Utshovসর্গ 74
74.1
তয়োস্তদা সাদিতয়ো রণাগ্রে মুমোহ সৈন্যং হরিপুঙ্গবানাম্।
সুগ্রীবনীলাঙ্গদজাম্ববন্তো ন চাপি কিঞ্চিৎ প্রতিপেদিরে তে ।। ৬.৭৪.১ ।।
74.2
ততো বিষণ্ণং সমবেক্ষ্য সৈন্যং বিভীষণো বুদ্ধিমতাং বরিষ্ঠঃ।
উবাচ শাখামৃগরাজবীরানাশ্বাসয়ন্নপ্রতিমৈর্বচোভিঃ ।। ৬.৭৪.২ ।।
74.3
মা ভৈষ্ট নাস্ত্যত্র বিষাদকালো যদার্যপুত্রৌ হ্যবশৌ বিষণ্ণৌ।
স্বয়ম্ভুবো বাক্যমথোদ্বহন্তৌ যৎ সাদিতাবিন্দ্রজিদস্ত্রজালৈঃ ।। ৬.৭৪.৩ ।।
74.4
তস্মৈ তু দত্তং পরমাস্ত্রমেতৎ স্বয়ম্ভুবা ব্রাহ্মমমোঘবেগম্।
তন্মানয়ন্তৌ যুধি রাজপুত্রৌ নিপাতিতৌ কো ঽত্র বিষাদকালঃ ।। ৬.৭৪.৪ ।।
74.5
ব্রাহ্মমস্ত্রং ততো ধীমান্ মানয়িত্বা তু মারুতিঃ।
বিভীষণবচঃ শ্রুত্বা হনুমাংস্তমথাব্রবীৎ ।। ৬.৭৪.৫ ।।
74.6
এতস্মিন্নিহতে সৈন্যে বানরাণাং তরস্বিনাম্।
যো যো ধারয়তে প্রাণাংস্তন্তমাশ্বাসয়াবহৈ ।। ৬.৭৪.৬ ।।
74.7
তাবুভৌ যুগপদ্বীরৌ হনুমদ্রাক্ষসোত্তমৌ।
উল্কাহস্তৌ তদা রাত্রৌ রণশীর্ষে বিচেরতুঃ ।। ৬.৭৪.৭ ।।
74.8
ভিন্নলাঙ্গূলহস্তোরুপাদাঙ্গুলিশিরোধরৈঃ।
স্রবদ্ভিঃ ক্ষতজং গাত্রৈঃ প্রস্রবদ্ভিস্ততস্ততঃ ।। ৬.৭৪.৮ ।।
74.9
পতিতৈঃ পর্বতাকারৈর্বানরৈরভিসঙ্কুলাম্।
শস্ত্রৈশ্চ পতিতৈর্দীপ্তৈর্দদৃশাতে বসুন্ধরাম্ ।। ৬.৭৪.৯ ।।
74.10
সুগ্রীবমঙ্গদং নীলং শরভং গন্ধমাদনম্।
গবাক্ষং চ সুষেণং চ বেগদর্শিনমাহুকম্ ।। ৬.৭৪.১০ ।।
74.11
মৈন্দং নলং জ্যোতিমুখং দ্বিবিদং পনসং তথা।
এতাংশ্চান্যাংস্ততো বীরৌ দদৃশাতে হতান্ রণে ।। ৬.৭৪.১১ ।।
74.12
সপ্তষষ্টির্হতাঃ কোট্যো বানরাণাং তরস্বিনাম্।
অহ্নঃ পঞ্চমশেষেণঃ বল্লভেন স্বয়ম্ভুবঃ ।। ৬.৭৪.১২ ।।
74.13
সাগরৌঘনিভং ভীমং দৃষ্ট্বা বাণার্দিতং বলম্।
মার্গতে জাম্ববন্তং স হনুমান্ সবিভীষণঃ ।। ৬.৭৪.১৩ ।।
74.14
স্বভাবজরয়া যুক্তং বৃদ্ধং শরশতৈশ্চিতম্।
প্রজাপতিসুতং বীরং শাম্যন্তমিব পাবকম্ ।। ৬.৭৪.১৪ ।।
74.15
দৃষ্ট্বা তমুপসঙ্গম্য পৌলস্ত্যো বাক্যমব্রবীৎ।
কচ্চিদার্য শরৈস্তীক্ষ্ণৈঃ প্রাণা ন ধ্বংসিতাস্তব ।। ৬.৭৪.১৫ ।।
74.16
বিভীষণবচঃ শ্রুত্বা জাম্ববানৃক্ষপুঙ্গবঃ।
