সর্গ 45

45.1

স তস্য গতিমন্বিচ্ছন্ রাজপুত্রঃ প্রতাপবান্ ।
দিদেশাতিবলো রামো দশ বানরয়ূথপান্ ।। ৬.৪৫.১ ।।।।

45.2

দ্বৌ সুষেণস্য দায়াদৌ নীলং চ প্লবগর্ষভম্ ।
অঙ্গদং বালিপুত্রং চ শরভং চ তরস্বিনম্ ।। ৬.৪৫.২ ।।।।

45.3

বিনতং জাম্ববন্তং চ সানুপ্রস্থং মহাবলম্ ।
ঋষভং চর্ষভস্কন্ধমাদিদেশ পরন্তপঃ ।। ৬.৪৫.৩ ।।।।

45.4

তে সম্প্রহৃষ্টা হরয়ো ভীমানুদ্যম্য পাদপান্ ।
আকাশং বিবিশুঃ সর্বে মার্গমাণা দিশো দশ ।। ৬.৪৫.৪ ।।।।

45.5

তেষাং বেগবতাং বেগমিষুভির্বেগবত্তরৈঃ ।
অস্ত্রবিৎ পরমাস্ত্রৈস্তু বারয়ামাস রাবণিঃ ।। ৬.৪৫.৫ ।।।।

45.6

তং ভীমবেগা হরয়ো নারাচৈঃ ক্ষতবিগ্রহাঃ ।
অন্ধকারে ন দদৃশুর্মেঘৈঃ সূর্যমিবাবৃতম্ ।। ৬.৪৫.৬ ।।।।

45.7

রামলক্ষ্মণয়োরেব সর্বদেহভিদঃ শরান্ ।
ভৃশমাবেশয়ামাস রাবণিঃ সমিতিঞ্জয়ঃ ।। ৬.৪৫.৭ ।।।।

45.8

নিরন্তরশরীরৌ তৌ ভ্রাতরৌ রামলক্ষ্ণৌ ।
ক্রুদ্ধেনেন্দ্রজিতা বীরৌ পন্নগৈঃ শরতাং গতৈঃ ।। ৬.৪৫.৮ ।।।।

45.9

তয়োঃ ক্ষতজমার্গেণ সুস্রাব রুধিরং বহু ।
তাবুভৌ চ প্রকাশেতে পুষ্পিতাবিব কিংশুকৌ ।। ৬.৪৫.৯ ।।।।

45.10

ততঃ পর্যন্তরক্তাক্ষো ভিন্নাঞ্জনচয়োপমঃ ।
রাবণির্ভ্রাতরৌ বাক্যমন্তর্ধানগতো ঽব্রবীৎ ।। ৬.৪৫.১০ ।।।।

45.11

যুদ্ধ্যমানমনালক্ষ্যং শক্রো ঽপি ত্রিদশেশ্বরঃ ।
দ্রষ্টুমাসাদিতুং বাপি ন শক্তঃ কিং পুনর্যুবাম্ ।। ৬.৪৫.১১ ।।।।

45.12

প্রাবৃতাবিষুজালেন রাঘবৌ কঙ্কপত্রিণা ।
এষ রোষপরীতাত্মা নয়ামি যমসাদনম্ ।। ৬.৪৫.১২ ।।।।

45.13

এবমুক্ত্বা তু ধর্মজ্ঞৌ ভ্রাতরৌ রামলক্ষ্মণৌ ।
নির্বিভেদ শিতৈর্বাণৈঃ প্রজহর্ষ ননাদ চ ।। ৬.৪৫.১৩ ।।।।

45.14

ভিন্নাঞ্জনচয়শ্যামো বিস্ফার্য বিপুলং ধনুঃ ।
ভূয়ো ভূয়ঃ শরান্ ঘোরান্ বিসসর্জ মহামৃধে ।। ৬.৪৫.১৪ ।।।।

