Utshovসর্গ 63
63.1
তস্য রাক্ষসরাজস্য নিশম্য পরিদেবিতম্ ।
কুম্ভকর্ণো বভাষেদং বচনং প্রজহাস চ ।। ৬.৬৩.১ ।।
63.2
দৃষ্টো দোষো হি যো ঽস্মাভিঃ পুরা মন্ত্রবিনির্ণয়ে ।
হিতেষ্বনভিরক্তেন সো ঽয়মাসাদিতস্ত্বয়া ।। ৬.৬৩.২ ।।
63.3
শীঘ্রং খল্বভ্যুপেতং ত্বাং ফলং পাপস্য কর্মণঃ ।
নিরয়েষ্বেব পতনং যথা দুষ্কৃতকর্মণঃ ।। ৬.৬৩.৩ ।।
63.4
প্রথমং বৈ মহারাজ কৃত্যমেতদচিন্তিতম্ ।
কেবলং বীর্যদর্পেণ নানুবন্ধো বিচারিতঃ ।। ৬.৬৩.৪ ।।
63.5
যঃ পশ্চাৎ পূর্বকার্যাণি কুর্যাদৈশ্বর্যমাস্থিতঃ ।
পূর্বং চাপরকার্যাণি ন স বেদ নয়ানয়ৌ ।। ৬.৬৩.৫ ।।
63.6
দেশকালবিহীনানি কর্মাণি বিপরীতবৎ ।
ক্রিয়মাণানি দুষ্যন্তি হবীংষ্যপ্রয়তেষ্বিব ।। ৬.৬৩.৬ ।।
63.7
ত্রয়াণাং পঞ্চধা যোগং কর্মণাং যঃ প্রপশ্যতি ।
সচিবৈঃ সময়ং কৃত্বা স সভ্যে বর্ততে পথি ।। ৬.৬৩.৭ ।।
63.8
যথাগমং চ যো রাজা সময়ং বিচিকীর্ষতি ।
বুধ্যতে সচিবান্ বুদ্ধ্যা সুহৃদশ্চানুপশ্যতি ।। ৬.৬৩.৮ ।।
63.9
ধর্মমর্থং চ কামং চ সর্বান্ বা রক্ষসাং পতে ।
ভজেত পুরুষঃ কালে ত্রীণি দ্বন্দ্বানি বা পুনঃ ।। ৬.৬৩.৯ ।।
63.10
ত্রিষু চৈতেষু যচ্ছ্রেষ্ঠং শ্রুত্বা তন্নাববুধ্যতে ।
রাজা বা রাজমাত্রো বা ব্যর্থং তস্য বহুশ্রুতম্ ।। ৬.৬৩.১০ ।।
63.11
উপপ্রদানং সান্ত্বং বা ভেদং কালে চ বিক্রমম্ ।
যোগং চ রক্ষসাং শ্রেষ্ঠ তাবুভৌ চ নয়ানয়ৌ ।। ৬.৬৩.১১ ।।
63.12
কালে ধর্মার্থকামান্ যঃ সম্মন্ত্র্য সচিবৈঃ সহ ।
নিষেবেতাত্মবান্ লোকে ন স ব্যসনমাপ্নুয়াৎ ।। ৬.৬৩.১২ ।।
63.13
হিতানুবন্ধমালোচ্য কার্যাকার্যমিহাত্মনঃ ।
রাজা সহার্থতত্ত্বজ্ঞৈঃ সচিবৈঃ স হি জীবতি ।। ৬.৬৩.১৩ ।।
63.14
অনভিজ্ঞায় শাস্ত্রার্থান্ পুরুষাঃ পশুবুদ্ধয়ঃ ।
প্রাগল্ভ্যাদ্বক্তুমিচ্ছন্তি মন্ত্রেষ্বভ্যন্তরীকৃতাঃ ।। ৬.৬৩.১৪ ।।
63.15
অশাস্ত্রবিদুষাং তেষাং ন কার্যমহিতং বচঃ ।
