UtshovSarga 62
62.1
स तु राक्षसशार्दूलो निद्रामदसमाकुलः ।
राजमार्गं श्रिया जुष्टं ययौ विपुलविक्रमः ।। ६.६२.१ ।।
Sa tu rakshasashardulo nidramadasamakulah
Rajamargam shriya jushtam yayau vipulavikramah
62.2
राक्षसानां सहस्रैश्च वृतः परमदुर्जयः ।
गृहेभ्यः पुष्पवर्षेण कीर्यमाणस्तदा ययौ ।। ६.६२.२ ।।
Rakshasanam sahasraishcha vritah paramadurjayah
Grihebhyah pushpavarshena kiryamanastada yayau
62.3
स हेमजालिविततं भानुभास्वरदर्शनम् ।
ददर्श विपुलं रम्यं राक्षसेन्द्रनिवेशनम् ।। ६.६२.३ ।।
Sa hemajalivitatam bhanubhasvaradarshanam
Dadarsha vipulam ramyam rakshasendraniveshanam
62.4
स तत्तदा सूर्य इवाभ्रजालं प्रविश्य रक्षोधिपतेर्निवेशम् ।
ददर्श दूरे ऽग्रजमासनस्थं स्वयम्भुवं शक्र इवासनस्थम् ।। ६.६२.४ ।।
Sa tattada surya ivabhrajalam pravishya rakshodhipaternivesham
Dadarsha dure grajamasanastham svayambhuvam shakra ivasanastham
62.5
भ्रातुः स भवनं गच्छन् रक्षोगणसमन्वितम् ।
कुम्भकर्णः पदन्यासैरकम्पयत मेदिनीम् ।। ६.६२.५ ।।
Bhratuh sa bhavanam gachchhan rakshoganasamanvitam
Kumbhakarnah padanyasairakampayata medinim
62.6
सो ऽभिगम्य गृहं भ्रातुः कक्ष्यामभिविगाह्य च ।
ददर्शोद्विग्नमासीनं विमाने पुष्पके गुरुम् ।। ६.६२.६ ।।
So bhigamya griham bhratuh kakshyamabhivigahya cha
Dadarshodvignamasinam vimane pushpake gurum
62.7
अथ दृष्ट्वा दशग्रीवः कुम्भकर्णमुपस्थितम् ।
तूर्णमुत्थाय संहृष्टः सन्निकर्षमुपानयत् ।। ६.६२.७ ।।
Atha drishtva dashagrivah kumbhakarnamupasthitam
Turnamutthaya sanhrishtah sannikarshamupanayat
62.8
अथासीनस्य पर्यङ्के कुम्भकर्णो महाबलः ।
भ्रातुर्ववन्दे चरणौ किं कृत्यमिति चाब्रवीत् ।। ६.६२.८ ।।
Athasinasya paryanke kumbhakarno mahabalah
Bhraturvavande charanau kim krityamiti chabravit
62.9
उत्पत्य चैनं मुदितो रावणः परिषस्वजे ।
स भ्रात्रा सम्परिष्वक्तो यथावच्छाभिनन्दितः ।। ६.६२.९ ।।
Utpatya chainam mudito ravanah parishasvaje
Sa bhratra samparishvakto yathavachchhabhinanditah
62.10
कुम्भकर्णः शुभं दिव्यं प्रतिपेदे वरासनम् ।
स तदासनमाश्रित्य कुम्भकर्णो महाबलः ।संरक्तनयनः कोपाद्रावणं वाक्यमब्रवीत् ।। ६.६२.१० ।।
Kumbhakarnah shubham divyam pratipede varasanam
Sa tadasanamashritya kumbhakarno mahabalah, sanraktanayanah kopadravanam vakyamabravit
62.11
किमर्थमहमादृत्य त्वया राजन् विबोधितः ।
शंस कस्माद्भयं ते ऽस्ति को ऽद्य प्रेतो भविष्यति ।। ६.६२.११ ।।
Kimarthamahamadritya tvaya rajan vibodhitah
Shansa kasmadbhayam te sti ko dya preto bhavishyati
62.12
भ्रातरं रावणः कुद्धं कुम्भकर्णमवस्थितम् ।
ईषत्तु परिवृत्ताभ्यां नेत्राभ्यां वाक्यमब्रवीत् ।। ६.६२.१२ ।।
Bhrataram ravanah kuddham kumbhakarnamavasthitam
