Utshovসর্গ 57
57.1
অকম্পনবধং শ্রুত্বা ক্রুদ্ধো বৈ রাক্ষসেশ্বরঃ ।
কিঞ্চিদ্দীনমুখশ্চাপি সচিবাংস্তানুদৈক্ষত ।। ৬.৫৭.১ ।।।।
57.2
স তু ধ্যাত্বা মুহূর্তং তু মন্ত্রিভিঃ সংবিচার্য চ ।
ততস্তু রাবণঃ পূর্বদিবসে রাক্ষসাধিপঃ ।পুরীং পরিয়য়ৌ লঙ্কাং সর্বান্ গুল্মানবেক্ষিতুম্ ।। ৬.৫৭.২ ।।।।
57.3
তাং রাক্ষসগণৈর্গুপ্তাং গুল্মৈর্বহুভিরাবৃতাম্ ।
দদর্শ নগরীং লঙ্কাং পতাকাধ্বজমালিনীম্ ।। ৬.৫৭.৩ ।।।।
57.4
রুদ্ধাং তু নগরীং দৃষ্ট্বা রাবণো রাক্ষসেশ্বরঃ ।
উবাচামর্ষতঃ কালে প্রহস্তং যুদ্ধকোবিদম্ ।। ৬.৫৭.৪ ।।।।
57.5
পুরস্যোপনিবিষ্টস্য সহসা পীডিতস্য বা ।
নান্যং যুদ্ধাৎ প্রপশ্যামি মোক্ষং যুদ্ধবিশারদ ।। ৬.৫৭.৫ ।।।।
57.6
অহং বা কুম্ভকর্ণো বা ত্বং বা সেনাপতির্মম ।
ইন্দ্রজিদ্বা নিকুম্ভো বা বহেয়ুর্ভারমীদৃশম্ ।। ৬.৫৭.৬ ।।।।
57.7
স ত্বং বলমতঃ শীঘ্রমাদায় পরিগৃহ্য চ ।
বিজয়ায়াভিনির্যাহি যত্র সর্বে বনৌকসঃ ।। ৬.৫৭.৭ ।।।।
57.8
নির্যাণাদেব তে নূনং চপলা হরিবাহিনী ।
নর্দতাং রাক্ষসেন্দ্রাণাং শ্রুত্বা নাদং দ্রবিষ্যতি ।। ৬.৫৭.৮ ।।।।
57.9
চপলা হ্যবিনীতাশ্চ চলচিত্তাশ্চ বানরাঃ ।
ন সহিষ্যন্তি তে নাদং সিংহনাদমিব দ্বিপাঃ ।। ৬.৫৭.৯ ।।।।
57.10
বিদ্রুতে চ বলে তস্মিন্ রামঃ সৌমিত্রিণা সহ ।
অবশস্তে নিরালম্বঃ প্রহস্ত বশমেষ্যতি ।। ৬.৫৭.১০ ।।।।
57.11
আপৎ সংশয়িতা শ্রেয়ো ন তু নিস্সংশয়ীকৃতা ।
প্রতিলোমানুলোমং বা যদ্বা নো মন্যসে হিতম্ ।। ৬.৫৭.১১ ।।।।
57.12
রাবণেনৈবমুক্তস্তু প্রহস্তো বাহিনীপতিঃ ।
রাক্ষসেন্দ্রমুবাচেদমসুরেন্দ্রমিবোশনা ।। ৬.৫৭.১২ ।।।।
57.13
রাজন্ মন্ত্রিতপূর্বং নঃ কুশলৈঃ সহ মন্ত্রিভিঃ ।
বিবাদশ্চাপি নো বৃত্তঃ সমবেক্ষ্য পরস্পরম্ ।। ৬.৫৭.১৩ ।।।।
57.14
প্রদানেন তু সীতায়াঃ শ্রেয়ো ব্যবসিতং ময়া ।
অপ্রদানে পুনর্যুদ্ধং দৃষ্টমেতত্তথৈব নঃ ।। ৬.৫৭.১৪ ।।।।
57.15
সো ঽহং দানৈশ্চ মানৈশ্চ সততং পূজিতস্ত্বয়া ।
সান্ত্বৈশ্চ বিবিধৈঃ কালে কিং ন কুর্যাং প্রিয়ং তব ।। ৬.৫৭.১৫ ।।।।
