Utshovসর্গ 48
48.1
ভর্তারং নিহতং দৃষ্ট্বা লক্ষ্মণং চ মহাবলম্ ।
বিললাপ ভৃশং সীতা করুণং শোককর্শিতা ।। ৬.৪৮.১ ।।।।
48.2
ঊচুর্লক্ষণিনো যে মাং পুত্রিণ্যবিধবেতি চ ।
তে ঽদ্য সর্বে হতে রামে জ্ঞানিনো ঽনৃতবাদিনঃ ।। ৬.৪৮.২ ।।।।
48.3
যজ্বনো মহিষীং যে মামূচুঃ পত্নীং চ সত্রিণঃ ।
তে ঽদ্য সর্বে হতে রামে জ্ঞানিনো ঽনৃতবাদিনঃ ।। ৬.৪৮.৩ ।।।।
48.4
ঊচুঃ সংশ্রবণে যে মাং দ্বিজাঃ কার্তান্তিকাঃ শুভাম্ ।
তে ঽদ্য সর্বে হতে রামে জ্ঞানিনো ঽনৃতবাদিনঃ ।। ৬.৪৮.৪ ।।।।
48.5
বীরপার্থিবপত্নী ত্বং যে ধন্যেতি চ মাং বিদুঃ ।
তে ঽদ্য সর্বে হতে রামে জ্ঞানিনো ঽনৃতবাদিনঃ ।। ৬.৪৮.৫ ।।।।
48.6
ইমানি খলু পদ্মানি পাদয়োর্যৈঃ কিল স্ত্রিয়ঃ ।
আধিরাজ্যে ঽভিষিচ্যন্তে নরেন্দ্রৈঃ পতিভিঃ সহ ।। ৬.৪৮.৬ ।।।।
48.7
বৈধব্যং যান্তি যৈর্নার্যো লক্ষণৈর্ভাগ্যদুর্লভাঃ ।
নাত্মনস্তানি পশ্যামি পশ্যন্তী হতলক্ষণা ।। ৬.৪৮.৭ ।।।।
48.8
সত্যনামানি পদ্মানি স্ত্রীণামুক্তানি লক্ষণৈঃ ।
তান্যদ্য নিহতে রামে বিতথানি ভবন্তি মে ।। ৬.৪৮.৮ ।।।।
48.9
কেশাঃ সূক্ষ্মাঃ সমা নীলা ভ্রুবৌ চাসঙ্গতে মম ।
বৃত্তে চারোমশে জঙ্ঘে দন্তাশ্চাবিরলা মম ।। ৬.৪৮.৯ ।।।।
48.10
শঙ্খে নেত্রে করৌ পাদৌ গুল্ফাবূরূ চ মে চিতৌ ।
অনুবৃত্তনখাঃ স্নিগ্ধাঃ সমাশ্চাঙ্গুলয়ো মম ।। ৬.৪৮.১০ ।।।।
48.11
স্তনৌ চাবিরলৌ পীনৌ মমেমৌ মগ্নচূচুকৌ ।
মগ্না চোত্সঙ্গিনী নাভিঃ পার্শ্বোরস্কাশ্চ মে চিতাঃ ।। ৬.৪৮.১১ ।।।।
48.12
মম বর্ণো মণিনিভো মৃদূন্যঙ্গরুহাণি চ ।
প্রতিষ্ঠিতাং দ্বাদশভির্মামূচুঃ শুভলক্ষণাম্ ।। ৬.৪৮.১২ ।।।।
48.13
সমগ্রয়বমচ্ছিদ্রং পাণিপাদং চ বর্ণবৎ ।
মন্দস্মিতেত্যেব চ মাং কন্যালক্ষণিনো দ্বিজাঃ ।। ৬.৪৮.১৩ ।।।।
48.14
আধিরাজ্যে ঽভিষেকো মে ব্রাহ্মণৈঃ পতিনা সহ ।
কৃতান্তকুশলৈরুক্তং তত্সর্বং বিতথীকৃতম্ ।। ৬.৪৮.১৪ ।।।।
48.15
শোধয়িত্বা জনস্থানং প্রবৃত্তিমুপলভ্য চ ।
তীর্ত্বা সাগরমক্ষোভ্যং ভ্রাতরৌ গোষ্পদে হতৌ ।। ৬.৪৮.১৫ ।।।।
48.16
ননু বারুণমাগ্নেয়মৈন্দ্রং বায়ব্যমেব চ ।
অস্ত্রং ব্রহ্মশিরশ্চৈব রাঘবৌ প্রত্যপদ্যতাম্ ।। ৬.৪৮.১৬ ।।।।
48.17
অদৃশ্যমানেন রণে মায়য়া বাসবোপমৌ ।
মম নাথাবনাথায়া নিহতৌ রামলক্ষ্মণৌ ।। ৬.৪৮.১৭ ।।।।
48.18
ন হি দৃষ্টিপথং প্রাপ্য রাঘবস্য রণে রিপুঃ ।
জীবন্ প্রতিনিবর্তেত যদ্যপি স্যান্মনোজবঃ ।। ৬.৪৮.১৮ ।।।।
48.19
ন কালস্যাতিভারো ঽস্তি কৃতান্তশ্চ সুদুর্জয়ঃ ।
