Utshovসর্গ 46
46.1
ততো দ্যাং পৃথিবীং চৈব বীক্ষমাণা বনৌকসঃ ।
দদৃশুঃ সন্ততৌ বাণৈর্ভ্রাতরৌ রামলক্ষ্মণৌ ।। ৬.৪৬.১ ।।।।
46.2
বৃষ্ট্বেবোপরতে দেবে কৃতকর্মণি রাক্ষসে ।
আজগামাথ তং দেশং সসুগ্রীবো বিভীষণঃ ।। ৬.৪৬.২ ।।।।
46.3
নীলদ্বিবিদমৈন্দাশ্চ সুষেণকুমুদাঙ্গদাঃ ।
তূর্ণং হনুমতা সার্ধমন্বশোচন্ত রাঘবৌ ।। ৬.৪৬.৩ ।।।।
46.4
অচেষ্টৌ মন্দনিশ্বাসৌ শোণিতৌঘপরিপ্লুতৌ ।
শরজালাচিতৌ স্তব্ধৌ শয়ানৌ শরতল্পয়োঃ ।। ৬.৪৬.৪ ।।।।
46.5
নিশ্বসন্তৌ যথা সর্পৌ নিশ্চেষ্টৌ মন্দবিক্রমৌ ।
রুধিরস্রাবদিগ্ধাঙ্গৌ তাপনীয়াবিব ধ্বজৌ ।। ৬.৪৬.৫ ।।।।
46.6
তৌ বীরশয়নে বীরৌ শয়নৌ মন্দচেষ্টিতৌ ।
যূথপৈস্তৈঃ পরিবৃতৌ বাষ্পব্যাকুললোচনৈঃ ।। ৬.৪৬.৬ ।।।।
46.7
রাঘবৌ পতিতৌ দৃষ্ট্বা শরজালসমাবৃতৌ ।
বভূবুর্ব্যথিতাঃ সর্বে বানরাঃ সবিভীষণাঃ ।। ৬.৪৬.৭ ।।।।
46.8
অন্তরিক্ষং নিরীক্ষন্তো দিশঃ সর্বাশ্চ বানরাঃ ।
ন চৈনং মায়য়া চ্ছন্নং দদৃশূ রাবণিং রণে ।। ৬.৪৬.৮ ।।।।
46.9
ত তু মায়াপ্রতিচ্ছন্নং মায়য়ৈব বিভীষণঃ ।
বীক্ষমাণো দদর্শাথ ভ্রাতুঃ পুত্রমবস্থিতম্ ।। ৬.৪৬.৯ ।।।।
46.10
তমপ্রতিমকর্মাণমপ্রতিদ্বন্দ্বমাহবে ।
দদর্শান্তর্হিতং বীরং বরদানাদ্বিভীষণঃ ।। ৬.৪৬.১০ ।।।।
46.11
তেজসা যশসা চৈব বিক্রমেণ চ সংয়ুতম্ ।
। ৬.৪৬.১১ ।।।।
46.12
ইন্দ্রজিত্ত্বাত্মনঃ কর্ম তৌ শয়ানৌ সমীক্ষ্য চ ।
উবাচ পরমপ্রীতো হর্ষয়ন্ সর্বনৈর্ঋতান্ ।। ৬.৪৬.১২ ।।।।
46.13
দূষণস্য চ হন্তারৌ খরস্য চ মহাবলৌ ।
সাদিতৌ মামকৈর্বাণৈর্ভ্রাতরৌ রামলক্ষ্ণৌ ।। ৬.৪৬.১৩ ।।।।
46.14
নেমৌ মোক্ষয়িতুং শক্যাবেতস্মাদিষুবন্ধনাৎ ।
সর্বৈরপি সমাগম্য সর্ষিসঙ্ঘৈঃ সুরাসুরৈঃ ।। ৬.৪৬.১৪ ।।।।
46.15
যত্কৃতে চিন্তয়ানস্য শোকার্তস্য পিতুর্মম ।
অস্পৃষ্ট্বা শয়নং গাত্রৈস্ত্রিয়ামা যাতি শর্বরী ।। ৬.৪৬.১৫ ।।।।
46.16
কৃত্স্নেয়ং যত্কৃতে লঙ্কা নদী বর্ষাস্বিবাকুলা ।
সো ঽয়ং মূলহরো ঽনর্থঃ সর্বেষাং নিহতো ময়া ।। ৬.৪৬.১৬ ।।।।
46.17
রামস্য লক্ষ্মণস্যাপি সর্বেষাং চ বনৌকসাম্ ।
বিক্রমা নিষ্ফলাঃ সর্বে যথা শরদি তোয়দাঃ ।। ৬.৪৬.১৭ ।।।।
46.18
এবমুক্ত্বা তু তান্ সর্বান্ রাক্ষসান্ পরিপার্শ্বতঃ ।
