Utshovসর্গ 68
68.1
কুম্ভকর্ণং হতং দৃষ্ট্বা রাঘবেণ মহাত্মনা।
রাক্ষসা রাক্ষসেন্দ্রায় রাবণায় ন্যবেদয়ন্ ।। ৬.৬৮.১ ।।
68.2
রাজন্ স কালসঙ্কাশঃ সংয়ুক্তঃ কালকর্মণা।
বিদ্রাব্য বানরীং সেনাং ভক্ষয়িত্বা চ বানরান্ ।। ৬.৬৮.২ ।।
68.3
প্রতপিত্বা মুহূর্তং চ প্রশান্তো রাম তেজসা।
কায়েনার্ধপ্রবিষ্টেন সমুদ্রং ভীমদর্শনম্ ।। ৬.৬৮.৩ ।।
68.4
নিকৃত্তকণ্ঠোরুভুজো বিক্ষরন্ রুধিরং বহু।
রুদ্ধ্বা দ্বারং শরীরেণ লঙ্কায়াঃ পর্বতোপমঃ ।। ৬.৬৮.৪ ।।
68.5
কুম্ভকর্ণস্তব ভ্রাতা কাকুত্স্থশরপীডিতঃ।
লগণ্ডভূতো বিকৃতো দাবদগ্ধ ইব দ্রুমঃ ।। ৬.৬৮.৫ ।।
68.6
তং শ্রুত্বা নিহতং সঙ্খ্যে কুম্ভকর্ণং মহাবলম্।
রাবণঃ শোকসন্তপ্তো মুমোহ চ পপাত চ ।। ৬.৬৮.৬ ।।
68.7
পিতৃব্যং নিহতং দৃষ্ট্বা দেবান্তকনরান্তকৌ।
ত্রিশিরাশ্চাতিকায়শ্চ রুরুদুঃ শোকপীডিতাঃ ।। ৬.৬৮.৭ ।।
68.8
ভ্রাতরং নিহতং দৃষ্ট্বা রামেণাক্লিষ্টকর্মণা।
মহোদরমহাপার্শ্বৌ শোকাক্রান্তৌ বভূবতুঃ ।। ৬.৬৮.৮ ।।
68.9
ততঃ কৃচ্ছ্রাৎ সমাসাদ্য সঞ্জ্ঞাং রাক্ষসপুঙ্গবঃ।
কুম্ভকর্ণবধাদ্দীনো বিললাপ স রাবণঃ ।। ৬.৬৮.৯ ।।
68.10
হা বীর রিপুদর্পঘ্ন কুম্ভকর্ণ মহাবল।
ত্বং মাং বিহায় বৈ দৈবাদ্যাতো ঽসি যমসাদনম্ ।। ৬.৬৮.১০ ।।
68.11
মম শল্যমনুদ্ধত্য বান্ধবানাং মহাবল।
শত্রুসৈন্যং প্রতাপ্যৈকস্ত্বং মাং সন্ত্যজ্য গচ্ছসি ।। ৬.৬৮.১১ ।।
68.12
ইদানীং খল্বহং নাস্মি যস্য মে দক্ষিণো ভুজঃ।
পতিতো যং সমাশ্রিত্য ন বিভেমি সুরাসুরাৎ ।। ৬.৬৮.১২ ।।
68.13
কথমেবংবিধো বীরো দেবদানবদর্পহা।
কালাগ্নিরুদ্রপ্রতিমো রণে রামেণ বৈ হতঃ ।। ৬.৬৮.১৩ ।।
68.14
যস্য তে বজ্রনিষ্পেষো ন কুর্যাদ্ব্যসনং সদা।
স কথং রামবাণার্তঃ প্রসুপ্তো ঽসি মহীতলে ।। ৬.৬৮.১৪ ।।
68.15
এতে দেবগণাঃ সার্ধমৃষ্টিভির্গগনে স্থিতাঃ।
নিহতং ত্বাং রণে দৃষ্ট্বা নিনদন্তি প্রহর্ষিতাঃ ।। ৬.৬৮.১৫ ।।
68.16
ধ্রুবমদ্যৈব সংহৃষ্টা লব্ধলক্ষাঃ প্লবঙ্গমাঃ।
আরোক্ষ্যন্তি হি দুর্গাণি লঙ্কাদ্বারাণি সর্বশঃ ।। ৬.৬৮.১৬ ।।
68.17
রাজ্যেন নাস্তি মে কার্যং কিং করিষ্যামি সীতয়া।
কুম্ভকর্ণবিহীনস্য জীবিতে নাস্তি মে রতিঃ ।। ৬.৬৮.১৭ ।।
68.18
যদ্যহং ভ্রাতৃহন্তারং ন হন্মি যুধি রাঘবম্।
ননু মে মরণং শ্রেয়ো ন চেদং ব্যর্থজীবিতম্ ।। ৬.৬৮.১৮ ।।
68.19
অদ্যৈব তং গমিষ্যামি দেশং যত্রানুজো মম।
নহি ভ্রাতঽন্ সমুত্সৃজ্য ক্ষণং জীবিতুমুত্সহে ।। ৬.৬৮.১৯ ।।
68.20
দেবা হি মাং হসিষ্যন্তি দৃষ্ট্বা পূর্বাপকারিণম্।
কথমিন্দ্রং জয়িষ্যামি কুম্ভকর্ণ হতে ত্বয়ি ।। ৬.৬৮.২০ ।।
68.21
তদিদং মামনুপ্রাপ্তং বিভীষণবচঃ শুভম্।
যদজ্ঞানান্ময়া তস্য ন গৃহীতং মহাত্মনঃ ।। ৬.৬৮.২১ ।।
68.22
বিভীষণবচো যাবৎ কুম্ভকর্ণপ্রহস্তয়োঃ।
বিনাশো ঽয়ং সমুত্পন্নো মাং ব্রীডয়তি দারুণঃ ।। ৬.৬৮.২২ ।।
68.23
তস্যায়ং কর্মণঃ প্রাপ্তো বিপাকো মম শোকদঃ।
যন্ময়া ধার্মিকঃ শ্রীমান্ স নিরস্তো বিভীষণঃ ।। ৬.৬৮.২৩ ।।
68.24
ইতি বহুবিধমাকুলান্তরাত্মা কৃপণমতীব বিলপ্য কুম্ভকর্ণম্।
ন্যপতদথ দশাননো ভৃশার্তস্তমনুজমিন্দ্ররিপুং হতং বিদিত্বা ।। ৬.৬৮.২৪ ।।
68.25
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে অষ্টষষ্টিতমঃ সর্গঃ ।
। ৬৮ ।।