যত্র রামঃ সহ ভ্রাত্রা শেতে যুধি নিপাতিতঃ ।। ৬.৪৮.১৯ ।।।।
48.20
ন শোচামি তথা রামং লক্ষ্মণং চ মহাবলম্ ।
নাত্মানং জননীং বাপি যথা শ্বশ্রূং তপস্বিনীম্ ।। ৬.৪৮.২০ ।।।।
48.21
সা ঽনুচিন্তয়তে নিত্যং সমাপ্তব্রতমাগতম্ ।
কদা দ্রক্ষ্যামি সীতাং চ লক্ষ্মণং চ সরাঘবম্ ।। ৬.৪৮.২১ ।।।।
48.22
পরিদেবয়মানাং তাং রাক্ষসী ত্রিজটা ঽব্রবীৎ ।
। ৬.৪৮.২২ ।।।।
48.23
মা বিষাদং কৃথা দেবি ভর্তা ঽয়ং তব জীবতি ।
। ৬.৪৮.২৩ ।।।।
48.24
কারণানি চ বক্ষ্যামি মহান্তি সদৃশানি চ ।
যথেমৌ জীবতো দেবি ভ্রাতরৌ রামলক্ষ্মণৌ ।। ৬.৪৮.২৪ ।।।।
48.25
নহি কোপপরীতানি হর্ষপর্যুত্সুকানি চ ।
ভবন্তি যুধি যোধানাং মুখানি নিহতে পতৌ ।। ৬.৪৮.২৫ ।।।।
48.26
ইদং বিমানং বৈদেহি পুষ্পকং নাম নামতঃ ।
দিব্যং ত্বাং ধারয়েন্নৈবং যদ্যেতৌ গতজীবিতৌ ।। ৬.৪৮.২৬ ।।।।
48.27
হতবীরপ্রধানাং হি হতৌত্সাহা নিরুদ্যমা ।
সেনা ভ্রমতি সঙ্খ্যেষু হতকর্ণেব নৌর্জলে ।। ৬.৪৮.২৭ ।।।।
48.28
ইয়ং পুনরসম্ভ্রান্তা নিরুদ্বিগ্না তরস্বিনী ।
সেনা রক্ষতি কাকুত্স্থৌ ময়া প্রীত্যা নিবেদিতৌ ।। ৬.৪৮.২৮ ।।।।
48.29
সা ত্বং ভব সুবিস্রব্ধা অনুমানৈঃ সুখোদয়ৈঃ ।
অহতৌ পশ্য কাকুত্স্থৌ স্নেহাদেতদ্ ব্রবীমি তে ।। ৬.৪৮.২৯ ।।।।
48.30
অনৃতং নোক্তপূর্বং মে ন চ বক্ষ্যে কদাচন ।
চারিত্রসুখশীলত্বাৎ প্রবিষ্টা ঽসি মনো মম ।। ৬.৪৮.৩০ ।।।।
48.31
নেমৌ শক্যৌ রণে জেতুং সেন্দ্রৈরপি সুরাসুরৈঃ ।
তাদৃশং দর্শনং দৃষ্ট্বা ময়া চাবেদিতং তব ।ইদং চ সুমহচ্চিহ্নং শনৈঃ পশ্যস্ব মৈথিলি ।। ৬.৪৮.৩১ ।।।।
48.32
নিস্সঞ্জ্ঞাবপ্যুভাবেতৌ নৈব লক্ষ্মীর্বিয়ুজ্যতে ।
প্রায়েণ গতসত্ত্বানাং পুরুষাণাং গতায়ুষাম্ ।দৃশ্যমানেষু বক্ত্রেষু পরং ভবতি বৈকৃতম্ ।। ৬.৪৮.৩২ ।।।।
48.33
ত্যজ শোকং চ মোহং চ দুঃখং চ জনকাত্মজে ।
রামলক্ষ্মণয়োরর্থে নাদ্য শক্যমজীবিতুম্ ।। ৬.৪৮.৩৩ ।।।।
48.34
শ্রুত্বা তু বচনং তস্যাঃ সীতা সুরসুতোপমা ।
কৃতাঞ্জলিরুবাচেদমেবমস্ত্বিতি মৈথিলী ।। ৬.৪৮.৩৪ ।।।।
48.35
বিমানং পুষ্পকং তত্তু সন্নিবর্ত্য মনোজবম্ ।
দীনা ত্রিজটয়া সীতা লঙ্কামেব প্রবেশিতা ।। ৬.৪৮.৩৫ ।।।।
48.36
ততস্ত্রিজটয়া সার্ধং পুষ্পকাদবরুহ্য সা ।
অশোকবনিকামেব রাক্ষসীভিঃ প্রবেশিতা ।। ৬.৪৮.৩৬ ।।।।
48.37
প্রবিশ্য সীতা বহুবৃক্ষষণ্ডাং তাং রাক্ষসেন্দ্রস্য বিহারভূমিম্ ।
সম্প্রেক্ষ্য সঞ্চিন্ত্য চ রাজপুত্রৌ পরং বিষাদং সমুপাজগাম ।। ৬.৪৮.৩৭ ।।