Utshovসর্গ 69
69.1
এবং বিলপমানস্য রাবণস্য দুরাত্মনঃ।
শ্রুত্বা শোকাভিতপ্তস্য ত্রিশিরা বাক্যমব্রবীৎ ।। ৬.৬৯.১ ।।
69.2
এবমেব মহাবীর্যো হতো নস্তাতমধ্যমঃ।
ন তু সত্পুরুষা রাজন্ বিলপন্তি যথা ভবান্ ।। ৬.৬৯.২ ।।
69.3
নূনং ত্রিভুবনস্যাপি পর্যাপ্তস্ত্বমসি প্রভো।
স কস্মাৎ প্রাকৃত ইব শোচস্যাত্মানমীদৃশম্ ।। ৬.৬৯.৩ ।।
69.4
ব্রহ্মদত্তা ঽস্তি তে শক্তিঃ কবচঃ সায়কো ধনুঃ।
সহস্রখরসংয়ুক্তো রথো মেঘস্বনো মহান্ ।। ৬.৬৯.৪ ।।
69.5
ত্বয়া ঽসকৃদ্বিশস্ত্রেণ বিশস্তা দেবদানবাঃ।
স সর্বায়ুধসম্পন্নো রাঘবং শাস্তুমর্হসি ।। ৬.৬৯.৫ ।।
69.6
কামং তিষ্ঠ মহারাজ নির্গমিষ্যাম্যহং রণম্।
উদ্ধরিষ্যামি তে শত্রূন্ গরুডঃ পন্নগানিব ।। ৬.৬৯.৬ ।।
69.7
শম্বরো দেবরাজেন নরকো বিষ্ণুনা যথা।
তথা ঽদ্য শয়িতা রামো ময়া যুধি নিপাতিতঃ ।। ৬.৬৯.৭ ।।
69.8
শ্রুত্বা ত্রিশিরসো বাক্যং রাবণো রাক্ষসাধিপঃ।
পুনর্জাতমিবাত্মানং মন্যতে কালচোদিতঃ ।। ৬.৬৯.৮ ।।
69.9
শ্রুত্বা ত্রিশিরসো বাক্যং দেবান্তকনরান্তকৌ।
অতিকায়শ্চ তেজস্বী বভূবুর্যুদ্ধহর্ষিতাঃ ।। ৬.৬৯.৯ ।।
69.10
ততো ঽহমহমিত্যেব গর্জন্তো নৈর্ঋতর্ষভাঃ।
রাবণস্য সুতা বীরাঃ শক্রতুল্যপরাক্রমাঃ ।। ৬.৬৯.১০ ।।
69.11
অন্তরিক্ষগতাঃ সর্বে সর্বে মায়াবিশারদাঃ।
সর্বে ত্রিদশদর্পঘ্নাঃ সর্বে চ রণদুর্জয়াঃ ।। ৬.৬৯.১১ ।।
69.12
সর্বে সুবলসম্পন্নাঃ সর্বে বিকীর্ণকীর্তয়ঃ।
সর্বে সমরমাসাদ্য ন শ্রূয়ন্তে পরাজিতাঃ।দেবৈরপি সগন্ধর্বৈঃ সকিন্নরমহোরগৈঃ ।। ৬.৬৯.১২ ।।
69.13
সর্বে চ বিদুষো বীরাঃ সর্বে যুদ্ধবিশারদাঃ।
সর্বে প্রবরবিজ্ঞানাঃ সর্বে লব্ধবরাস্তথা ।। ৬.৬৯.১৩ ।।
69.14
স তৈস্তদা ভাস্করতুল্যবর্চসৈঃ সুতৈর্বৃতঃ শত্রুবলপ্রমর্দনৈঃ।
ররাজ রাজা মঘবান্ যথা ঽমরৈর্বৃতো মহাদানবদর্পনাশনৈঃ ।। ৬.৬৯.১৪ ।।
69.15
স পুত্রান্ সম্পরিষ্বজ্য ভূষয়িত্বা চ ভূষণৈঃ।
