Utshovসর্গ 78
78.1
নিকুম্ভং চ হতং শ্রুত্বা কুম্ভং চ বিনিপাতিতম্।
রাবণঃ পরমামর্ষী প্রজজ্বালানলো যথা ।। ৬.৭৮.১ ।।
78.2
নৈর্ঋতঃ ক্রোধশোকাভ্যাং দ্বাভ্যাং তু পরিমূর্চ্ছিতঃ।
খরপুত্রং বিশালাক্ষং মকরাক্ষমচোদয়ৎ ।। ৬.৭৮.২ ।।
78.3
গচ্ছ পুত্র ময়া ঽ ঽজ্ঞপ্তো বলেনাভিসমন্বিতঃ।
রাঘবং লক্ষ্মণং চৈব জহি তাংশ্চ বনৌকসঃ ।। ৬.৭৮.৩ ।।
78.4
রাবণস্য বচঃ শ্রুত্বা শূরমানী খরাত্মজঃ।
বাঢমিত্যব্রবীদ্ধৃষ্টো মকারাক্ষো নিশাচরঃ ।। ৬.৭৮.৪ ।।
78.5
সো ঽবিবাদ্য দশগ্রীবং কৃত্বা চাপি প্রদক্ষিণম্।
নির্জগাম গৃহাচ্ছুভ্রাদ্রাবণস্যাজ্ঞয়া বলী ।। ৬.৭৮.৫ ।।
78.6
সমীপস্থং বলাধ্যক্ষং খরপুত্রো ঽব্রবীদিদম্।
রথশ্চানীয়তাং শীঘ্রং সৈন্যং চাহূয়তাং ত্বরাৎ ।। ৬.৭৮.৬ ।।
78.7
তস্য তদ্বচনং শ্রুত্বা বলাধ্যক্ষো নিশাচরঃ।
স্যন্দনং চ বলং চৈব সমীপং প্রত্যপাদয়ৎ ।। ৬.৭৮.৭ ।।
78.8
প্রদক্ষিণং রথং কৃত্বা আরুরোহ নিশাচরঃ।
সূতং সঞ্চোদয়ামাস শীঘ্রং মে রথমাবহ ।। ৬.৭৮.৮ ।।
78.9
অথ তান্ রাক্ষসান্ সর্বান্ মকরাক্ষো ঽব্রবীদিদম্।
যূয়ং সর্বে প্রয়ুদ্ধ্যধ্বং পুরস্তান্মম রাক্ষসাঃ ।। ৬.৭৮.৯ ।।
78.10
অহং রাক্ষসরাজেন রাবণেন মহাত্মনা।
আজ্ঞপ্তঃ সমরে হন্তুং তাবুভৌ রামলক্ষ্মণৌ ।। ৬.৭৮.১০ ।।
78.11
অদ্য রামং বধিষ্যামি লক্ষ্মণং চ নিশাচরাঃ।
শাখামৃগং চ সুগ্রীবং বানরাংশ্চ শরোত্তমৈঃ ।। ৬.৭৮.১১ ।।
78.12
অদ্য শূলনিপাতৈশ্চ বানরাণাং মহাচমূম্।
প্রদহিষ্যামি সম্প্রাপ্তঃ শুষ্কেন্ধনমিবানলঃ ।। ৬.৭৮.১২ ।।
78.13
মকরাক্ষস্য তচ্ছ্রুত্বা বচনং তে নিশাচরাঃ।
সর্বে নানায়ুধোপেতা বলবন্তঃ সমাগতাঃ ।। ৬.৭৮.১৩ ।।
78.14
তে কামরূপিণঃ সর্বে দংষ্ট্রিণঃ পিঙ্গলেক্ষণাঃ।
মাতঙ্গা ইব নর্দন্তো ধ্বস্তকেশা ভয়ানকাঃ ।। ৬.৭৮.১৪ ।।
78.15
পরিবার্য মহাকায়া মহাকায়ং খরাত্মজম্।
অভিজগ্মুস্ততো হৃষ্টাশ্চালয়ন্তো বসুন্ধরাম্ ।। ৬.৭৮.১৫ ।।
78.16
শঙ্খভেরীসহস্রাণামাহতানাং সমন্ততঃ।
ক্ষ্বেলিতাস্ফোটিতানাং চ ততঃ শব্দো মহানভূৎ ।। ৬.৭৮.১৬ ।।
78.17
প্রভ্রষ্টো ঽথ করাত্তস্য প্রতোদঃ সারথেস্তদা।
পপাত সহসা চৈব ধ্বজস্তস্য চ রক্ষসঃ ।। ৬.৭৮.১৭ ।।
78.18
তস্য তে রথয়ুক্তাশ্চ হয়া বিক্রমবর্জিতাঃ।
চরণৈরাকুলৈর্গত্বা দীনাঃ সাস্রমুখা যয়ুঃ ।। ৬.৭৮.১৮ ।।
78.19
প্রবাতি পবনস্তস্মিন্ সপাংসুঃ খরদারুণঃ।
নির্যাণে তস্য রৌদ্রস্য মকরাক্ষস্য দুর্মতেঃ ।। ৬.৭৮.১৯ ।।
78.20
তানি দৃষ্ট্বা নিমিত্তানি রাক্ষসা বীর্যবত্তমাঃ।
অচিন্ত্য নির্গতাঃ সর্বে যত্র তৌ রামলক্ষ্মণৌ ।। ৬.৭৮.২০ ।।
78.21
ঘনগজমহিষাঙ্গতুল্যবর্ণাঃ সমরমুখেষ্বসকৃদ্গদাসিভিন্নাঃ।
অহমহমিতি যুদ্ধকৌশলাস্তে রজনিচরাঃ পরিতঃ সমুন্নদন্তঃ ।। ৬.৭৮.২১ ।।
78.22
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে অষ্টসপ্ততিতমঃ সর্গঃ ।
। ৭৮ ।।