Utshovসর্গ 80
80.1
মকরাক্ষং হতং শ্রুত্বা রাবণঃ সমিতিঞ্জয়ঃ।
ক্রোধেন মহতা ঽ ঽবিষ্টো দন্তান্ কটকটাপয়ন্ ।। ৬.৮০.১ ।।
80.2
কুপিতশ্চ তদা তত্র কিং কার্যমিতি চিন্তয়ন্।
আদিদেশাথ সঙ্ক্রুদ্ধো রণায়েন্দ্রজিতং সুতম্ ।। ৬.৮০.২ ।।
80.3
জহি বীর মহাবীর্যৌ ভ্রাতরৌ রামলক্ষ্মণৌ।
অদৃশ্যো দৃশ্যমানো বা সর্বথা ত্বং বলাধিকঃ ।। ৬.৮০.৩ ।।
80.4
ত্বমপ্রতিমকর্মাণমিন্দ্রং জয়সি সংয়ুগে।
কিং পুনর্মানুষৌ দৃষ্ট্বা ন বধিষ্যসি সংয়ুগে ।। ৬.৮০.৪ ।।
80.5
তথোক্তো রাক্ষসেন্দ্রেণ প্রতিগৃহ্য পিতুর্বচঃ।
যজ্ঞভূমৌ স বিধিবৎ পাবকং জুহবেন্দ্রজিৎ ।। ৬.৮০.৫ ।।
80.6
জুহ্বতশ্চাপি তত্রাগ্নিং রক্তোষ্ণীষধরাঃ স্ত্রিয়ঃ।
আজগ্মুস্তত্র সম্ভ্রান্তা রাক্ষস্যো যত্র রাবণিঃ ।। ৬.৮০.৬ ।।
80.7
শস্ত্রাণি শরপত্রাণি সমিধো ঽথ বিভীতকাঃ।
লোহিতানি চ বাসাংসি স্রুবং কার্ষ্ণায়সং তথা ।। ৬.৮০.৭ ।।
80.8
সর্বতো ঽগ্নিং সমাস্তীর্য শরপত্রৈঃ সতোমরৈঃ।
ছাগস্য কৃষ্ণবর্ণস্য গলং জগ্রাহ জীবিতঃ ।। ৬.৮০.৮ ।।
80.9
সকৃদেব সমিদ্ধস্য বিধূমস্য মহার্চিষঃ।
বভূবুস্তানি লিঙ্গানি বিজয়ং দর্শয়ন্তি চ ।। ৬.৮০.৯ ।।
80.10
প্রদক্ষিণাবর্তশিখস্তপ্তহাটকসন্নিভঃ।
হবিস্তৎ প্রতিজগ্রাহ পাবকঃ স্বয়মুত্থিতঃ ।। ৬.৮০.১০ ।।
80.11
হুত্বা ঽগ্নিং তর্পয়িত্বা চ দেবদানবরাক্ষসান্।
আরুরোহ রথশ্রেষ্ঠমন্তর্ধানগতং শুভম্ ।। ৬.৮০.১১ ।।
80.12
স বাজিভিশ্চতুর্ভিশ্চ বাণৈশ্চ নিশিতৈর্যুতঃ।
আরোপিতমহাচাপঃ শুশুভে স্যন্দনোত্তমঃ ।। ৬.৮০.১২ ।।
80.13
জাজ্বল্যমানো বপুষা তপনীয়পরিচ্ছদঃ।
মৃগৈশ্চন্দ্রার্ধচন্দ্রৈশ্চ স রথঃ সমলঙ্কৃতঃ ।। ৬.৮০.১৩ ।।
80.14
জাম্বূনদমহাকম্বুর্দীপ্তপাবকসন্নিভঃ।
বভূবেন্দ্রজিতঃ কেতুর্বৈডূর্যসমলঙ্কৃতঃ ।। ৬.৮০.১৪ ।।
80.15
তেন চাদিত্যকল্পেন ব্রহ্মাস্ত্রেণ চ পালিতঃ।
স বভূব দুরাধর্ষো রাবণিঃ সুমহাবলঃ ।। ৬.৮০.১৫ ।।
