Utshovসর্গ 70
70.1
নরান্তকং হতং দৃষ্ট্বা চুক্রুশুর্নৈর্ঋতর্ষভাঃ।
দেবান্তকস্ত্রিমূর্ধা চ পৌলস্ত্যশ্চ মহোদরঃ ।। ৬.৭০.১ ।।
70.2
আরূঢো মেঘসঙ্কাশং বারণেন্দ্রং মহোদরঃ।
বালিপুত্রং মহাবীর্যমভিদুদ্রাব বীর্যবান্ ।। ৬.৭০.২ ।।
70.3
ভ্রাতৃব্যসনসন্তপ্তস্তথা দেবান্তকো বলী।
আদায় পরিঘং দীপ্তমঙ্গদং সমভিদ্রবৎ ।। ৬.৭০.৩ ।।
70.4
রথমাদিত্যসঙ্কাশং যুক্তং পরমবাজিভিঃ।
আস্থায় ত্রিশিরা বীরো বালিপুত্রমথাভ্যয়াৎ ।। ৬.৭০.৪ ।।
70.5
স ত্রিভির্দেবদর্পঘ্নৈর্নৈর্ঋতেন্দ্রৈরভিদ্রুতঃ।
বৃক্ষমুত্পাটয়ামাস মহাবিটপমঙ্গদঃ ।। ৬.৭০.৫ ।।
70.6
দেবান্তকায় তং বীরশ্চিক্ষেপ সহসা ঽঙ্গদঃ।
মহাবৃক্ষং মহাশাখং শক্রো দীপ্তমিবাশনিম্ ।। ৬.৭০.৬ ।।
70.7
ত্রিশিরাস্তং প্রচিচ্ছেদ শরৈরাশীবিষোপমৈঃ।
স বৃক্ষং কৃত্তমালোক্য উত্পপাত তদা ঽঙ্গদঃ ।। ৬.৭০.৭ ।।
70.8
স ববর্ষ ততো বৃক্ষান্ শৈলাংশ্চ কপিকুঞ্জরঃ।
তান্ প্রচিচ্ছেদ সঙ্ক্রুদ্ধস্ত্রিশিরা নিশিতৈঃ শরৈঃ ।। ৬.৭০.৮ ।।
70.9
পরিঘাগ্রেণ তান্ বৃক্ষান্ বভঞ্জ চ সুরান্তকঃ।
ত্রিশিরাশ্চাঙ্গদং বীরমবিদুদ্রাব সায়কৈঃ ।। ৬.৭০.৯ ।।
70.10
গজেন সমভিদ্রুত্য বালিপুত্রং মহোদরঃ।
জঘানোরসি সঙ্ক্রুদ্ধস্তোমরৈর্বজ্রসন্নিভৈঃ ।। ৬.৭০.১০ ।।
70.11
দেবান্তকশ্চ সঙ্ক্রুদ্ধঃ পরিঘেণ তদা ঽঙ্গদম্।
উপগম্যাভিহত্যাশু ব্যপচক্রাম বেগবান্ ।। ৬.৭০.১১ ।।
70.12
স ত্রিভির্নৈর্ঋতশ্রেষ্ঠৈর্যুগপৎ সমভিদ্রুতঃ।
ন বিব্যথে মহাতেজা বালিপুত্রঃ প্রতাপবান্ ।। ৬.৭০.১২ ।।
70.13
স বেগবান্ মহাবেগং কৃত্বা পরমদুর্জয়ঃ।
তলেন ভৃশমুত্পত্য জঘানাস্য মহাগজম্ ।। ৬.৭০.১৩ ।।
70.14
তস্য তেন প্রহারেণ নাগরাজস্য সংয়ুগে।
পেততুর্লোচনে তস্য বিননাদ স বারণঃ ।। ৬.৭০.১৪ ।।
70.15
বিষাণং চাস্য নিষ্কৃষ্য বালিপুত্রো মহাবলঃ।
দেবান্তকমভিপ্লুত্য তাডয়ামাস সংয়ুগে ।। ৬.৭০.১৫ ।।
70.16
স বিহ্বলিতসর্বাঙ্গো বাতোদ্ধূত ইব দ্রুমঃ।
লাক্ষারসসবর্ণং চ সুস্রাব রুধিরং মুখাৎ ।। ৬.৭০.১৬ ।।
70.17
অথাশ্বাস্য মহাতেজাঃ কৃচ্ছ্রাদ্দেবান্তকো বলী।