অর্থশাস্ত্রানভিজ্ঞানাং বিপুলাং শ্রিয়মিচ্ছতাম্ ।। ৬.৬৩.১৫ ।।
63.16
অহিতং চ হিতাকারং ধার্ষ্ট্যাজ্জল্পন্তি যে নরাঃ ।
অবেক্ষ্য মন্ত্রবাহ্যাস্তে কর্তব্যাঃ কৃত্যদূষণাঃ ।। ৬.৬৩.১৬ ।।
63.17
বিনাশয়ন্তো ভর্তারং সহিতাঃ শত্রুভির্বুধৈঃ ।
বিপরীতানি কৃত্যানি কারয়ন্তীহ মন্ত্রিণঃ ।। ৬.৬৩.১৭ ।।
63.18
তান্ ভর্তা মিত্রসঙ্কাশানমিত্রান্ মন্ত্রনির্ণয়ে ।
ব্যবহারেণ জানীয়াৎ সচিবানুপসংহিতান্ ।। ৬.৬৩.১৮ ।।
63.19
চপলস্যেহ কৃত্যানি সহসানুপ্রধাবতঃ ।
ছিদ্রমন্যে প্রপদ্যন্তে ক্রৌঞ্চস্য স্বমিব দ্বিজাঃ ।। ৬.৬৩.১৯ ।।
63.20
যো হি শত্রুমবিজ্ঞায় নাত্মানমভিরক্ষতি ।
অবাপ্নোতি হি সো ঽনর্থান্ স্থানাচ্চ ব্যবরোপ্যতে ।। ৬.৬৩.২০ ।।
63.21
যদুক্তমিহ তে পূর্বং ক্রিয়তামনুজেন চ ।
তদেব নো হিতং কার্যং যদিচ্ছসি চ তৎ কুরু ।। ৬.৬৩.২১ ।।
63.22
তত্তু শ্রুত্বা দশগ্রীবঃ কুম্ভকর্ণস্য ভাষিতম্ ।
ভ্রুকুটিং চৈব সঞ্চক্রে ক্রুদ্ধশ্চৈনমভাষত ।। ৬.৬৩.২২ ।।
63.23
মান্যো গুরুরিবাচার্যঃ কিং মাং ত্বমনুশাসসি ।
কিমেবং বাক্ছ্রমং কৃত্বা যুক্তং বিধীয়তাম্ ।। ৬.৬৩.২৩ ।।
63.24
বিভ্রমাচ্চিত্তমোহাদ্বা বলবীর্যাশ্রয়েণ বা ।
নাভিপন্নমিদানীং যদ্ব্যর্থাস্তস্য পুনঃ কথাঃ ।। ৬.৬৩.২৪ ।।
63.25
অস্মিন্ কালে তু যদ্যুক্তং তদিদানীং বিধীয়তাম্ ।
গতং তু নানুশোচন্তি গতং তু গতমেব হি ।। ৬.৬৩.২৫ ।।
63.26
মমাপনয়জং দোষং বিক্রমেণ সমীকুরু ।
যদি খল্বস্তি মে স্নেহো বিক্রমং বা ঽবগচ্ছসি ।যদি বা কার্যমেতত্তে হৃদি কার্যতমং মতম্ ।। ৬.৬৩.২৬ ।।
63.27
স সুহৃদ্ যো বিপন্নার্থং দীনমভ্যবপদ্যতে ।
স বন্ধুর্যো ঽপনীতেষু সাহায্যায়োপকল্পতে ।। ৬.৬৩.২৭ ।।
63.28
তমথৈবং ব্রুবাণং তু বচনং ধীরদারুণম্ ।
রুষ্টো ঽয়মিতি বিজ্ঞায় শনৈঃ শ্লক্ষ্ণমুবাচ হ ।। ৬.৬৩.২৮ ।।
63.29
অতীব হি সমালক্ষ্য ভ্রাতরং ক্ষুভিতেন্দ্রিয়ম্ ।
