Utshovসর্গ 82
82.1
শ্রুত্বা তু ভীমনির্হ্রাদং শক্রাশনিসমস্বনম্।
বীক্ষমাণা দিশঃ সর্বা দুদ্রুবুর্বানরর্ষভাঃ ।। ৬.৮২.১ ।।
82.2
তানুবাচ ততঃসর্বান্ হনুমান্ মারুতাত্মজঃ।
বিষণ্ণবদনান্ দীনাংস্ত্রস্তান্ বিদ্রবতঃ পৃথক্ ।। ৬.৮২.২ ।।
82.3
কস্মাদ্বিষণ্ণবদনা বিদ্রবধ্বে প্লবঙ্গমাঃ।
ত্যক্তয়ুদ্ধসমুত্সাহাঃ শূরত্বং ক্বনু বো গতম্ ।। ৬.৮২.৩ ।।
82.4
পৃষ্ঠতো ঽনুব্রজধ্বং মামগ্রতো যান্তমাহবে।
শূরৈরভিজনোপেতৈরয়ুক্তং হি নিবর্তিতুম্ ।। ৬.৮২.৪ ।।
82.5
এবমুক্তাঃ সুসংহৃষ্টা বায়ুপুত্রেণ বানরাঃ।
শৈলশৃঙ্গাণ্যগাংশ্চৈব জগৃহুর্হৃষ্টমানসাঃ ।। ৬.৮২.৫ ।।
82.6
অভিপেতুশ্চ গর্জন্তো রাক্ষসান্ বানরর্ষভাঃ।
পরিবার্য হনূমন্তমন্বয়ুশ্চ মহাহবে ।। ৬.৮২.৬ ।।
82.7
স তৈর্বানরমুখ্যৈশ্চ হনুমান্ সর্বতো বৃতঃ।
হুতাশন ইবার্চিষ্মানদহচ্ছত্রুবাহিনীম্ ।। ৬.৮২.৭ ।।
82.8
স রাক্ষসানাং কদনং চকার সুমহাকপিঃ।
বৃতো বানরসৈন্যেন কালান্তকয়মোপমঃ ।। ৬.৮২.৮ ।।
82.9
স তু কোপেন চাবিষ্টঃ শোকেন চ মহাকপিঃ।
হনুমান্ রাবণিরথে ঽপাতয়ন্মহতীং শিলাম্ ।। ৬.৮২.৯ ।।
82.10
তামাপতন্তীং দৃষ্ট্বৈব রথঃ সারথিনা তদা।
বিধেয়াশ্বসমায়ুক্তঃ সুদূরমপবাহিতঃ ।। ৬.৮২.১০ ।।
82.11
তমিন্দ্রজিতমপ্রাপ্য রথস্থং সহসারথিম্।
বিবেশধরণীং ভিত্ত্বা সা শিলা ব্যর্থমুদ্যতা ।। ৬.৮২.১১ ।।
82.12
পাতিতায়াং শিলায়াং তু রক্ষসাং ব্যথিতা চমূঃ।
নিপতন্ত্যা চ শিলয়া রাক্ষসা মথিতা ভৃশম্ ।। ৬.৮২.১২ ।।
82.13
তমভ্যধাবঞ্ছতশো নদন্তঃ কাননৌকসঃ ।
। ৬.৮২.১৩ ।।
82.14
তে দ্রুমাংশ্চ মহাবীর্যা গিরিশৃঙ্গাণি চোদ্যতাঃ।
ক্ষিপন্তীন্দ্রজিতঃ সঙ্খ্যে বানরা ভীমবিক্রমাঃ ।। ৬.৮২.১৪ ।।
82.15
বৃক্ষশৈলমহাবর্ষং বিসৃজন্তঃ প্লবঙ্গমাঃ।
শত্রূণাং কদনং চক্রুর্নেদুশ্চ বিবিধৈঃ স্বরৈঃ ।। ৬.৮২.১৫ ।।
82.16
বানরৈস্তৈর্মহাবীর্যৈর্ঘোররূপা নিশাচরাঃ।
