সর্গ 84

84.1

রামমাশ্বাসয়ানে তু লক্ষ্মণে ভ্রাতৃবত্সলে।
নিক্ষিপ্য গুল্মান্ স্বস্থানে তত্রাগচ্ছদ্বিভীষণঃ ।। ৬.৮৪.১ ।।

নানাপ্রহরণৈর্বীরৈশ্চতুর্ভিঃ সচিবৈর্বৃতঃ।
নীলাঞ্জনচয়াকারৈর্মাতঙ্গৈরিব যূথপঃ ।। ৬.৮৪.২ ।।

সো ঽভিগম্য মহাত্মানং রাঘবং শোকলালসম্।
বানরাংশ্চৈব দদৃশে বাষ্পপর্যাকুলেক্ষণান্ ।। ৬.৮৪.৩ ।।

রাঘবং চ মহাত্মানমিক্ষ্বাকুকুলনন্দনম্।
দদর্শ মোহমাপন্নং লক্ষ্মণস্যাঙ্কমাশ্রিতম্ ।। ৬.৮৪.৪ ।।

ব্রীডিতং শোকসন্তপ্তং দৃষ্ট্বা রামং বিভীষণঃ।
অন্তর্দুঃখেন দীনাত্মা কিমেতদিতি সো ঽব্রবীৎ ।। ৬.৮৪.৫ ।।

বিভীষণমুখং দৃষ্ট্বা সুগ্রীবং তাংশ্চ বানরান্।
লক্ষ্মণোবাচ মন্দার্থমিদং বাষ্পপরিপ্লুতঃ ।। ৬.৮৪.৬ ।।

হতামিন্দ্রজিতা সীতামিহ শ্রুত্বৈব রাঘবঃ।
হনুমদ্বচনাৎ সৌম্য ততো মোহমুপাগতঃ ।। ৬.৮৪.৭ ।।

কথয়ন্তং তু সৌমিত্রিং সন্নিবার্য বিভীষণঃ ।
। ৬.৮৪.৮ ।।

মনুজেন্দ্রার্তরূপেণ যদুক্তং চ হনূমতা।
তদয়ুক্তমহং মন্যে সাগরস্যেব শোষণম্ ।। ৬.৮৪.৯ ।।

অভিপ্রায়ং তু জানামি রাবণস্য দুরাত্মনঃ।
সীতাং প্রতি মহাবাহো ন চ ঘাতং করিষ্যতি ।। ৬.৮৪.১০ ।।

যাচ্যমানস্তু বহুশো ময়া হিতচিকীর্ষুণা।
বৈদেহীমুত্সৃজস্বেতি ন চ তৎ কৃতবান্ বচঃ ।। ৬.৮৪.১১ ।।

নৈব সাম্না ন দানেন ন ভেদেন কুতো যুধা।
সা দ্রুষ্টুমপি শক্যেত নৈব চান্যেন কেনচিৎ ।। ৬.৮৪.১২ ।।

বানরান্ মোহয়িত্বা তু প্রতিয়াতঃ স রাক্ষসঃ।
চৈত্যং নিকুম্ভিলাং নাম যত্র হোমং করিষ্যতি ।। ৬.৮৪.১৩ ।।

হুতবানুপয়াতো হি দেবৈরপি সবাসবৈঃ।
দুরাধর্ষো ভবত্যেব সঙ্গ্রামে রাবণাত্মজঃ ।। ৬.৮৪.১৪ ।।

তেন মোহয়তা নূনমেষা মায়া প্রয়োজিতা।
বিঘ্নমন্বিচ্ছতা তত্র বানরাণাং পরাক্রমে ।। ৬.৮৪.১৫ ।।

সসৈন্যাস্তত্র গচ্ছামো যাবত্তন্ন সমাপ্যতে।
ত্যজেমং নরশার্দূল মিথ্যাসন্তাপমাগতম্।সীদতে হি বলং সর্বং দৃষ্ট্বা ত্বাং শোককর্শিতম্ ।। ৬.৮৪.১৬ ।।

ইহ ত্বং স্বস্থহৃদয়স্তিষ্ঠ সত্ত্বসমুচ্ছ্রিতঃ।
লক্ষ্মণং প্রেষয়াস্মাভিঃ সহ সৈন্যানুকর্ষিভিঃ ।। ৬.৮৪.১৭ ।।

এষ তং নরশার্দূলো রাবণিং নিশিতৈঃ শরৈঃ।
ত্যাজয়িষ্যতি তৎ কর্ম ততো বধ্যো ভবিষ্যতি ।। ৬.৮৪.১৮ ।।

তস্যৈতে নিশিতাস্তীক্ষ্ণাঃ পত্রিপত্রাঙ্গবাজিনঃ।
পতত্রিণ ইবাসৌম্যাঃ শরাঃ পাস্যন্তি শোণিতম্ ।। ৬.৮৪.১৯ ।।

তং সন্দিশ মহাবাহো লক্ষ্মণং শুভলক্ষণম্।
রাক্ষসস্য বিনাশায় বজ্রং বজ্রধরো যথা ।। ৬.৮৪.২০ ।।

মনুজবর ন কালবিপ্রকর্ষো রিপুনিধনং প্রতি যৎ ক্ষমো ঽদ্য কর্তুম্।
ত্বমতি সৃজ রিপোর্বধায় বাণীমমররিপোর্মথনে যথা মহেন্দ্রঃ ।। ৬.৮৪.২১ ।।

সমাপ্তকর্মা হি স রাক্ষসাধিপো ভবত্যদৃস্যঃ সমরে সুরাসুরৈঃ।
যুয়ুত্সতা তেন সমাপ্তকর্মণা ভবেৎ সুরাণামপি সংশয়ো মহান্ ।। ৬.৮৪.২২ ।।

ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে চতুরশীতিতমঃ সর্গঃ ।
। ৮৪ ।।