Utshovসর্গ 83
83.1
রাঘবশ্চাপি বিপুলং তং রাক্ষসবনৌকসাম্।
শ্রুত্বা সঙ্গ্রামনির্ঘোষং জাম্ববন্তমুবাচ হ ।। ৬.৮৩.১ ।।
83.2
সৌম্য নূনং হনুমতা ক্রিয়তে কর্ম দুষ্করম্।
শ্রূয়তে হি যথা ভীমঃ সুমহানায়ুধস্বনঃ ।। ৬.৮৩.২ ।।
83.3
তদ্গচ্ছ কুরু সাহায্যং স্ববলেনাভিসংবৃতঃ।
ক্ষিপ্রমৃক্ষপতে তস্য কপিশ্রেষ্ঠস্য যুধ্যতঃ ।। ৬.৮৩.৩ ।।
83.4
ঋক্ষারাজস্তথোক্তস্তু স্বেনানীকেন সংবৃতঃ।
আগচ্ছৎ পশ্চিমং দ্বারং হনুমান্ যত্র বানরঃ ।। ৬.৮৩.৪ ।।
83.5
অথায়ান্তং হনূমন্তং দদর্শর্ক্ষপতিঃ পথি।
বানরৈঃ কৃতসঙ্গ্রামৈঃ শ্বসদ্ভিরভিসংবৃতম্ ।। ৬.৮৩.৫ ।।
83.6
দৃষ্ট্বা পথি হনূমাংশ্চ তদৃক্ষবলমুদ্যতম্।
নীলমেঘনিভং ভীমং সন্নিবার্য ন্যবর্তত ।। ৬.৮৩.৬ ।।
83.7
স তেন হরিসৈন্যেন সন্নিকর্ষং মহায়শাঃ।
শীঘ্রমাগম্য রামায় দুঃখিতো বাক্যমব্রবীৎ ।। ৬.৮৩.৭ ।।
83.8
সমরে যুদ্ধ্যমানানামস্মাকং প্রেক্ষতাং পুরঃ।
জঘান রুদতীং সীতামিন্দ্রিজিদ্রাবণাত্মজঃ ।। ৬.৮৩.৮ ।।
83.9
উদ্ভ্রান্তচিত্তস্তাং দৃষ্ট্বা বিষণ্ণো ঽহমরিন্দম।
তদহং ভবতো বৃত্তং বিজ্ঞাপয়িতুমাগতঃ ।। ৬.৮৩.৯ ।।
83.10
তস্য তদ্বচনং শ্রুত্বা রাঘবঃ শোকমূর্চ্ছিতঃ।
নিপপাত তদা ভূমৌ ছিন্নমূল ইব দ্রুমঃ ।। ৬.৮৩.১০ ।।
83.11
তং ভূমৌ দেবসঙ্কাশং পতিতং প্রেক্ষ্য রাঘবম্।
অভিপেতুঃ সমুত্পত্য সর্বতঃ কপিসত্তমাঃ ।। ৬.৮৩.১১ ।।
83.12
অসিঞ্চন্ সলিলৈশ্চৈনং পদ্মোত্পলসুগন্ধিভিঃ।
প্রদহন্তমনাসাদ্যং সহসা ঽগ্নিমিবোচ্ছিখম্ ।। ৬.৮৩.১২ ।।
83.13
তং লক্ষ্মণো ঽথ বাহুভ্যাং পরিষ্বজ্য সুদুঃখিতঃ।
উবাচ রামমস্বস্থং বাক্যং হেত্বর্থসংয়ুতম্ ।। ৬.৮৩.১৩ ।।
83.14
শুভে বর্ত্মনি তিষ্ঠন্তং ত্বামার্য বিজিতেন্দ্রিয়ম্।
অনর্থেভ্যো ন শক্নোতি ত্রাতুং ধর্মো নিরর্থকঃ ।। ৬.৮৩.১৪ ।।
83.15
ভূতানাং স্থাবরাণাং চ জঙ্গমানাং চ দর্শনম্।
যথা ঽস্তি ন তথা ধর্মস্তেন নাস্তীতি মে মতিঃ ।। ৬.৮৩.১৫ ।।
83.16