কুম্ভকর্ণঃ শনৈর্বাক্যং বভাষে পরিসান্ত্বয়ন্ ।। ৬.৬৩.২৯ ।।
63.30
অলং রাক্ষসরাজেন্দ্র সন্তাপমুপপদ্য তে ।
রোষং চ সম্পরিত্যজ্য স্বস্থো ভবিতুমর্হসি ।। ৬.৬৩.৩০ ।।
63.31
নৈতন্মনসি কর্তব্যং ময়ি জীবতি পার্থিব ।
তমহং নাশয়িষ্যামি যত্কৃতে পরিতপ্যসে ।। ৬.৬৩.৩১ ।।
63.32
অবশ্যং তু হিতং বাচ্যং সর্বাবস্থং ময়া তব ।
বন্ধুভাবাদভিহিতং ভ্রাতৃস্নেহাচ্চ পার্থিব ।। ৬.৬৩.৩২ ।।
63.33
সদৃশং যত্তু কালে ঽস্মিন্ কর্তুং স্নিগ্ধেন বন্ধুনা ।
শত্রূণাং কদনং পশ্য ক্রিয়মাণং ময়া রণে ।। ৬.৬৩.৩৩ ।।
63.34
অদ্য পশ্য মহাবাহো ময়া সমরমূর্ধনি ।
হতে রামে সহ ভ্রাত্রা দ্রবন্তীং পরবাহিনীম্ ।। ৬.৬৩.৩৪ ।।
63.35
অদ্য রামস্য তদ্ দৃষ্ট্বা ময়া ঽ ঽনীতং রণাচ্ছিরঃ ।
সুখী ভব মহাবাহো সীতা ভবতু দুঃখিতা ।। ৬.৬৩.৩৫ ।।
63.36
অদ্য রামস্য পশ্যন্তু নিধনং সুমহৎ প্রিয়ম্ ।
লঙ্কায়াং রাক্ষসাঃ সর্বে যে তে নিহতবান্ধবাঃ ।। ৬.৬৩.৩৬ ।।
63.37
অদ্য শোকপরীতানাং স্ববন্ধুবধকারণাৎ ।
শত্রোর্যুধি বিনাশেন করোম্যাস্রপ্রমার্জনম্ ।। ৬.৬৩.৩৭ ।।
63.38
অদ্য পর্বতসঙ্কাশং সসূর্যমিব তোয়দম্ ।
বিকীর্ণং পশ্য সমরে সুগ্রীবং প্লবগোত্তমম্ ।। ৬.৬৩.৩৮ ।।
63.39
কথং ত্বং রাক্ষসৈরেভির্ময়া চ পরিরক্ষিতঃ ।
জিঘাংসুভির্দাশরথিং বধ্যসে ত্বমিহানঘ ।। ৬.৬৩.৩৯ ।।
63.40
অথ পূর্বং হতে তেন ময়ি ত্বাং হন্তি রাঘবঃ ।
নাহমাত্মনি সন্তাপং গচ্ছেয়ং রাক্ষসাধিপ ।। ৬.৬৩.৪০ ।।
63.41
কামং ত্বিদানীমপি মাং ব্যাদিশ ত্বং পরন্তপ ।
ন পরঃ প্রেষণীয়স্তে যুদ্ধায়াতুলবিক্রম ।। ৬.৬৩.৪১ ।।
63.42
অহমুত্সাদয়িষ্যামি শত্রূংস্তব মহাবল ।
। ৬.৬৩.৪২ ।।
63.43
যদি শক্রো যদি যমো যদি পাবকমারুতৌ ।
তানহং যোধয়িষ্যামি কুবেরবরুণাবপি ।। ৬.৬৩.৪৩ ।।
63.44
গিরিমাত্রশরীরস্য শিতশূলধরস্য মে ।
নর্দতস্তীক্ষ্ণদংষ্ট্রস্য বিভীয়াচ্চ পুরন্দরঃ ।। ৬.৬৩.৪৪ ।।