57.16
ন হি মে জীবিতং রক্ষ্যং পুত্রদারধনানি বা ।
ত্বং পশ্য মাং জুহূষন্তং ত্বদর্থং জীবিতং যুধি ।। ৬.৫৭.১৬ ।।।।
57.17
এবমুক্ত্বা তু ভর্তারং রাবণং বাহিনীপতিঃ ।
উবাচেদং বলাধ্যক্ষান্ প্রহস্তঃ পুরতঃ স্থিতান্ ।। ৬.৫৭.১৭ ।।।।
57.18
সমানয়ত মে শীঘ্রং রাক্ষসানাং মহদ্বলম্ ।
। ৬.৫৭.১৮ ।।।।
57.19
মদ্বাণশতবেগেন হতানাং চ রণাজিরে ।
অদ্য তৃপ্যন্তু মাংসাদাঃ পক্ষিণঃ কাননৌকসাম্ ।। ৬.৫৭.১৯ ।।।।
57.20
ইত্যুক্তাস্তে প্রহস্তেন বলাধ্যক্ষাঃ কৃতত্বরাঃ ।
বলমুদ্যোজয়ামাসুস্তস্মিন্ রাক্ষসমন্দিরে ।। ৬.৫৭.২০ ।।।।
57.21
সা বভূব মুহূর্তেন তিগ্মনানাবিধায়ুধৈঃ ।
লঙ্কা রাক্ষসবীরৈস্তৈর্গজৈরিব সমাকুলা ।। ৬.৫৭.২১ ।।।।
57.22
হুতাশনং তর্পয়তাং ব্রাহ্মণাংশ্চ নমস্যতাম্ ।
আজ্যগন্ধপ্রতিবহঃ সুরভির্মারুতো ববৌ ।। ৬.৫৭.২২ ।।।।
57.23
স্রজশ্চ বিবিধাকারা জগৃহুস্ত্বভিমন্ত্রিতাঃ ।
সঙ্গ্রামসজ্জাঃ সংহৃষ্টা ধারয়ন্ রাক্ষসাস্তদা ।। ৬.৫৭.২৩ ।।।।
57.24
সধনুষ্কাঃ কবচিনো বেগাদাপ্লুত্য রাক্ষসাঃ ।
রাবণং প্রেক্ষ্য রাজানং প্রহস্তং পর্যবারয়ন্ ।। ৬.৫৭.২৪ ।।।।
57.25
অথামন্ত্র্য চ রাজানং ভেরীমাহত্য ভৈরবাম্ ।
আরুরোহ রথং দিব্যং প্রহস্তঃ সজ্জকল্পিতম্ ।। ৬.৫৭.২৫ ।।।।
57.26
হয়ৈর্মহাজবৈর্যুক্তং সম্যক্ সূতসুসংয়তম্ ।
মহাজলদনির্ঘোষং সাক্ষাচ্চন্দ্রার্কভাস্বরম্ ।। ৬.৫৭.২৬ ।।।।
57.27
উরগধ্বজদুর্দ্ধর্ষং সুবরূথং স্বপস্করম্ ।
সুবর্ণজালসংয়ুক্তং প্রহসন্তমিব শ্রিয়া ।। ৬.৫৭.২৭ ।।।।
57.28
ততস্তং রথমাস্থায় রাবণার্পিতশাসনঃ ।
লঙ্কায়া নির্যয়ৌ তূর্ণং বলেন মহতা বৃতঃ ।। ৬.৫৭.২৮ ।।।।
57.29
ততো দুন্দুভিনির্ঘোষঃ পর্জন্যনিনদোপমঃ ।
বাদিত্রাণাং চ নিনদঃ পূরয়ন্নিব সাগরম্ ।শুশ্রুবে শঙ্খশব্দশ্চ প্রয়াতে বাহিনীপতৌ ।। ৬.৫৭.২৯ ।।।।
57.30
নিনদন্তঃ স্বরান্ ঘোরান্ রাক্ষসা জগ্মুরগ্রতঃ ।
ভীমরূপা মহাকায়াঃ প্রহস্তস্য পুরস্সরাঃ ।। ৬.৫৭.৩০ ।।।।
57.31
