫.২১ ।।
85.22
জাম্ববেনর্ক্ষপতিনা সহসৈন্যেন সংবৃতঃ।
জহি তং রাক্ষসসুতং মায়াবলবিশারদম্ ।। ৬.৮৫.২২ ।।
85.23
অয়ং ত্বাং সচিবৈঃ সার্দ্ধং মহাত্মা রজনীচরঃ।
অভিজ্ঞস্তস্য দেশস্য পৃষ্ঠতো ঽনুগমিষ্যতি ।। ৬.৮৫.২৩ ।।
85.24
রাঘবস্য বচঃ শ্রুত্বা লক্ষ্মণঃ সবিভীষণঃ।
জাগ্রাহ কার্মুকশ্রেষ্ঠমত্যদ্ভুতপরাক্রমঃ ।। ৬.৮৫.২৪ ।।
85.25
সন্নদ্ধঃ কবচী খড্গী সশরো হেমচাপধৃৎ।
রামপাদাবুপস্পৃশ্য হৃষ্টঃ সৌমিত্রিরব্রবীৎ ।। ৬.৮৫.২৫ ।।
85.26
অদ্য মত্কার্মুকোন্মুক্তাঃ শরা নির্ভিদ্য রাবণিম্।
লঙ্কামভিপতিষ্যন্তি হংসাঃ পুষ্করিণীমিব ।। ৬.৮৫.২৬ ।।
85.27
অদ্যৈব তস্য রৌদ্রস্য শরীরং মামকাঃ শরাঃ।
বিধমিষ্যন্তি ভিত্ত্বা তং মহাচাপগুণচ্যুতাঃ ।। ৬.৮৫.২৭ ।।
85.28
স এবমুক্ত্বা দ্যুতিমান্ বচনং ভ্রাতুরগ্রতঃ।
স রাবণিবধাকাঙ্ক্ষী লক্ষ্মণস্ত্বরিতো যয়ৌ ।। ৬.৮৫.২৮ ।।
85.29
সো ঽভিবাদ্য গুরোঃ পাদৌ কৃত্বা চাপি প্রদক্ষিণম্।
নিকুম্ভিলামভিয়য়ৌ চৈত্যং রাবণিপালিতম্ ।। ৬.৮৫.২৯ ।।
85.30
বিভীষণেন সহিতো রাজপুত্রঃ প্রতাপবান্।
কৃতস্বস্ত্যয়নো ভ্রাত্রা লক্ষ্মণস্ত্বরিতো যয়ৌ ।। ৬.৮৫.৩০ ।।
85.31
বানরাণাং সহস্রৈস্তু হনুমান্ বহুভির্বৃতঃ।
বিভীষণশ্চ সামাত্যস্তদা লক্ষ্মণমন্বগাৎ ।। ৬.৮৫.৩১ ।।
85.32
মহতা হরিসৈন্যেন সবেগমভিসংবৃতঃ।
ঋক্ষরাজবলং চৈব দদর্শ পথি বিষ্ঠিতম্ ।। ৬.৮৫.৩২ ।।
85.33
স গত্বা দূরমধ্বানং সৌমিত্রির্মিত্রনন্দনঃ।
রাক্ষসেন্দ্রবলং দূরাদপশ্যদ্ ব্যূহমাস্থিতম্ ।। ৬.৮৫.৩৩ ।।
85.34
স তং প্রাপ্য ধনুষ্পাণির্মায়ায়োগমরিন্দমঃ।
তস্থৌ ব্রহ্মবিধানেন বিজেতুং রঘুনন্দনঃ ।। ৬.৮৫.৩৪ ।।
85.35
বিভীষণেন সহিতো রাজপুত্রঃ প্রতাপবান্।
অঙ্গদেন চ বীরেণ তথা ঽনিলসুতেন চ ।। ৬.৮৫.৩৫ ।।
85.36
বিবিধমমলশস্ত্রভাস্বরং তদ্ ধ্বজগহনং বিপুলং মহারথৈশ্চ।
প্রতিভয়তমমপ্রমেয়বেগং তিমিরমিব দ্বিষতাং বলং বিবেশ ।। ৬.৮৫.৩৬ ।।
85.37
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে পঞ্চাশীতিতমঃ সর্গঃ ।
। ৮৫ ।।