সর্গ 72

72.1

অতিকায়ং হতং শ্রুত্বা লক্ষ্মণেন মহৌজসা।
উদ্বেগমগমদ্রাজা বচনং চেদমব্রবীৎ ।। ৬.৭২.১ ।।

ধূভ্রাক্ষঃ পরমামর্ষী ধন্বী শস্ত্রভৃতাং বরঃ।
অকম্পনঃ প্রহস্তশ্চ কুম্ভকর্ণস্তথৈব চ ।। ৬.৭২.২ ।।

এতে মহাবলা বীরা রাক্ষসা যুদ্ধকাঙ্ক্ষিণঃ।
জেতারঃ পরসৈন্যানাং পরৈর্নিত্যাপরাজিতাঃ ।। ৬.৭২.৩ ।।

নিহতাস্তে মহাবীর্যা রামেণাক্লিষ্টকর্মণা।
রাক্ষসাঃ সুমহাকায়া নানাশস্ত্রবিশারদাঃ।অন্যে চ বহবঃ শূরা মহাত্মানো নিপাতিতাঃ ।। ৬.৭২.৪ ।।

প্রখ্যাতবলবীর্যেণ পুত্রেণেন্দ্রজিতা মম।
যৌ হি তৌ ভ্রাতরৌ বীরৌ বদ্ধৌ দত্তবরৈঃ শরৈঃ ।। ৬.৭২.৫ ।।

যন্ন শক্যং সুরৈঃ সর্বৈরসুরৈর্বা মহাবলৈঃ।
মোক্তুং তদ্বন্ধনং ঘোরং যক্ষগন্ধর্বকিন্নরৈঃ ।। ৬.৭২.৬ ।।

তন্ন জানে প্রভাবৈর্বা মায়য়া মোহনেন বা।
শরবন্ধাদ্বিমুক্তৌ তৌ ভ্রাতরৌ রামলক্ষ্মণৌ ।। ৬.৭২.৭ ।।

যে যোধা নির্গতাঃ শূরা রাক্ষসা মম শাসনাৎ।
তে সর্বে নিহতা যুদ্ধে বানরৈঃ সুমহাবলৈঃ ।। ৬.৭২.৮ ।।

তং ন পশ্যাম্যহং যুদ্ধে যো ঽদ্য রামং সলক্ষ্মণম্।
শাসয়েৎ সবলং বীরং সসুগ্রীববিভীষণম্ ।। ৬.৭২.৯ ।।

অহো নু বলবান্ রামো মহদস্ত্রবলং চ বৈ।
যস্য বিক্রমমাসাদ্য রাক্ষসা নিধনং গতাঃ ।। ৬.৭২.১০ ।।

তং মন্যে রাঘবং বীরং নারায়ণমনাময়ম্।
তদ্ভয়াদ্ধি পুরী লঙ্কা পিহিতদ্বারতোরণা ।। ৬.৭২.১১ ।।

অপ্রমত্তৈশ্চ সর্বত্র গুপ্তৈ রক্ষ্যা পুরী ত্বিয়ম্ ।
। ৬.৭২.১২ ।।

অশোকবনিকায়াং চ যত্র সীতা ঽভিরক্ষ্যতে।
নিষ্ক্রামো বা প্রবেশো বা জ্ঞাতব্যঃ সর্বথৈব নঃ ।। ৬.৭২.১৩ ।।

যত্র যত্র ভবেদ্ গুল্মস্তত্রতত্র পুনঃপুনঃ।
সর্বতশ্চাপি তিষ্ঠধ্বং স্বৈঃস্বৈঃ পরিবৃতা বলৈঃ ।। ৬.৭২.১৪ ।।

দ্রষ্টব্যং চ পদং তেষাং বানরাণাং নিশাচরাঃ।
প্রদোষে বা ঽর্ধরাত্রে বা প্রত্যূষে বাপি সর্বতঃ ।। ৬.৭২.১৫ ।।

নাবজ্ঞা তত্র কর্তব্যা বানরেষু কদাচন।
দ্বিষতাং বলমুদ্যুক্তমাপতৎ কিং স্থিতং সদা ।। ৬.৭২.১৬ ।।

ততস্তে রাক্ষসাঃ সর্বে শ্রুত্বা লঙ্কাধিপস্য তৎ।
বচনং সর্বমাতিষ্ঠন্ যথাবত্তু মহাবলাঃ ।। ৬.৭২.১৭ ।।

স তান্ সর্বান্ সমাদিশ্য রাবণো রাক্ষসাধিপঃ।
মন্যুশল্যং বহন্ দীনঃ প্রবিবেশ স্বমালয়ম্ ।। ৬.৭২.১৮ ।।

ততঃ স সন্দীপিতকোপবহ্নির্নিশাচরাণামধিপো মহাবলঃ।
তদেব পুত্রব্যসনং বিচিন্তয়ন্ মুহুর্মুহুশ্চৈব তদা ব্যনিশ্বসৎ ।। ৬.৭২.১৯ ।।

ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে দ্বিসপ্ততিতমঃ সর্গঃ ।
। ৭২ ।।