সর্গ 127

127.1

পূর্ণে চতুর্দশে বর্ষে পঞ্চম্যাং লক্ষ্মণাগ্রজঃ ।
ভরদ্বাজশ্রমং প্রাপ্য ববন্দে নিয়তো মুনিম্ ।। ৬.১২৭.১ ।।

সো ঽপৃচ্ছদভিবাদ্যৈনং ভরদ্বাজং তপোধনম্ ।
শৃণোষি কচ্চিদ্ভগবন্ সুভিক্ষানাময়ং পুরে ।কচ্চিচ্চ যুক্তো ভরতো জীবন্ত্যপি চ মাতরঃ ।। ৬.১২৭.২ ।।

এবমুক্তস্তু রামেণ ভরদ্বাজো মহামুনিঃ ।
প্রত্যুবাচ রঘুশ্রেষ্ঠং স্মিতপূর্বং প্রহৃষ্টবৎ ।। ৬.১২৭.৩ ।।

পঙ্কদিগ্ধস্তু ভরতো জটিলস্ত্বাং প্রতীক্ষতে ।
পাদুকে তে পুরস্কৃত্য সর্বং চ কুশলং গৃহে ।। ৬.১২৭.৪ ।।

ত্বাং পুরা চীরবসনং প্রবিশন্তং মহাবনম্ ।
স্ত্রীতৃতীয়ং চ্যুতং রাজ্যাদ্ধর্মকামং চ কেবলম্ ।পদাতিং ত্যক্তসর্বস্বং পিতুর্বচনকারিণম্ ।। ৬.১২৭.৫ ।।

সর্বভোগৈঃ পরিত্যক্তং স্বর্গচ্যুতমিবামরম্ ।
দৃষ্ট্বা তু করুণা পূর্বং মমাসীৎ সমিতিঞ্জয় ।। ৬.১২৭.৬ ।।

কৈকেয়ীবচনে যুক্তং বন্যমূলফলাশিনম্ ।
। ৬.১২৭.৭ ।।

সাম্প্রতং সুসমৃদ্ধার্থং সমিত্রগণবান্ধবম্ ।
সমীক্ষ্য বিজিতারিং ত্বাং মম প্রীতিরনুত্তমা ।। ৬.১২৭.৮ ।।

সর্বং চ সুখদুঃখং তে বিদিতং মম রাঘব ।
। ৬.১২৭.৯ ।।

যত্ত্বয়া বিপুলং প্রাপ্তং জনস্থানবধাদিকম্ ।
ব্রাহ্মণার্থে নিয়ুক্তস্য রক্ষিতুঃ সর্বতাপসান্ ।। ৬.১২৭.১০ ।।

রাবণেন হৃতা ভার্যা বভূবেয়মনিন্দিতা ।
মারীচদর্শনং চৈব সীতোন্মথনমেব চ ।। ৬.১২৭.১১ ।।

কবন্ধদর্শনং চৈব পম্পাভিগমনং তথা ।
সুগ্রীবেণ চ তে সখ্যং যচ্চ বালী হতস্ত্বয়া ।। ৬.১২৭.১২ ।।

মার্গণং চৈব বৈদেহ্যাঃ কর্ম বাতাত্মজস্য চ ।
বিদিতায়াং চ বৈদেহ্যাং নলসেতুর্যথা কৃতঃ ।। ৬.১২৭.১৩ ।।

যথা বা দীপিতা লঙ্কা প্রহৃষ্টৈর্হরিয়ূথপৈঃ ।
সপুত্রবান্ধবামাত্যঃ সবলঃ সহবাহনঃ ।। ৬.১২৭.১৪ ।।

যথা বিনিহতঃ সঙ্খ্যে রাবণো দেবকম্টকঃ ।
সমাগমশ্চ ত্রিদশৈর্যথা দত্তশ্চ তে বরঃ ।সর্বং মমৈতদ্বিদিতং তপসা ধর্মবত্সল ।। ৬.১২৭.১৫ ।।

অহমপ্যত্র তে দদ্মি বরং শস্ত্রভৃতাং বর ।
অর্ধ্যমদ্য গৃহাণেদময়োধ্যাং শ্বো গমিষ্যসি ।। ৬.১২৭.১৬ ।।

তস্য তচ্ছিরসা বাক্যং প্রতিগৃহ্য নৃপাত্মজঃ ।
বাঢমিত্যেব সংহৃষ্টো ধীমান্ বরময়াচত ।অকালে ফলিনো বৃক্ষাঃ সর্বে চাপি মধুস্রবাঃ ।। ৬.১২৭.১৭ ।।

ফলান্যমৃতকল্পানি বহূনি বিবিধানি চ ।
ভবন্তু মার্গে ভগবন্নয়োধ্যাং প্রতি গচ্ছতঃ ।। ৬.১২৭.১৮ ।।

তথেতি চ প্রতিজ্ঞাতে বচনাৎ সমনন্তরম্ ।
অভবন্ পাদপাস্তত্র স্বর্গপাদপসন্নিভাঃ ।। ৬.১২৭.১৯ ।।

নিষ্ফলাঃ ফলিনশ্চাসন্ বিপুষ্পাঃ পুষ্পশালিনঃ ।
শুষ্কাঃ সমগ্রপত্রাস্তে নগাশ্চৈব মধুস্রবাঃ ।। ৬.১২৭.২০ ।।

সর্বতো যোজনাস্তিস্রো গচ্ছতামভবংস্তদা ।
। ৬.১২৭.২১ ।।

ততঃ প্রহৃষ্টাঃ প্লবগর্ষভাস্তে বহূনি দিব্যানি ফলানি চৈব ।
কামাদুপাশ্নন্তি সহস্রশস্তে মুদা ঽন্বিতাঃ স্বর্গজিতো যথৈব ।। ৬.১২৭.২২ ।।

ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে সপ্তবিংশত্যুত্তরশততমঃ সর্গঃ ।
। ১২৭ ।।