Utshovসর্গ 71
71.1
স্ববলং ব্যথিতং দৃষ্ট্বা তুমুলং রোমহর্ষণম্।
ভ্রাতঽংশ্চ নিহতান্ দৃষ্ট্বা শক্রতুল্যপরাক্রমান্ ।। ৬.৭১.১ ।।
71.2
পিতৃব্যৌ চাপি সন্দৃশ্য সমরে সন্নিষূদিতৌ।
যুদ্ধোন্মত্তং চ মত্তং চ ভ্রাতরৌ রাক্ষসর্ষভৌ ।। ৬.৭১.২ ।।
71.3
চুকোপ চ মহাতেজা ব্রহ্মদত্তবরো যুধি।
অতিকায়ো ঽদ্রিসঙ্কাশো দেবদানবদর্পহা ।। ৬.৭১.৩ ।।
71.4
স ভাস্করসহস্রস্য সঙ্ঘাতমিব ভাস্বরম্।
রথমাস্থায় শক্রারিরভিদুদ্রাব বানরান্ ।। ৬.৭১.৪ ।।
71.5
স বিস্ফার্য মহচ্চাপং কিরীটী মৃষ্টকুণ্ডলঃ।
নাম বিশ্রাবয়ামাস ননাদ চ মহাস্বনম্ ।। ৬.৭১.৫ ।।
71.6
তেন সিংহপ্রণাদেন নামবিশ্রাবণেন চ।
জ্যাশব্দেন চ ভীমেন ত্রাসয়ামাস বানরান্ ।। ৬.৭১.৬ ।।
71.7
তে দৃষ্ট্বা দেহমাহাত্ম্যং কুম্ভকর্ণো ঽয়মুত্থিতঃ।
ভয়ার্তা বানরাঃ সর্বে সংশ্রয়ন্তে পরস্পরম্ ।। ৬.৭১.৭ ।।
71.8
তে তস্য রূপমালোক্য যথা বিষ্ণোস্ত্রিবিক্রমে।
ভয়াদ্বানরয়ূথাস্তে বিদ্রবন্তি ততস্ততঃ ।। ৬.৭১.৮ ।।
71.9
তে ঽতিকায়ং সমাসাদ্য বানরা মূঢচেতসঃ।
শরণ্যং শরণং জগ্মুর্লক্ষ্মণাগ্রজমাহবে ।। ৬.৭১.৯ ।।
71.10
ততো ঽতিকায়ং কাকুত্স্থো রথস্থং পর্বতোপমম্।
দদর্শ ধন্বিনং দূরাদ্গর্জন্তং কালমেঘবৎ ।। ৬.৭১.১০ ।।
71.11
স তং দৃষ্ট্বা মহাত্মানং রাঘবস্তু বিসিষ্মিয়ে।
বানরান্ সান্ত্বয়িত্বা ঽথ বিভীষণমুবাচ হ ।। ৬.৭১.১১ ।।
71.12
কো ঽসৌ পর্বতসঙ্কাশো ধনুষ্মান্ হরিলোচনঃ।
যুক্তে হয়সহস্রেণ বিশালে স্যন্দনে স্থিতঃ ।। ৬.৭১.১২ ।।
71.13
য এষ নিশিতৈঃ শূলৈঃ সুতীক্ষ্ণৈঃ প্রাসতোমরৈঃ।
অর্চিষ্মদ্ভির্বৃতো ভাতি ভূতৈরিব মহেশ্বরঃ ।। ৬.৭১.১৩ ।।
71.14
কালজিহ্বাপ্রকাশাভির্য এষো ঽতিবিরাজতে।
আবৃতো রথশক্তীভির্বিদ্যুদ্ভিরিব তোয়দঃ ।। ৬.৭১.১৪ ।।
71.15
ধনূংষি চাস্য সজ্যানি হেমপৃষ্ঠানি সর্বশঃ।
শোভয়ন্তি রথশ্রেষ্ঠং শক্রচাপ ইবাম্বরম্ ।। ৬.৭১.১৫ ।।
71.16
ক এষ রক্ষশ্শার্দূলো রণভূমিং বিরাজয়ন্।
অভ্যেতি রথিনাং শ্রেষ্ঠো রথেনাদিত্যতেজসা ।। ৬.৭১.১৬ ।।
71.17