80.16
সো ঽভিনির্যায় নগরাদিন্দ্রজিৎ সমিতিঞ্জয়ঃ।
হুত্বা ঽগ্নিং রাক্ষসৈর্মন্ত্রৈরন্তর্ধানগতো ঽব্রবীৎ ।। ৬.৮০.১৬ ।।
80.17
অদ্য হত্বা রণে যৌ তৌ মিথ্যা প্রব্রাজিতৌ বনে।
জয়ং পিত্রে প্রদাস্যামি রাবণায় রণার্জিতম্ ।। ৬.৮০.১৭ ।।
80.18
অদ্য নির্বানরামুর্বীং হত্বা রামং সলক্ষ্মণম্।
করিষ্যে পরমপ্রীতিমিত্যুক্ত্বা ঽন্তরধীয়ত ।। ৬.৮০.১৮ ।।
80.19
আপপাতাথ সঙ্ক্রুদ্ধো দশগ্রীবেণ চোদিতঃ।
তীক্ষ্ণকার্মুকনারাচৈস্তীক্ষ্ণস্ত্বিন্দ্ররিপূ রণে ।। ৬.৮০.১৯ ।।
80.20
স দদর্শ মহাবীর্যো নাগৌ ত্রিশিরসাবিব।
সৃজন্তাবিষুজালানি বীরৌ বানরমধ্যগৌ ।। ৬.৮০.২০ ।।
80.21
ইমৌ তাবিতি সঞ্চিন্ত্য সজ্যং কৃত্বা চ কার্মুকম্।
সন্ততানেষুধারাভিঃ পর্জন্য ইব বৃষ্টিমান্ ।। ৬.৮০.২১ ।।
80.22
স তু বৈহায়সং প্রাপ্য সরথো রামলক্ষ্মণৌ।
অচক্ষুর্বিষয়ে তিষ্ঠন্ বিব্যাধ নিশিতৈঃ সরৈঃ ।। ৬.৮০.২২ ।।
80.23
তৌ তস্য শরবেগেন পরীতৌ রামলক্ষ্মণৌ।
ধনুষী সশরে কৃত্বা দিব্যমস্ত্রং প্রচক্রতুঃ ।। ৬.৮০.২৩ ।।
80.24
প্রচ্ছাদয়ন্তৌ গগনং শরজালৈর্মহাবলৌ।
তমস্ত্রৈঃ সূর্যসঙ্কাশৈর্নৈব পস্পৃশতুঃ শরৈঃ ।। ৬.৮০.২৪ ।।
80.25
স হি ধূমান্ধকারং চ চক্রে প্রচ্ছাদয়ন্নভঃ।
দিশশ্চান্তর্দধে শ্রীমান্নীহারতমসাবৃতাঃ ।। ৬.৮০.২৫ ।।
80.26
নৈব জ্যাতলনির্ঘোষো ন চ নেমিখুরস্বনঃ।
শশ্রুবে চরতস্তস্য ন চ রূপং প্রকাশতে ।। ৬.৮০.২৬ ।।
80.27
ঘনান্ধকারে তিমিরে শরবর্ষমিবাদ্ভুতম্।
স ববর্ষ মহাবাহুর্নারাচশরবৃষ্টিভিঃ ।। ৬.৮০.২৭ ।।
80.28
স রামং সূর্যসঙ্কাশৈঃ শরৈর্দত্তবরো ভৃশম্।
বিব্যাধ সমরে ক্রুদ্ধঃ সর্বগাত্রেষু রাবণিঃ ।। ৬.৮০.২৮ ।।
80.29
তৌ হন্যমানৌ নারাচৈর্ধারাভিরিব পর্বতৌ।
হেমপুঙ্খান্নরব্যাঘ্রৌ তিগ্মান্ মুমুচতুঃ শরান্ ।। ৬.৮০.২৯ ।।
80.30
অন্তরিক্ষে সমাসাদ্য রাবণিং কঙ্কপত্রিণঃ।
