Utshovসর্গ 73
73.1
ততো হতান্ রাক্ষসপুঙ্গবাংস্তান্ দেবান্তকাদিত্রিশিরোতিকায়ান্।
রক্ষোগণাস্তত্র হতাবশিষ্টাস্তে রাবণায় ত্বরিতং শশংসুঃ ।। ৬.৭৩.১ ।।
73.2
ততো হতাংস্তান্ সহসা নিশম্য রাজা মুমোহাশ্রুপরিপ্লুতাক্ষঃ।
পুত্রক্ষয়ং ভ্রাতৃবধং চ ঘোরং বিচিন্ত্য রাজা বিপুলং প্রদধ্যৌ ।। ৬.৭৩.২ ।।
73.3
ততস্তু রাজানমুদীক্ষ্য দীনং শোকার্ণবে সম্পরিপুপ্লুবানম্।
রথর্ষভো রাক্ষসরাজসূনুস্তমিন্দ্রজিদ্বাক্যমিদং বভাষে ।। ৬.৭৩.৩ ।।
73.4
ন তাত মোহং প্রতিগন্তুমর্হসি যত্রেন্দ্রজিজ্জীবতি রাক্ষসেন্দ্র।
নেন্দ্রারিবাণাভিহতো হি কশ্চিৎ প্রাণান্ সমর্থঃ সমরে ঽভিপাতুম্ ।। ৬.৭৩.৪ ।।
73.5
পশ্যাদ্য রামং সহ লক্ষ্মণেন মদ্বাণনির্ভিন্নবিকীর্ণদেহম্।
গতায়ুষং ভূমিতলে শয়ানং শিতৈঃ শরৈরাচিতসর্বগাত্রম্ ।। ৬.৭৩.৫ ।।
73.6
ইমাং প্রতিজ্ঞাং শৃণু শক্রশত্রোঃ সুনিশ্চিতাং পৌরুষদৈবয়ুক্তাম্।
অদ্যৈব রামং সহ লক্ষ্মণেন সন্তর্পয়িষ্যামি শরৈরমোঘৈঃ ।। ৬.৭৩.৬ ।।
73.7
অদ্যেন্দ্রবৈবস্বতবিষ্ণুমিত্রসাধ্যাশ্বিবৈশ্বানরচন্দ্রসূর্যাঃ।
দ্রক্ষ্যন্তু মে বিক্রমমপ্রমেয়ং বিষ্ণোরিবোগ্রং বলিয়জ্ঞবাটে ।। ৬.৭৩.৭ ।।
73.8
স এবমুক্ত্বা ত্রিদশেন্দ্রশত্রুরাপৃচ্ছ্য রাজানমদীনসত্ত্বঃ।
সমারুরোহানিলতুল্যবেগং রথং খরশ্রেষ্ঠসমাধিয়ুক্তম্ ।। ৬.৭৩.৮ ।।
73.9
তমাস্থায় মহাতেজা রথং হরিরথোপমম্।
জগাম সহসা তত্র যত্র যুদ্ধমরিন্দমঃ ।। ৬.৭৩.৯ ।।
73.10
তং প্রস্থিতং মহাত্মানমনুজগ্মুর্মহাবলাঃ।
সংহর্ষমাণা বহবো ধনুঃপ্রবরপাণয়ঃ ।। ৬.৭৩.১০ ।।
73.11
গজস্কন্ধগতাঃ কেচিৎ কেচিৎ প্রবরবাজিভিঃ।
প্রাসমুদ্গরনিস্ত্রিংশপরশ্বধগদাধরাঃ ।। ৬.৭৩.১১ ।।
73.12
স শঙ্খনিনদৈঃ পূর্ণৈর্ভেরীণাং চাপি নিস্বনৈঃ।
জগাম ত্রিদশেন্দ্রারিঃ স্তূয়মানো নিশাচরৈঃ ।। ৬.৭৩.১২ ।।
73.13
স শঙ্খশশিবর্ণেন ছত্রেণ রিপুসূদনঃ।
ররাজ প্রতিপূর্ণেন নভশ্চান্দ্রমসা যথা ।। ৬.৭৩.১৩ ।।
73.14
অবীজ্যত ততো বীরো হৈমৈর্হেমবিভূষিতৈঃ।