ধ্বজশৃঙ্গপ্রতিষ্ঠেন রাহুণা ঽভিবিরাজতে।
সূর্যরশ্মিনিভৈর্বাণৈর্দিশো দশ বিরাজয়ন্ ।। ৬.৭১.১৭ ।।
71.18
ত্রিণতং মেঘনির্হ্রাদং হেমপৃষ্ঠমলঙ্কৃতম্।
শতক্রতুধনুঃপ্রখ্যং ধনুশ্চাস্য বিরাজতে ।। ৬.৭১.১৮ ।।
71.19
সধ্বজঃ সপতাকশ্চ সানুকর্ষো মহারথঃ।
চতুস্সাদিসমায়ুক্তো মেঘস্তনিতনিস্বনঃ ।। ৬.৭১.১৯ ।।
71.20
বিংশতির্দশ চাষ্টৌ চ তূণ্যো ঽস্য রথমাস্থিতাঃ।
কার্মুকানি চ ভীমানি জ্যাশ্চ কাঞ্চনপিঙ্গলাঃ ।। ৬.৭১.২০ ।।
71.21
দ্বৌ চ খড্গৌ রথগতৌ পার্শ্বস্থৌ পার্শ্বশোভিতৌ।
চতুর্হস্তত্সরুয়ুতৌ ব্যক্তহস্তদশায়তৌ ।। ৬.৭১.২১ ।।
71.22
রক্তকণ্ঠগুণো ধীরো মহাপর্বতসন্নিভঃ।
কালঃ কালমহাবক্ত্রো মেঘস্থ ইব ভাস্করঃ ।। ৬.৭১.২২ ।।
71.23
কাঞ্চনাঙ্গদনদ্ধাভ্যাং ভুজাভ্যামেষ শোভতে।
শৃঙ্গাভ্যামিব তুঙ্গাভ্যাং হিমবান্ পর্বতোত্তমঃ ।। ৬.৭১.২৩ ।।
71.24
কুণ্ডলাভ্যাং তু যস্যৈতদ্ভাতি বক্ত্রং শুভেক্ষণম্।
পুনর্বস্বন্তরগতং পূর্ণং বিম্বমিবৈন্দবম্ ।। ৬.৭১.২৪ ।।
71.25
আচক্ষ্ব মে মহাবাহো ত্বমেনং রাক্ষসোত্তমম্।
যং দৃষ্ট্বা বানরাঃ সর্বে ভয়ার্তা বিদ্রুতা দিশঃ ।। ৬.৭১.২৫ ।।
71.26
স পৃষ্টো রাজপুত্রেণ রামেণামিততেজসা।
আচচক্ষে মহাতেজা রাঘবায় বিভীষণঃ ।। ৬.৭১.২৬ ।।
71.27
দশগ্রীবো মহাতেজা রাজা বৈশ্রবণানুজঃ।
ভীমকর্মা মহোত্সাহো রাবণো রাক্ষসাধিপঃ ।। ৬.৭১.২৭ ।।
71.28
তস্যাসীদ্বীর্যবান্ পুত্রো রাবণপ্রতিমো রণে।
বৃদ্ধসেবী শ্রুতিধরঃ সর্বাস্ত্রবিদুষাং বরঃ ।। ৬.৭১.২৮ ।।
71.29
অশ্বপৃষ্ঠে রথে নাগে খড্গে ধনুষি কর্ষণে।
ভেদে সান্ত্বে চ দানে চ নয়ে মন্ত্রে চ সম্মতঃ ।। ৬.৭১.২৯ ।।
71.30
যস্য বাহূ সমাশ্রিত্য লঙ্কা বসতি নির্ভয়া।
তনয়ং ধান্যমালিন্যা অতিকায়মিমং বিদুঃ ।। ৬.৭১.৩০ ।।
71.31
এতেনারাধিতো ব্রহ্মা তপসা ভাবিতাত্মনা।
অস্ত্রাণি চাপ্যবাপ্তানি রিপবশ্চ পরাজিতাঃ ।। ৬.৭১.৩১ ।।
71.32
সুরাসুরৈরবধ্যত্বং দত্তমস্মৈ স্বয়ম্ভুবা।
এতচ্চ কবচং দিব্যং রথশ্চৈষো ঽর্কভাস্বরঃ ।। ৬.৭১.৩২ ।।
71.33
