Utshovসর্গ 44
44.1
যুদ্ধ্যতামেব তেষাং তু তদা বানররক্ষসাম্ ।
রবিরস্তং গতো রাত্রিঃ প্রবৃত্তা প্রাণহারিণী ।। ৬.৪৪.১ ।।।।
44.2
অন্যোন্যং বদ্ধবৈরাণাং ঘোরাণাং জয়মিচ্ছতাম্ ।
সম্প্রবৃত্তং নিশায়ুদ্ধং তদা বানররক্ষসাম্ ।। ৬.৪৪.২ ।।।।
44.3
রাক্ষসো ঽসীতি হরয়ো হরিশ্চাসীতি রাক্ষসাঃ ।
অন্যোন্যং সমরে জঘ্নুস্তস্মিংস্তমসি দারুণে ।। ৬.৪৪.৩ ।।।।
44.4
জহি দারয় চৈহীতি কথং বিদ্রবসীতি চ ।
এবং সুতুমুলঃ শব্দস্তস্মিংস্তমসি শুশ্রুবে ।। ৬.৪৪.৪ ।।।।
44.5
কালাঃ কাঞ্চনসন্নাহাস্তস্মিংস্তমসি রাক্ষসাঃ ।
সম্প্রাদৃশ্যন্ত শৈলেন্দ্রা দীপ্তৌষধিবনা ইব ।। ৬.৪৪.৫ ।।।।
44.6
তস্মিংস্তমসি দুষ্পারে রাক্ষসাঃ ক্রোধমূর্চ্ছিতাঃ ।
পরিপেতুর্মহাবেগা ভক্ষয়ন্তঃ প্লবঙ্গমান্ ।। ৬.৪৪.৬ ।।।।
44.7
তে হয়ান্ কাঞ্চনাপীডান্ ধ্বজাংশ্চাগ্নিশিখোপমান্ ।
আপ্লুত্য দশনৈস্তীক্ষ্ণৈর্ভীমকোপা ব্যদারয়ন্ ।। ৬.৪৪.৭ ।।।।
44.8
বানরা বলিনো যুদ্ধে ঽক্ষোভয়ন্ রাক্ষসীং চমূম্ ।
কুঞ্জরান্ কুঞ্জরারোহান্ পতাকাধ্বজিনো স্থান্ ।চকর্ষুশ্চ দদংশুশ্চ দশনৈঃ ক্রোধমূর্চ্ছিতাঃ ।। ৬.৪৪.৮ ।।।।
44.9
লক্ষ্মণশ্চাপি রামশ্চ শরৈরাশীবিষোপমৈঃ ।
দৃশ্যাদৃশ্যানি রক্ষাংসি প্রবরাণি নিজঘ্নতুঃ ।। ৬.৪৪.৯ ।।।।
44.10
তুরঙ্গখুরবিধ্বস্তং রথনেমিসমুত্থিতম্ ।
রুরোধ কর্ণনেত্রাণি যুদ্ধ্যতাং ধরণীরজঃ ।। ৬.৪৪.১০ ।।।।
44.11
বর্তমানে মহাঘোরে সঙ্গ্রামে রোমহর্ষণে ।
রুধিরোদা মহাঘোরা নদ্যস্তত্র প্রসুস্রুবুঃ ।। ৬.৪৪.১১ ।।।।
44.12
ততো ভেরীমৃদঙ্গানাং পণবানাং চ নিস্বনঃ ।
শঙ্খবেণুস্বনোন্মিশ্রঃ সম্বভূবাদ্ভুতোপমঃ ।। ৬.৪৪.১২ ।।।।
44.13
হতানাং স্তনমানানাং রাক্ষসানাং চ নিস্বনঃ ।
শস্তানাং বানরাণাং চ সম্বভূবাতিদারুণঃ ।। ৬.৪৪.১৩ ।।।।
44.14
হতৈর্বানরবীরৈশ্চ শক্তিশূলপরশ্বধৈঃ ।
