Utshovসর্গ 62
62.1
স তু রাক্ষসশার্দূলো নিদ্রামদসমাকুলঃ ।
রাজমার্গং শ্রিয়া জুষ্টং যয়ৌ বিপুলবিক্রমঃ ।। ৬.৬২.১ ।।
62.2
রাক্ষসানাং সহস্রৈশ্চ বৃতঃ পরমদুর্জয়ঃ ।
গৃহেভ্যঃ পুষ্পবর্ষেণ কীর্যমাণস্তদা যয়ৌ ।। ৬.৬২.২ ।।
62.3
স হেমজালিবিততং ভানুভাস্বরদর্শনম্ ।
দদর্শ বিপুলং রম্যং রাক্ষসেন্দ্রনিবেশনম্ ।। ৬.৬২.৩ ।।
62.4
স তত্তদা সূর্য ইবাভ্রজালং প্রবিশ্য রক্ষোধিপতের্নিবেশম্ ।
দদর্শ দূরে ঽগ্রজমাসনস্থং স্বয়ম্ভুবং শক্র ইবাসনস্থম্ ।। ৬.৬২.৪ ।।
62.5
ভ্রাতুঃ স ভবনং গচ্ছন্ রক্ষোগণসমন্বিতম্ ।
কুম্ভকর্ণঃ পদন্যাসৈরকম্পয়ত মেদিনীম্ ।। ৬.৬২.৫ ।।
62.6
সো ঽভিগম্য গৃহং ভ্রাতুঃ কক্ষ্যামভিবিগাহ্য চ ।
দদর্শোদ্বিগ্নমাসীনং বিমানে পুষ্পকে গুরুম্ ।। ৬.৬২.৬ ।।
62.7
অথ দৃষ্ট্বা দশগ্রীবঃ কুম্ভকর্ণমুপস্থিতম্ ।
তূর্ণমুত্থায় সংহৃষ্টঃ সন্নিকর্ষমুপানয়ৎ ।। ৬.৬২.৭ ।।
62.8
অথাসীনস্য পর্যঙ্কে কুম্ভকর্ণো মহাবলঃ ।
ভ্রাতুর্ববন্দে চরণৌ কিং কৃত্যমিতি চাব্রবীৎ ।। ৬.৬২.৮ ।।
62.9
উত্পত্য চৈনং মুদিতো রাবণঃ পরিষস্বজে ।
স ভ্রাত্রা সম্পরিষ্বক্তো যথাবচ্ছাভিনন্দিতঃ ।। ৬.৬২.৯ ।।
62.10
কুম্ভকর্ণঃ শুভং দিব্যং প্রতিপেদে বরাসনম্ ।
স তদাসনমাশ্রিত্য কুম্ভকর্ণো মহাবলঃ ।সংরক্তনয়নঃ কোপাদ্রাবণং বাক্যমব্রবীৎ ।। ৬.৬২.১০ ।।
62.11
কিমর্থমহমাদৃত্য ত্বয়া রাজন্ বিবোধিতঃ ।
শংস কস্মাদ্ভয়ং তে ঽস্তি কো ঽদ্য প্রেতো ভবিষ্যতি ।। ৬.৬২.১১ ।।
62.12
ভ্রাতরং রাবণঃ কুদ্ধং কুম্ভকর্ণমবস্থিতম্ ।
ঈষত্তু পরিবৃত্তাভ্যাং নেত্রাভ্যাং বাক্যমব্রবীৎ ।। ৬.৬২.১২ ।।
62.13
অদ্য তে সুমহান্ কালঃ শয়ানস্য মহাবল ।
সুখিতস্ত্বং ন জানীষে মম রামকৃতং ভয়ম্ ।। ৬.৬২.১৩ ।।
62.14
এষ দাশরথী রামঃ সুগ্রীবসহিতো বলী ।
সমুদ্রং সবলস্তীর্ত্বা মূলং নঃ পরিকৃন্ততি ।। ৬.৬২.১৪ ।।
62.15
হন্ত পশ্যস্ব লঙ্কায়াং বনান্যুপবনানি চ ।
সেতুনা সুখমাগম্য বানরৈকার্ণবীকৃতম্ ।। ৬.৬২.১৫ ।।
62.16
যে রক্ষসাং মুখ্যতমা হতাস্তে বানরৈর্যুধি ।
বানরাণাং ক্ষয়ং যুদ্ধে ন পশ্যামি কদাচন ।। ৬.৬২.১৬ ।।
62.17
ন চাপি বানরা যুদ্ধে জিতপূর্বাঃ কদাচন ।
। ৬.৬২.১৭ ।।
62.18
তদেতদ্ভয়মুত্পন্নং ত্রায়স্বেমাং মহাবল ।
নাশয় ত্বমিমানদ্য তদর্থং বোধিতো ভবান্ ।। ৬.৬২.১৮ ।।
62.19
সর্বক্ষপিতকোশং চ স ত্বমভ্যবপদ্য মাম্ ।
ত্রায়স্বেমাং পুরীং লঙ্কাং বালবৃদ্ধাবশেষিতাম্ ।। ৬.৬২.১৯ ।।
62.20
ভ্রাতুরর্থে মহাবাহো কুরু কর্ম সুদুষ্করম্ ।
ময়ৈবং নোক্তপূর্বো হি কচ্চিদ্ ভ্রাতঃ পরন্তপ ।। ৬.৬২.২০ ।।
62.21
ত্বয্যস্তি তু মম স্নেহঃ পরা সম্ভাবনা চ মে ।
দৈবাসুরেষু যুদ্ধেষু বহুশো রাক্ষসর্ষভ ।ত্বয়া দেবাঃ প্রতিব্যূহ্য নির্জিতাশ্চাসুরা যুধি ।। ৬.৬২.২১ ।।
62.22
তদেতৎ সর্বমাতিষ্ঠ বীর্যং ভীমপরাক্রম ।
ন হি তে সর্বভূতেষু দৃশ্যতে সদৃশো বলী ।। ৬.৬২.২২ ।।
62.23
কুরুষ্ব মে প্রিয়হিতমেতদুত্তমং যথাপ্রিয়ং প্রিয়রণবান্ধবপ্রিয় ।
স্বতেজসা বিধম সপত্নবাহিনীং শরদ্ঘনং পবন ইবোদ্যতো মহান্ ।। ৬.৬২.২৩ ।।
62.24
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে দ্বিষষ্টিতমঃ সর্গঃ ।
। ৬২ ।।