আশীর্ভিশ্চ প্রশস্তাভিঃ প্রেষয়ামাস সংয়ুগে ।। ৬.৬৯.১৫ ।।
69.16
যুদ্ধোন্মত্তং চ মত্তং চ ভ্রাতরৌ চাপি রাবণঃ।
রক্ষণার্থং কুমারাণাং প্রেষয়ামাস সংয়ুগে ।। ৬.৬৯.১৬ ।।
69.17
তে ঽভিবাদ্য মহাত্মানং রাবণং রিপুরাবণম্।
কৃত্বা প্রদক্ষিণং চৈব মহাকায়াঃ প্রতস্থিরে ।। ৬.৬৯.১৭ ।।
69.18
সর্বৌষধীভির্গন্ধৈশ্চ সমালভ্য মহাবলাঃ।
নির্জগ্মুর্নৈর্ঋতশ্রেষ্ঠাঃ ষডেতে যুদ্ধকাঙ্ক্ষিণঃ ।। ৬.৬৯.১৮ ।।
69.19
ত্রিশিরাশ্চাতিকায়শ্চ দেবান্তকনরান্তকৌ।
মহোদরমহাপার্শ্বো নির্জগ্মুঃ কালচোদিতাঃ ।। ৬.৬৯.১৯ ।।
69.20
ততঃ সুদর্শনং নাম নীলজীমূতসন্নিভম্।
ঐরাবতকুলে জাতমারুরোহ মহোদরঃ ।। ৬.৬৯.২০ ।।
69.21
সর্বায়ুধসমায়ুক্তং তূণীভিশ্চ স্বলঙ্কৃতম্।
ররাজ গজমাস্থায় সবিতেবাস্তমূর্ধনি ।। ৬.৬৯.২১ ।।
69.22
হয়োত্তমসমায়ুক্তং সর্বায়ুধসমাকুলম্।
আরুরোহ রথশ্রেষ্ঠং ত্রিশিরা রাবণাত্মজঃ ।। ৬.৬৯.২২ ।।
69.23
ত্রিশিরা রথমাস্থায় বিররাজ ধনুর্ধরঃ।
সবিদ্যুদুল্কঃ শৈলাগ্রে সেন্দ্রচাপ ইবাম্বুদঃ ।। ৬.৬৯.২৩ ।।
69.24
ত্রিভিঃ কিরীটৈঃ শুশুভে ত্রিশিরাঃ স রথোত্তমে।
হিমবানিব শৈলেন্দ্রস্ত্রিভিঃ কাঞ্চনপর্বতৈঃ ।। ৬.৬৯.২৪ ।।
69.25
অতিকায়ো ঽপি তেজস্বী রাক্ষসেন্দ্রসুতস্তদা।
আরুরোহ রথশ্রেষ্ঠং শ্রেষ্ঠঃ সর্বধনুষ্মতাম্ ।। ৬.৬৯.২৫ ।।
69.26
সুচক্রাক্ষং সুসংয়ুক্তং স্বনুকর্ষং সুকূবরম্।
তূণীবাণাসনৈর্দীপ্তং প্রাসাসিপরিঘাকুলম্ ।। ৬.৬৯.২৬ ।।
69.27
স কাঞ্চনবিচিত্রেণ মুকুটেন বিরাজতা।
ভূষণৈশ্চ বভৌ মেরুঃ কিরণৈরিব ভাসয়ন্ ।। ৬.৬৯.২৭ ।।
69.28
স ররাজ রথে তস্মিন্ রাজসূনুর্মহাবলঃ।
বৃতো নৈর্ঋতশার্দূলৈর্বজ্রপাণিরিবামরৈঃ ।। ৬.৬৯.২৮ ।।
69.29
হয়মুচ্চৈশ্শ্রবপ্রখ্যং শ্বেতং কনকভূষণম্।
মনোজবং মহাকায়মারুরোহ নরান্তকঃ ।। ৬.৬৯.২৯ ।।
69.30
গৃহীত্বা প্রাসমুল্কাভং বিররাজ নরান্তকঃ।
শক্তিমাদায় তেজস্বী গুহঃ শিখিগতো যথা ।। ৬.৬৯.৩০ ।।
