Utshovসর্গ 75
75.1
ততো ঽব্রবীন্মহাতেজাঃ সুগ্রীবো বানরাধিপঃ।
অর্থ্যং বিজ্ঞাপয়ংশ্চাপি হনুমন্তমিদং বচঃ ।। ৬.৭৫.১ ।।
75.2
যতো হতঃ কুম্ভকর্ণঃ কুমারাশ্চ নিষূদিতাঃ।
নেদানীমুপনির্হারং রাবণো দাতুমর্হতি ।। ৬.৭৫.২ ।।
75.3
যে যে মহাবলাঃ সন্তি লঘবশ্চ প্লবঙ্গমাঃ।
লঙ্কামভ্যুত্পতন্ত্বাশু গৃহ্যোল্কাঃ প্লবগর্ষভাঃ ।। ৬.৭৫.৩ ।।
75.4
ততো ঽস্তং গত আদিত্যে রৌদ্রে তস্মিন্নিশামুখে।
লঙ্কামভিমুখাঃ সোল্কা জগ্মুস্তে প্লবগর্ষভাঃ ।। ৬.৭৫.৪ ।।
75.5
উল্কাহস্তৈর্হরিগণৈঃ সর্বতঃ সমভিদ্রুতাঃ।
আরক্ষস্থা বিরূপাক্ষাঃ সহসা বিপ্রদুদ্রুবুঃ ।। ৬.৭৫.৫ ।।
75.6
গোপুরাট্টপ্রতোলীষু চর্যাসু বিবিধাসু চ।
প্রাসাদেষু চ সংহৃষ্টাঃ সসৃজুস্তে হুতাশনম্।তেষাং গৃহসস্রাণি দদাহ হুতভুক্ তদা ।। ৬.৭৫.৬ ।।
75.7
প্রাসাদাঃ পর্বতাকারাঃ পতন্তি ধরণীতলে।
অগরুর্দহ্যতে তত্র বর চ হরিচন্দনম্ ।। ৬.৭৫.৭ ।।
75.8
মৌক্তিকা মণয়ঃ স্নিগ্ধা বজ্রং চাপি প্রবালকম্।
ক্ষৌমং চ দহ্যতে তত্র কৌশেয়ং চাপি শোভনম্ ।। ৬.৭৫.৮ ।।
75.9
আবিকং বিবিধং চৌর্ণং কাঞ্চনং ভাণ্ডমায়ুধম্।
নানাবিকৃতসংস্থানং বাজিভাণ্ডপরিচ্ছদৌ ।। ৬.৭৫.৯ ।।
75.10
গজগ্রৈবেয়কক্ষ্যাশ্চ রথভাণ্ডাশ্চ সংস্কৃতাঃ।
তনুত্রাণি চ যোধানাং হস্ত্যশ্বানাং চ বর্ম চ ।। ৬.৭৫.১০ ।।
75.11
খড্গা ধনূংষি জ্যাবাণাস্তোমরাঙ্কুশশক্তয়ঃ।
রোমজং বালজং চর্ম ব্যাঘ্রজং চাণ্ডজং বহু ।। ৬.৭৫.১১ ।।
75.12
মুক্তামণিবিচিত্রাংশ্চ প্রাসাদাংশ্চ সমন্ততঃ।
বিবিধানস্ত্রসংয়োগানগ্নির্দহতি তত্র বৈ ।। ৬.৭৫.১২ ।।
75.13
নানাবিধান্ গৃহচ্ছন্দান্ দদাহ হুতভূক্ তদা।
আবাসান্ রাক্ষসানাং চ সর্বেষাং গৃহগর্ধিনাম্ ।। ৬.৭৫.১৩ ।।
75.14
হেমচিত্রতনুত্রাণাং স্রগ্দামাম্বরধারিণাম্।
শীধুপানচলাক্ষাণাং মদবিহ্বলগামিনাম্ ।। ৬.৭৫.১৪ ।।
75.15
কান্তালম্বিতবস্ত্রাণাং শত্রুসঞ্জাতমন্যুনাম্।
গদাশূলাসিহস্তানাং খাদতাং পিবতামপি ।। ৬.৭৫.১৫ ।।
75.16
শয়নেষু মহার্হেষু প্রসুপ্তানাং প্রিয়ৈঃ সহ।
ত্রস্তানাং গচ্ছতাং তূর্ণং পুত্রানাদায় সর্বতঃ ।। ৬.৭৫.১৬ ।।
75.17
তেষাং শতসহস্রাণি তদা লঙ্কানিবাসিনাম্।
অদহৎ পাবকস্তত্র জজ্বাল চ পুনঃপুনঃ ।। ৬.৭৫.১৭ ।।
75.18
সারবন্তি মহার্হাণি গম্ভীরগুণবন্তি চ।