কৃচ্ছ্রাদভ্যুদ্গিরন্ বাক্যমিদং বচনমব্রবীৎ ।। ৬.৭৪.১৬ ।।
74.17
নৈর্ঋতেন্দ্র মহাবীর্য স্বরেণ ত্বা ঽভিলক্ষয়ে।
পীড্যমানঃ শিতৈর্বাণৈর্ন ত্বাং পশ্যামি চক্ষুষা ।। ৬.৭৪.১৭ ।।
74.18
অঞ্জনা সুপ্রজা যেন মাতরিশ্বা চ নৈর্ঽত।
হনুমান্ বানরশ্রেষ্ঠঃ প্রাণান্ ধারয়তে ক্বচিৎ ।। ৬.৭৪.১৮ ।।
74.19
শ্রুত্বা জাম্ববতো বাক্যমুবাচেদং বিভীষণঃ।
আর্যপুত্রাবতিক্রম্য কস্মাৎ পৃচ্ছসি মারুতিম্ ।। ৬.৭৪.১৯ ।।
74.20
নৈব রাজনি সুগ্রীবে নাঙ্গদে নাপি রাঘবে।
আর্য সন্দর্শিতঃ স্নেহো যথা বায়ুসুতে পরঃ ।। ৬.৭৪.২০ ।।
74.21
বিভীষণবচঃ শ্রুত্বা জাম্ববান্ বাক্যমব্রবীৎ।
শৃণু নৈর্ঋতশার্দূল যস্মাৎ পৃচ্ছামি মারুতিম্ ।। ৬.৭৪.২১ ।।
74.22
তস্মিন্ জীবতি বীরে তু হতমপ্যহতং বলম্।
হনুমত্যুজ্ঝিতপ্রাণে জীবন্তো ঽপি বয়ং হতাঃ ।। ৬.৭৪.২২ ।।
74.23
ধরতে মারুতিস্তাত মারুতপ্রতিমো যদি।
বৈশ্বানরসমো বীর্যে জীবিতাশা ততো ভবেৎ ।। ৬.৭৪.২৩ ।।
74.24
ততো বৃদ্ধমুপাগম্য নিয়মেনাভ্যবাদয়ৎ।
গৃহ্য জাম্ববতঃ পাদৌ হনুমান্ মারুতাত্মজঃ ।। ৬.৭৪.২৪ ।।
74.25
শ্রুত্বা হনুমতো বাক্যং তথাপি ব্যথিতেন্দ্রিয়ঃ।
পুনর্জাতমিবাত্মানং মন্যতে স্মর্ক্ষপুঙ্গবঃ ।। ৬.৭৪.২৫ ।।
74.26
ততো ঽব্রবীন্মহাতেজা হনুমন্তং স জাম্ববান্ ।
। ৬.৭৪.২৬ ।।
74.27
আগচ্ছ হরিশার্দূল বানরাংস্ত্রাতুমর্হসি।
নান্যো বিক্রমপর্যাপ্তস্ত্বমেষাং পরমঃ সখা ।। ৬.৭৪.২৭ ।।
74.28
ত্বত্পরাক্রমকালো ঽয়ং নান্যং পশ্যামি কঞ্চন।
ঋক্ষবানরবীরাণামনীকানি প্রহর্ষয়।বিশল্যৌ কুরু চাপ্যেতৌ সাদিতৌ রামলক্ষ্মণৌ ।। ৬.৭৪.২৮ ।।
74.29
গত্বা পরমমধ্বানমুপর্যুপরি সাগরম্।
হিমবন্তং নগশ্রেষ্ঠং হনুমন্ গন্তুমর্হসি ।। ৬.৭৪.২৯ ।।
74.30
ততঃ কাঞ্চনমত্যুচ্চমৃষভং পর্বতোত্তমম্।
কৈলাসশিখরং চাপি দ্রক্ষ্যস্যরিনিষূদন ।। ৬.৭৪.৩০ ।।
74.31
তয়োঃ শিখরয়োর্মধ্যে প্রদীপ্তমতুলপ্রভম্।
সর্বৌষধিয়ুতং বীর দ্রক্ষ্যস্যোষধিপর্বতম্ ।। ৬.৭৪.৩১ ।।
74.32
তস্য বানরশার্দূল চতস্রো মূর্ধ্নিসম্ভবাঃ।
দ্রক্ষ্যস্যোষধয়ো দীপ্তা দীপয়ন্ত্যো দিশো দশ ।। ৬.৭৪.৩২ ।।
74.33
মৃতসঞ্জীবনীং চৈব বিশল্যকরণীমপি।
