Utshovসর্গ 61
61.1
ততো রামো ভহাতেজা ধনুরাদায় বীর্যবান্ ।
কিরীটিনং মহাকায়ং কুম্ভকর্ণং দদর্শ হ ।। ৬.৬১.১ ॥
61.2
তং দৃষ্ট্বা রাক্ষসশ্রেষ্ঠং পর্বতাকারদর্শনম্ ।
ক্রমমাণমিবাকাশং পুরা নারায়ণং প্রভুম্ ।সতোয়াম্বুদসঙ্কাশং কাঞ্চনাঙ্গদভূষণম্ ।। ৬.৬১.২ ॥
61.3
দৃষ্ট্বা পুনঃ প্রদুদ্রাব বানরাণাং মহাচমূঃ ।
। ৬.৬১.৩ ॥
61.4
বিদ্রুতাং বাহিনীং দৃষ্ট্বা বর্ধমানং চ রাক্ষসম্ ।
সবিস্ময়মিদং রামো বিভীষণমুবাচ হ ।। ৬.৬১.৪ ॥
61.5
কো ঽসৌ পর্বতসঙ্কাশঃ কিরীটী হরিলোচনঃ ।
লঙ্কায়াং দৃশ্যতে বীর সবিদ্যুদিব তোয়দঃ ।। ৬.৬১.৫ ॥
61.6
পৃথিব্যাঃ কেতুভূতো ঽসৌ মহানেকো ঽত্র দৃশ্যতে ।
যং দৃষ্ট্বা বানরাঃ সর্বে বিদ্রবন্তি ততস্ততঃ ।। ৬.৬১.৬ ॥
61.7
আচক্ষ্ব মে মহান্ কো ঽসৌ রক্ষো বা যদি বা ঽসুরঃ ।
ন ময়ৈবংবিধং ভূতং দৃষ্টপূর্বং কদাচন ।। ৬.৬১.৭ ॥
61.8
স পৃষ্টো রাজপুত্রেণ রামেণাক্লিষ্টকর্মণা ।
বিভীষণো মহাপ্রাজ্ঞঃ কাকুত্স্থমিদমব্রবীৎ ।। ৬.৬১.৮ ॥
61.9
যেন বৈবস্বতো যুদ্ধে বাসবশ্চ পরাজিতঃ ।
সৈষ বিশ্রবসঃ পুত্রঃ কুম্ভকর্ণঃ প্রতাপবান্ ।অস্য প্রমাণাৎ সদৃশো রাক্ষসো ঽন্যো ন বিদ্যতে ।। ৬.৬১.৯ ॥
61.10
এতেন দেবা যুধি দানবাশ্চ যক্ষা ভুজঙ্গাঃ পিশিতাশনাশ্চ ।
গন্ধর্ববিদ্যাধরকিন্নরাশ্চ সহস্রশো রাঘব সম্প্রভগ্রাঃ ।। ৬.৬১.১০ ॥
61.11
শূলপাণিং বিরূপাক্ষং কুম্ভকর্ণং মহাবলম্ ।
হন্তুং ন শেকুস্ত্রিদশাঃ কালো ঽয়মিতি মোহিতাঃ ।। ৬.৬১.১১ ॥
61.12
প্রকৃত্যা হ্যেষ তেজস্বী কুম্ভকর্ণো মহাবলঃ ।
অন্যেষাং রাক্ষসেন্দ্রাণাং বরদানকৃতং বলম্ ।। ৬.৬১.১২ ॥
61.13
এতেন জাতমাত্রেণ ক্ষুধার্তেন মহাত্মনা ।
ভক্ষিতানি সহস্রাণি সত্ত্বানাং সুবহূন্যপি ।। ৬.৬১.১৩ ॥
61.14
তেষু সম্ভক্ষ্যমাণেষু প্রজা ভয়নিপীডিতাঃ ।
যান্তি স্ম শরণং শক্রং তমপ্যর্থং ন্যবেদয়ন্ ।। ৬.৬১.১৪ ॥
61.15
স কুম্ভকর্ণং কুপিতো মহেন্দ্রো জঘান বজ্রেণ শিতেন বজ্রী ।
স শক্রবজ্রাভিহতো মহাত্মা চচাল কোপাচ্চ ভৃশং ননাদ ।। ৬.৬১.১৫ ॥
61.16
তস্য নানদ্যমানস্য কুম্ভকর্ণস্য ধীমতঃ ।
শ্রুত্বা ঽতিনাদং বিত্রস্তা ভূয়ো ভূমির্বিতত্রসে ।। ৬.৬১.১৬ ॥
61.17
তত্র কোপান্মহেন্দ্রস্য কুম্ভকর্ণো মহাবলঃ ।
বিকৃষ্যৈরাবতাদ্দন্তং জঘানোরসি বাসবম্ ।। ৬.৬১.১৭ ॥
61.18
কুম্ভকর্ণপ্রহারার্তো বিজজ্বাল স বাসবঃ ।
ততো বিষেদুঃ সহসা দেবব্রহ্মর্ষিদানবাঃ ।। ৬.৬১.১৮ ॥
61.19
প্রজাভিঃ সহ শক্রশ্চ যয়ৌ স্থানং স্বয়ম্ভুবঃ ।
কুম্ভকর্ণস্য দৌরাত্ম্যং শশংসুস্তে প্রজাপতেঃ ।। ৬.৬১.১৯ ॥
61.20
প্রজানাং ভক্ষণং চাপি দেবানাং চাপি ধর্ষণম্ ।
আশ্রমধ্বংসনং চাপি পরস্ত্রীহরণং ভৃশম্ ।। ৬.৬১.২০ ॥
61.21