নিকৃত্য পতগা ভূমৌ পেতুস্তে শোণিতোক্ষিতাঃ ।। ৬.৮০.৩০ ।।
80.31
অতিমাত্রং শরৌঘেণ পীড্যমানৌ নরোত্তমৌ।
তানিষূন্ পততো ভল্লেরনেকৈর্নিচকৃন্ততুঃ ।। ৬.৮০.৩১ ।।
80.32
যতো হি দদৃশাতে তৌ শরান্নিপততঃ শিতান্।
ততস্তু তৌ দাশরথী সসৃজাতে ঽস্ত্রমুত্তমম্ ।। ৬.৮০.৩২ ।।
80.33
রাবণিস্তু দিশঃ সর্বা রথেনাতিরথঃ পতন্।
বিব্যাধ তৌ দাশরথী লধ্বস্ত্রো নিশিতৈঃ শরৈঃ ।। ৬.৮০.৩৩ ।।
80.34
তেনাতিবিদ্ধৌ তৌ বীরৌ রুক্মপুঙ্খৈঃ সুসংহিতৈঃ।
বভূবতুর্দাশরথী পুষ্পিতাবিব কিংশুকৌ ।। ৬.৮০.৩৪ ।।
80.35
নাস্য বেদ গতিং কশ্চিন্ন চ রূপং ধনুঃ শরান্।
ন চান্যদ্বিদিতং কিঞ্চিৎ সূর্যস্যেবাভ্রসম্প্লবে ।। ৬.৮০.৩৫ ।।
80.36
তেন বিদ্ধাশ্চ হরয়ো নিহতাশ্চ গতাসবঃ।
বভূবুঃ শতশস্তত্র পতিতা ধরণীতলে ।। ৬.৮০.৩৬ ।।
80.37
লক্ষ্মণস্তু সুসঙ্ক্রুদ্ধো ভ্রাতরং বাক্যমব্রবীৎ।
ব্রাহ্মমস্ত্রং প্রয়োক্ষ্যামি বধার্থং সর্বরক্ষসাম্ ।। ৬.৮০.৩৭ ।।
80.38
তমুবাচ ততো রামো লক্ষ্মণং শুভলক্ষণম্ ।
। ৬.৮০.৩৮ ।।
80.39
নৈকস্য হেতো রক্ষাংসি পৃথিব্যাং হন্তু মর্হসি।
অয়ুধ্যমানং প্রচ্ছন্নং প্রাঞ্জলিং শরণাগতম্।পলায়ন্তং প্রমত্তং বা ন ত্বং হন্তুমিহার্হসি ।। ৬.৮০.৩৯ ।।
80.40
অস্যৈব তু বধে যত্নং করিষ্যাবো মহাবল।
আদেক্ষ্যাবো মহাবেগানস্ত্রানাশীবিষোপমান্ ।। ৬.৮০.৪০ ।।
80.41
তমেনং মায়িনং ক্ষুদ্রমন্তর্হিতরথং বলাৎ।
রাক্ষসং নিহনিষ্যন্তি দৃষ্ট্বা বানরয়ূথপাঃ ।। ৬.৮০.৪১ ।।
80.42
যদ্যেষ ভূমিং বিশতে দিবং বা রসাতলং বাপি নভস্স্থলং বা।
এবং নিগূঢো ঽপি মমাস্ত্রদগ্ধঃ পতিষ্যতে ভূমিতলে গতাসুঃ ।। ৬.৮০.৪২ ।।
80.43
ইত্যেবমুক্ত্বা বচনং মহাত্মা রঘুপ্রবীরঃ প্লবগর্ষভৈর্বৃতঃ।
বধায় রৌদ্রস্য নৃশংসকর্মণস্তদা মহাত্মা ত্বরিতং নিরীক্ষতে ।। ৬.৮০.৪৩ ।।
80.44
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে অশীতিতমঃ সর্গঃ ।
। ৮০ ।।