আবিধ্য পরিঘং ঘোরমাজঘান তদা ঽঙ্গদম্ ।। ৬.৭০.১৭ ।।
70.18
পরিঘাভিহতশ্চাপি বানরেন্দ্রাত্মজস্তদা।
জানুভ্যাং পতিতো ভূমৌ পুনরেবোত্পপাত হ ।। ৬.৭০.১৮ ।।
70.19
তমুত্পতন্তং ত্রিশিরাস্ত্রিভির্বাণৈরজিহ্মগৈঃ।
ঘোরৈর্হরিপতেঃ পুত্রং ললাটে ঽভিজঘান হ ।। ৬.৭০.১৯ ।।
70.20
ততো ঽঙ্গদং পরিক্ষিপ্তং ত্রিভির্নৈর্ঋতপুঙ্গবৈঃ।
হনুমানপি বিজ্ঞায় নীলশ্চাপি প্রতস্থতুঃ ।। ৬.৭০.২০ ।।
70.21
ততশ্চিক্ষেপ শেলাগ্রং নীলস্ত্রিশিরসে তদা।
তদ্রাবণসুতো ধীমান্ বিভেদ নিশিতৈঃ শরৈঃ ।। ৬.৭০.২১ ।।
70.22
তদ্বাণশতনির্ভিন্নং বিদারিতশিলাতলম্।
সবিস্ফুলিঙ্গং সজ্বালং নিপপাত গিরঃ শিরঃ ।। ৬.৭০.২২ ।।
70.23
ততো জৃম্ভিতমালোক্য হর্ষাদ্দেবান্তকস্তদা।
পরিঘেণাভিদুদ্রাব মারুতাত্মজমাহবে ।। ৬.৭০.২৩ ।।
70.24
তমাপতন্তমুত্প্লুত্য হনুমান্ মারুতাত্মজঃ।
আজঘান তদা মূর্ধ্নি বজ্রকল্পেন মুষ্টিনা ।। ৬.৭০.২৪ ।।
70.25
শিরসি প্রহরন্ বীরস্তদা বায়ুসুতো বলী।
নাদেনাকম্পয়চ্চৈব রাক্ষসান্ স মহাকপিঃ ।। ৬.৭০.২৫ ।।
70.26
স মুষ্টিনিষ্পিষ্টবিকীর্ণমূর্ধা নির্বান্তদন্তাক্ষিবিলম্বিজিহ্বঃ।
দেবান্তকো রাক্ষসরাজসূনুর্গতাসুরুর্ব্যাং সহসা পপাত ।। ৬.৭০.২৬ ।।
70.27
তস্মিন্ হতে রাক্ষসয়োধমুখ্যে মহাবলে সংয়তি দেবশত্রৌ।
ক্রুদ্ধস্ত্রিমূর্ধা নিশিতাগ্রমুগ্রং ববর্ষ নীলোরসি বাণবর্ষম্ ।। ৬.৭০.২৭ ।।
70.28
মহোদরস্তু সঙ্ক্রুদ্ধঃ কুঞ্জরং পর্বতোপমম্।
ভূয়ঃ সমধিরুহ্যাশু মন্দরং রশ্মিমানিব ।। ৬.৭০.২৮ ।।
70.29
ততো বাণময়ং বর্ষং নীলস্যোরস্যপাতয়ৎ।
গিরৌ বর্ষং তডিচ্চক্রচাপবানিব তোয়দঃ ।। ৬.৭০.২৯ ।।
70.30
ততঃ শরৌঘৈরভিবর্ষ্যমাণো বিভিন্নগাত্রঃ কপিসৈন্যপালঃ।
নীলো বভূবাথ নিসৃষ্টগাত্রো বিষ্টম্ভিতস্তেন মহাবলেন ।। ৬.৭০.৩০ ।।
70.31
ততস্তু নীলঃ প্রতিলভ্য সঞ্জ্ঞাং শৈলং সমুত্পাট্য সবৃক্ষষণ্ডম্।
ততঃ সমুত্পত্য ভৃশোগ্রবেগো মহোদরং তেন জঘান মূর্ধ্নি ।। ৬.৭০.৩১ ।।
70.32
ততঃ স শৈলেন্দ্রনিপাতভগ্নো মহোদরস্তেন মহাদ্বিপেন।
