Utshovসর্গ 65
65.1
স তথোক্তস্তু নির্ভর্ত্স্য কুম্ভকর্ণো মহোদরম্।
অব্রবীদ্রাক্ষসশ্রেষ্ঠং ভ্রাতরং রাবণং ততঃ ।। ৬.৬৫.১ ।।
65.2
সো ঽহং তব ভয়ং ঘোরং বধাত্তস্য দুরাত্মনঃ।
রামস্যাদ্য প্রমার্জামি নির্বৈরো হি সুখী ভব ।। ৬.৬৫.২ ।।
65.3
গর্জন্তি ন বৃথা শূরা নির্জলা ইব তোয়দাঃ।
পশ্য সম্পাদ্যমানং তু গর্জিতং যুধি কর্মণা ।। ৬.৬৫.৩ ।।
65.4
ন মর্ষয়তি চাত্মানং সম্ভাবয়তি নাত্মনা।
অদর্শয়িত্বা শূরাস্তু কর্ম কুর্বন্তি দুষ্করম্ ।। ৬.৬৫.৪ ।।
65.5
বিক্লবানামবুদ্ধীনাং রাজ্ঞা পণ্ডিতমানিনাম্।
শৃণ্বতা সাদিতমিদং ত্বদ্বিধানাং মহোদর ।। ৬.৬৫.৫ ।।
65.6
যুদ্ধে কাপুরুষৈর্নিত্যং ভবদ্ভিঃ প্রিয়বাদিভিঃ।
রাজানমনুগচ্ছদ্ভিঃ কৃত্যমেতদ্ধি সাদিতম্ ।। ৬.৬৫.৬ ।।
65.7
রাজশেষা কৃতা লঙ্কা ক্ষীণঃ কোশো বলং হতম্।
রাজানমিমমাসাদ্য সুহৃচ্চিহ্নমমিত্রকম্ ।। ৬.৬৫.৭ ।।
65.8
এষ নির্যাম্যহং যুদ্ধমুদ্যতঃ শত্রুনির্জয়ে।
দুর্নয়ং ভবতামদ্য সমীকর্তুমিহাহবে ।। ৬.৬৫.৮ ।।
65.9
এবমুক্তবতো বাক্যং কুম্ভকর্ণস্য ধীমতঃ।
প্রত্যুবাচ ততো বাক্যং প্রহসন্ রাক্ষসাধিপঃ ।। ৬.৬৫.৯ ।।
65.10
মহোদরো ঽয়ং রামাত্তু পরিত্রস্তো ন সংশয়ঃ।
ন হি রোচয়তে তাত যুদ্ধং যুদ্ধবিশারদ ।। ৬.৬৫.১০ ।।
65.11
কশ্চিন্মে ত্বত্সমো নাস্তি সৌহৃদেন বলেন চ।
গচ্ছ শত্রুবধায় ত্বং কুম্ভকর্ণ জয়ায় চ ।। ৬.৬৫.১১ ।।
65.12
তস্মাত্তু ভয়নাশার্থং ভবান্ সম্বোধিতো ময়া।
অয়ং হি কালঃ সুহৃদাং রাক্ষসানামরিন্দম ।। ৬.৬৫.১২ ।।
65.13
তদ্গচ্ছ শূলমাদায় পাশহস্ত ইবান্তকঃ।
বানরান্ রাজপুত্রৌ চ ভক্ষয়াদিত্যতেজসৌ ।। ৬.৬৫.১৩ ।।
65.14
সমালোক্য তু তে রূপং বিদ্রবিষ্যন্তি বানরাঃ।
রামলক্ষ্মণোশ্চাপি হৃদয়ে প্রস্ফুটিষ্যতঃ ।। ৬.৬৫.১৪ ।।
65.15
এবমুক্ত্বা মহারাজঃ কুম্ভকর্ণং মহাবলম্।
পুনর্জাতমিবাত্মানং মেনে রাক্ষসপুঙ্গবঃ ।। ৬.৬৫.১৫ ।।