যথৈব স্থাবরং ব্যক্তং জঙ্গমং চ তথাবিধম্।
নায়মর্থস্তথা যুক্তস্ত্বদ্বিধো ন বিপদ্যতে ।। ৬.৮৩.১৬ ।।
83.17
যদ্যধর্মো ভবেদ্ভূতো রাবণো নরকং ব্রজেৎ।
ভবাংশ্চ ধর্ময়ুক্তো বৈ নৈবং ব্যসনমাপ্নুয়াৎ ।। ৬.৮৩.১৭ ।।
83.18
তস্য চ ব্যসনাভাবাদ্ ব্যসনং চ গতে ত্বয়ি।
ধর্মো ভবত্যধর্মশ্চ পরস্পরবিরোধিনৌ ।। ৬.৮৩.১৮ ।।
83.19
ধর্মেণোপলভেদ্ধর্মমধর্মং চাপ্যধর্মতঃ।
যদ্যধর্মেণ যুজ্যেয়ুর্যেষ্বধর্মঃ প্রতিষ্ঠিতঃ ।। ৬.৮৩.১৯ ।।
83.20
যদি ধর্মেণ যুজ্যেরন্নাধর্মরুচয়ো জনাঃ।
ধর্মেণ চরতাং ধর্মস্তথা চৈষাং ফলং ভবেৎ ।। ৬.৮৩.২০ ।।
83.21
যস্মাদর্থা বিবর্ধন্তে যেষ্বধর্মঃ পতিষ্ঠিতঃ।
ক্লিশ্যন্তে ধর্মশীলাশ্চ তস্মাদেতৌ নিরর্থকৌ ।। ৬.৮৩.২১ ।।
83.22
বধ্যন্তে পাপকর্মাণো যদ্যধর্মেণ রাঘব।
বধকর্ম হতো ঽধর্মঃ স হতঃ কং বধিষ্যতি ।। ৬.৮৩.২২ ।।
83.23
অথবা বিহিতেনায়ং হন্যতে হন্তি বা পরম্।
বিধিরালিপ্যতে তেন ন স পাপেন কর্মণা ।। ৬.৮৩.২৩ ।।
83.24
অদৃষ্টপ্রতিকারেণ ত্বব্যক্তেনাসতা সতা।
কথং শক্যং পরং প্রাপ্তুং ধর্মেণারিবিকর্শন ।। ৬.৮৩.২৪ ।।
83.25
যদি সৎ স্যাৎ সতাং মুখ্য নাসৎ স্যাত্তব কিঞ্চন।
ত্বয়া যদীদৃশং প্রাপ্তং তস্মাৎ সন্নোপপদ্যতে ।। ৬.৮৩.২৫ ।।
83.26
অথবা দুর্বলঃ ক্লীবো বলং ধর্মো ঽনুবর্ততে।
দুর্বলো হৃতমর্যাদো ন সেব্য ইতি মে মতিঃ ।। ৬.৮৩.২৬ ।।
83.27
বলস্য যদি চেদ্ধর্মো গুণভূতঃ পরাক্রমে।
ধর্মমুত্সৃজ্য বর্তস্ব যথা ধর্মে তথা বলে ।। ৬.৮৩.২৭ ।।
83.28
অথ চেৎ সত্যবচনং ধর্মঃ কিল পরন্তপ।
অনৃতস্ত্বয্যকরুণঃ কিং ন বদ্ধস্ত্বয়া পিতা ।। ৬.৮৩.২৮ ।।
83.29
যদি ধর্মো ভবেদ্ভূতো অধর্মো বা পরন্তপ।
ন স্ম হত্বা মুনিং বজ্রী কুর্যাদিজ্যাং শতক্রতুঃ ।। ৬.৮৩.২৯ ।।
83.30
অধর্মসংশ্রিতো ধর্মো বিনাশয়তি রাঘব।
সর্বমেতদ্যথাকামং কাকুত্স্থ কুরুতে নরঃ ।। ৬.৮৩.৩০ ।।
83.31
মম চেদং মতং তাত ধর্মো ঽয়মিতি রাঘব।