চারুচামরমুখ্যৈশ্চ মুখ্যঃ সর্বধনুষ্মতাম্ ।। ৬.৭৩.১৪ ।।
73.15
ততস্ত্বিন্দ্রজিতা লঙ্কা সূর্যপ্রতিমতেজসা।
ররাজা প্রতিবীরেণ দ্যৌরিবার্কেণ ভাস্বতা ।। ৬.৭৩.১৫ ।।
73.16
স সম্প্রাপ্য মহাতেজা যুদ্ধভূমিমরিন্দমঃ।
স্থাপয়ামাস রক্ষাংসি রথং প্রতি সমন্ততঃ ।। ৬.৭৩.১৬ ।।
73.17
ততস্তু হুতভোক্তারং হুতভুক্সদৃশপ্রভঃ।
জুহাব রাক্ষসশ্রেষ্ঠো মন্ত্রবদ্বিধিবত্তদা ।। ৬.৭৩.১৭ ।।
73.18
স হবির্লাজসংস্কারৈর্মাল্যগন্ধপুরস্কৃতৈঃ।
জুহুবে পাবকং তত্র রাক্ষসেন্দ্রঃ প্রতাপবান্ ।। ৬.৭৩.১৮ ।।
73.19
শস্ত্রাণি শরপত্রাণি সমিধো ঽথ বিভীতকাঃ।
লোহিতানি চ বাসাংসি স্রুবং কার্ষ্ণায়সং তথা ।। ৬.৭৩.১৯ ।।
73.20
স তত্রাগ্নিং সমাস্তীর্য শরপত্রৈঃ সতোমরৈঃ।
ছাগস্য কৃষ্ণবর্ণস্য গলং জগ্রাহ জীবতঃ ।। ৬.৭৩.২০ ।।
73.21
সকৃদেব সমিদ্ধস্য বিধূমস্য মহার্চিষঃ।
বভূবুস্তানি লিঙ্গানি বিজয়ং যান্যদর্শয়ন্ ।। ৬.৭৩.২১ ।।
73.22
প্রদক্ষিণাবর্তশিখস্তপ্তকাঞ্চনভূষণঃ।
হবিস্তৎ প্রতিজগ্রাহ পাবকঃ স্বয়মাস্থিতঃ ।। ৬.৭৩.২২ ।।
73.23
সো ঽস্ত্রমাহারয়ামাস ব্রাহ্মমিন্দ্ররিপুস্তদা।
ধনুশ্চাত্মরথং চৈব সর্বং তত্রাভ্যমন্ত্রয়ৎ ।। ৬.৭৩.২৩ ।।
73.24
তস্মিন্নাহূয়মানে ঽস্ত্রে হূয়মানে চ পাবকে।
সার্ধং গ্রহেন্দুনক্ষত্রৈর্বিতত্রাস নভঃস্থলম্ ।। ৬.৭৩.২৪ ।।
73.25
স পাবকং পাবকদীপ্ততেজা হুত্বা মহেন্দ্রপ্রতিমপ্রভাবঃ।
সচাপবাণাসিরথাশ্বসূতঃ খে ঽন্তর্দধেত্মানমচিন্ত্যরূপঃ ।। ৬.৭৩.২৫ ।।
73.26
ততো হয়রথাকীর্ণং পতাকাধ্বজশোভিতম্।
নির্যয়ৌ রাক্ষসবলং নর্দমানং যুয়ুত্সয়া ।। ৬.৭৩.২৬ ।।
73.27
তে শরৈর্বহুভিশ্চিত্রৈস্তীক্ষ্ণবেগৈরলঙ্কৃতৈঃ।
তোমরৈরঙ্কুশৈশ্চাপি বানরান্ জঘ্নুরাহবে ।। ৬.৭৩.২৭ ।।
73.28
রাবণিস্তু ততঃ ক্রুদ্ধস্তান্নিরীক্ষ্য নিশাচরান্।
হৃষ্টা ভবন্তো যুদ্ধ্যন্তু বানরাণাং জিঘাংসয়া ।। ৬.৭৩.২৮ ।।
73.29
ততস্তে রাক্ষসাঃ সর্বে নর্দন্তো জয়কাঙ্ক্ষিণঃ।