65.16
কুম্ভকর্ণবলাভিজ্ঞো জানংস্তস্য পরাক্রমম্।
বভূব মুদিতো রাজা শশাঙ্ক ইব নির্মলঃ ।। ৬.৬৫.১৬ ।।
65.17
ইত্যেবমুক্তঃ সংহৃষ্টো নির্জগাম মহাবলঃ ।
। ৬.৬৫.১৭ ।।
65.18
রাজ্ঞস্তু বচনং শ্রুত্বা কুম্ভকর্ণঃ সমুদ্যতঃ।
আদদে নিশিতং শূলং বেগাচ্ছত্রুনিবর্হণম্ ।। ৬.৬৫.১৮ ।।
65.19
সর্বকালায়সং দীপ্তং তপ্তকাঞ্চনভূষণম্।
ইন্দ্রাশনিসমং ভীমং বজ্রপ্রতিমগৌরবম্ ।। ৬.৬৫.১৯ ।।
65.20
দেবদানবগন্ধর্বয়ক্ষকিন্নরসূদনম্।
রক্তমাল্যং মহাধামস্বতশ্চোদ্গতপাবকম্ ।। ৬.৬৫.২০ ।।
65.21
আদায় নিশিতং শূলং শত্রুশোণিতরঞ্জিতম্।
কুম্ভকর্ণো মহাতেজা রাবণং বাক্যমব্রবীৎ ।। ৬.৬৫.২১ ।।
65.22
গমিষ্যাম্যহমেকাকী তিষ্ঠত্বিহ বলং মম।
অদ্য তান্ ক্ষুভিতান্ ক্রুদ্ধো ভক্ষয়িষ্যামি বানরান্।কুম্ভকর্ণবচঃ শ্রুত্বা রাবণো বাক্যমব্রবীৎ ।। ৬.৬৫.২২ ।।
65.23
সৈন্যৈঃ পরিবৃতো গচ্ছ শূলমুদ্গরপাণিভিঃ।
বানরা হি মহাত্মানঃ শীঘ্রাঃ সুব্যবসায়িনঃ ।। ৬.৬৫.২৩ ।।
65.24
একাকিনং প্রমত্তং বা নয়েয়ুর্দশনৈঃ ক্ষয়ম্।
তস্মাৎ পরমদুর্ধর্ষৈঃ সৈন্যৈঃ পরিবৃতো ব্রজ।রক্ষসামহিতং সর্বং শত্রুপক্ষং নিষূদয় ।। ৬.৬৫.২৪ ।।
65.25
অথাসনাৎ সমুত্পত্য স্রজং মণিকৃতান্তরাম্।
আববন্ধ মহাতেজাঃ কুম্ভকর্ণস্য রাবণঃ ।। ৬.৬৫.২৫ ।।
65.26
অঙ্গদান্যঙ্গুলীবেষ্টান্ বরাণ্যাভরণানি চ।
হারং চ শশিসঙ্কাশমাববন্ধ মহাত্মনঃ ।। ৬.৬৫.২৬ ।।
65.27
দিব্যানি চ সুগন্ধীনি মাল্যদামানি রাবণঃ।
শ্রোত্রে চাসঞ্জয়ামাস শ্রীমতী চাস্য কুণ্ডলে ।। ৬.৬৫.২৭ ।।
65.28
কাঞ্চনাঙ্গদকেয়ূরনিষ্কাভরণভূষিতঃ।
কুম্ভকর্ণো বৃহত্কর্ণঃ সুহুতো ঽগ্নিরিবাবভৌ ।। ৬.৬৫.২৮ ।।
65.29
শ্রোণীসূত্রেণ মহতা মেচকেন ব্যরাজত।
অমৃতোত্পাদনে নদ্ধো ভুজঙ্গেনেব মন্দরঃ ।। ৬.৬৫.২৯ ।।
65.30
স কাঞ্চনং ভারসহং নিবাতং বিদ্যুত্প্রভং দীপ্তমিবাত্মভাসা।