সাবর্ণ্যকরণীং চৈব সন্ধানকরণীং তথা ।। ৬.৭৪.৩৩ ।।
74.34
তাঃ সর্বা হনুমন্ গৃহ্য ক্ষিপ্রমাগন্তুমর্হসি।
আশ্বাসয় হরীন্ প্রাণৈর্যোজ্য গন্ধবহাত্মজ ।। ৬.৭৪.৩৪ ।।
74.35
শ্রুত্বা জাম্ববতো বাক্যং হনুমান্ হরিপুঙ্গবঃ।
আপূর্যত বলোদ্ধর্ষৈস্তোয়বেগৈরিবার্ণবঃ ।। ৬.৭৪.৩৫ ।।
74.36
স পর্বততটাগ্রস্থঃ পীডয়ন্ পর্বতোত্তমম্।
হনুমান্ দৃশ্যতে বীরো দ্বিতীয় ইব পর্বতঃ ।। ৬.৭৪.৩৬ ।।
74.37
হরিপাদবিনির্ভগ্নো নিষসাদ স পর্বতঃ।
ন শশাক তদা ঽ ঽত্মানং সোঢুং ভৃশনিপীডিতঃ ।। ৬.৭৪.৩৭ ।।
74.38
তস্য পেতুর্নগা ভূমৌ হরিবেগাচ্চ জজ্বলুঃ।
শৃঙ্গাণি চ ব্যশীর্যন্ত পীডিতস্য হনূমতা ।। ৬.৭৪.৩৮ ।।
74.39
তস্মিন্ সম্পীড্যমানে তু ভগ্নদ্রুমাশিলাতলে।
ন শেকুর্বানরাঃ স্থাতুং ঘূর্ণমানে নগোত্তমে ।। ৬.৭৪.৩৯ ।।
74.40
সা ঘূর্ণিতমহাদ্বারা প্রভগ্নগৃহগোপুরা।
লঙ্কা ত্রাসাকুলা রাত্রৌ প্রবৃত্তেবাভবত্তদা ।। ৬.৭৪.৪০ ।।
74.41
পৃথিবীধরসঙ্কাশো বিপীড্য ধরণীধরম্।
পৃথিবীং ক্ষোভয়ামাস সার্ণবাং মারুতত্মজঃ ।। ৬.৭৪.৪১ ।।
74.42
আরুরোহ তদা তস্মাদ্ধরির্মলয়পর্বতম্।
মেরুমন্দরসঙ্কাশং নানাপ্রস্রবণাকুলম্ ।। ৬.৭৪.৪২ ।।
74.43
নানাদ্রুমলতাকীর্ণং বিকাসিকমলোত্পলম্।
সেবিতং দেবগন্ধর্বৈঃ ষষ্টিয়োজনমুচ্ছ্রিতম্ ।। ৬.৭৪.৪৩ ।।
74.44
বিদ্যাধরৈর্মুনিগণৈরপ্সরোভির্নিষেবিতম্।
নানামৃগগণাকীর্ণং বহুকন্দরশোভিতম্ ।। ৬.৭৪.৪৪ ।।
74.45
সর্বানাকুলয়ংস্তত্র যক্ষগন্ধর্বকিন্নরান্।
হনুমান্ মেঘসঙ্কাশো ববৃধে মারুতাত্মজঃ ।। ৬.৭৪.৪৫ ।।
74.46
পদ্ভ্যাং তু শৈলমাপীড্য বডবামুখবন্মুখম্।
বিবৃত্যোগ্রং ননাদোচ্চৈস্ত্রাসয়ন্নিব রাক্ষসান্ ।। ৬.৭৪.৪৬ ।।
74.47
তস্য নানদ্যমানস্য শ্রুত্বা নিনদমদ্ভুতম্।
লঙ্কাস্থা রাক্ষসাঃ সর্বে ন শেকুঃ স্পন্দিতুং ভয়াৎ ।। ৬.৭৪.৪৭ ।।
74.48
নমস্কৃত্বা ঽথ রামায় মারুতির্ভীমবিক্রমঃ।
রাঘবার্থে পরং কর্ম সমীহতপরন্তপঃ ।। ৬.৭৪.৪৮ ।।
74.49
স পুচ্ছমুদ্যম্য ভুজঙ্গকল্পং বিনম্য পৃষ্ঠং শ্রবণে নিকুঞ্জ্য।
বিবৃত্য বক্ত্রং বডবামুখাভমাপুপ্লুবে ব্যোমনি চণ্ডবেগঃ ।। ৬.৭৪.৪৯ ।।
74.50