বিপোথিতো ভূমিতলে গতাসুঃ পপাত বজ্রাভিহতো যথা ঽদ্রিঃ ।। ৬.৭০.৩২ ।।
70.33
পিতৃব্যং নিহতং দৃষ্ট্বা ত্রিশিরাশ্চাপমাদদে।
হনুমন্তং চ সঙ্ক্রুদ্ধো বিব্যাধ নিশিতৈঃ শরৈঃ ।। ৬.৭০.৩৩ ।।
70.34
স বায়ুসূনুঃ কুপিতশ্চিক্ষেপ শিখরং গিরেঃ।
ত্রিশিরাস্তচ্ছরৈস্তীক্ষ্ণৈর্বিভেদ বহুধা বলী ।। ৬.৭০.৩৪ ।।
70.35
তদ্ব্যর্থং শিখরং দৃষ্ট্বা দ্রুমবর্ষং মহাকপিঃ।
বিসসর্জ রণে তস্মিন্ রাবণস্য সুতং প্রতি ।। ৬.৭০.৩৫ ।।
70.36
তমাপন্তমাকাশে দ্রুমবর্ষং প্রতাপবান্।
ত্রিশিরা নিসিতৈর্বাণৈশ্চিচ্ছেদ চ ননাদ চ ।। ৬.৭০.৩৬ ।।
70.37
ততো হনূমানুত্প্লুত্য হয়াংত্রিশিরসস্তদা।
বিদদার নখৈঃ ক্রুদ্ধো গজেন্দ্রং মৃগরাডিব ।। ৬.৭০.৩৭ ।।
70.38
অথ শক্তিং সমাদায় কালরাত্রিমিবান্তকঃ।
চিক্ষেপানিলপুত্রায় ত্রিশিরা রাবণাত্মজঃ ।। ৬.৭০.৩৮ ।।
70.39
দিবঃ ক্ষিপ্তামিবোল্কাং তাং শক্তিং ক্ষিপ্তামসঙ্গতাম্।
গৃহীত্বা হরিশার্দূলো বভঞ্জ চ ননাদ চ ।। ৬.৭০.৩৯ ।।
70.40
তাং দৃষ্ট্বা ঘোরসঙ্কাশাং শক্তিং ভগ্নাং হনূমতা।
প্রহৃষ্টা বানরগণা বিনেদুর্জলদা ইব ।। ৬.৭০.৪০ ।।
70.41
ততঃ খড্গং সমুদ্যম্য ত্রিশিরা রাক্ষসোত্তমঃ।
নিজঘান তদা ব্যূঢে বায়ুপুত্রস্য বক্ষসি ।। ৬.৭০.৪১ ।।
70.42
খড্গপ্রহারাভিহতো হনূমান্ মারুতাত্মজঃ।
আজঘান ত্রিশিরসং তলেনোরসি বীর্যবান্ ।। ৬.৭০.৪২ ।।
70.43
স তলাভিহতস্তেন স্রস্তহস্তায়ুধো ভুবি।
নিপপাত মহাতেজাস্ত্রিশিরাস্ত্যক্তচেতনঃ ।। ৬.৭০.৪৩ ।।
70.44
স তস্য পততঃ খড্গং সমাচ্ছিদ্য মহাকপিঃ।
ননাদ গিরিসঙ্কাশস্ত্রাসয়ন্ সর্বনৈর্ঋতান্ ।। ৬.৭০.৪৪ ।।
70.45
অমৃষ্যমাণস্তং ঘোষমুত্পপাত নিশাচরঃ।
উত্পত্য চ হমূমন্তং তাডয়ামাস মুষ্টিনা ।। ৬.৭০.৪৫ ।।
70.46
তেন মুষ্টিপ্রহারেণ সঞ্চুকোপ মহাকপিঃ।
কুপিতশ্চ নিজগ্রাহ কিরীটে রাক্ষসর্ষভম্ ।। ৬.৭০.৪৬ ।।
70.47
স তস্য শীর্ষাণ্যসিনা শিতেন কিরীটজুষ্টানি সকুণ্ডলানি।
ক্রুদ্ধঃ প্রচিচ্ছেদ সুতো ঽনিলস্য ত্বষ্টুঃ সুতস্যেব শিরাংসি শক্রঃ ।। ৬.৭০.৪৭ ।।
70.48
তান্যায়তাক্ষাণ্যগসন্নিভানি প্রদীপ্তবৈশ্বানরলোচনানি।