এতেন শতশো দেবা দানবাশ্চ পরাজিতাঃ।
রক্ষিতানি চ রক্ষাংসি যক্ষাশ্চাপি নিষূদিতাঃ ।। ৬.৭১.৩৩ ।।
71.34
বজ্রং বিষ্টম্ভিতং যেন বাণৈরিন্দ্রস্য ধীমতঃ।
পাশঃ সলিলরাজস্য রণে প্রতিহতস্তথা ।। ৬.৭১.৩৪ ।।
71.35
এষো ঽতিকায়ো বলবান্ রাক্ষসানামথর্ষভঃ।
রাবণস্য সুতো ধীমান্ দেবদানবদর্পহা ।। ৬.৭১.৩৫ ।।
71.36
তদস্মিন্ ক্রিয়তাং যত্নঃ ক্ষিপ্রং পুরুষপুঙ্গব।
পুরা বানরসৈন্যানি ক্ষয়ং নয়তি সায়কৈঃ ।। ৬.৭১.৩৬ ।।
71.37
ততো ঽতিকায়ো বলবান্ প্রবিশ্য হরিবাহিনীম্।
বিস্ফারয়ামাস ধনুর্ননাদ চ পুনঃপুনঃ ।। ৬.৭১.৩৭ ।।
71.38
তং ভীমবপুষং দৃষ্ট্বা রথস্থং রথিনাং বরম্।
অভিপেতুর্মহাত্মানো যে প্রধানা বনৌকসঃ ।। ৬.৭১.৩৮ ।।
71.39
কুমুদো দ্বিবিদো মৈন্দো নীলঃ শরভ এব চ।
পাদপৈর্গিরিশৃঙ্গৈশ্চ যুগপৎ সমভিদ্রবন্ ।। ৬.৭১.৩৯ ।।
71.40
তেষাং বৃক্ষাংশ্চ শৈলাংশ্চ শরৈঃ কাঞ্চনভূষণৈঃ।
অতিকায়ো মহাতেজাশ্চিচ্ছেদাস্ত্রবিদাং বরঃ ।। ৬.৭১.৪০ ।।
71.41
তাংশ্চৈব সর্বান্ স হরীন্ শরৈঃ সর্বায়সৈর্বলী।
বিব্যাধাভিমুখঃ সঙ্খ্যে ভীমকায়ো নিশাচরঃ ।। ৬.৭১.৪১ ।।
71.42
তে ঽর্দিতা বাণবর্ষেণ ভগ্নগাত্রাঃ প্লবঙ্গমাঃ।
ন শেকুরতিকায়স্য প্রতিকর্তুং মহারণে ।। ৬.৭১.৪২ ।।
71.43
তত্সৈন্যং হরিবীরাণাং ত্রাসয়ামাস রাক্ষসঃ।
মৃগয়ূথমিব ক্রুদ্ধো হরির্যৌবনদর্পিতঃ ।। ৬.৭১.৪৩ ।।
71.44
স রাক্ষসেন্দ্রো হরিসৈন্যমধ্যে নায়ুধ্যমানং নিজঘান কঞ্চিৎ।
উপেত্য রামং সধনুঃ কলাপী সগর্বিতং বাক্যমিদং বভাষে ।। ৬.৭১.৪৪ ।।
71.45
রথে স্থিতো ঽহং শরচাপপাণির্ন প্রাকৃতং কঞ্চন যোধয়ামি।
যশ্চাস্তি কশ্চিদ্ব্যবসায়য়ুক্তো দদাতু মে ক্ষিপ্রমিহাদ্য যুদ্ধম্ ।। ৬.৭১.৪৫ ।।
71.46
তত্তস্য বাক্যং ব্রুবতো নিশম্য চুকোপ সৌমিত্রিরমিত্রহন্তা।
অমৃষ্যমাণশ্চ সমুত্পপাত জগ্রাহ চাপং চ ততঃ স্ময়িত্বা ।। ৬.৭১.৪৬ ।।
71.47
ক্রুদ্ধঃ সৌমিত্রিরুত্পত্য তূণাদাক্ষিপ্য সায়কম্।
পুরস্তাদতিকায়স্য বিচকর্ষ মহদ্ধনুঃ ।। ৬.৭১.৪৭ ।।
71.48