স বৃক্ষষণ্ডাংস্তরসা জহার শৈলান্ শিলাঃ প্রাকৃতবানরাংশ্চ।
বাহূরুবেগোদ্ধতসম্প্রণুন্নাস্তে ক্ষীণবেগাঃ সলিলে নিপেতুঃ ।। ৬.৭৪.৫০ ।।
74.52
তৌ প্রসার্যোরগভোগকল্পৌ ভূজৌ ভুজঙ্গারিনিকাশবীর্যঃ।
জগাম মেরুং নগরাজমগ্র্যং দিশঃ প্রকর্ষন্নিব বায়ুসূনুঃ ।। ৬.৭৪.৫১ ।।
74.53
স সাগরং ঘূর্ণিতবীচিমালং তদা ভৃশং ভ্রামিতসর্বসত্ত্বম্।
সমীক্ষমাণঃ সহসা জগাম চক্রং যথা বিষ্ণুকরাগ্রমুক্তম্ ।। ৬.৭৪.৫২ ।।
74.54
স পর্বতান্ বৃক্ষগণান্ সরাংসি নদীস্তটাকানি পুরোত্তমানি।
স্ফীতান্ জনান্তানপি সম্প্রবীক্ষ্য জগাম বেগাৎ পিতৃতুল্যবেগঃ ।। ৬.৭৪.৫৩ ।।
74.55
আদিত্যপথমাশ্রিত্য জগাম স গতক্লমঃ।
হনুমাংস্ত্বরিতো বীরঃ পিতৃতুল্যপরাক্রমঃ ।। ৬.৭৪.৫৪ ।।
74.56
জবেন মহতা যুক্তো মারুতির্মারুতো যথা।
জগাম হরিশার্দূলো দিশঃ শব্দেন পূরয়ন্ ।। ৬.৭৪.৫৫ ।।
74.57
স্মরন্ জাম্ববতো বাক্যং মারুতির্বাতরংহসা।
দদর্শ সহসা চাপি হিমবন্তং মহাকপিঃ ।। ৬.৭৪.৫৬ ।।
74.58
নানাপ্রস্রবণোপেতং বহুকন্দরনির্ঝরম্।
শ্বেতাভ্রচয়সঙ্কাশৈঃ শিখরৈশ্চারুদর্শনৈঃ।শোভিতং বিবিধৈর্বৃক্ষৈরগমৎ পর্বতোত্তমম্ ।। ৬.৭৪.৫৭ ।।
74.59
স তং সমাসাদ্য মহানগেন্দ্রমতিপ্রবৃদ্ধোত্তমঘোরশৃঙ্গম্।
দদর্শ পুণ্যানি মহাশ্রমাণি সুরর্ষিসঙ্ঘোত্তমসেবিতানি ।। ৬.৭৪.৫৮ ।।
74.60
স ব্রহ্মকোশং রজতালয়ং চ শক্রালয়ং রুদ্রশরপ্রমোক্ষম্।
হয়াননং ব্রহ্মশিরশ্চ দীপ্তং দদর্শ বৈবস্বতকিঙ্করাংশ্চ ।। ৬.৭৪.৫৯ ।।
74.61
বজ্রালয়ং বৈশ্রবণালয়ং চ সূর্যপ্রভং সূর্যনিবন্ধনং চ।
ব্রহ্মাসনং শঙ্করকার্মুকং চ দদর্শ নাভিং চ বসুন্ধরায়াঃ ।। ৬.৭৪.৬০ ।।
74.62
কৈলাসমগ্র্যং হিমবচ্ছিলাং চ তথর্ষভং কাঞ্চনশৈলমগ্র্যম্।
সন্দীপ্তসর্বৌষধিসম্প্রদীপ্তং দদর্শ সর্বৌষধিপর্বতেন্দ্রম্ ।। ৬.৭৪.৬১ ।।
74.63
স তং সমীক্ষ্যানলরশ্মিদীপ্তং বিসিষ্মিয়ে বাসবদূতসূনুঃ।
আবৃত্য তং চৌষধিপর্বতেন্দ্রং তত্রৌষধীনাং বিচয়ঞ্চকার ।। ৬.৭৪.৬২ ।।
74.64
স যোজনসহস্রাণি সমতীত্য মহাকপিঃ।
দিব্যৌষধিধরং শৈলং ব্যচরন্মারুতাত্মজঃ ।। ৬.৭৪.৬৩ ।।
74.65
মহৌষধ্যস্ততঃ সর্বাস্তস্মিন্ পর্বতসত্তমে।
বিজ্ঞায়ার্থিনমায়ান্তং ততো জগ্মুরদর্শনম্ ।। ৬.৭৪.৬৪ ।।