অভ্যবর্ষংস্ততো ঘোরান্ বানরান্ শরবৃষ্টিভিঃ ।। ৬.৭৩.২৯ ।।
73.30
স তু নালীকনারাচৈর্গদাভির্মুসলৈরপি।
রক্ষোভিঃ সংবৃতঃ সঙ্খ্যে বানরান্ বিচকর্ত হ ।। ৬.৭৩.৩০ ।।
73.31
তে বধ্যমানাঃ সমরে বানরাঃ পাদপায়ুধাঃ।
অভ্যদ্রবন্ত সহিতা রাবণিং রণকর্কশম্ ।। ৬.৭৩.৩১ ।।
73.32
ইন্দ্রজিত্তু ততঃ ক্রুদ্ধো মহাতেজা মহাবলঃ।
বানরাণাং শরীরাণি ব্যধমদ্রাবণাত্মজঃ ।। ৬.৭৩.৩২ ।।
73.33
শরেণৈকেন চ হরীন্ নব পঞ্চ চ সপ্ত চ।
চিচ্ছেদ সমরে ক্রুদ্ধো রাক্ষসান্ সম্প্রহর্ষয়ন্ ।। ৬.৭৩.৩৩ ।।
73.34
স শরৈঃ সূর্যসঙ্কাশৈঃ শাতকুম্ভবিভূষিতৈঃ।
বানরান্ সমরে বীরঃ প্রমমাথ সুদুর্জয়ঃ ।। ৬.৭৩.৩৪ ।।
73.35
তে ভিন্নগাত্রাঃ সমরে বানরাঃ শপপীডিতাঃ।
পেতুর্মথিতসঙ্কল্পাঃ সুরৈরিব মহাসুরাঃ ।। ৬.৭৩.৩৫ ।।
73.36
তং তপন্তমিবাদিত্যং ঘোরৈর্বাণগভস্তিভিঃ।
অভ্যধাবন্ত সঙ্ক্রুদ্ধাঃ সংয়ুগে বানরর্ষভাঃ ।। ৬.৭৩.৩৬ ।।
73.37
ততস্তু বানরাঃ সর্বে ভিন্নদেহা বিচেতসঃ।
ব্যথিতা বিদ্রবন্তি স্ম রুধিরেণ সমুক্ষিতাঃ ।। ৬.৭৩.৩৭ ।।
73.38
রামস্যার্থে পরাক্রম্য বানরাস্ত্যক্তজীবিতাঃ।
নর্দন্তস্তে ঽভিবৃত্তাস্তু সমরে সশিলায়ুধাঃ ।। ৬.৭৩.৩৮ ।।
73.39
তে দ্রুমৈঃ পর্বতাগ্রৈশ্চ শিলাভিশ্চ প্লবঙ্গমাঃ।
অভ্যবর্ষন্ত সমরে রাবণিং পর্যবস্থিতাঃ ।। ৬.৭৩.৩৯ ।।
73.40
তদ্দ্রুমাণাং শিলানাং চ বর্ষং প্রাণহরং মহৎ।
ব্যপোহত মহাতেজা রাবণিঃ সমিতিঞ্জয়ঃ ।। ৬.৭৩.৪০ ।।
73.41
ততঃ পাবকসঙ্কাশৈঃ শরৈরাশীবিষোপমৈঃ।
বানরাণামনীকানি বিভেদ সমরে প্রভুঃ ।। ৬.৭৩.৪১ ।।
73.42
অষ্টাদশশরৈস্তীক্ষ্ণৈঃ স বিদ্ধ্বা গন্ধমাদনম্।
বিব্যাধ নবভিশ্চৈব নলং দূরাদবস্থিতম্ ।। ৬.৭৩.৪২ ।।
73.43
সপ্তভিস্তু মহা বীর্যো মৈন্দং মর্মবিদারণৈঃ।
পঞ্চভির্বিশিখৈশ্চৈব গজং বিব্যাধ সংয়ুগে ।। ৬.৭৩.৪৩ ।।
73.44
জাম্ববন্তং তু দশভির্নীলং ত্রিংশদ্ভিরেব চ।
সুগ্রীবমৃষভং চৈব সো ঽঙ্গদং দ্বিবিদং তথা।ঘোরৈর্দত্তবরৈস্তীক্ষ্ণৈর্নিষ্প্রাণানকরোত্তদা ।। ৬.৭৩.৪৪ ।।