69.31
দেবান্তকঃ সমাদায় পরিঘং বজ্রভূষণম্।
পরিগৃহ্য গিরীং দোর্ভ্যাং বপুর্বিষ্ণোর্বিডম্বয়ন্ ।। ৬.৬৯.৩১ ।।
69.32
মহাপার্শ্বো মহাকায়ো গদামাদায় বীর্যবান্।
বিররাজ গদাপাণিঃ কুবের ইব সংয়ুগে ।। ৬.৬৯.৩২ ।।
69.33
প্রতস্থিরে মহাত্মানো বলৈরপ্রতিমৈর্বৃতাঃ।
সুরা ইবামরাবত্যা বলৈরপ্রতিমৈর্বৃতাঃ ।। ৬.৬৯.৩৩ ।।
69.34
তান্ গজৈশ্চ তুরঙ্গৈশ্চ রথৈশ্চাম্বুদনিস্বনৈঃ।
অনুজগ্মুর্মহাত্মানো রাক্ষসাঃ প্রবরায়ুধাঃ ।। ৬.৬৯.৩৪ ।।
69.35
তে বিরেজুর্মহাত্মানঃ কুমারাঃ সূর্যবর্চসঃ।
কিরীটিনঃ শ্রিয়া জুষ্টা গ্রহা দীপ্তা ইবাম্বরে ।। ৬.৬৯.৩৫ ।।
69.36
প্রগৃহীতা বভৌ তেষাং শস্ত্রাণামাবলিঃ সিতা।
শারদাভ্রপ্রতীকাশা হংসাবলিরিবাম্বরে ।। ৬.৬৯.৩৬ ।।
69.37
মরণং বাপি নিশ্চিত্য শত্রূণাং বা পরাজয়ম্ ।
। ৬.৬৯.৩৭ ।।
69.38
ইতি কৃত্বা মতিং বীরা নির্জগ্মুঃ সংয়ুগার্থিনঃ ।
। ৬.৬৯.৩৮ ।।
69.39
জগর্জুশ্চ প্রণেদুশ্চ চিক্ষিপুশ্চাপি সায়কান্।
জগৃহুশ্চাপি তে বীরা নির্যান্তো যুদ্ধদুর্মদাঃ ।। ৬.৬৯.৩৯ ।।
69.40
ক্ষ্বেলিতাস্ফোটনিনদৈশ্চচাল চ বসুন্ধরা।
রক্ষসাং সিংহনাদৈশ্চ পুস্ফোটেব তদা ঽম্বরম্ ।। ৬.৬৯.৪০ ।।
69.41
তে ঽভিনিষ্ক্রম্য মুদিতা রাক্ষসেন্দ্রা মহাবলাঃ।
দদৃশুর্বানরানীকং সমুদ্যতশিলানগম্ ।। ৬.৬৯.৪১ ।।
69.42
হরয়ো ঽপি মহাত্মানো দদৃশুর্নৈর্ঋতং বলম্।
হস্ত্যশ্বরথসম্বাধং কিঙ্কিণীশতনাদিতম্ ।। ৬.৬৯.৪২ ।।
69.43
নীলজীমূতসঙ্কাশং সমুদ্যতমহায়ুধম্।
দীপ্তানলপবিপ্রখ্যৈঃ সর্বতো নৈর্ঋতৈর্বৃতম্ ।। ৬.৬৯.৪৩ ।।
69.44
তদ্ দৃষ্ট্বা বলমায়ান্তং লব্ধলক্ষাঃ প্লবঙ্গমাঃ।
সমুদ্যতমহাশৈলাঃ সম্প্রণেদুর্মহাবলাঃ।অমৃষ্যমাণা রক্ষাংসি প্রতিনর্দন্তি বানরাঃ ।। ৬.৬৯.৪৪ ।।
69.45
ততঃ সমুদ্ঘুষ্টরবং নিশম্য রক্ষোগণা বানরয়ূথপানাম্।
অমৃষ্যমাণাঃ পরহর্ষমুগ্রং মহাবলা ভীমতরং বিনেদুঃ ।। ৬.৬৯.৪৫ ।।