পেতুঃ শিরাংসীন্দ্ররিপোর্ধরণ্যাং জ্যোতীংষি মুক্তানি যথা ঽর্কমার্গাৎ ।। ৬.৭০.৪৮ ।।
70.49
তস্মিন্ হতে দেবরিপৌ ত্রিশীর্ষে হনূমতা শক্রপরাক্রমেণ।
নেদুঃ প্লবঙ্গাঃ প্রচচাল ভূমী রক্ষাংস্যথো দুদ্রুবিরে সমন্তাৎ ।। ৬.৭০.৪৯ ।।
70.50
হতং ত্রিশিরসং দৃষ্ট্বা তথৈব চ মহোদরম্।
হতৌ প্রেক্ষ্য দুরাধর্ষৌ দেবান্তকনরান্তকৌ ।। ৬.৭০.৫০ ।।
70.51
চুকোপ পরমামর্ষী মত্তো রাক্ষসপুঙ্গবঃ।
জগ্রাহার্চিষ্মতীং ঘোরাং গদাং সর্বায়সীং শুভাম্ ।। ৬.৭০.৫১ ।।
70.52
হেমপট্টপরিক্ষিপ্তাং মাংসশোণিতফেনিলাম্।
বিরাজমানাং বপুষা শত্রুশোণিতরঞ্জিতাম্ ।। ৬.৭০.৫২ ।।
70.53
তেজসা সম্প্রদীপ্তাগ্রাং রক্তমাল্যাবিভূষিতাম্।
ঐরাবতমহাপদ্মসার্বভৌমভয়াবহাম্ ।। ৬.৭০.৫৩ ।।
70.54
গদামাদায় সঙ্ক্রুদ্ধো মত্তো রাক্ষসপুঙ্গবঃ।
হরীন্ সমভিদুদ্রাব যুগান্তাগ্নিরিব জ্বলন্ ।। ৬.৭০.৫৪ ।।
70.55
অথর্ষভঃ সমুত্পত্য বানরো রাবণানুজম্।
মত্তানীকমুপাগম্য তস্থৌ তস্যাগ্রতো বলী ।। ৬.৭০.৫৫ ।।
70.56
তং পুরস্তাৎ স্থিতং দৃষ্ট্বা বানরং পর্বতোপমম্।
আজঘানোরসি ক্রুদ্ধো গদয়া বজ্রকল্পয়া ।। ৬.৭০.৫৬ ।।
70.57
স তয়া ঽভিহতস্তেন গদয়া বানরর্ষভঃ।
ভিন্নবক্ষাঃ সমাধূতঃ সুস্ত্রাব রুধিরং বহু ।। ৬.৭০.৫৭ ।।
70.58
স সম্প্রাপ্য চিরাৎ সঞ্জ্ঞামৃষভো বানরর্ষভঃ।
অবিদুদ্রাব বেগেন গদাং তস্য মহাত্মনঃ ।। ৬.৭০.৫৮ ।।
70.59
গৃহীত্বা তাং গদাং ভীমামাবিধ্য চ পুনঃপুনঃ।
মত্তানীকং মহাত্মানং জঘান রণমূর্ধনি ।। ৬.৭০.৫৯ ।।
70.60
স স্বয়া গদয়া ভগ্নো বিশীর্ণদশনেক্ষণঃ।
নিপপাত ততো মত্তো বজ্রাহত ইবাচলঃ ।। ৬.৭০.৬০ ।।
70.61
বিশীর্ণনয়নে ভূমৌ গতসত্ত্বে গতায়ুষি।
পতিতে রাক্ষসে তস্মিন্ বিদ্রুতং রাক্ষসং বলম্ ।। ৬.৭০.৬১ ।।
70.62
তস্মিন্ হতে ভ্রাতরি রাবণস্য তন্নৈর্ঋতানাং বলমর্ণবাভম্।
ত্যক্তায়ুধং কেবলজীবিতার্থং দুদ্রাব ভিন্নার্ণবসন্নিকাশম্ ।। ৬.৭০.৬২ ।।
70.63
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে সপ্ততিতমঃ সর্গঃ ।
। ৭০ ।।