Ishattu parivrittabhyam netrabhyam vakyamabravit
62.13
अद्य ते सुमहान् कालः शयानस्य महाबल ।
सुखितस्त्वं न जानीषे मम रामकृतं भयम् ।। ६.६२.१३ ।।
Adya te sumahan kalah shayanasya mahabala
Sukhitastvam na janishe mama ramakritam bhayam
62.14
एष दाशरथी रामः सुग्रीवसहितो बली ।
समुद्रं सबलस्तीर्त्वा मूलं नः परिकृन्तति ।। ६.६२.१४ ।।
Esha dasharathi ramah sugrivasahito bali
Samudram sabalastirtva mulam nah parikrintati
62.15
हन्त पश्यस्व लङ्कायां वनान्युपवनानि च ।
सेतुना सुखमागम्य वानरैकार्णवीकृतम् ।। ६.६२.१५ ।।
Hanta pashyasva lankayam vananyupavanani cha
Setuna sukhamagamya vanaraikarnavikritam
62.16
ये रक्षसां मुख्यतमा हतास्ते वानरैर्युधि ।
वानराणां क्षयं युद्धे न पश्यामि कदाचन ।। ६.६२.१६ ।।
Ye rakshasam mukhyatama hataste vanarairyudhi
Vanaranam kshayam yuddhe na pashyami kadachana
62.17
न चापि वानरा युद्धे जितपूर्वाः कदाचन ।
। ६.६२.१७ ।।
Na chapi vanara yuddhe jitapurvah kadachana
62.18
तदेतद्भयमुत्पन्नं त्रायस्वेमां महाबल ।
नाशय त्वमिमानद्य तदर्थं बोधितो भवान् ।। ६.६२.१८ ।।
Tadetadbhayamutpannam trayasvemam mahabala
Nashaya tvamimanadya tadartham bodhito bhavan
62.19
सर्वक्षपितकोशं च स त्वमभ्यवपद्य माम् ।
त्रायस्वेमां पुरीं लङ्कां बालवृद्धावशेषिताम् ।। ६.६२.१९ ।।
Sarvakshapitakosham cha sa tvamabhyavapadya mam
Trayasvemam purim lankam balavriddhavasheshitam
62.20
भ्रातुरर्थे महाबाहो कुरु कर्म सुदुष्करम् ।
मयैवं नोक्तपूर्वो हि कच्चिद् भ्रातः परन्तप ।। ६.६२.२० ।।
Bhraturarthe mahabaho kuru karma sudushkaram
Mayaivam noktapurvo hi kachchid bhratah parantapa
62.21
त्वय्यस्ति तु मम स्नेहः परा सम्भावना च मे ।
दैवासुरेषु युद्धेषु बहुशो राक्षसर्षभ ।त्वया देवाः प्रतिव्यूह्य निर्जिताश्चासुरा युधि ।। ६.६२.२१ ।।
Tvayyasti tu mama snehah para sambhavana cha me
Daivasureshu yuddheshu bahusho rakshasarshabha, tvaya devah prativyuhya nirjitashchasura yudhi
62.22
तदेतत् सर्वमातिष्ठ वीर्यं भीमपराक्रम ।
न हि ते सर्वभूतेषु दृश्यते सदृशो बली ।। ६.६२.२२ ।।
Tadetat sarvamatishtha viryam bhimaparakrama
Na hi te sarvabhuteshu drishyate sadrisho bali
62.23
कुरुष्व मे प्रियहितमेतदुत्तमं यथाप्रियं प्रियरणबान्धवप्रिय ।
स्वतेजसा विधम सपत्नवाहिनीं शरद्घनं पवन इवोद्यतो महान् ।। ६.६२.२३ ।।
Kurushva me priyahitametaduttamam yathapriyam priyaranabandhavapriya
Svatejasa vidhama sapatnavahinim sharadghanam pavana ivodyato mahan
62.24
इत्यार्षे श्रीमद्रामायणे वाल्मीकीये आदिकाव्ये श्रीमद्युद्धकाण्डे द्विषष्टितमः सर्गः ।
। ६२ ।।
Ityarshe shrimadramayane valmikiye adikavye shrimadyuddhakande dvishashtitamah sargah