নরান্তকঃ কুম্ভহনুর্মহানাদঃ সমুন্নতঃ ।
প্রহস্তসচিবা হ্যেতে নির্যয়ুঃ পরিবার্য তম্ ।। ৬.৫৭.৩১ ।।।।
57.32
ব্যূঢেনৈব সুঘোরেণ পূর্বদ্বারাৎ স নির্যয়ৌ ।
গজয়ূথনিকাশেন বলেন মহতা বৃতঃ ।। ৬.৫৭.৩২ ।।।।
57.33
সাগরপ্রতিমৌঘেন বৃতস্তেন বলেন সঃ ।
প্রহস্তো নির্যয়ৌ তূর্ণং কালান্তকয়মোপমঃ ।। ৬.৫৭.৩৩ ।।।।
57.34
তস্য নির্যাণঘোষেণ রাক্ষসানাং চ নর্দতাম্ ।
লঙ্কায়াং সর্বভূতানি বিনেদুর্বিকৃতৈঃ স্বরৈঃ ।। ৬.৫৭.৩৪ ।।।।
57.35
ব্যভ্রমাকাশমাবিশ্য মাংসশোণিতভোজনাঃ ।
মণ্ডলান্যপসব্যানি খগাশ্চক্রূ রথং প্রতি ।। ৬.৫৭.৩৫ ।।।।
57.36
বমন্ত্যঃ পাবকজ্বালাঃ শিবা ঘোরং ববাশিরে ।
অন্তরিক্ষাৎ পপাতোল্কা বায়ুশ্চ পরুষো ববৌ ।। ৬.৫৭.৩৬ ।।।।
57.37
অন্যোন্যমভিসংরব্ধা গ্রহাশ্চ ন চকাশিরে ।
। ৬.৫৭.৩৭ ।।।।
57.38
মেঘাশ্চ খরনির্ঘোষা রথস্যোপরি রক্ষসঃ ।
ববৃষূ রুধিরং চাস্য সিষিচুশ্চ পুরস্সরান্ ।। ৬.৫৭.৩৮ ।।।।
57.39
কেতুমূর্ধনি গৃধ্রো ঽস্য নিলীনো দক্ষিণামুখঃ ।
তুদন্নুভয়তঃ পার্শ্বং সমগ্রামহরৎ প্রভাম্ ।। ৬.৫৭.৩৯ ।।।।
57.40
সারথের্বহুশশ্চাস্য সঙ্গ্রামমবগাহতঃ ।
প্রতোদো ন্যপতদ্ধস্তাৎ সূতস্য হয়সাদিনঃ ।। ৬.৫৭.৪০ ।।।।
57.41
নির্যাণশ্রীশ্চ যা ঽস্যাসীদ্ভাস্বরা বসুদুর্লভা ।
সা ননাশ মুহূর্তেন সমে চ স্খলিতা হয়াঃ ।। ৬.৫৭.৪১ ।।।।
57.42
প্রহস্তং ত্বভিনির্যান্তং প্রখ্যাতবলপৌরুষম্ ।
যুধি নানাপ্রহরণা কপিসেনা ঽভ্যবর্তত ।। ৬.৫৭.৪২ ।।।।
57.43
অথ ঘোষঃ সুতুমুলো হরীণাং সমজায়ত ।
বৃক্ষানারুজতাং চৈব গুর্বীরাগৃহ্ণতাং শিলাঃ ।। ৬.৫৭.৪৩ ।।।।
57.44
নদতাং রাক্ষসানাং চ বানরাণাং চ গর্জতাম্ ।
উভে প্রমুদিতে সৈন্যে রক্ষোগণবনৌকসাম্ ।। ৬.৫৭.৪৪ ।।।।
57.45
বেগিতানাং সমর্থানামন্যোন্যবধকাঙ্ক্ষিণাম্ ।
পরস্পরং চাহ্বয়তাং নিনাদঃ শ্রূয়তে মহান্ ।। ৬.৫৭.৪৫ ।।।।
57.46
ততঃ প্রহস্তঃ কপিরাজবাহিনীমভিপ্রতস্থে বিজয়ায় দুর্মতিঃ ।
বিবৃদ্ধবেগাং চ বিবেশ তাং চমূং যথা মুমূর্ষুঃ শলভো বিভাবসুম্ ।। ৬.৫৭.৪৬ ।।