69.46
তে রাক্ষসবলং ঘোরং প্রবিশ্য হরিয়ূথপাঃ।
বিচেরুরুদ্যতৈঃ শৈলৈর্নগাঃ শিখরিণো যথা ।। ৬.৬৯.৪৬ ।।
69.47
কেচিদাকাশমাবিশ্য কেচিদুর্ব্যাং প্লবঙ্গমাঃ।
রক্ষস্সৈন্যেষু সঙ্ক্রুদ্ধাশ্চেরুর্দ্রুমশিলায়ুধাঃ ।। ৬.৬৯.৪৭ ।।
69.48
দ্রুমাংশ্চ বিপুলস্কন্ধান্ গৃহ্য বানরপুঙ্গবাঃ।
তদ্যুদ্ধমভবদ্ ঘোরং রক্ষোবানরসঙ্কুলম্ ।। ৬.৬৯.৪৮ ।।
69.49
তে পাদপশিলাশৈলৈশ্চক্রুর্বৃষ্টিমনূপমাম্।
বাণৌঘৈর্বায়মাণাশ্চ হরয়ো ভীমবিক্রমাঃ ।। ৬.৬৯.৪৯ ।।
69.50
সিংহনাদান্ বিনেদুশ্চ রণে বানররাক্ষসাঃ।
শিলাভিশ্চূর্ণয়ামাসুর্যাতুধানান্ প্লবঙ্গমাঃ ।। ৬.৬৯.৫০ ।।
69.51
নিজঘ্নুঃ সংয়ুগে ক্রুদ্ধাঃ কবচাভরণাবৃতান্।
কেচিদ্রথগতান্ বীরান্ গজবাজিগতানপি ।। ৬.৬৯.৫১ ।।
69.52
নিজঘ্নুঃ সহসা ঽ ঽপ্লুত্য যাতুধানান্ প্লবঙ্গমাঃ।
শৈলশৃঙ্গাচিতাঙ্গাশ্চ মুষ্টিভির্বান্তলোচনাঃ ।। ৬.৬৯.৫২ ।।
69.53
চেরুঃ পেতুশ্চ নেদুশ্চ তত্র রাক্ষসপুঙ্গবাঃ।
রাক্ষসাশ্চ শরৈস্তীক্ষ্ণৈর্বিভিদুঃ কপিকুঞ্জরান্ ।। ৬.৬৯.৫৩ ।।
69.54
শূলমুদ্গরখড্গৈশ্চ জঘ্নুঃ প্রাসৈশ্চ শক্তিভিঃ।
অন্যোন্যং পাতয়ামাসুঃ পরস্পরজয়ৈষিণঃ ।। ৬.৬৯.৫৪ ।।
69.55
রিপুশোণিতদিগ্ধাঙ্গাস্তত্র বানররাক্ষসাঃ।
ততঃ শৈলৈশ্চ খড্গৈশ্চ বিসৃষ্টৈর্হরিরাক্ষসৈঃ ।। ৬.৬৯.৫৫ ।।
69.56
মুহূর্তেনাবৃতা ভূমিরভবচ্ছোণিতাপ্লুতা।
বিকীর্ণপর্বতাকারৈ রক্ষোভিররিমর্দনৈঃ।আসীদ্বসুমতী পূর্ণা তদা যুদ্ধমদান্বিতৈঃ ।। ৬.৬৯.৫৬ ।।
69.57
আক্ষিপ্তাঃ ক্ষিপ্যমাণাশ্চ ভগ্নশূলাশ্চ বানরৈঃ।
পুনরঙ্গৈস্তথা চক্রুরাসন্না যুদ্ধমদ্ভুতম্ ।। ৬.৬৯.৫৭ ।।
69.58
বানরান্ বানরৈরেব জঘ্নুস্তে রজনীচরাঃ।
রাক্ষসান্ রাক্ষসৈরেব জঘ্নুস্তে বানরা অপি ।। ৬.৬৯.৫৮ ।।
69.59
আক্ষিপ্য চ শিলাস্তেষাং নিজঘ্নূ রাক্ষসা হরীন্।
তেষাং চাচ্ছিদ্য শস্ত্রাণি জঘ্নূ রক্ষাংসি বানরাঃ ।। ৬.৬৯.৫৯ ।।
69.60