আভধ্যমানঃ কবচং ররাজ সন্ধ্যাভ্রসংবীত ইবাদ্রিরাজঃ ।। ৬.৬৫.৩০ ।।
65.31
সর্বাভরণসর্বাঙ্গঃ শূলপাণিঃ স রাক্ষসঃ।
ত্রিবিক্রমকৃতোত্সাহো নারায়ণ ইবাবভৌ ।। ৬.৬৫.৩১ ।।
65.32
ভ্রাতরং সম্পরিষ্বজ্য কৃত্বা চাভিপ্রদক্ষিণম্।
প্রণম্য শিরসা তস্মৈ সম্প্রতস্থে মহাবলঃ ।। ৬.৬৫.৩২ ।।
65.33
নিষ্পতন্তং মহাকায়ং মহানাদং মহাবলম্।
তমাশীর্ভিঃ প্রশস্তাভিঃ প্রেষয়ামাস রাবণঃ ।। ৬.৬৫.৩৩ ।।
65.34
শঙ্খদুন্দুভিনির্ঘোষৈঃ সৈন্যৈশ্চাপি বরায়ুধৈঃ।
তং গজৈশ্চ তুরঙ্গৈশ্চ স্যন্দনৈশ্চাম্বুদস্বনৈঃ ।। ৬.৬৫.৩৪ ।।
65.35
অনুজগ্মুর্মহাত্মানং রথিনো রথিনাং বরম্ ।
। ৬.৬৫.৩৫ ।।
65.36
সর্পৈরুষ্ট্রৈঃ খরৈরশ্বৈঃ সিংহদ্বিপমৃগদ্বিজৈঃ।
অনুজগ্মুশ্চ তং ঘোরং কুম্ভকর্ণং মহাবলম্ ।। ৬.৬৫.৩৬ ।।
65.37
স পুষ্পবর্ষৈরবকীর্যমাণো ধৃতাতপত্রঃ শিতশূলপাণিঃ।
মদোত্কটঃ শোণিতগন্ধমত্তো বিনির্যয়ৌ দানবদেবশত্রুঃ ।। ৬.৬৫.৩৭ ।।
65.38
পদাতয়শ্চ বহবো মহানাদা মহাবলাঃ।
অন্বয়ূ রাক্ষসা ভীমা ভীমাক্ষাঃ শস্ত্রপাণয়ঃ ।। ৬.৬৫.৩৮ ।।
65.39
রক্তাক্ষাঃ সুমহাকায়া নীলাঞ্জনচয়োপমাঃ।
শূলানুদ্যম্য খড্গাংশ্চ নিশিতাংশ্চ পরশ্বধান্ ।। ৬.৬৫.৩৯ ।।
65.40
বহুব্যামাংশ্চ পরিঘান্ গদাশ্চ মুসলানি চ।
তালস্কন্ধাংশ্চ বিপুলান্ ক্ষেপণীয়ান্ দুরাসদান্ ।। ৬.৬৫.৪০ ।।
65.41
অথান্যদ্বপুরাদায় দারুণং রোমহর্ষণম্।
নিষ্পপাত মহাতেজাঃ কুম্ভকর্ণো মহাবলঃ ।। ৬.৬৫.৪১ ।।
65.42
ধনুশ্শতপরীণাহঃ স ষট্ছতসমুচ্ছ্রিতঃ।
রৌদ্রঃ শকটচক্রাক্ষো মহাপর্বতসন্নিভঃ ।। ৬.৬৫.৪২ ।।
65.43
সন্নিপত্য চ রক্ষাংসি দগ্ধশৈলোপমো মহান্।
কুম্ভকর্ণো মহাবক্ত্রঃ প্রহসন্নিদমব্রবীৎ ।। ৬.৬৫.৪৩ ।।
65.44
অদ্য বানরমুখ্যানাং তানি যূথানি ভাগশঃ।
নির্দহিষ্যামি সঙ্ক্রুদ্ধঃ শলভানিব পাবকঃ ।। ৬.৬৫.৪৪ ।।
65.45
নাপরাধ্যন্তি মে কামং বানরা বনচারিণঃ।
জাতিরস্মাদ্বিধানাং সা পুরোদ্যানবিভূষণম্ ।। ৬.৬৫.৪৫ ।।