হেমচন্দ্রার্ধচন্দ্রাণি চন্দ্রশালোন্নতানি চ ।। ৬.৭৫.১৮ ।।
75.19
রত্নচিত্রগবাক্ষাণি সাধিষ্ঠানানি সর্বশঃ।
মণিবিদ্রুমচিত্রাণি স্পৃশন্তীব দিবাকরম্ ।। ৬.৭৫.১৯ ।।
75.20
ক্রৌঞ্চবর্হিণবীণানাং ভূষণানাং চ নিস্বনৈঃ।
নাদিতান্যচলা ভানি বেশ্মান্যগ্নির্দদাহ সঃ ।। ৬.৭৫.২০ ।।
75.21
জ্বলনেন পরীতানি তোরণানি চকাশিরে।
বিদ্যুদ্ভিরিব নদ্ধানি মেঘজালানি ধর্মগে ।। ৬.৭৫.২১ ।।
75.22
জ্বলনেন পরীতানি নিপেতুর্ভবনান্যথ।
বজ্রিবজ্রহতানীব শিখরাণি মহাগিরেঃ ।। ৬.৭৫.২২ ।।
75.23
বিমানেষু প্রসুপ্তাশ্চ দহ্যমানা বরাঙ্গনাঃ।
ত্যক্তাভরণসর্বাঙ্গা হা হেত্যুচ্চৈর্বিচুক্রুশুঃ ।। ৬.৭৫.২৩ ।।
75.24
তানি নির্দহ্যমানানি দূরতঃ প্রচকাশিরে।
হিমবচ্ছিখরাণীব দীপ্তৌষধিবনানি চ ।। ৬.৭৫.২৪ ।।
75.25
হর্ম্যাগ্রৈর্দহ্যমানৈশ্চ জ্বালাপ্রজ্বলিতৈরপি।
রাত্রৌ সা দৃশ্যতে লঙ্কা পুষ্পিতৈরিব কিংশুকৈঃ ।। ৬.৭৫.২৫ ।।
75.26
হস্ত্যধ্যক্ষৈর্গজৈর্মুক্তৈর্মুক্তৈশ্চ তুরগৈরপি।
বভূব লঙ্কা লোকান্তে ভ্রান্তগ্রাহ ইবার্ণবঃ ।। ৬.৭৫.২৬ ।।
75.27
অশ্বং মুক্তং গজো দৃষ্ট্বা ক্বচিদ্ভীতো ঽপসর্পতি।
ভীতো ভীতং গজং দৃষ্ট্বা ক্বচিদশ্বো নিবর্ততে ।। ৬.৭৫.২৭ ।।
75.28
লঙ্কায়াং দহ্যমানায়াং শুশুভে স মহার্ণবঃ।
ছায়াসংসক্তসলিলো লোহিতোদ ইবার্ণবঃ ।। ৬.৭৫.২৮ ।।
75.29
সা বভূব মুহূর্তেন হরিভির্দীপিতা পুরী।
লোকস্যাস্য ক্ষয়ে ঘোরে প্রদীপ্তেব বসুন্ধরা ।। ৬.৭৫.২৯ ।।
75.30
নারীজনস্য ধূমেন ব্যাপ্তস্যোচ্চৈর্বিনেদুষঃ।
স্বনো জ্বলনতপ্তস্য শুশ্রুবে দশয়োজনম্ ।। ৬.৭৫.৩০ ।।
75.31
প্রদগ্ধকায়ানপরান্ রাক্ষসান্নির্গতান্ বহিঃ।
সহসা ঽভ্যুত্পতন্তি স্ম হরয়ো ঽথ যুয়ুত্সবঃ ।। ৬.৭৫.৩১ ।।
75.32
উদ্ঘুষ্টং বানরাণাং চ রাক্ষসানাং চ নিস্বনঃ।
দিশো দশ সমুদ্রং চ পৃথিবীং চান্বনাদয়ৎ ।। ৬.৭৫.৩২ ।।
75.33
বিশল্যৌ তু মহাত্মানৌ তাবুভৌ রামলক্ষ্মণৌ।
অসম্ভ্রান্তৌ জগৃহতুস্তদোভে ধনুষী বরে ।। ৬.৭৫.৩৩ ।।
75.34
ততো বিষ্ফারয়ানস্য রামস্য ধনুরুত্তমম্।
বভূব তুমুলঃ শব্দো রাক্ষসানাং ভয়াবহঃ ।। ৬.৭৫.৩৪ ।।
75.35
অশোভত তদা রামো ধনুর্বিষ্ফারয়ন্ মহৎ।
ভগবানিব সঙ্ক্রুদ্ধো ভবো বেদময়ং ধনুঃ ।। ৬.৭৫.৩৫ ।।
75.36
