Utshovসর্গ 79
79.1
নির্গতং মকারাক্ষং তে দৃষ্ট্বা বানরয়ূথপাঃ।
আপ্লুত্য সহসা সর্বে যোদ্ধুকামা ব্যবস্থিতাঃ ।। ৬.৭৯.১ ।।
79.2
ততঃ প্রবৃত্তং সুমহৎ তদ্যুদ্ধং রোমহর্ষণম্।
নিশাচরৈঃ প্লবঙ্গানাং দেবানাং দানবৈরিব ।। ৬.৭৯.২ ।।
79.3
বৃক্ষশূলনিপাতৈশ্চ শিলাপরিঘপাতনৈঃ।
অন্যোন্যং মর্দয়ন্তি স্ম তদা কপিনিশাচরাঃ ।। ৬.৭৯.৩ ।।
79.4
শক্তিখড্গগদাকুন্তৈস্তোমরৈশ্চ নিশাচরাঃ।
পট্টিশৈর্ভিন্দিপালৈশ্চ নির্ঘাতৈশ্চ সমন্ততঃ ।। ৬.৭৯.৪ ।।
79.5
পাশমুদ্গরদণ্ডৈশ্চ নিখাতৈশ্চাপরে তদা।
কদনং কপিবীরাণাং চক্রুস্তে রজনীচরাঃ ।। ৬.৭৯.৫ ।।
79.6
বাণৌঘৈরর্দিতাশ্চাপি খরপুত্রেণ বানরাঃ।
সম্ভ্রান্তমনসঃ সর্বে দুদ্রুবুর্ভয়পীডিতাঃ ।। ৬.৭৯.৬ ।।
79.7
তান্ দৃষ্ট্বা রাক্ষসাঃ সর্বে দ্রবমাণান্ বলীমুখান্।
নেদুস্তে সিংহবদ্ধৃষ্টা রাক্ষসা জিতকাশিনঃ ।। ৬.৭৯.৭ ।।
79.8
বিদ্রবত্সু তদা তেষু বানরেষু সমন্ততঃ।
রামস্তান্ বারয়ামাস শরবর্ষেণ রাক্ষসান্ ।। ৬.৭৯.৮ ।।
79.9
বারিতান্ রাক্ষসান্ দৃষ্ট্বা মকরাক্ষো নিশাচরঃ।
ক্রোধানলসমাবিষ্টো বচনং চেদমব্রবীৎ ।। ৬.৭৯.৯ ।।
79.10
তিষ্ঠ রাম ময়া সার্ধং দ্বন্দ্বয়ুদ্ধং দদামি তে।
ত্যাজয়িষ্যামি তে প্রাণান্ ধনুর্মুক্তৈঃ শিতৈঃ শরৈঃ ।। ৬.৭৯.১০ ।।
79.11
যত্তদা দণ্ডকারণ্যে পিতরং হতবান্ মম।
মদগ্রতঃ স্বকর্মস্থং দৃষ্ট্বা রোষো ঽভিবর্ধতে ।। ৬.৭৯.১১ ।।
79.12
দহ্যন্তে ভৃশমঙ্গানি দুরাত্মন্ মম রাঘব।
যন্ময়া ঽসি ন দৃষ্টস্ত্বং তস্মিন্ কালে মহাবনে ।। ৬.৭৯.১২ ।।
79.13
দিষ্ট্যা ঽসি দর্শনং রাম মম ত্বং প্রাপ্তবানিহ।
কাঙ্ক্ষিতো ঽসি ক্ষুধার্তস্য সিংহস্যেবেতরো মৃগঃ ।। ৬.৭৯.১৩ ।।
79.14
অদ্য মদ্বাণবেগেন প্রেতরাঙ্বিষয়ং গতঃ।
যে ত্বয়া নিহতা বীরাঃ সহ তৈশ্চ সমেষ্যসি ।। ৬.৭৯.১৪ ।।
79.15
বহুনা ঽত্র কিমুক্তেন শৃণু রাম বচো মম।
পশ্যন্তু সকলা লোকাস্ত্বাং মাং চৈব রণাজিরে ।। ৬.৭৯.১৫ ।।
79.16
অস্ত্রৈর্বা গদয়া বাপি বাহুভ্যাং বা মহাহবে।
অভ্যস্তং যেন বা রাম তেনৈব যুধি বর্ততাম্ ।। ৬.৭৯.১৬ ।।
79.17
মকরাক্ষবচঃ ক্ষুত্বা রামো দশরথাত্মজঃ।
অব্রবীৎ প্রহসন্ বাক্যমুত্তরোত্তরবাদিনম্ ।। ৬.৭৯.১৭ ।।
79.18
কত্থসে কিং বৃথা রক্ষো বহূন্যসদৃশানি তু।
ন রণে শক্যতে জেতুং বিনা যুদ্ধেন বাগ্বলাৎ ।। ৬.৭৯.১৮ ।।
79.19
চতুর্দশসহস্রাণি রক্ষসাং ত্বত্পিতা চ যঃ।
ত্রিশিরা দূষণশ্চৈব দণ্ডকে নিহতা ময়া ।। ৬.৭৯.১৯ ।।
79.20
স্বাশিতাস্তব মাংসেন গৃধ্রগোমায়ুবায়সাঃ।
ভবিষ্যন্ত্যদ্য বৈ পাপ তীক্ষ্ণতুণ্ডনখাঙ্কুরাঃ ।। ৬.৭৯.২০ ।।
79.21
রাঘবেণৈবমুক্তস্তু খরপুত্রো নিশাচরঃ।