নিজঘ্নুঃ শৈলশূলাস্ত্রৈর্বিভিদুশ্চ পরস্পরম্।
সিংহনাদান্ বিনেদুশ্চ রণে বানররাক্ষসাঃ ।। ৬.৬৯.৬০ ।।
69.61
ছিন্নবর্মতনুত্রাণা রাক্ষসা বানরৈর্হতাঃ।
রুধিরং প্রস্রুতাস্তত্র রসসারমিব দ্রুমাঃ ।। ৬.৬৯.৬১ ।।
69.62
রথেন চ রথং চাপি বারণেনৈব বারণম্ ।
। ৬.৬৯.৬২ ।।
69.63
হয়েন চ হয়ং কেচিন্নিজঘ্নুর্বানরা রণে।
প্রহৃষ্টমনসঃ সর্বে প্রগৃহীতমনঃশিলাঃ ।। ৬.৬৯.৬৩ ।।
69.64
হরয়ো রাক্ষসান্ জঘ্নুর্দ্রুমৈশ্চ বহুশাখিভিঃ।
তদ্যুদ্ধমভবদ্ ঘোরং রক্ষোবানরসঙ্কুলম্ ।। ৬.৬৯.৬৪ ।।
69.65
ক্ষুরপ্রৈরর্ধচন্দ্রৈশ্চ ভল্লৈশ্চ নিশিতৈঃ শরৈঃ।
রাক্ষসা বানরেন্দ্রাণাং চিচ্ছিদুঃ পাদপান্ শিলাঃ ।। ৬.৬৯.৬৫ ।।
69.66
বিকীর্ণৈঃ পর্বতাগ্রৈশ্চ দ্রুমৈশ্ছিন্নৈশ্চ সংয়ুগে।
হতৈশ্চ কপিরক্ষোবির্দুর্গমা বসুধা ঽভবৎ ।। ৬.৬৯.৬৬ ।।
69.67
তে বানরা গর্বিতহৃষ্টচেষ্টাঃ সঙ্গ্রামমাসাদ্য ভয়ং বিমুচ্য।
যুদ্ধং তু সর্বে সহ রাক্ষসৈস্তৈর্নানায়ুধাশ্চক্রুরদীনসত্ত্বাঃ ।। ৬.৬৯.৬৭ ।।
69.68
তস্মিন্ প্রবৃত্তে তুমুলে বিমর্দে প্রহৃষ্যমাণেষু বলীমুখেষু।
নিপাত্যমানেষু চ রাক্ষসেষু মহর্ষয়ো দেবগণাশ্চ নেদুঃ ।। ৬.৬৯.৬৮ ।।
69.69
ততো হয়ং মারুততুল্যবেগমারুহ্য শক্তিং নিশিতাং প্রগৃহ্য।
নরান্তকো বানররাজসৈন্যং মহার্ণবং মীন ইবাবিবেশ ।। ৬.৬৯.৬৯ ।।
69.70
স বানরান্ সপ্ত শতানি বীরঃ প্রাসেন দীপ্তেন বিনির্বিভেদ।
একক্ষণেনেন্দ্ররিপুর্মহাত্মা জঘান সৈন্যং হরিপুঙ্গবানাম্ ।। ৬.৬৯.৭০ ।।
69.71
দদৃশুশ্চ মহাত্মানং হয়পৃষ্ঠে প্রতিষ্ঠিতম্।
চরন্তং হরিসৈন্যেষু বিদ্যাধরমহর্ষয়ঃ ।। ৬.৬৯.৭১ ।।
69.72
স তস্য দদৃশো মার্গো মাংসশোণিতকর্দমঃ।
পতিতৈঃ পর্বতাকারৈর্বানরৈরভিসংবৃতঃ ।। ৬.৬৯.৭২ ।।
69.73
যাবদ্বিক্রমিতুং বুদ্ধিং চক্রুঃ প্লবগপুঙ্গবাঃ।
তাবদেতানতিক্রম্য নির্বিভেদ নরান্তকঃ ।। ৬.৬৯.৭৩ ।।
69.74
জ্বলন্তং প্রাসমুদ্যম্য সঙ্গ্রামাগ্রে নরান্তকঃ।
