Utshovসর্গ 77
77.1
নিকুম্ভো ভ্রাতরং দৃষ্ট্বা সুগ্রীবেণ নিপাতিতম্।
প্রদহন্নিব কোপেন বানরেন্দ্রমবৈক্ষত ।। ৬.৭৭.১ ।।
77.2
ততঃ স্রগ্দামসন্নদ্ধং দত্তপঞ্চাঙ্গুলং শুভম্।
আদদে পরিঘং বীরো নগেন্দ্রশিখরোপমম্ ।। ৬.৭৭.২ ।।
77.3
হেমপট্টপরিক্ষিপ্তং বজ্রবিদ্রুমভূষিতম্।
যমদণ্ডোপমং ভীমং রক্ষসাং ভয়নাশনম্ ।। ৬.৭৭.৩ ।।
77.4
তমাবিধ্য মহাতেজাঃ শক্রধ্বজসমং তদা।
বিননাদ বিবৃত্তাস্যো নিকুম্ভো ভীম বিক্রমঃ ।। ৬.৭৭.৪ ।।
77.5
উরোগতেন নিষ্কেণ ভুজস্থৈরঙ্গদৈরপি।
কুণ্ডলাভ্যাং চ চিত্রাভ্যাং মালয়া চ বিচিত্রয়া ।। ৬.৭৭.৫ ।।
77.6
নিকুম্ভো ভূষণৈর্ভাতি তেন স্ম পরিঘেণ চ।
যথেন্দ্রধনুষা মেঘঃ সবিদ্যুৎ স্তনয়িত্নুমান্ ।। ৬.৭৭.৬ ।।
77.7
পরিঘাগ্রেণ পুস্ফোট বাতগ্রন্থির্মহাত্মনঃ।
প্রজজ্বাল সঘোষশ্চ বিধূম ইব পাবকঃ ।। ৬.৭৭.৭ ।।
77.8
নগর্যা বিটপাবত্যা গন্ধর্বভবনোত্তমৈঃ।
সহ চৈবামরাবত্যা সর্বৈশ্চ ভবনৈঃ সহ ।। ৬.৭৭.৮ ।।
77.9
সতারগ্রহনক্ষত্রং সচন্দ্রং সমহাগ্রহম্।
নিকুম্ভপরিঘাঘূর্ণং ভ্রমতীব নভস্স্থলম্ ।। ৬.৭৭.৯ ।।
77.10
দুরাসদশ্চ সঞ্জজ্ঞে পরিঘাভরণপ্রভঃ।
কপীনাং স নিকুম্ভাগ্নির্যুগান্তাগ্নিরিবোত্থিতঃ ।। ৬.৭৭.১০ ।।
77.11
রাক্ষসা বানরাশ্চাপি ন শেকুঃ স্পন্দিতুং ভয়াৎ।
হনুমাংস্তু বিবৃত্যোরস্তস্থৌ প্রমুখতো বলী ।। ৬.৭৭.১১ ।।
77.12
পরিঘোপমবাহুস্তু পরিঘং ভাস্করপ্রভম্।
বলী বলবতস্তস্য পাতয়ামাস বক্ষসি ।। ৬.৭৭.১২ ।।
77.13
স্থিরে তস্যোরসি ব্যূঢে পরিঘঃ শতধা কৃতঃ।
বিশীর্যমাণঃ সহসা উল্কাশতমিবাম্বরে ।। ৬.৭৭.১৩ ।।
77.14
স তু তেন প্রহারেণ বিচচাল মহাকপিঃ।
পরিঘেণ সমাধূতো যথাভূমিচলে ঽচলঃ ।। ৬.৭৭.১৪ ।।
77.15
স তদা ঽভিহতস্তেন হনুমান্ প্লবগোত্তমঃ।
মুষ্টিং সংবর্তয়ামাস বলেনাতিমহাবলঃ ।। ৬.৭৭.১৫ ।।
77.16
তমুদ্যম্য মহাতেজা নিকুম্ভোরসি বীর্যবান্।
অভিচিক্ষেপ বেগেন বেগবান্ বায়ুবিক্রমঃ ।। ৬.৭৭.১৬ ।।
77.17
ততঃ পুস্ফোট চর্মাস্য প্রসুস্রাব চ শোণিতম্।
মুষ্টিনা তেন সঞ্জজ্ঞে জ্বালা বিদ্যুদিবোত্থিতা ।। ৬.৭৭.১৭ ।।
77.18
স তু তেন প্রহারেণ নিকুম্ভো বিচচাল হ।
স্বস্থশ্চাপি নিজগ্রাহ হনুমন্তং মহাবলম্ ।। ৬.৭৭.১৮ ।।
77.19
বিচুক্রুশুস্তদা সঙ্খ্যে ভীমং লঙ্কানিবাসিনঃ।
নিকুম্ভেনোদ্যতং দৃষ্ট্বা হনুমন্তং মহাবলম্ ।। ৬.৭৭.১৯ ।।
77.20
স তদা হ্রিয়মাণো ঽপি কুম্ভকর্ণাত্মজেন হ।
আজঘানানিলসুতো বজ্রকল্পেন মুষ্টিনা ।। ৬.৭৭.২০ ।।
77.21
আত্মানং মোচয়িত্বা ঽথ ক্ষিতাবভ্যবপদ্যত।
হনুমানুন্মমাথাশু নিকুম্ভং মারুতাত্মজঃ ।। ৬.৭৭.২১ ।।
77.22
নিক্ষিপ্য পরমায়ত্তো নিকুম্ভং নিষ্পিপেষ হ।
উত্পত্য চাস্য বেগেন পপাতোরসি বীর্যবান্ ।। ৬.৭৭.২২ ।।
77.23
পরিগৃহ্য চ বাহুভ্যাং পরিবৃত্য শিরোধরাম্।
উত্পাটয়ামাস শিরো ভৈরবং নদতো মহৎ ।। ৬.৭৭.২৩ ।।
77.24
অথ বিনদতি সাদিতে নিকুম্ভে পবনসুতেন রণে বভূব যুদ্ধম্।
দশরথসুতরাক্ষসেন্দ্রসূন্বোর্ভৃশতরমাগতরোষয়োঃ সুভীমম্ ।। ৬.৭৭.২৪ ।।
77.25
ব্যপেতে তু জীবে নিকুম্ভস্য হৃষ্টা বিনেদুঃ প্লবঙ্গা দিশঃ সস্বনুশ্চ।
চচালেব চোর্বী পফালেব চ দ্যৌর্ভয়ং রাক্ষসানাং বলং চাবিবেশ ।। ৬.৭৭.২৫ ।।
77.26
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে সপ্তসপ্ততিতমঃ সর্গঃ ।
। ৭৭ ।।