Utshovসর্গ 56
56.1
তদ্দৃষ্ট্বা সুমহৎ কর্ম কৃতং বানরসত্তমৈঃ ।
ক্রোধমাহারয়ামাস যুধি তীব্রমকম্পনঃ ।। ৬.৫৬.১ ।।।।
56.2
ক্রোধমূর্চ্ছিতরূপস্তু ধূন্বন্ পরমকার্মুকম্ ।
দৃষ্ট্বা তু কর্ম শত্রূণাং সারথিং বাক্যমব্রবীৎ ।। ৬.৫৬.২ ।।।।
56.3
তত্রৈব তাবত্ত্বরিতং রথং প্রাপয় সারথে ।
যত্রৈতে বহবো ঘ্নন্তি সুবহূন্ রাক্ষসান্ রণে ।। ৬.৫৬.৩ ।।।।
56.4
এতে ঽত্র বলবন্তো হি ভীমকায়াশ্চ বানরাঃ ।
দ্রুমশৈলপ্রহরণাস্তিষ্ঠন্তি প্রমুখে মম ।। ৬.৫৬.৪ ।।।।
56.5
এতান্নিহন্তুমিচ্ছামি সমরশ্লাঘিনো হ্যহম্ ।
এতৈঃ প্রমথিতং সর্বং দৃশ্যতে রাক্ষসং বলম্ ।। ৬.৫৬.৫ ।।।।
56.6
ততঃ প্রজবনাশ্বেন রথেন রথিনাং বরঃ ।
হরীনভ্যহনৎ ক্রোধাচ্ছরজালৈরকম্পনঃ ।। ৬.৫৬.৬ ।।।।
56.7
ন স্থাতুং বানরাঃ শেকুঃ কিং পুনর্যোদ্ধুমাহবে ।
অকম্পনশরৈর্ভগ্নাঃ সর্ব এব বিদুদ্রুবুঃ ।। ৬.৫৬.৭ ।।।।
56.8
তান্ মৃত্যুবশমাপন্নানকম্পনবশং গতান্ ।
সমীক্ষ্য হনুমান্ জ্ঞাতীনুপতস্থে মহাবলঃ ।। ৬.৫৬.৮ ।।।।
56.9
তং মহাপ্লবগং দৃষ্ট্বা সর্বে প্লবগয়ূথপাঃ ।
সমেত্য সমরে বীরাঃ সংহৃষ্টাঃ পর্যবারয়ন্ ।। ৬.৫৬.৯ ।।।।
56.10
অবস্থিতং হনূমন্তং তে দৃষ্ট্বা হরিয়ূথপাঃ ।
বভূবুর্বলবন্তো হি বলবন্তং সমাশ্রিতাঃ ।। ৬.৫৬.১০ ।।।।
56.11
অকম্পনস্তু শৈলাভং হনূমন্তমবস্থিতম্ ।
মহেন্দ্র ইব ধারাভিঃ শরৈরভিববর্ষ হ ।। ৬.৫৬.১১ ।।।।
56.12
অচিন্তয়িত্বা বাণৌঘান্ শরীরে পতিতান্ শিতান্ ।
অকম্পনবধার্থায় মনো দধ্রে মহাবলঃ ।। ৬.৫৬.১২ ।।।।
56.13
স প্রসহ্য মহাতেজা হনূমান্ মারুতাত্মজঃ ।
অভিদুদ্রাব তদ্রক্ষঃ কম্পয়ন্নিব মেদিনীম্ ।। ৬.৫৬.১৩ ।।।।
56.14
তস্যাভিনর্দমানস্য দীপ্যমানস্য তেজসা ।
বভূব রূপং দুর্ধর্ষং দীপ্তস্যেব বিভাবসোঃ ।। ৬.৫৬.১৪ ।।।।
56.15
আত্মানমপ্রহরণং জ্ঞাত্বা ক্রোধসমন্বিতঃ ।
শৈলমুত্পাটয়ামাস বেগেন হরিপুঙ্গবঃ ।। ৬.৫৬.১৫ ।।।।
56.16
তং গৃহীত্বা মহাশৈলং পাণিনৈকেন মারুতিঃ ।
স বিনদ্য মহানাদং ভ্রাময়ামাস বীর্যবান্ ।। ৬.৫৬.১৬ ।।।।
56.17
ততস্তমভিদুদ্রাব রাক্ষসেন্দ্রমকম্পনম্ ।
পুরা হি নমুচিং সঙ্খ্যে বজ্রেণেব পুরন্দরঃ ।। ৬.৫৬.১৭ ।।।।
56.18
অকম্পনস্তু তদ্দৃষ্ট্বা গিরিশৃঙ্গং সমুদ্যতম্ ।
দূরাদেব মহাবাণৈরর্ধচন্দ্রৈর্ব্যদারয়ৎ ।। ৬.৫৬.১৮ ।।।।
56.19
তত্পর্বতাগ্রমাকাশে রক্ষোবাণবিদারিতম্ ।
বিশীর্ণং পতিতং দৃষ্ট্বা হনুমান্ ক্রোধমূর্চ্ছিতঃ ।। ৬.৫৬.১৯ ।।।।
56.20
সো ঽশ্বকর্ণং সমাসাদ্য রোষদর্পান্বিতো হরিঃ ।
তূর্ণমুত্পাটয়ামাস মহাগিরিমিবোচ্ছ্রিতম্ ।। ৬.৫৬.২০ ।।।।