বীর্যাদভিহতা বৃক্ষৈর্ব্যবেষ্টন্ত রণাজিরে ।। ৬.৮২.১৬ ।।
82.17
স্বসৈন্যমভিবীক্ষ্যাথ বানরার্দিতমিন্দ্রজিৎ।
প্রগৃহীতায়ুধঃ ক্রুদ্ধঃ পরানভিমুখো যয়ৌ ।। ৬.৮২.১৭ ।।
82.18
স শরৌঘানবসৃজন্ স্বসৈন্যেনাভিসংবৃতঃ।
জঘান কপিশার্দূলান্ স বহূন্ দৃষ্টবিক্রমঃ ।। ৬.৮২.১৮ ।।
82.19
শূলৈরশনিভিঃ খড্গৈঃ পট্টিশৈঃ কূটমুদ্গরৈঃ।
তে চাপ্যনুচরাস্তস্য বানরান্ জঘ্নুরোজসা ।। ৬.৮২.১৯ ।।
82.20
সস্কন্ধবিটপৈঃ সালৈঃ শিলাভিশ্চ মহাবলঃ।
হনুমান্ কদনং চক্রে রক্ষসাং ভীমকর্মণাম্ ।। ৬.৮২.২০ ।।
82.21
স নিবার্য পরানীকমব্রবীত্তান্ বনৌকসঃ।
হনুমান্ সন্নিবর্তধ্বং ন নঃ সাধ্যমিদং বলম্ ।। ৬.৮২.২১ ।।
82.22
ত্যক্ত্বা প্রাণান্ বিবেষ্টন্তো রামিপ্রিয়চিকীর্ষবঃ।
যন্নিমিত্তং হি যুদ্ধ্যামো হতা সা জনকাত্মজা ।। ৬.৮২.২২ ।।
82.23
ইমমর্থং হি বিজ্ঞাপ্য রামং সুগ্রীবমেব চ।
তৌ যৎ প্রতিবিধাস্যেতে তৎ করিষ্যামহে বয়ম্ ।। ৬.৮২.২৩ ।।
82.24
ইত্যুক্ত্বা বানরশ্রেষ্ঠো বারয়ন্ সর্ববানরান্।
শনৈঃ শনৈরসংত্রস্তঃ সবলঃ সন্ন্যবর্তত ।। ৬.৮২.২৪ ।।
82.25
ততঃ প্রেক্ষ্য হনূমন্তং ব্রজন্তং যত্র রাঘবঃ।
স হোতুকামো দুষ্টাত্মা গতশ্চৈত্যনিকুম্ভিলাম্ ।। ৬.৮২.২৫ ।।
82.26
নিকুম্ভিলামধিষ্ঠায় পাবকং জুহবেন্দ্রজিৎ ।
। ৬.৮২.২৬ ।।
82.27
যজ্ঞভূম্যাং তু বিধিবৎ পাবকস্তেন রক্ষসা।
হূয়মানঃ প্রজজ্বাল মাংসশোণিতভুক্ তদা ।। ৬.৮২.২৭ ।।
82.28
সো ঽর্চিঃপিনদ্ধো দদৃশে হোমশোণিততর্পিতঃ।
সন্ধ্যাগত ইবাদিত্যঃ সুতীব্রো ঽগ্নিঃ সমুত্থিতঃ ।। ৬.৮২.২৮ ।।
82.29
অথেন্দ্রজিদ্রাক্ষসভূতয়ে তু জুহাব হব্যং বিধিনা বিধানবিৎ।
দৃষ্ট্বা ব্যতিষ্ঠন্ত চ রাক্ষসাস্তে মহাসমূহেষু নয়ানয়জ্ঞাঃ ।। ৬.৮২.২৯ ।।
82.30
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে দ্ব্যশীততমঃ সর্গঃ ।
। ৮২ ।।