Utshovসর্গ 55
55.1
বজ্রদংষ্ট্রং হতং শ্রুত্বা বালিপুত্রেণ রাবণঃ ।
বলাধ্যক্ষমুবাচেদং কৃতাঞ্জলিমবস্থিতম্ ।। ৬.৫৫.১ ।।।।
55.2
শীঘ্রং নির্যান্তু দুর্ধর্ষা রাক্ষসা ভীমবিক্রমাঃ ।
অকম্পনং পুরস্কৃত্য সর্বশস্ত্রপ্রকোবিদম্ ।। ৬.৫৫.২ ।।।।
55.3
এষ শাস্তা চ গোপ্তা চ নেতা চ যুধি সম্মতঃ ।
ভূতিকামশ্চ মে নিত্যং নিত্যং চ সমরপ্রিয়ঃ ।। ৬.৫৫.৩ ।।।।
55.4
এষ জেষ্যতি কাকুত্স্থৌ সুগ্রীবং চ মহাবলম্ ।
বানরাংশ্চাপরান্ ঘোরান্ হনিষ্যতি পরন্তপঃ ।। ৬.৫৫.৪ ।।।।
55.5
পরিগৃহ্য স তামাজ্ঞাং রাবণস্য মহাবলঃ ।
বলং সন্ত্বরয়ামাস তদা লঘুপরাক্রমঃ ।। ৬.৫৫.৫ ।।।।
55.6
ততো নানাপ্রহরণা ভীমাক্ষা ভীমদর্শনাঃ ।
নিষ্পেতূ রক্ষসাং মুখ্যা বলাধ্যক্ষপ্রচোদিতাঃ ।। ৬.৫৫.৬ ।।।।
55.7
রথমাস্থায় বিপুলং তপ্তকাঞ্চনকুণ্ডলঃ ।
মেঘাভো মেঘবর্ণশ্চ মেঘস্বনমহাস্বনঃ ।রাক্ষসৈঃ সংবৃতো ভীমৈস্তদা নির্যাত্যকম্পনঃ ।। ৬.৫৫.৭ ।।।।
55.8
ন হি কম্পয়িতুং শক্যঃ সুরৈরপি মহামৃধে ।
অকম্পনস্ততস্তেষামাদিত্য ইব তেজসা ।। ৬.৫৫.৮ ।।।।
55.9
তস্য নির্ধাবমানস্য সংরব্ধস্য যুয়ত্সয়া ।
অকস্মাদ্দৈন্যমাগচ্ছদ্ধয়ানাং রথবাহিনাম্ ।। ৬.৫৫.৯ ।।।।
55.10
ব্যস্ফুরন্নয়নং চাস্য সব্যং যুদ্ধাভিনন্দিনঃ ।
বিবর্ণো মুখবর্ণশ্চ গদ্গদশ্চাভবৎ স্বনঃ ।। ৬.৫৫.১০ ।।।।
55.11
অভবৎ সুদিনে চাপি দুর্দিনং রূক্ষমারুতম্ ।
ঊচুঃ খগা মৃগাঃ সর্বে বাচঃ ক্রূরা ভয়াবহাঃ ।। ৬.৫৫.১১ ।।।।
55.12
স সিংহোপচিতস্কন্ধঃ শার্দূলসমবিক্রমঃ ।
তানুত্পাতানচিন্ত্যৈব নির্জগাম রণাজিরম্ ।। ৬.৫৫.১২ ।।।।
55.13
তদা নির্গচ্ছতস্তস্য রক্ষসঃ সহ রাক্ষসৈঃ ।
বভূব সুমহান্নাদঃ ক্ষোভয়ন্নিব সাগরম্ ।। ৬.৫৫.১৩ ।।।।
55.14
তেন শব্দেন বিত্রস্তা বানরাণাং মহাচমূঃ ।
দ্রুমশৈলপ্রহরণা যোদ্ধুং সমবতিষ্ঠত ।। ৬.৫৫.১৪ ।।।।
55.15
তেষাং যুদ্ধং মহারৌদ্রং সঞ্জজ্ঞে হরিরক্ষসাম্ ।
রামরাবণয়োরর্থে সমভিত্যক্তজীবিনাম্ ।। ৬.৫৫.১৫ ।।।।
55.16
সর্বে হ্যতি বলাঃ শূরাঃ সর্বে পর্বতসন্নিভাঃ ।