73.45
অন্যানপি তদা মুখ্যান্ বানরান্ বহুভিঃ শরৈঃ।
অর্দয়ামাস সঙ্ক্রুদ্ধঃ কালাগ্নিরিব মূর্চ্ছিতঃ ।। ৬.৭৩.৪৫ ।।
73.46
স শরৈঃ সূর্যসঙ্কাশৈঃ সুমুক্তৈঃ শীঘ্রগামিভিঃ।
বানরাণামনীকানি নির্মমন্থ মহারণে ।। ৬.৭৩.৪৬ ।।
73.47
আকুলাং বানরীং সেনাং শরজালেন মোহিতাম্।
হৃষ্টঃ স পরয়া প্রীত্যা দদর্শ ক্ষতজোক্ষিতাম্ ।। ৬.৭৩.৪৭ ।।
73.48
পুনরেব মহাতেজা রাক্ষসেন্দ্রাত্মজো বলী।
সংসৃজ্য বাণবর্ষং চ শস্ত্রবর্ষং চ দারুণম্।মমর্দ বানরানীকমিন্দ্রজিত্ত্বরিতো বলী ।। ৬.৭৩.৪৮ ।।
73.49
স্বসৈন্যমুত্সৃজ্য সমেত্য তূর্ণং মহারণে বানরবাহিনীষু।
অদৃশ্যমানঃ শরজালমুগ্রং ববর্ষ নীলাম্বুধরো যথা ঽম্বু ।। ৬.৭৩.৪৯ ।।
73.50
তে শক্রজিদ্বাণবিশীর্ণদেহা মায়াহতা বিস্বরমুন্নদন্তঃ।
রণে নিপেতুর্হরয়ো ঽদ্রিকল্পা যথেন্দ্রবজ্রাভিহতা নগেন্দ্রাঃ ।। ৬.৭৩.৫০ ।।
73.51
তে কেবলং সন্দদৃশুঃ শিতাগ্রান্ বাণান্ রণে বানরবাহিনীষু।
মায়ানিগূঢং তু সুরেন্দ্রশত্রুং ন চাবৃতং রাক্ষসমভ্যপশ্যন্ ।। ৬.৭৩.৫১ ।।
73.52
ততঃ স রক্ষোধিপতির্মহাত্মা সর্বে দিশো বাণগণৈঃ শিতাগ্রৈঃ।
প্রচ্ছাদয়ামাস রবিপ্রকাশৈর্বিষাদয়ামাস চ বানরেন্দ্রান্ ।। ৬.৭৩.৫২ ।।
73.53
স শূলনিস্ত্রিংশপরশ্বধানি ব্যাবিধ্য দীপ্তানলসন্নিভানি।
সবিস্ফুলিঙ্গোজ্জ্বলপাবকানি ববর্ষ তীর্ব্রং প্লবগেন্দ্রসৈন্যে ।। ৬.৭৩.৫৩ ।।
73.54
ততো জ্বলনসঙ্কাশৈঃ শরৈর্বানরয়ূথপাঃ।
তাডিতাঃ শক্রজিদ্বাণৈঃ প্রফুল্লা ইব কিংশুকাঃ ।। ৬.৭৩.৫৪ ।।
73.55
তে ঽন্যোন্যমভিসর্পন্তো নিনদন্তশ্চ বিস্বরম্।
রাক্ষসেন্দ্রাস্ত্রনির্ভিন্না নিপেতুর্বানরর্ষভাঃ ।। ৬.৭৩.৫৫ ।।
73.56
উদীক্ষমাণা গগনং কেচিন্নেত্রেষু তাডিতাঃ।
শরৈর্বিবিশুরন্যোন্যং পেতুশ্চ জগতীতলে ।। ৬.৭৩.৫৬ ।।
73.57
হনুমন্তং চ সুগ্রীবমঙ্গদং গন্ধমাদনম্।
জাম্ববন্তং সুষেণং চ বেগদর্শিনমেব চ ।। ৬.৭৩.৫৭ ।।
73.58
মৈন্দং চ দ্বিবিদং নীলং গবাক্ষং গজগোমুখৌ।