উদ্ঘুষ্টং বানরাণাং চ রাক্ষসানাং চ নিস্বনম্।
জ্যাশব্দস্তাবুভৌ শব্দাবতি রামস্য শুশ্রুবে ।। ৬.৭৫.৩৬ ।।
75.37
বানরোদ্ঘুষ্টঘোষশ্চ রাক্ষসানাং চ নিস্বনঃ।
জ্যাশব্দশ্চাপি রামস্য ত্রয়ং ব্যাপ দিশো দশ ।। ৬.৭৫.৩৭ ।।
75.38
তস্য কার্মুকমুক্তৈশ্চ শরৈস্তত্পুরগোপুরম্।
কৈলাসশৃঙ্গপ্রতিমং বিকীর্ণমপতদ্ভুবি ।। ৬.৭৫.৩৮ ।।
75.39
ততো রামশরান্ দৃষ্ট্বা বিমানেষু গৃহেষু চ।
সন্নাহো রাক্ষসেন্দ্রাণাং তুমুলঃ সমপদ্যত ।। ৬.৭৫.৩৯ ।।
75.40
তেষাং সন্নহ্যমানানাং সিংহনাদং চ কুর্বতাম্।
শর্বরী রাক্ষসেন্দ্রাণাং রৌদ্রীব সমপদ্যত ।। ৬.৭৫.৪০ ।।
75.41
আদিষ্টা বানরেন্দ্রাস্তু সুগ্রীবেণ মহাত্মনা।
আসন্নদ্বারমাসাদ্য যুধ্যধ্বং প্লবগর্ষভাঃ ।। ৬.৭৫.৪১ ।।
75.42
যশ্চ বো বিতথং কুর্যাত্তত্র তত্র হ্যুপস্থিতঃ।
স হন্তব্যো হি সম্প্লুত্য রাজশাসনদূষকঃ ।। ৬.৭৫.৪২ ।।
75.43
তেষু বানরমুখ্যেষু দীপ্তোল্কোজ্জ্বলপাণিষু।
স্থিতেষু দ্বারমাসাদ্য রাবণং মন্যুরাবিশৎ ।। ৬.৭৫.৪৩ ।।
75.44
তস্য জৃম্ভিতবিক্ষেপাদ্ব্যামিশ্রা বৈ দিশো দশ।
রূপবানিব রুদ্রস্য মন্যুর্গাত্রেষ্বদৃশ্যত ।। ৬.৭৫.৪৪ ।।
75.45
স নিকুম্ভং চ কুম্ভং চ কুম্ভকর্ণাত্মজাবুভৌ।
প্রেষয়ামাস সঙ্ক্রুদ্ধো রাক্ষসৈর্বহুভিঃ সহ ।। ৬.৭৫.৪৫ ।।
75.46
যূপাক্ষঃ শোণিতাক্ষশ্চ প্রজঙ্ঘঃ কম্পনস্তথা।
নির্যয়ুঃ কৌম্ভকর্ণিভ্যাং সহ রাবণশাসনাৎ ।। ৬.৭৫.৪৬ ।।
75.47
শশাস চৈব তান্ সর্বান্ রাক্ষসান্ সুমহাবলান্।
নাদয়ন্ গচ্ছতাত্রৈব জয়ধ্বং শীঘ্রমেব চ ।। ৬.৭৫.৪৭ ।।
75.48
ততস্তু চোদিতাস্তেন রাক্ষসা জ্বলিতায়ুধাঃ।
লঙ্কায়া নির্যয়ুর্বীরাঃ প্রণদন্তঃ পুনঃপুনঃ ।। ৬.৭৫.৪৮ ।।
75.49
রক্ষসাং ভূষণস্থাভির্ভাভিঃ স্বাভিশ্চ সর্বশঃ।
চক্রুস্তে সপ্রভং ব্যোম হরয়শ্চাগ্নিভিঃ সহ ।। ৬.৭৫.৪৯ ।।
75.50
তত্র তারাধিপস্যাভা তারাণাং চ তথৈব চ।
তয়োরাভরণস্থা চ বলয়োর্দ্যামভাসয়ন্ ।। ৬.৭৫.৫০ ।।
75.51
চন্দ্রাভা ভূষণাভা চ গৃহাণাং জ্বলতাং চ ভা।
হরিরাক্ষসসৈন্যানি ভ্রাজয়ামাস সর্বতঃ ।। ৬.৭৫.৫১ ।।
75.52
তত্র চোর্ধ্বং প্রদীপ্তানাং গৃহাণাং সাগরঃ পুনঃ।
ভাভিঃ সংসক্তপাতালশ্চলোর্মিঃ শুশুবে ঽধিকম্ ।। ৬.৭৫.৫২ ।।
75.53
পতাকাধ্বজসংসক্তমুত্তমাসিপরশ্বধম্।