নিহতৈঃ পর্বতাগ্রৈশ্চ রাক্ষসৈঃ কামরূপিভিঃ ।। ৬.৪৪.১৪ ।।।।
44.15
শস্ত্রপুষ্পোপহারা চ তত্রাসীদ্যুদ্ধমেদিনী ।
দুর্জ্ঞেয়া দুর্নিবেশা চ শোণিতাস্রাবকর্দমা ।। ৬.৪৪.১৫ ।।।।
44.16
সা বভূব নিশা ঘোরা হরিরাক্ষসহারিণী ।
কালরাত্রীব ভূতানাং সর্বেষাং দুরতিক্রমা ।। ৬.৪৪.১৬ ।।।।
44.17
ততস্তে রাক্ষসাস্তত্র তস্মিংস্তমসি দারুণে ।
রামমেবাভ্যবর্তন্ত সংসৃষ্টাঃ শরবৃষ্টিভিঃ ।। ৬.৪৪.১৭ ।।।।
44.18
তেষামাপততাং শব্দঃ ক্রুদ্ধানামপি গর্জতাম্ ।
উদ্বর্ত ইব সপ্তানাং সমুদ্রাণাং প্রশুশ্রুবে ।। ৬.৪৪.১৮ ।।।।
44.19
তেষাং রামঃ শরৈষ্ষঙ্ভিষ্ষড্ জঘান নিশাচরান্ ।
নিমেষান্তরমাত্রেণ শিতৈরগ্নিশিখোপমৈঃ ।। ৬.৪৪.১৯ ।।।।
44.20
যমশত্রুশ্চ দুর্ধর্ষো মহাপার্শ্বমহোদরৌ ।
বজ্রদংষ্ট্রো মহাকায়স্তৌ চোভৌ শুকসারণৌ ।। ৬.৪৪.২০ ।।।।
44.21
তে তু রামেণ বাণৌঘৈঃ সর্বে মর্মসু তাডিতাঃ ।
যুদ্ধাদপসৃতাস্তত্র সাবশেষায়ুষো ঽভবন্ ।। ৬.৪৪.২১ ।।।।
44.22
তত্র কাঞ্চনচিত্রাঙ্গৈঃ শরৈরগ্নিশিখোপমৈঃ ।
দিশশ্চকার বিমলাঃ প্রদিশশ্চ মহাবলঃ ।। ৬.৪৪.২২ ।।।।
44.23
যে ত্বন্যে রাক্ষসা ভীমা রামস্যাভিমুখে স্থিতাঃ ।
তে ঽপি নষ্টাঃ সমাসাদ্য পতঙ্গ ইব পাবকম্ ।। ৬.৪৪.২৩ ।।।।
44.24
সুবর্ণপুঙ্খৈর্বিশিখৈঃ সম্পতদ্ভিঃ সহস্রশঃ ।
বভূব রজনী চিত্রা খদ্যোতৈরিব শারদী ।। ৬.৪৪.২৪ ।।।।
44.25
রাক্ষসানাং চ নিনদৈর্হরীণাং চাপি নিস্বনৈঃ ।
সা বভূব নিশা ঘোরা ভূয়ো ঘোরতরা তদা ।। ৬.৪৪.২৫ ।।।।
44.26
তেন শব্দেন মহতা প্রবৃদ্ধেন সমন্ততঃ ।
ত্রিকূটঃ কন্দরাকীর্ণঃ প্রব্যাহরদিবাচলঃ ।। ৬.৪৪.২৬ ।।।।
44.27
গোলাঙ্গূলা মহাকায়াস্তমসা তুল্যবর্চসঃ ।
সম্পরিষ্বজ্য বাহুভ্যাং ভক্ষয়ন্ রজনীচরান্ ।। ৬.৪৪.২৭ ।।।।
44.28
অঙ্গদস্তু রণে শত্রুং নিহন্তুং সমুপস্থিতঃ ।