হরয়ো রাক্ষসাশ্চৈব পরস্পরজিঘাংসবঃ ।। ৬.৫৫.১৬ ।।।।
55.17
তেষাং বিনর্দতাং শব্দঃ সংয়ুগে ঽতিতরস্বিনাম্ ।
সুশ্রুবে সুমহান্ ক্রোধাদন্যোন্যমভিগর্জতাম্ ।। ৬.৫৫.১৭ ।।।।
55.18
রজশ্চারুণবর্ণাভং সুভীমমভবদ্ভৃশম্ ।
উদ্ভূতং হরিরক্ষোভিঃ সংরুরোধ দিশো দশ ।। ৬.৫৫.১৮ ।।।।
55.19
অন্যোন্যং রজসা তেন কৌশেয়োদ্ধূতপাণ্ডুনা ।
সংবৃতানি চ ভূতানি দদৃশুর্ন রণাজিরে ।। ৬.৫৫.১৯ ।।।।
55.20
ন ধ্বজা ন পতাকা বা চর্ম বা তুরগো ঽপি বা ।
আয়ুধং স্যন্দনং বা ঽপি দদৃশে তেন রেণুনা ।। ৬.৫৫.২০ ।।।।
55.21
শব্দশ্চ সুমহাংস্তেষাং নর্দতামভিধাবতাম্ ।
শ্রূয়তে তুমুলে যুদ্ধে ন রূপাণি চকাশিরে ।। ৬.৫৫.২১ ।।।।
55.22
হরীনেব সুসঙ্ক্রুদ্ধা হরয়ো জঘ্নুরাহবে ।
রাক্ষসাশ্চাপি রক্ষাংসি নিজঘ্নুস্তিমিরে তদা ।। ৬.৫৫.২২ ।।।।
55.23
পরাংশ্চৈব বিনিঘ্নন্তঃ স্বাংশ্চ বানররাক্ষসাঃ ।
রুধিরার্দ্রাং তদা চক্রুর্মহীং পঙ্কানুলেপনাম্ ।। ৬.৫৫.২৩ ।।।।
55.24
ততস্তু রুধিরৌঘেণ সিক্তং ব্যপগতং রজঃ ।
শরীরশবসঙ্কীর্ণা বভূব চ বসুন্ধরা ।। ৬.৫৫.২৪ ।।।।
55.25
দ্রুমশক্তিশিলাপ্রাসৈর্গদাপরিঘতোমরৈঃ ।
হরয়ো রাক্ষসাশ্চৈব জঘ্নুরন্যোন্যমোজসা ।। ৬.৫৫.২৫ ।।।।
55.26
বাহুভিঃ পরিঘাকারৈর্যুদ্ধ্যন্তঃ পর্বতোপমাঃ ।
হরয়ো ভীমকর্মাণো রাক্ষসান্ জঘ্নুরাহবে ।। ৬.৫৫.২৬ ।।।।
55.27
রাক্ষসাস্ত্বপি সঙ্ক্রুদ্ধাঃ প্রাসতোমরপাণয়ঃ ।
কপীন্নিজঘ্নিরে তত্র শস্ত্রৈঃ পরমদারুণৈঃ ।। ৬.৫৫.২৭ ।।।।
55.28
অকম্পনঃ সুসঙ্ক্রুদ্ধো রাক্ষসানাং চমূপতিঃ ।
সংহর্ষয়তি তান্ সর্বান্ রাক্ষসান্ ভীমবিক্রমান্ ।। ৬.৫৫.২৮ ।।।।
55.29
হরয়স্ত্বপি সক্ষাংসি মহাদ্রুমমহাশ্মভিঃ ।
বিদারয়ন্ত্যভিক্রম্য শস্ত্রাণ্যাচ্ছিদ্য বীর্যতঃ ।। ৬.৫৫.২৯ ।।।।
55.30
এতস্মিন্নন্তরে বীরা হরয়ঃ কুমুদো নলঃ ।
মৈন্দশ্চ দ্বিবিদঃ ক্রুদ্ধাশ্চক্রুর্বেগমনুত্তমম্ ।। ৬.৫৫.৩০ ।।।।
55.31
তে তু বৃক্ষৈর্মহাবেগা রাক্ষসানাং চমূমুখে ।
কদনং সুমহচ্চক্রুর্লীলয়া হরিয়ূথপাঃ ।মমন্থূ রাক্ষসান্ সর্বে বানরা গণশো ভৃশম্ ।। ৬.৫৫.৩১ ।।