ভীমাশ্বরথমাতঙ্গং নানাপত্তিসমাকুলম্ ।। ৬.৭৫.৫৩ ।।
75.54
দীপ্তশূলগদাখড্গপ্রাসতোমরকার্মুকম্।
তদ্রাক্ষসবলং ঘোরং ভীমবিক্রমপৌরুষম্ ।। ৬.৭৫.৫৪ ।।
75.55
দদৃশো জ্বলিতপ্রাসং কিঙ্কিণীশতনাদিতম্।
হেমজালাচিতভুজং ব্যামিশ্রিতপরশ্বধম্ ।। ৬.৭৫.৫৫ ।।
75.56
ব্যাঘূর্ণিতমহাশস্ত্রং বাণসংসক্তকার্মুকম্।
গন্ধমাল্যমধূত্সেকসম্মোদিতমহানিলম্ ।। ৬.৭৫.৫৬ ।।
75.57
ঘোরং শূরজনাকীর্ণং মহাম্বুধরনিস্বনম্ ।
। ৬.৭৫.৫৭ ।।
75.58
তদ্দৃষ্ট্বা বলমায়ান্তং রাক্ষসানাং সুদারুণম্।
সঞ্চচাল প্লবঙ্গানাং বলমুচ্চৈর্ননাদ চ ।। ৬.৭৫.৫৮ ।।
75.59
জবেনাপ্লুত্য চ পুনস্তদ্বলং রক্ষসাং মহৎ।
অভ্যয়াৎ প্রত্যরিবলং পতঙ্গা ইব পাবকম্ ।। ৬.৭৫.৫৯ ।।
75.60
তেষাং ভুজপরামর্শব্যামৃষ্টপরিঘাশনি।
রাক্ষসানাং বলং শ্রেষ্ঠং ভূয়স্তরমশোভত ।। ৬.৭৫.৬০ ।।
75.61
তত্রোন্মত্তা ইবোত্পেতুর্হরয়ো ঽথ যুয়ুত্সবঃ।
তরুশৈলৈরভিঘ্নন্তো মুষ্টিভিশ্চ নিশাচরান্ ।। ৬.৭৫.৬১ ।।
75.62
তথৈবাপততাং তেষাং কপীনামসিভিঃ শিতৈঃ।
শিরাংসি সহসা জহ্নূ রাক্ষসা ভীমদর্শনাঃ ।। ৬.৭৫.৬২ ।।
75.63
দশনৈর্হৃতকর্ণাশ্চ মুষ্টিনিষ্কীর্ণমস্তকাঃ।
শিলাপ্রহারভগ্নাঙ্গা বিচেরুস্তত্র রাক্ষসাঃ ।। ৬.৭৫.৬৩ ।।
75.64
তথৈবাপ্যপরে তেষাং কপীনামভিলক্ষিতাঃ।
প্রবীরানভিতো জঘ্নূ রাক্ষসানাং তরস্বিনাম্ ।। ৬.৭৫.৬৪ ।।
75.65
তথৈবাপ্যপরে তেষাং কপীনামসিভিঃ শিতৈঃ।
হরিবীরান্নিজঘ্নুশ্চ ঘোররূপা নিশাচরাঃ ।। ৬.৭৫.৬৫ ।।
75.66
ঘ্নন্তমন্যং জঘানান্যঃ পাতয়ন্তমপাতয়ৎ।
গর্হমাণং জগর্হে ঽন্যো দশন্তমপরো ঽদশৎ ।। ৬.৭৫.৬৬ ।।
75.67
দেহীত্যন্যো দদাত্যন্যো দদামীত্যপরঃ পুনঃ।
কিং ক্লেশয়সি তিষ্ঠেতি তত্রান্যোন্যং বভাষিরে ।। ৬.৭৫.৬৭ ।।
75.68
বিপ্রলম্বিতবস্ত্রং চ বিমুক্তকবচায়ুধম্।
সমুদ্যতমহাপ্রাসং যষ্টিশূলাসিসঙ্কুলম্।প্রাবর্তত মহারৌদ্রং যুদ্ধং বানররক্ষসাম্ ।। ৬.৭৫.৬৮ ।।
75.69
বানরান্ দশ সপ্তেতি রাক্ষসা জঘ্নুরাহবে।
রাক্ষসান্ দশ সপ্তেতি বানরাশ্চাভ্যপাতয়ন্ ।। ৬.৭৫.৬৯ ।।
75.70
বিস্রস্তকেশবসনং বিধ্বস্তকবচধ্বজম্।
বলং রাক্ষসমালম্ব্য বানরাঃ পর্যবারয়ন্ ।। ৬.৭৫.৭০ ।।
75.71
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে পঞ্চসপ্ততিতমঃ সর্গঃ ।
। ৭৫ ।।