সর্গ 47

47.1

প্রতিপ্রবিষ্টে লঙ্কাং তু কৃতার্থে রাবণাত্মজে ।
রাঘবং পরিবার্যার্তা ররক্ষুর্বানরর্ষভাঃ ।। ৬.৪৭.১ ।।।।

হনুমানঙ্গদো নীলঃ সুষেণঃ কুমুদো নলঃ ।
গজো গবাক্ষো গবয়ঃ শরভো গন্ধমাদনঃ ।জাম্ববানৃষভঃ স্কন্ধো রম্ভঃ শতবলিঃ পৃথুঃ ।। ৬.৪৭.২ ।।।।

ব্যূঢানীকাশ্চ যত্তাশ্চ দ্রুমানাদায় সর্বতঃ ।
বীক্ষমাণা দিশঃ সর্বাস্তির্যগূর্ধ্বং চ বানরাঃ ।তৃণেষ্বপি চ চেষ্টত্সু রাক্ষসা ইতি মেনিরে ।। ৬.৪৭.৩ ।।।।

রাবণশ্চাপি সংহৃষ্টো বিসৃজ্যেন্দ্রজিতং সুতম্ ।
আজুহাব ততঃ সীতারক্ষিণী রাক্ষসীস্তদা ।। ৬.৪৭.৪ ।।।।

রাক্ষস্যস্ত্রিজটা চৈব শাসনাৎ সমুপস্থিতাঃ ।
। ৬.৪৭.৫ ।।।।

তা উবাচ ততো হৃষ্টো রাক্ষসী রাক্ষসাধিপঃ ।
। ৬.৪৭.৬ ।।।।

হতাবিন্দ্রজিতা ঽ ঽখ্যাত বৈদেহ্যা রামলক্ষ্মণৌ ।
পুষ্পকং চ সমারোপ্য দর্শয়ধ্বং হতৌ রণে ।। ৬.৪৭.৭ ।।।।

যদাশ্রয়াদবষ্টব্ধা নেয়ং মামুপতিষ্ঠতি ।
সো ঽস্যা ভর্ত্তা সহ ভ্রাত্রা নিরস্তো রণমূর্ধনি ।। ৬.৪৭.৮ ।।।।

নির্বিশঙ্কা নিরুদ্বিগ্না নিরপেক্ষা চ মৈথিলী ।
মামুপস্থাস্যতে সীতা সর্বাভরণভূষিতা ।। ৬.৪৭.৯ ।।।।

অদ্য কালবশং প্রাপ্তং রণে রামং সলক্ষ্মণম্ ।
অবেক্ষ্য বিনিবৃত্তাশা চান্যাং গতিমপশ্যতী ।নিরপেক্ষা বিশালাক্ষী মামুপস্থাস্যতে স্বয়ম্ ।। ৬.৪৭.১০ ।।।।

তস্য তদ্বচনং চ শ্রুত্বা রাবণস্য দুরাত্মনঃ ।
রাক্ষস্যস্তাস্তথেত্যুক্ত্বা জগ্মুর্বৈ যত্র পুষ্পকম্ ।। ৬.৪৭.১১ ।।।।

ততঃ পুষ্পকমাদায় রাক্ষস্যো রাবণাজ্ঞয়া ।
অশোকবনিকাস্থাং তাং মৈথিলীং সমুপানয়ন্ ।। ৬.৪৭.১২ ।।।।

তামাদায় তু রাক্ষস্যো ভর্তৃশোকপরাজিতাম্ ।
সীতামারোপয়ামাসুর্বিমানং পুষ্পকং তদা ।। ৬.৪৭.১৩ ।।।।

ততঃ পুষ্পকমারোপ্য সীতাং ত্রিজটয়া সহ ।
জগ্মুর্দর্শয়িতুং তস্যৈ রাক্ষস্যো রামলক্ষ্মণৌ ।। ৬.৪৭.১৪ ।।।।

রাবণো ঽকারয়ল্লঙ্কাং পতাকাধ্বজমালিনীম্ ।
প্রাঘোষয়ত হৃষ্টশ্চ লঙ্কায়াং রাক্ষসেশ্বরঃ ।রাঘবো লক্ষ্মণশ্চৈব হতাবিন্দ্রজিতা রণে ।। ৬.৪৭.১৫ ।।।।

বিমানেনাপি সীতা তু গত্বা ত্রিজটয়া সহ ।
দদর্শ বানরাণাং তু সর্বং সৈন্যং নিপাতিতম্ ।। ৬.৪৭.১৬ ।।।।

প্রহৃষ্টমনসশ্চাপি দদর্শ পিশিতাশনান্ ।
বানরাংশ্চাপি দুঃখার্তান্ রামলক্ষ্মণপার্শ্বতঃ ।। ৬.৪৭.১৭ ।।।।

ততঃ সীতা দদর্শোভৌ শয়ানৌ শরতল্পয়োঃ ।
লক্ষ্মণং চাপি রামং চ বিসঞ্জ্ঞৌ শরপীডিতৌ ।। ৬.৪৭.১৮ ।।।।

বিধ্বস্তকবচৌ বীরৌ বিপ্রবিদ্ধশরাসনৌ ।
সায়কৈশ্ছিন্নসর্বাঙ্গৌ শরস্তম্বময়ৌ ক্ষিতৌ ।। ৬.৪৭.১৯ ।।।।

তৌ দৃষ্ট্বা ভ্রাতরৌ তত্র বীরৌ সা পুরুষর্ষভৌ ।
শয়ানৌ পুণ্ডরীকাক্ষৌ কুমারাবিব পাবকী ।। ৬.৪৭.২০ ।।।।

শরতল্পগতৌ বীরৌ তথাভূতৌ নরর্ষভৌ ।
দুঃখার্তা সুভৃশং সীতা সুচিরং বিললাপ হ ।। ৬.৪৭.২১ ।।।।

ভর্তারমনবদ্যাঙ্গী লক্ষ্মণং চাসিতেক্ষণা ।
প্রেক্ষ্য পাংসুষু বেষ্টন্তৌ রুরোদ জনকাত্মজা ।। ৬.৪৭.২২ ।।।।

সা বাষ্পশোকাভিহতা সমীক্ষ্য তৌ ভ্রাতরৌ দেবসমপ্রভাবৌ ।
বিতর্কয়ন্তী নিধনং তয়োঃ সা দুঃখান্বিতা বাক্যমিদং জগাদ ।। ৬.৪৭.২৩ ।।