45.15

ততো মর্মসু মর্মজ্ঞো মজ্জয়ন্নিশিতান্ শরান্ ।
রামলক্ষ্মণয়োর্বীরো ননাদ চ মুহুর্মুহুঃ ।। ৬.৪৫.১৫ ।।।।

45.16

বদ্ধৌ তু শরবন্ধেন তাবুভৌ রণমূর্ধনি ।
নিমেষান্তরমাত্রেণ ন শেকতুরুদীক্ষিতুম্ ।। ৬.৪৫.১৬ ।।।।

45.17

ততো বিভিন্নসর্বাঙ্গৌ শরশল্যাচিতাবুভৌ ।
ধ্বজাবিব মহেন্দ্রস্য রজ্জুমুক্তৌ প্রকম্পিতৌ ।। ৬.৪৫.১৭ ।।।।

45.18

তৌ সম্প্রচলিতৌ বীরৌ মর্মভেদেন কর্শিতৌ ।
নিপেততুর্মহেষ্বাসৌ জগত্যাং জগতীপতী ।। ৬.৪৫.১৮ ।।।।

45.19

তৌ বীরশয়নে বীরৌ শয়ানৌ রুধিরোক্ষিতৌ ।
শরবেষ্টিতসর্বাঙ্গাবার্তৌ পরমপীডিতৌ ।। ৬.৪৫.১৯ ।।।।

45.20

ন হ্যবিদ্ধং তয়োর্গাত্রে বভূবাঙ্গুলমন্তরম্ ।
নানির্ভিন্নং ন চাস্তব্ধমাকরাগ্রাদজিহ্মগৈঃ ।। ৬.৪৫.২০ ।।।।

45.21

তৌ তু ক্রূরেণ নিহতৌ রক্ষসা কামরূপিণা ।
অসৃক্ সুস্রুবতুস্তীব্রং জলং প্রস্রবণাবিব ।। ৬.৪৫.২১ ।।।।

45.22

পপাত প্রথমং রামো বিদ্ধো মর্মসু মার্গণৈঃ ।
ক্রোধাদিন্দ্রজিতা যেন পুরা শক্রো বিনির্জিতঃ ।। ৬.৪৫.২২ ।।।।

45.23

রুক্মপুঙ্খৈঃ প্রসন্নাগ্রৈরধোগতিভিরাশুগৈঃ ।
নারাচৈরর্ধনারাচৈর্ভল্লৈরঞ্জলিকৈরপি ।বিব্যাধ বত্সদন্তৈশ্চ সিংহদংষ্ট্রৈঃ ক্ষুরৈস্তথা ।। ৬.৪৫.২৩ ।।।।

45.24

স বীরশয়নে শিশ্যে বিজ্যমাদায় কার্মুকম্ ।
ভিন্নমুষ্টিপরীণাহং ত্রিনতং রত্নভূষিতম্ ।। ৬.৪৫.২৪ ।।।।

45.25

বাণপাতান্তরে রামং পতিতং পুরুষর্ষভম্ ।
স তত্র লক্ষ্মণো দৃষ্ট্বা নিরাশো জীবিতে ঽভবৎ ।। ৬.৪৫.২৫ ।।।।

45.26

রামং কমলপত্রাক্ষং শরবন্ধপরিক্ষতম্ ।
শুশোচ ভ্রাতরং দৃষ্ট্বা পতিতং ঘরণীতলে ।। ৬.৪৫.২৬ ।।।।

45.27

হরয়শ্চাপি তং দৃষ্ট্বা সন্তাপং পরমং গতাঃ ।
। ৬.৪৫.২৭ ।।।।

45.28

বদ্ধৌ তু বীরৌ পতিতৌ শয়ানৌ তৌ বানরাঃ সম্পরিবার্য তস্থুঃ ।
সমাগতা বায়ুসুতপ্রমুখ্যা বিষাদমার্তাঃ পরমং চ জগ্মুঃ ।। ৬.৪৫.২৮ ।।

Contains text from DharmicData, made available under the Open Database License (ODbL). Simple meanings are written by AI and can contain mistakes.