74.66
স তা মহাত্মা হনুমানপশ্যন্ চুকোপ কোপাচ্চ ভৃশং ননাদ।
অমৃষ্যমাণো ঽগ্নিনিকাশচক্ষুর্মহীধরেন্দ্রং তমুবাচ বাক্যম্ ।। ৬.৭৪.৬৫ ।।
74.67
কিমেতদেবং সুবিনিশ্চিতং তে যদ্রাঘবে নাসি কৃতানুকম্পঃ।
পশ্যাদ্য মদ্বাহুবলাভিভূতো বিকীর্ণমাত্মানমথো নগেন্দ্র ।। ৬.৭৪.৬৬ ।।
74.68
স তস্য শৃঙ্গং সনগং সনাগং সকাঞ্চনং ধাতুসহস্রজুষ্টম্।
বিকীর্ণকূটজ্বলিতাগ্রসানুং প্রগৃহ্য বেগাৎ সহসোন্মমাথ ।। ৬.৭৪.৬৭ ।।
74.69
স তং সমুত্পাট্য খমুত্পপাত বিত্রাস্য লোকান্ সসুরাসুরেন্দ্রান্।
সংস্তূয়মানঃ খচরৈরনেকৈর্জগাম বৈগাদ্ গরুডোগ্রবেগঃ ।। ৬.৭৪.৬৮ ।।
74.70
স ভাস্করাধ্বানমনুপ্রপন্নস্তং ভাস্করাভং শিখরং প্রগৃহ্য।
বভৌ তদা ভাস্করসন্নিকাশো রবেঃ সমীপে প্রতিভাস্করাভঃ ।। ৬.৭৪.৬৯ ।।
74.71
স তেন শৈলেন ভৃশং ররাজ শৈলোপমো গন্ধবহাত্মজস্তু।
সহস্রধারেণ সপাবকেন চক্রেণ খে বিষ্ণুরিবার্পিতেন ।। ৬.৭৪.৭০ ।।
74.72
তং বানরাঃ প্রেক্ষ্য বিনেদুরুচ্চৈঃ স তানপি প্রেক্ষ্য মুদা ননাদ।
তেষাং সমুদ্ঘুষ্টরবং নিশম্য লঙ্কালয়া ভীমতরং বিনেদুঃ ।। ৬.৭৪.৭১ ।।
74.73
ততো মহাত্মা নিপপাত তস্মিন্ শৈলোত্তমে বানরসৈন্যমধ্যে।
হর্যুত্তমেভ্যঃ শিরসা ঽভিবাদ্য বিভীষণং তত্র স সস্বজে চ ।। ৬.৭৪.৭২ ।।
74.74
তাবপ্যুভৌ মানুষরাজপুত্রৌ তং গন্ধমাঘ্রায় মহৌষধীনাম্।
বভূবতুস্তত্র তদা বিশল্যাবুত্তস্থুরন্যে চ হরিপ্রবীরাঃ ।। ৬.৭৪.৭৩ ।।
74.75
সর্বে বিশল্যা বিরুজঃ ক্ষণেন হরিপ্রবীরা নিহতাশ্চ যে স্যুঃ।
গন্ধেন তাসাং প্রবরৌষধীনাং সুপ্তা নিশান্তেষ্বিব সম্প্রবুদ্ধাঃ ।। ৬.৭৪.৭৪ ।।
74.76
যদাপ্রভৃতি লঙ্কায়াং যুদ্ধ্যন্তে কপিরাক্ষসাঃ।
তদাপ্রভৃতি মানার্থমাজ্ঞয়া রাবণস্য চ ।। ৬.৭৪.৭৫ ।।
74.77
যে হন্যন্তে রণে তত্র রাক্ষসাঃ কপিকুঞ্জরৈঃ।
হতা হতাস্তু ক্ষিপ্যন্তে সর্ব এব তু সাগরে ।। ৬.৭৪.৭৬ ।।
74.78
ততো হরির্গন্ধবহাত্মজস্তু তমোষধীশৈলমুদগ্রবীর্যঃ।
নিনায় বেগাদ্ধিমবন্তমেব পুনশ্চ রামেণ সমাজগাম ।। ৬.৭৪.৭৭ ।।
74.79
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে চতুস্সপ্ততিতমঃ সর্গঃ ।
। ৭৪ ।।