যূথপানপি তান্ সর্বাংস্তাডয়ামাস রাবণিঃ ।। ৬.৪৬.১৮ ।।।।
46.19
নীলং নবভিরাহত্য মৈন্দং চ দ্বিবিদং তথা ।
ত্রিভিস্ত্রিভিরমিত্রঘ্নস্ততাপ প্রবরেষুভিঃ ।। ৬.৪৬.১৯ ।।।।
46.20
জাম্ববন্তং মহেষ্বাসো বিদ্ধ্বা বাণেন বক্ষসি ।
হনূমতো বেগবতো বিসসর্জ শরান্ দশ ।। ৬.৪৬.২০ ।।।।
46.21
গবাক্ষং শরভং চৈব দ্বাবপ্যমিততেজসৌ ।
দ্বাভ্যাং দ্বাভ্যাং মহাবেগো বিব্যাধ যুধি রাবণিঃ ।। ৬.৪৬.২১ ।।।।
46.22
গোলাঙ্গূলেশ্বরং চৈব বালিপুত্রমথাঙ্গদম্ ।
বিব্যাধ বহুভির্বাণৈস্ত্বরমাণো ঽথ রাবণিঃ ।। ৬.৪৬.২২ ।।।।
46.23
তান্ বানরবরান্ ভিত্ত্বা শরৈরগ্নিশিখোপমৈঃ ।
ননাদ বলবাংস্তত্র মহাসত্ত্বঃ স রাবণিঃ ।। ৬.৪৬.২৩ ।।।।
46.24
তানর্দয়িত্বা বাণৌঘৈস্ত্রাসয়িত্বা চ বানরান্ ।
প্রজহাস মহাবাহুর্বচনং চেদমব্রবীৎ ।। ৬.৪৬.২৪ ।।।।
46.25
শরবন্ধেন ঘোরেণ ময়া বদ্ধৌ চমূমুখে ।
সহিতৌ ভ্রাতরাবেতৌ নিশাময়ত রাক্ষসাঃ ।। ৬.৪৬.২৫ ।।।।
46.26
এবমুক্তাস্তু তে সর্বে রাক্ষসাঃ কূটয়োধিনঃ ।
পরং বিস্ময়মাজগ্মুঃ কর্মণা তেন হর্ষিতাঃ ।। ৬.৪৬.২৬ ।।।।
46.27
বিনেদুশ্চ মহানাদান্ সর্বতো জলদোপমাঃ ।
হতো রাম ইতি জ্ঞাত্বা রাবণিং সমপূজয়ন্ ।। ৬.৪৬.২৭ ।।।।
46.28
নিষ্পন্দৌ তু তদা দৃষ্ট্বা তাবুভৌ রামলক্ষ্মণৌ ।
বসুধায়াং নিরুচ্ছ্বাসৌ হতাবিত্যন্বমন্যত ।। ৬.৪৬.২৮ ।।।।
46.29
হর্ষেণ তু সমাবিষ্ট ইন্দ্রজিৎ সমিতিঞ্জয়ঃ ।
প্রবিবেশ পুরীং লঙ্কাং হর্ষয়ন্ সর্বরাক্ষসান্ ।। ৬.৪৬.২৯ ।।।।
46.30
রামলক্ষ্মণয়োর্দ্দষ্ট্বা শরীরে সায়কৈশ্চিতে ।
সর্বাণি চাঙ্গোপাঙ্গানি সুগ্রীবং ভয়মাবিশৎ ।। ৬.৪৬.৩০ ।।।।
46.31
তমুবাচ পরিত্রস্তং বানরেন্দ্রং বিভীষণঃ ।
সবাষ্পবদনং দীনং শোকব্যাকুললোচনম্ ।। ৬.৪৬.৩১ ।।।।
46.32
অলং ত্রাসেন সুগ্রীব বাষ্পবেগো নিগৃহ্যতাম্ ।
এবং প্রায়াণি যুদ্ধানি বিজয়ো নাস্তি নৈষ্ঠিকঃ ।। ৬.৪৬.৩২ ।।।।
46.33
সশেষভাগ্যতা ঽস্মাকং যদি বীর ভবিষ্যতি ।
মোহমেতৌ প্রহাস্যেতে মহাত্মানৌ মহাবলৌ ।। ৬.৪৬.৩৩ ।।।।
46.34
পর্যবস্থাপয়াত্মানমনাথং মাং চ বানর ।
সত্যধর্মাভিরক্তানাং নাস্তি মৃত্যুকৃতং ভয়ম্ ।। ৬.৪৬.৩৪ ।।।।
46.35