এবং প্রজা যদি ত্বেষ ভক্ষয়িষ্যতি নিত্যশঃ ।
অচিরেণৈব কালেন শূন্যো লোকো ভবিষ্যতি ।। ৬.৬১.২১ ॥
61.22
বাসবস্য বচঃ শ্রুত্বা সর্বলোকপিতামহঃ ।
রক্ষাংস্যাবাহয়ামাস কুম্ভকর্ণং দদর্শ হ ।। ৬.৬১.২২ ॥
61.23
কুম্ভকর্ণং সমীক্ষ্যৈব বিতত্রাস প্রজাপতিঃ ।
দৃষ্ট্বা বিশ্বাস্য চৈবেদং স্বয়ম্ভূরিদমব্রবীৎ ।। ৬.৬১.২৩ ॥
61.24
ধ্রুবং লোকবিনাশায় পৌলস্ত্যেনাসি নির্মিতঃ ।
তস্মাত্ত্বমদ্যপ্রভৃতি মৃতকল্পঃ শয়িষ্যসে ।। ৬.৬১.২৪ ॥
61.25
ব্রহ্মশাপাভিভূতো ঽথ নিপপাতাগ্রতঃ প্রভোঃ ।
ততঃ পরমসম্ভ্রান্তো রাবণো বাক্যমব্রবীৎ ।। ৬.৬১.২৫ ॥
61.26
বিবৃদ্ধঃ কাঞ্চনো বৃক্ষঃ ফলকালে নিকৃত্যতে ।
ন নপ্তারং স্বকং ন্যায্যং শপ্তুমেবং প্রজাপতে ।। ৬.৬১.২৬ ॥
61.27
ন মিথ্যাবচনশ্চ ত্বং স্বপ্স্যত্যেষ ন সংশয়ঃ ।
কালস্তু ক্রিয়তামস্য শয়নে জাগরে তথা ।। ৬.৬১.২৭ ॥
61.28
রাবণস্য বচঃ শ্রুত্বা স্বয়ম্ভূরিদমব্রবীৎ ।
। ৬.৬১.২৮ ॥
61.29
শয়তি হ্যেষ ষণ্মাসানেকাহং জাগরিষ্যতি ।
একেনাহ্না ত্বসৌ বীরশ্চরন্ ভূমিং বুভুক্ষিতঃ ।ব্যাত্তাস্যো ভক্ষয়েল্লোকান্ সক্রুদ্ধ ইব পাবকঃ ।। ৬.৬১.২৯ ॥
61.30
সো ঽসৌ ব্যসনমাপন্নঃ কুম্ভকর্ণমবোধয়ৎ ।
ত্বত্পরাক্রমভীতশ্চ রাজা সম্প্রতি রাবণঃ ।। ৬.৬১.৩০ ॥
61.31
স এষ নির্গতো বীরঃ শিবিরাদ্ভীমবিক্রমঃ ।
বানরান্ ভৃশসঙ্ক্রুদ্ধো ভক্ষয়ন্ পরিধাবতি ।। ৬.৬১.৩১ ॥
61.32
কুম্ভকর্ণং সমীক্ষ্যৈব হরয়ো ঽদ্য প্রবিদ্রুতাঃ ।
কথমেনং রণে ক্রুদ্ধং বারয়িষ্যন্তি বানরাঃ ।। ৬.৬১.৩২ ॥
61.33
উচ্যন্তাং বানরাঃ সর্বে যন্ত্রমেতৎ সমুচ্ছ্রিতম্ ।
ইতি বিজ্ঞায় হরয়ো ভবিষ্যন্তীহ নির্ভয়াঃ ।। ৬.৬১.৩৩ ॥
61.34
বিভীষণবচঃ শ্রুত্বা হেতুমৎ সুমুখেরিতম্ ।
উবাচ রাঘবো বাক্যং নীলং সেনাপতিং তদা ।। ৬.৬১.৩৪ ॥
61.35
গচ্ছ সৈন্যানি সর্বাণি ব্যূহ্য তিষ্ঠস্ব পাবকে ।
দ্বারাণ্যাদায় লঙ্কায়াশ্চর্যাশ্চাপ্যথ সঙ্ক্রমান্ ।। ৬.৬১.৩৫ ॥
61.36
শৈলশৃঙ্গাণি বৃক্ষাংশ্চ শিলাশ্চাপ্যুপসংহর ।
তিষ্ঠন্তু বানরাঃ সর্বে সায়ুধাঃ শৈলপাণয়ঃ ।। ৬.৬১.৩৬ ॥
61.37
রাঘবেণ সমাদিষ্টো নীলো হরিচমূপতিঃ ।
শশাস বানরানীকং যথাবৎ কপিকুঞ্জরঃ ।। ৬.৬১.৩৭ ॥
61.38
ততো গবাক্ষঃ শরভো হনুমানঙ্গদস্তথা ।
শৈলশৃঙ্গাণি শৈলাভা গৃহীত্বা দ্বারমভ্যয়ুঃ ।। ৬.৬১.৩৮ ॥
61.39
রামবাক্যমুপশ্রুত্য হরয়ো জিতকাশিনঃ ।
পাদপৈরর্দয়ন্ বীরা বানরাঃ পরবাহিনীম্ ।। ৬.৬১.৩৯ ॥
61.40
ততো হরীণাং তদনীকমুগ্রং ররাজ শৈলোদ্যতদীপ্তহস্তম্ ।
গিরেঃ সমীপানুগতং যথৈব মহন্মহাম্ভোধরজালমুগ্রম্ ।। ৬.৬১.৪০ ॥
61.41
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে একষষ্টিতমঃ সর্গঃ ।
। ৬১ ।।