দদাহ হরিসৈন্যানি বনানীব বিভাবসুঃ ।। ৬.৬৯.৭৪ ।।
69.75
যাবদুত্পাটয়ামাসুর্বৃক্ষান্ শৈলান্ বনৌকসঃ।
তাবৎ প্রাসহতাঃ পেতুর্বজ্রকৃত্তা ইবাচলাঃ ।। ৬.৬৯.৭৫ ।।
69.76
দিক্ষু সর্বাসু বলবান্ বিচচার নরান্তকঃ।
প্রমৃদ্নন্ সর্বতো যুদ্ধে প্রাবৃট্কালে যথা ঽনিলঃ ।। ৬.৬৯.৭৬ ।।
69.77
ন শেকুর্ধাবিতুং বীরা ন স্থাতুং স্পন্দিতুং ভয়াৎ।
উত্পতন্তং স্থিতং যান্তং সর্বান্ বিব্যাধ বীর্যবান্ ।। ৬.৬৯.৭৭ ।।
69.78
একেনান্তককল্পেন প্রাসেনাদিত্যতেজসা।
ভিন্নানি হরিসৈন্যানি নিপেতুর্ধরণীতলে ।। ৬.৬৯.৭৮ ।।
69.79
বজ্রনিষ্পেষসদৃশং প্রাসস্যাভিনিপাতনম্।
ন শেকুর্বানরাঃ সোঢুং তে বিনেদুর্মহাস্বনম্ ।। ৬.৬৯.৭৯ ।।
69.80
পততাং হরিবীরাণাং রূপাণি প্রচকাশিরে।
বজ্রভিন্নাগ্রকূটানাং শৈলানাং পততামিব ।। ৬.৬৯.৮০ ।।
69.81
যে তু পূর্বং মহাত্মানঃ কুম্ভকর্ণেন পাতিতাঃ।
তে স্বস্থা বানরশ্রেষ্ঠাঃ সুগ্রীবমুপতস্থিরে ।। ৬.৬৯.৮১ ।।
69.82
বিপ্রেক্ষমাণঃ সুগ্রীবো দদর্শ হরিবাহিনীম্।
নরান্তকভয়ত্রস্তাং বিদ্রবন্তীমিতস্ততঃ ।। ৬.৬৯.৮২ ।।
69.83
বিদ্রুতাং বাহিনীং দৃষ্ট্বা স দদর্শ নরান্তকম্।
গৃহীতপ্রাসমায়ান্তং হয়পৃষ্ঠে প্রতিষ্ঠিতম্ ।। ৬.৬৯.৮৩ ।।
69.84
অথোবাচ মহাতেজাঃ সুগ্রীবো বানরাধিপঃ।
কুমারমঙ্গদং বীরং শক্রতুল্যপরাক্রমম্ ।। ৬.৬৯.৮৪ ।।
69.85
গচ্ছ ত্বং রাক্ষসং বীরো যো ঽসৌ তুরগমাস্থিতঃ।
ক্ষোভয়ন্তং হরিবলং ক্ষিপ্রং প্রাণৈর্বিয়োজয় ।। ৬.৬৯.৮৫ ।।
69.86
স ভর্তুর্বচনং শ্রুত্বা নিষ্পপাতাঙ্গদস্ততঃ।
অনীকান্মেঘসঙ্কাশান্মেঘানীকাদিবাংশুমান্ ।। ৬.৬৯.৮৬ ।।
69.87
শৈলসঙ্ঘাতসঙ্কাশো হরীণামুত্তমো ঽঙ্গদঃ।
ররাজাঙ্গদসন্নদ্ধঃ সধাতুরিব পর্বতঃ ।। ৬.৬৯.৮৭ ।।
69.88
নিরায়ুধো মহাতেজাঃ কেবলং নখদংষ্ট্রবান্।
নরান্তকমভিক্রম্য বালিপুত্রো ঽব্রবীদ্বচঃ ।। ৬.৬৯.৮৮ ।।
69.89