এবমুক্ত্বা ততস্তস্য জলক্লিন্নেন পাণিনা ।
সুগ্রীবস্য শুভে নেত্রে প্রমমার্জ বিভিষণঃ ।। ৬.৪৬.৩৫ ।।।।
46.36
ততঃ সলিলমাদায় বিদ্যয়া পরিজপ্য চ ।
সুগ্রীবনেত্রে ধর্মাত্মা স মমার্জ বিভীষণঃ ।। ৬.৪৬.৩৬ ।।।।
46.37
প্রমৃজ্য বদনং তস্য কপিরাজস্য ধীমতঃ ।
অব্রবীৎ কালসম্প্রাপ্তমসম্ভ্রমমিদং বচঃ ।। ৬.৪৬.৩৭ ।।।।
46.38
ন কালঃ কপিরাজেন্দ্র বৈক্লব্যমনুবর্তিতুম্ ।
অতিস্নেহো ঽপ্যকালে ঽস্মিন্ মরণায়োপকল্পতে ।। ৬.৪৬.৩৮ ।।।।
46.39
তস্মাদুত্সৃজ্য বৈক্লব্যং সর্বকার্যবিনাশনম্ ।
হিতং রামপুরোগাণাং সৈন্যানামনুচিন্ত্যতাম্ ।। ৬.৪৬.৩৯ ।।।।
46.40
অথবা রক্ষ্যতাং রামো যাবৎ সঞ্জ্ঞাবিপর্যয়ঃ ।
লব্ধসঞ্জ্ঞৌ হি কাকুত্স্থৌ ভয়ং নো ব্যপনেষ্যতঃ ।। ৬.৪৬.৪০ ।।।।
46.41
নৈতৎ কিঞ্চন রামস্য ন চ রামো মুমূর্ষতি ।
ন হ্যেনং হাস্যতে লক্ষ্মীর্দুর্লভা যা গতায়ুষাম্ ।। ৬.৪৬.৪১ ।।।।
46.42
তস্মাদাশ্বাসয়াত্মানং বলং চাশ্বাসয় স্বকম্ ।
যাবৎ কার্যাণি সর্বাণি পুনঃ সংস্থাপয়াম্যহম্ ।। ৬.৪৬.৪২ ।।।।
46.43
এতে হি ফুল্লনয়নাস্ত্রাসাদাগতসাধ্বসাঃ ।
কর্ণে কর্ণে প্রকথিতা হরয়ো হরিসত্তম ।। ৬.৪৬.৪৩ ।।।।
46.44
মাং তু দৃষ্ট্বা প্রধাবন্তমনীকং সম্প্রহর্ষিতুম্ ।
ত্যজন্তু হরয়স্ত্রাসং ভুক্তপূর্বামিব স্রজম্ ।। ৬.৪৬.৪৪ ।।।।
46.45
সমাশ্বাস্য তু সুগ্রীবং রাক্ষসেন্দ্রো বিভীষণঃ ।
বিদ্রুতং বানরানীকং তত্সমাশ্বাসয়ৎ পুনঃ ।। ৬.৪৬.৪৫ ।।।।
46.46
ইন্দ্রজিত্তু মহামায়ঃ সর্বসৈন্যসমাবৃতঃ ।
বিবেশ নগরীং লঙ্কাং পিতরং চাভ্যুপাগমৎ ।। ৬.৪৬.৪৬ ।।।।
46.47
তত্র রাবণমাসীনমভিবাদ্য কৃতাঞ্জলিঃ ।
আচচক্ষে প্রিয়ং পিত্রে নিহতৌ রামলক্ষ্মণৌ ।। ৬.৪৬.৪৭ ।।।।
46.48
উত্পপাত ততো হৃষ্টঃ পুত্রং চ পরিষস্বজে ।
রাবণো রক্ষসাং মধ্যে শ্রুত্বা শত্রূ নিপাতিতৌ ।উপাঘ্রায় স মূর্ধ্ন্যেনং পপ্রচ্ছ প্রীতমানসঃ ।। ৬.৪৬.৪৮ ।।।।
46.49
পৃচ্ছতে চ যথাবৃত্তং পিত্রে সর্বং ন্যবেদয়ৎ ।
যথা তৌ শরবন্ধেন নিশ্চেষ্টৌ নিষ্প্রভৌ কৃতৌ ।। ৬.৪৬.৪৯ ।।।।
46.50
স হর্ষবেগানুগতান্তরাত্মা শ্রুত্বা বচস্তস্য মহারথস্য ।
জহৌ জ্বরং দাশরথেঃ সমুত্থিতং প্রহৃষ্য বাচা ঽভিননন্দ পুত্রম্ ।। ৬.৪৬.৫০ ।।