ধর্মমূলং ত্বয়া ছিন্নং রাজ্যমুত্সৃজতা তদা ।। ৬.৮৩.৩১ ।।
83.32
অর্থেভ্যো হি বিবৃদ্ধেভ্যঃ সংবৃত্তেভ্যস্ততস্ততঃ।
ক্রিয়াঃ সর্বাঃ প্রবর্তন্তে পর্বতেভ্য ইবাপগাঃ ।। ৬.৮৩.৩২ ।।
83.33
অর্থেন হি বিয়ুক্তস্য পুরুষস্যাল্পতেজসঃ।
ব্যুচ্ছিদ্যন্তে ক্রিয়াঃ সর্বা গ্রীষ্মে কুসরিতো যথা ।। ৬.৮৩.৩৩ ।।
83.34
সো ঽয়মর্থং পরিত্যজ্য সুখকামঃ সুখৈধিতঃ।
পাপমারভতে কর্তুং ততো দোষঃ প্রবর্ততে ।। ৬.৮৩.৩৪ ।।
83.35
যস্যার্থাস্তস্য মিত্রাণি যস্যার্থাস্তস্য বান্ধবাঃ।
যস্যার্থাঃ স পুমান্ লোকে যস্যার্থাঃ স চ পণ্ডিতঃ ।। ৬.৮৩.৩৫ ।।
83.36
যস্যার্থাঃ স চ বিক্রান্তো যস্যার্থাঃ স চ বুদ্ধিমান্।
যস্যার্থাঃ স মহাভাগো যস্যার্থাঃ স মহাগুণঃ ।। ৬.৮৩.৩৬ ।।
83.37
অর্থস্যৈতে পরিত্যাগে দোষাঃ প্রব্যাহৃতা ময়া।
রাজ্যমুত্সৃজতা বীর যেন বুদ্ধিস্ত্বয়া কৃতা ।। ৬.৮৩.৩৭ ।।
83.38
যস্যার্থা ধর্মকামার্থাস্তস্য সর্বং প্রদক্ষিণম্।
অধনেনার্থকামেন নার্থঃ শক্যো বিচিন্বতা ।। ৬.৮৩.৩৮ ।।
83.39
হর্ষঃ কামশ্চ দর্পশ্চ ধর্মঃ ক্রোধঃ শমো দমঃ।
অর্থাদেতানি সর্বাণি প্রবর্তন্তে নরাধিপ ।। ৬.৮৩.৩৯ ।।
83.40
যেষাং নশ্যত্যয়ং লোকশ্চরতাং ধর্মচারিণাম্।
তে ঽর্থাস্ত্বয়ি ন দৃশ্যন্তে দুর্দিনেষু যথা গ্রহাঃ ।। ৬.৮৩.৪০ ।।
83.41
ত্বয়ি প্রব্রজিতে বীর গুরোশ্চ বচনে স্থিতে।
রক্ষসা ঽপহৃতা ভার্যা প্রাণৈঃ প্রিয়তরা তব ।। ৬.৮৩.৪১ ।।
83.42
তদদ্য বিপুলং বীর দুঃখমিন্দ্রজিতা কৃতম্।
কর্মণা ব্যপনেষ্যামি তস্মাদুত্তিষ্ঠ রাঘব ।। ৬.৮৩.৪২ ।।
83.43
উত্তিষ্ঠ নরশার্দূল দীর্ঘবাহো দৃঢব্রত।
কিমাত্মানং মহাত্মানমাত্মানং নাববুধ্যসে ।। ৬.৮৩.৪৩ ।।
83.44
অয়মনঘ তবোদিতঃ প্রিয়ার্থং জনকসুতানিধনং নিরীক্ষ্য রুষ্টঃ।
সহয়গজরথাং সরাক্ষসেন্দ্রাং ভৃশমিষুভির্বিনিপাতয়ামি লঙ্কাম্ ।। ৬.৮৩.৪৪ ।।
83.45
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে ত্র্যশীতিতমঃ সর্গঃ ।
। ৮৩ ।।