তিষ্ঠ কিং প্রাকৃতৈরেভির্হরিভিস্ত্বং করিষ্যসি।
অস্মিন্ বজ্রসমস্পর্শং প্রাসঙ্ক্ষিপ মমোরসি ।। ৬.৬৯.৮৯ ।।
69.90
অঙ্গদস্য বচঃ শ্রুত্বা প্রচুক্রোধ নরান্তকঃ।
সন্দশ্য দশনৈরোষ্ঠং বিনিশ্বস্য ভুজঙ্গবৎ ।। ৬.৬৯.৯০ ।।
69.91
অভিগম্যাঙ্গদং ক্রুদ্ধো বালিপুত্রং নরান্তকঃ ।
। ৬.৬৯.৯১ ।।
69.92
প্রাসং সমাবিধ্য তদা ঽঙ্গদায় সমুজ্জ্বলন্তং সহসোত্সসর্জ।
স বালিপুত্রোরসি বজ্রকল্পে বভূব ভগ্নো ন্যপতচ্চ ভূমৌ ।। ৬.৬৯.৯২ ।।
69.93
তং প্রাসমালোক্য তদা বিভগ্নং সুপর্ণকৃত্তোরগভোগকল্পম্।
তলং সমুদ্যম্য স বালিপুত্রস্তুরঙ্গমং তস্য জঘান মূর্ধ্নি ।। ৬.৬৯.৯৩ ।।
69.94
নিমগ্নতালুঃ স্ফুটিতাক্ষিতারো নিষ্ক্রান্তজিহ্বো ঽচলসন্নিকাশঃ।
স তস্য বাজী নিপপাত ভূমৌ তলপ্রহারেণ বিশীর্ণমূর্ধা ।। ৬.৬৯.৯৪ ।।
69.95
নরান্তকঃ ক্রোধবশং জগাম হতং তুরঙ্গং পতিতং নিরীক্ষ্য।
স মুষ্টিমুদ্যম্য মহাপ্রভাবো জঘান শীর্ষে যুধি বালিপুত্রম্ ।। ৬.৬৯.৯৫ ।।
69.96
অথাঙ্গদো মুষ্টিবিভিন্নমূর্ধা সুস্রাব তীব্রং রুধিরং ভৃশোষ্ণম্।
মুহুর্বিজজ্বাল মুমোহ চাপি সঞ্জ্ঞাং সমাসাদ্য বিসিষ্মিয়ে চ ।। ৬.৬৯.৯৬ ।।
69.97
অথাঙ্গদো বজ্রসমানবেগং সংবর্ত্য মুষ্টিং গিরিশৃঙ্গকল্পম্।
নিপাতয়ামাস তদা মহাত্মা নরান্তকস্যোরসি বালিপুত্রঃ ।। ৬.৬৯.৯৭ ।।
69.98
স মুষ্টিনিষ্পষ্টবিভিন্নবক্ষা জ্বালাবমচ্ছোণিতদিগ্ধগাত্রঃ।
নরান্তকো ভূমিতলে পপাত যথা ঽচলো বজ্রনিপাতভগ্নঃ ।। ৬.৬৯.৯৮ ।।
69.99
অথান্তরিক্ষে ত্রিদশোত্তমানাং বনৌকসাং চৈব মহাপ্রণাদঃ।
বভূব তস্মিন্নিহতে ঽগ্র্যবীরে নরান্তকে বালিসুতেন সঙ্খ্যে ।। ৬.৬৯.৯৯ ।।
69.100
অথাঙ্গদো রামমনঃপ্রহর্ষণং সুদুষ্করং তৎ কৃতবান্ হি বিক্রমম্।
বিসিষ্মিয়ে সো ঽপ্যতিবীর্যবিক্রমঃ পুনশ্চ যুদ্ধে স বভূব হর্ষিতঃ ।। ৬.৬৯.১০০ ।।
69.101
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে একোনসপ্ততিতমঃ সর্গঃ ।
। ৬৯ ।।