63.45
অথবা ত্যক্তশস্ত্রস্য মৃদ্নতস্তরসা রিপূন্ ।
ন মে প্রতিমুখে স্থাতুং কশ্চিচ্ছক্তো জিজীবিষুঃ ।। ৬.৬৩.৪৫ ।।
63.46
নৈব শক্ত্যা ন গদয়া নাসিনা নিশিতৈঃ শরৈঃ ।
হস্তাভ্যামেব সংরব্ধো হনিষ্যাম্যপি বজ্রিণম্ ।। ৬.৬৩.৪৬ ।।
63.47
যদি মে মুষ্টিবেগং স রাঘবো ঽদ্য সহিষ্যতে ।
ততঃ পাস্যন্তি বাণৌঘা রুধিরং রাঘবস্য তু ।। ৬.৬৩.৪৭ ।।
63.48
চিন্তয়া বাধ্যসে রাজন্ কিমর্থং ময়ি তিষ্ঠতি ।
সো ঽহং শত্রুবিনাশায় তব নির্যাতুমুদ্যতঃ ।। ৬.৬৩.৪৮ ।।
63.49
মুঞ্চ রামাদ্ভয়ং রাজন্ হনিষ্যামীহ সংয়ুগে ।
রাঘবং লক্ষ্মণং চৈব সুগ্রীবং চ মহাবলম্ ।হনুমন্তং চ রক্ষোঘ্নং লঙ্কা যেন প্রদীপিতা ।। ৬.৬৩.৪৯ ।।
63.50
হরীংশ্চাপি হনিষ্যামি সংয়ুগে সমবস্থিতান্ ।
অসাধারণমিচ্ছামি তব দাতুং মহদ্যশঃ ।। ৬.৬৩.৫০ ।।
63.51
যদি চেন্দ্রাদ্ভয়ং রাজন্ যদি বাপি স্বয়ম্ভুবঃ ।
। ৬.৬৩.৫১ ।।
63.52
অপি দেবাঃ শয়িষ্যন্তে ক্রুদ্ধে ময়ি মহীতলে ।
যমং চ শময়িষ্যামি ভক্ষয়িষ্যামি পাবকম্ ।আদিত্যং পাতয়িষ্যামি সনক্ষত্রং মহীতলে ।। ৬.৬৩.৫২ ।।
63.53
শতক্রতুং বধিষ্যামি পাস্যামি বরুণালয়ম্ ।
পর্বতাংশ্চূর্ণয়িষ্যামি দারয়িষ্যামি মেদিনীম্ ।। ৬.৬৩.৫৩ ।।
63.54
দীর্ঘকালং প্রসুপ্তস্য কুম্ভকর্ণস্য বিক্রমম্ ।
অদ্য পশ্যন্তু ভূতানি ভক্ষ্যমাণানি সর্বশঃ ।। ৬.৬৩.৫৪ ।।
63.55
নন্বিদং ত্রিদিবং সর্বমাহারস্য ন পূর্যতে ।
। ৬.৬৩.৫৫ ।।
63.56
বধেন তে দাশরথেঃ সুখার্হং সুখং সমাহর্তুমহং ব্রজামি ।
নিহত্য রামং সহ লক্ষ্মণেন খাদামি সর্বান্ হরিয়ূথমুখ্যান্ ।। ৬.৬৩.৫৬ ।।
63.57
রমস্ব কামং পিব চাগ্র্যবারুণীং কুরুষ্ব কৃত্যানি বিনীয়তাং জ্বরঃ ।
ময়া ঽদ্য রামে গমিতে যমক্ষয়ং চিরায় সীতা বশগা ভবিষ্যতি ।। ৬.৬৩.৫৭ ।।
63.58
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে ত্রিষষ্টিতমঃ সর্গঃ ।
। ৬৩ ।।