56.21
তং গৃহীত্বা মহাস্কন্ধং সো ঽশ্বকর্ণং মহাদ্যুতিঃ ।
প্রহস্য পরয়া প্রীত্যা ভ্রাময়ামাস সংয়ুগে ।। ৬.৫৬.২১ ।।।।
56.22
প্রধাবন্নূরুবেগেন প্রভঞ্জংস্তরসা দ্রুমান্ ।
হনুমান্ পরমক্রুদ্ধশ্চরণৈর্দারয়ৎ ক্ষিতিম্ ।। ৬.৫৬.২২ ।।।।
56.23
গজাংশ্চ সগজারোহান্ সরথান্ রথিনস্তথা ।
জঘান হনুমান্ ধীমান্ রাক্ষসাংশ্চ পদাতিগান্ ।। ৬.৫৬.২৩ ।।।।
56.24
তমন্তকমিব ক্রুদ্ধং সমরে প্রাণহারিণম্ ।
হনুমন্তমভিপ্রেক্ষ্য রাক্ষসা বিপ্রদুদ্রুবুঃ ।। ৬.৫৬.২৪ ।।।।
56.25
তমাপতন্তং সঙ্ক্রুদ্ধং রাক্ষসানাং ভয়াবহম্ ।
দদর্শাকম্পনো বীরশ্চুক্রোধ চ ননাদ চ ।। ৬.৫৬.২৫ ।।।।
56.26
স চতুর্দশভির্বাণৈঃ শিতৈর্দেহবিদারণৈঃ ।
নির্বিভেদ হনূমন্তং মহাবীর্যমকম্পনঃ ।। ৬.৫৬.২৬ ।।।।
56.27
স তদা প্রতিবিদ্ধস্তু বহ্বীভিঃ শরবৃষ্টিভিঃ ।
হনুমান্ দদৃশে বীরঃ প্ররূঢ ইব সানুমান্ ।। ৬.৫৬.২৭ ।।।।
56.28
বিররাজ মহাকায়ো মহাবীর্যো মহামনাঃ ।
পুষ্পিতাশোকসঙ্কাশো বিধূম ইব পাবকঃ ।। ৬.৫৬.২৮ ।।।।
56.29
ততো ঽন্যং বৃক্ষমুত্পাট্য কত্বা বেগমনুত্তমম্ ।
শিরস্যভিজঘানাশু রাক্ষসেন্দ্রমকম্পনম্ ।। ৬.৫৬.২৯ ।।।।
56.30
স বৃক্ষেণ হতস্তেন সক্রোধেন মহাত্মনা ।
রাক্ষশো বানরেন্দ্রেণ পপাত চ মমার চ ।। ৬.৫৬.৩০ ।।।।
56.31
তং দৃষ্ট্বা নিহতং ভূমৌ রাক্ষসেন্দ্রমকম্পনম্ ।
ব্যথিতা রাক্ষসাঃ সর্বে ক্ষিতিকম্প ইব দ্রুমাঃ ।। ৬.৫৬.৩১ ।।।।
56.32
ত্যক্তপ্রহরণাঃ সর্বে রাক্ষসাস্তে পরাজিতাঃ ।
লঙ্কামভিয়য়ুস্ত্রস্তা বানরৈস্তৈরভিদ্রুতাঃ ।। ৬.৫৬.৩২ ।।।।
56.33
তে মুক্তকেশাঃ সম্ভ্রান্তা ভগ্নমানাঃ পরাজিতাঃ ।
স্রবচ্ছ্রমজলৈরঙ্গৈঃ শ্বসন্তো বিপ্রদুদ্রুবুঃ ।। ৬.৫৬.৩৩ ।।।।
56.34
অন্যোন্যং প্রমমন্থুস্তে বিবিশুর্নগরং ভয়াৎ ।
পৃষ্ঠতস্তে সুসম্মূঢাঃ প্রেক্ষমাণা মুহুর্মুহুঃ ।। ৬.৫৬.৩৪ ।।।।
56.35
তেষু লঙ্কাং প্রবিষ্টেষু রাক্ষসেষু মহাবলাঃ ।
সমেত্য হরয়ঃ সর্বে হনুমন্তমপূজয়ন্ ।। ৬.৫৬.৩৫ ।।।।
56.36
সো ঽপি প্রহৃষ্টস্তান্ সর্বান্ হরীন্ প্রত্যভ্যপূজয়ৎ ।
হনুমান্ সত্ত্বসম্পন্নো যথার্হমনুকূলতঃ ।। ৬.৫৬.৩৬ ।।।।
56.37
বিনেদুশ্চ যথাপ্রাণং হরয়ো জিতকাশিনঃ ।
চকর্ষুশ্চ পুনস্তত্র সপ্রাণানপি রাক্ষসান্ ।। ৬.৫৬.৩৭ ।।।।
56.38
স বীরশোভামভজন্মহাকপিঃ সমেত্য রক্ষাংসি নিহত্য মারুতিঃ ।
মহাসুরং ভীমমমিত্রনাশনং যথৈব বিষ্ণুর্বলিনং চমূমুখে ।। ৬.৫৬.৩৮ ।।।।
56.39
অপূজয়ন্ দেবগণাস্তদা কপিং স্বয়ং চ রামো ঽতিবলশ্চ লক্ষ্মণঃ ।
তথৈব সুগ্রীবমুখাঃ প্লবঙ্গমা বিভীষণশ্চৈব মহাবলস্তথা ।। ৬.৫৬.৩৯ ।।