কেসরিং হরিলোমানং বিদ্যুদৃংষ্ট্রং চ বানরম্ ।। ৬.৭৩.৫৮ ।।
73.59
সূর্যাননং জ্যোতিমুখং তথা দধিমুখং হরিম্।
পাবকাক্ষং নলং চৈব কুমুদং চৈব বানরম্ ।। ৬.৭৩.৫৯ ।।
73.60
প্রাসৈঃ শূলৈঃ শিতৈর্বাণৈরিন্দ্রজিন্মন্ত্রসংহিতৈঃ।
বিব্যাধ হরিশার্দূলান্ সর্বাংস্তান্ রাক্ষসোত্তমঃ ।। ৬.৭৩.৬০ ।।
73.61
স বৈ গদাভির্হরিয়ূথমুখ্যান্ নির্ভিদ্য বাণৈস্তপনীয়পুঙ্খৈঃ।
ববর্ষ রামং শরবৃষ্টিজালৈঃ সলক্ষ্মণং ভাস্কররশ্মিকল্পৈঃ ।। ৬.৭৩.৬১ ।।
73.62
স বাণবর্ষৈরভিবর্ষ্যমাণো ধারানিপাতানিব তানচিন্ত্য।
সমীক্ষমাণঃ পরমাদ্ভুতশ্রী রামস্তদা লক্ষ্মণমিত্যুবাচ ।। ৬.৭৩.৬২ ।।
73.63
অসৌ পুনর্লক্ষ্মণ রাক্ষসেন্দ্রো ব্রহ্মাস্ত্রমাশ্রিত্য সুরেন্দ্রশত্রুঃ।
নিপাতয়িত্বা হরিসৈন্যমুগ্রমস্মান্ শরৈরর্দয়তি প্রসক্তঃ ।। ৬.৭৩.৬৩ ।।
73.64
স্বয়ম্ভুবা দত্তবরো মহাত্মা খমাস্থিতো ঽন্তর্হিতভীমকায়ঃ।
কথং নু শক্যো যুধি নষ্টদেহো নিহন্তুমদ্যেন্দ্রজিদুদ্যতাস্ত্রঃ ।। ৬.৭৩.৬৪ ।।
73.65
মন্যে স্বয়ম্ভূর্ভগবানচিন্ত্যো যস্যৈতদস্ত্রং প্রভবশ্চ যো ঽস্য।
বাণাবপাতাংস্ত্বমিহাদ্য ধীমন্ ময়া সহাব্যগ্রমনাঃ সহস্ব ।। ৬.৭৩.৬৫ ।।
73.66
প্রচ্ছাদয়ত্যেষ হি রাক্ষসেন্দ্রঃ সর্বা দিশঃ সায়কবৃষ্টিজালৈঃ।
এতচ্চ সর্বং পতিতাগ্র্যশূরং ন ভ্রাজতে বানররাজসৈন্যম্ ।। ৬.৭৩.৬৬ ।।
73.67
আবাং তু দৃষ্ট্বা পতিতৌ বিসঞ্জ্ঞৌ নিবৃত্তয়ুদ্ধৌ গতরোষহর্ষো।
ধ্রুবং প্রবেক্ষ্যত্যমরারিবাসমসৌ সমাদায় রণাগ্রলক্ষ্মীম্ ।। ৬.৭৩.৬৭ ।।
73.68
ততস্তু তাবিন্দ্রজিদস্ত্রজালৈর্বভূবতুস্তত্র তথা বিশস্তৌ।
স চাপি তৌ তত্র বিদর্শয়িত্বা ননাদ হর্ষাদ্যুধি রাক্ষসেন্দ্রঃ ।। ৬.৭৩.৬৮ ।।
73.69
স তত্তদা বানরসৈন্যমেবং রামং চ সঙ্খ্যে সহ লক্ষ্মণেন।
বিষাদয়িত্বা সহসা বিবেশ পুরীং দশগ্রীবভুজাভিগুপ্তাম্ ।। ৬.৭৩.৬৯ ।।
73.70
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে ত্রিসপ্ততিতমঃ সর্গঃ ।
। ৭৩ ।।