65.46
পুররোধস্য মূলং তু রাঘবঃ সহলক্ষ্মণঃ।
হতে তস্মিন্ হতং সর্বং তং বধিষ্যামি সংয়ুগে ।। ৬.৬৫.৪৬ ।।
65.47
এবং তস্য ব্রুবাণস্য কুম্ভকর্ণস্য রাক্ষসাঃ।
নাদং চক্রুর্মহাঘোরং কম্পয়ন্ত ইবার্ণবম্ ।। ৬.৬৫.৪৭ ।।
65.48
তস্য নিষ্পততস্তূর্ণং কুম্ভকর্ণস্য ধীমতঃ।
বভূবুর্ঘোররূপাণি নিমিত্তানি সমন্ততঃ ।। ৬.৬৫.৪৮ ।।
65.49
উল্কাশনিয়ুতা মেঘা বভূবুর্গর্দভারুণাঃ।
সসাগরবনা চৈব বসুধা সমকম্পত ।। ৬.৬৫.৪৯ ।।
65.50
ঘোররূপাঃ শিবা নেদুঃ সজ্বালকবলৈর্মুখৈঃ।
মণ্ডলান্যপসব্যানি ববন্ধুশ্চ বিহঙ্গমাঃ ।। ৬.৬৫.৫০ ।।
65.51
নিষ্পপাত চ মালেব গৃধ্রো ঽস্য পথি গচ্ছতঃ।
প্রাস্ফুরন্নয়নং চাস্য সব্যো বাহুশ্চ কম্পতে ।। ৬.৬৫.৫১ ।।
65.52
নিপপাত তদা চোল্কা জ্বলন্তী ভীমনিস্বনা।
আদিত্যো নিষ্প্রভশ্চাসীন্ন প্রবাতি সুখো ঽনিলঃ ।। ৬.৬৫.৫২ ।।
65.53
অচিন্তয়ন্ মহোত্পাতানুত্থিতান্ রোমহর্ষণান্।
নির্যয়ৌ কুম্ভকর্ণস্তু কৃতান্তবলচোদিতঃ ।। ৬.৬৫.৫৩ ।।
65.54
স লঙ্ঘয়িত্বা প্রাকারং পদ্ভ্যাং পর্বতসন্নিভঃ।
দদর্শাভ্রঘনপ্রখ্যং বানরানীকমদ্ভুতম্ ।। ৬.৬৫.৫৪ ।।
65.55
তে দৃষ্ট্বা রাক্ষসশ্রেষ্ঠং বানরাঃ পর্বতোপমম্।
বায়ুনুন্না ইব ঘনা যয়ুঃ সর্বা দিশস্তদা ।। ৬.৬৫.৫৫ ।।
65.56
তদ্বানরানীকমতিপ্রচণ্ডং দিশো দ্রবদ্ভিন্নমিবাভ্রজালম্।
স কুম্ভকর্ণঃ সমবেক্ষ্য হর্ষান্ননাদ ভূয়ো ঘনবদ্ ঘনাভঃ ।। ৬.৬৫.৫৬ ।।
65.57
তে তস্য ঘোরং নিনদং নিশম্য যথা নিনাদং দিবি বারিদস্য।
পেতুর্ধরণ্যাং বহবঃ প্লবঙ্গা নিকৃত্তমূলা ইব সালবৃক্ষাঃ ।। ৬.৬৫.৫৭ ।।
65.58
বিপুলপরিঘবান্ স কুম্ভকর্ণো রিপুনিধনায় বিনিস্সৃতো মহাত্মা।
কপিগণভয়মাদদৎ সুভীমং প্রভুরিব কিঙ্করদণ্ডবান্ যুগান্তে ।। ৬.৬৫.৫৮ ।।
65.59
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে পঞ্চষষ্টিতমঃ সর্গঃ ।
। ৬৫ ।।