পূরয়ন্ স মহীং শৈলানাকাশং সাগরং দিশঃ।
জ্যাশব্দো লক্ষ্মণস্যোগ্রস্ত্রাসয়ন্ রজনীচরান্ ।। ৬.৭১.৪৮ ।।
71.49
সৌমিত্রেশ্চাপনির্ঘোষং শ্রুত্বা প্রতিভয়ং তদা।
বিসিষ্মিয়ে মহাতেজা রাক্ষসেন্দ্রাত্মজো বলী ।। ৬.৭১.৪৯ ।।
71.50
অথাতিকায়ঃ কুপিতো দৃষ্ট্বা লক্ষ্মণমুত্থিতম্।
আদায় নিশিতং বাণমিদং বচনমব্রবীৎ ।। ৬.৭১.৫০ ।।
71.51
বালস্ত্বমসি সৌমিত্রে বিক্রমেষ্ববিচক্ষণঃ।
গচ্ছ কিং কালসদৃশং মাং যোধয়িতুমিচ্ছসি ।। ৬.৭১.৫১ ।।
71.52
নহি মদ্বাহুসৃষ্টানামস্ত্রাণাং হিমবানপি।
সোঢুমুত্সহতে বেগমন্তরিক্ষমথো মহী ।। ৬.৭১.৫২ ।।
71.53
সুখপ্রসুপ্তং কালাগ্নিং নিবোধয়িতুমিচ্ছসি।
ন্যস্যচাপং নিবর্তস্ব মা প্রাণান্ জহি মদ্গতঃ ।। ৬.৭১.৫৩ ।।
71.54
অথবা ত্বং প্রতিষ্টব্ধো ন নিবর্তিতুমিচ্ছসি।
তিষ্ঠ প্রাণান্ পরিত্যজ্য গমিষ্যসি যমক্ষয়ম্ ।। ৬.৭১.৫৪ ।।
71.55
পশ্য মে নিশিতান্ বাণানরিদর্পনিষূদনান্।
ঈশ্বরায়ুধসঙ্কাশাংস্তপ্তকাঞ্চনভূষণান্ ।। ৬.৭১.৫৫ ।।
71.56
এষ তে সর্পসঙ্কাশো বাণঃ পাস্যতি শোণিতম্।
মৃগরাজ ইব ক্রুদ্ধো নাগরাজস্য শোণিতম্।ইত্যেবমুক্ত্বা সঙ্ক্রুদ্ধঃ শরং ধনুষি সন্দধে ।। ৬.৭১.৫৬ ।।
71.57
শ্রুত্বা ঽতিকায়স্য বচঃ সরোষং সগর্বিতং সংয়তি রাজপুত্রঃ।
স সঞ্চুকোপাতিবলো বৃহচ্ছ্রীরুবাচ বাক্যং চ ততো মহার্থম্ ।। ৬.৭১.৫৭ ।।
71.58
ন বাক্যমাত্রেণ ভবান্ প্রধানো ন কত্থনাৎ সত্পুরুষা ভবন্তি।
ময়ি স্থিতে ধন্বিনি বাণপাণৌ নিদর্শয় স্বাত্মবলং দুরাত্মন্ ।। ৬.৭১.৫৮ ।।
71.59
কর্মণা সূচয়াত্মানং ন বিকত্থিতুমর্হসি।
পৌরুষেণ তু যো যুক্তঃ স তু শূর ইতি স্মৃতঃ ।। ৬.৭১.৫৯ ।।
71.60
সর্বায়ুধসমায়ুক্তো ধন্বী ত্বং রথমাস্থিতঃ।
শরৈর্বা যদি বাপ্যস্ত্রৈর্দর্শয়স্ব পরাক্রমম্ ।। ৬.৭১.৬০ ।।
71.61
ততঃ শিরস্তে নিশিতৈঃ পাতয়িষ্যাম্যহং শরৈঃ।
মারুতঃ কালসম্পক্বং বৃন্তাত্তালফলং যথা ।। ৬.৭১.৬১ ।।
71.62
অদ্য তে মামকা বাণাস্তপ্তকাঞ্চনভূষণাঃ।
পাস্যন্তি রুধিরং গাত্রাদ্বাণশল্যান্তরোত্থিতম্ ।। ৬.৭১.৬২ ।।