রাবণিং নিজঘানাশু সারথিং চ হয়ানপি ।। ৬.৪৪.২৮ ।।।।
44.29
বর্তমানে তদা ঘোরে সঙ্গ্রামে ভৃশদারুণে ।
ইন্দ্রজিত্তু রথং ত্যক্ত্বা হতাশ্বো হতসারথিঃ ।অঙ্গদেন মহাকায়স্তত্রৈবান্তরধীয়ত ।। ৬.৪৪.২৯ ।।।।
44.30
তত্কর্ম বালিপুত্রস্য সর্বে দেবাঃ সহর্ষিভিঃ ।
তুষ্টুবুঃ পূজনার্হস্য তৌ চোভৌ রামলক্ষ্মণৌ ।। ৬.৪৪.৩০ ।।।।
44.31
প্রভাবং সর্বভূতানি বিদুরিন্দ্রজিতো যুধি ।
তেন তে তং মহাত্মানং তুষ্টা দৃষ্ট্বা প্রধর্ষিতম্ ।। ৬.৪৪.৩১ ।।।।
44.32
ততঃ প্রহৃষ্টাঃ কপয়ঃ সসুগ্রীববিভীষণাঃ ।
সাধু সাধ্বিতি নেদুশ্চ দৃষ্ট্বা শত্রুং প্রধর্ষিতম্ ।। ৬.৪৪.৩২ ।।।।
44.33
ইন্দ্রজিত্তু তদা তেন নির্জিতো ভীমকর্মণা ।
সংয়ুগে বালিপুত্রেণ ক্রোধং চক্রে সুদারুণম্ ।। ৬.৪৪.৩৩ ।।।।
44.34
এতস্মিন্নন্তরে রামো বানরান্ বাক্যমব্রবীৎ ।
। ৬.৪৪.৩৪ ।।।।
44.35
সর্বে ভবন্তস্তিষ্ঠন্তু কপিরাজেন সঙ্গতাঃ ।
। ৬.৪৪.৩৫ ।।।।
44.36
স ব্রহ্মণা দত্তবরস্ত্রৈলোক্যং বাধতে ভৃশম্ ।
ভবতামর্থসিদ্ধ্যর্থং কালেন স সমাগতঃ ।অদ্যৈব ক্ষমিতব্যং মে ভবন্তো বিগতজ্বরাঃ ।। ৬.৪৪.৩৬ ।।।।
44.37
সো ঽন্তর্ধানগতঃ পাপো রাবণী রণকর্কশঃ ।
অদৃশ্যো নিশিতান্ বাণান্ মুমোচাশনিবর্চসঃ ।। ৬.৪৪.৩৭ ।।।।
44.38
স রামং লক্ষ্মণং চৈব ঘোরৈর্নাগময়ৈঃ শরৈঃ ।
বিভেদ সমরে ক্রুদ্ধঃ সর্বগাত্রেষু রাক্ষসঃ ।। ৬.৪৪.৩৮ ।।।।
44.39
মায়য়া সংবৃতস্তত্র মোহয়ন্ রাঘবৌ যুধি ।
অদৃশ্যঃ সর্বভূতানাং কূটয়োধী নিশাচরঃ ।ববন্ধ শরবন্ধেন ভ্রাতরৌ রামলক্ষ্মণৌ ।। ৬.৪৪.৩৯ ।।।।
44.40
তৌ তেন পুরুষব্যাঘ্রৌ ক্রুদ্ধেনাশীবিষৈঃ শরৈঃ ।
সহসা নিহতৌ বীরৌ তদা প্রৈক্ষন্ত বানরাঃ ।। ৬.৪৪.৪০ ।।।।
44.41
প্রকাশরূপস্তু যদা ন শক্তস্তৌ বাধিতুং রাক্ষসরাজপুত্রঃ ।
মায়াং প্রয়োক্তুং সমুপাজগাম ববন্ধ তৌ রাজসুতৌ মহাত্মা ।। ৬.৪৪.৪১ ।।