বাণৌঘানমুচত্তস্মৈ রাঘবায় রণাজিরে ।। ৬.৭৯.২১ ।।
79.22
তান্ শরান্ শরবর্ষেণ রামশ্চিচ্ছেদ নৈকধা।
নিপেতুর্ভুবি তে চ্ছিন্না রুক্মপুঙ্খাঃ সহস্রশঃ ।। ৬.৭৯.২২ ।।
79.23
তদ্যুদ্ধমভবত্তত্র সমেত্যান্যোন্যমোজসা।
রক্ষসঃ খরপুত্রস্য সূনোর্দশরথস্য চ ।। ৬.৭৯.২৩ ।।
79.24
জীমূতয়োরিবাকাশে শব্দো জ্যাতলয়োস্তদা।
ধনুর্মুক্তঃ স্বনোত্কৃষ্টঃ শ্রূয়তে চ রণাজিরে ।। ৬.৭৯.২৪ ।।
79.25
দেবদানবগন্ধর্বাঃ কিন্নরাশ্চ মহোরগাঃ।
অন্তরিক্ষগতাঃ সর্বে দ্রষ্টুকামাস্তদদ্ভুতম্ ।। ৬.৭৯.২৫ ।।
79.26
বিদ্ধমন্যোন্যগাত্রেষু দ্বিগুণং বর্ধতে পরম্।
কৃতপ্রতিকৃতান্যোন্যং কুরুতাং তৌ রণাজিরে ।। ৬.৭৯.২৬ ।।
79.27
রামমুক্তাংস্তু বাণৌঘান্ রাক্ষসস্ত্বচ্ছিনদ্রণে।
রক্ষোমুক্তাংস্তু রামো বৈ নৈকধা প্রাচ্ছিনচ্ছরৈঃ ।। ৬.৭৯.২৭ ।।
79.28
বাণৌঘৈর্বিততাঃ সর্বা দিশশ্চ প্রদিশস্তথা।
সঞ্ছন্না বসুধা চৈব সমন্তান্ন প্রকাশতে ।। ৬.৭৯.২৮ ।।
79.29
ততঃ ক্রুদ্ধো মহাবাহুর্ধনুশ্চিচ্ছেদ রক্ষসঃ।
অষ্টাভিরথ নারাচৈঃ সূতং বিব্যাধ রাঘবঃ ।। ৬.৭৯.২৯ ।।
79.30
ভিত্ত্বা শরৈ রথং রামো রথাশ্বান্ সমপাতয়ৎ।
বিরথো বসুধাং তিষ্ঠন্ মকরাক্ষো নিশাচরঃ ।। ৬.৭৯.৩০ ।।
79.31
তত্তিষ্ঠদ্বসুধাং রক্ষঃ শূলং জগ্রাহ পাণিনা।
ত্রাসনং সর্বভূতানাং যুগান্তাগ্নিসমপ্রভম্ ।। ৬.৭৯.৩১ ।।
79.32
বিভ্রাম্য তু মহচ্ছূলং প্রজ্বলত্তন্নিশাচরঃ।
স ক্রোধাৎ প্রাহিণোত্তস্মৈ রাঘবায় মহাহবে ।। ৬.৭৯.৩২ ।।
79.33
তমাপতন্তং জ্বলিতং খরপুত্রকরাচ্চ্যুতম্।
বাণৈস্তু ত্রিভিরাকাশে শূলং চিচ্ছেদ রাঘবঃ ।। ৬.৭৯.৩৩ ।।
79.34
স চ্ছিন্নো নৈকাধা শূলো দিব্যহাটকমণ্ডিতঃ।
ব্যশীর্যত মহোল্কেব রামবাণার্দিতো ভুবি ।। ৬.৭৯.৩৪ ।।
79.35
তচ্ছূলং নিহতং দৃষ্ট্বা রামেণাক্লিষ্টকর্মণা।
সাধু সাধ্বিতি ভূতানি ব্যাহরন্তি নভোগতা ।। ৬.৭৯.৩৫ ।।
79.36
তং দৃষ্ট্বা নিহতং শূলং মকারাক্ষো নিশাচরঃ।
মুষ্টিমুদ্যম্য কাকুত্স্থং তিষ্ঠ তিষ্ঠেতি চাব্রবীৎ ।। ৬.৭৯.৩৬ ।।
79.37
স তং দৃষ্ট্বা পতন্তং বৈ প্রহস্য রঘুনন্দনঃ।
পাবকাস্ত্রং ততো রামঃ সন্দধে তু শরাসনে ।। ৬.৭৯.৩৭ ।।
79.38
তেনাস্ত্রেণ হতং রক্ষঃ কাকুত্স্থেন তদা রণে।
সঞ্ছিন্নহৃদয়ং তত্র পপাত চ মমার চ ।। ৬.৭৯.৩৮ ।।
79.39
দৃষ্ট্বা তে রাক্ষসাঃ সর্বে মকরাক্ষস্য পাতনম্।
লঙ্কামেবাভ্যধাবন্ত রামবাণার্দিতাস্তদা ।। ৬.৭৯.৩৯ ।।
79.40
দশরথনৃপপুত্রবাণবেগৈ রজনিচরং নিহতং খরাত্মজং তম্।
দদৃশুরথ সুরা ভৃশং প্রহৃষ্টা গিরিমিব বজ্রহতং যথা বিকীর্ণম্ ।। ৬.৭৯.৪০ ।।
79.41
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে একোনাশীতিতমঃ সর্গঃ ।
। ৭৯ ।।