UtshovSarga 127
127.1
पूर्णे चतुर्दशे वर्षे पञ्चम्यां लक्ष्मणाग्रजः ।
भरद्वाजश्रमं प्राप्य ववन्दे नियतो मुनिम् ।। ६.१२७.१ ।।
Purne chaturdashe varshe panchamyam lakshmanagrajah
Bharadvajashramam prapya vavande niyato munim
127.2
सो ऽपृच्छदभिवाद्यैनं भरद्वाजं तपोधनम् ।
शृणोषि कच्चिद्भगवन् सुभिक्षानामयं पुरे ।कच्चिच्च युक्तो भरतो जीवन्त्यपि च मातरः ।। ६.१२७.२ ।।
So prichchhadabhivadyainam bharadvajam tapodhanam
Shrinoshi kachchidbhagavan subhikshanamayam pure, kachchichcha yukto bharato jivantyapi cha matarah
127.3
एवमुक्तस्तु रामेण भरद्वाजो महामुनिः ।
प्रत्युवाच रघुश्रेष्ठं स्मितपूर्वं प्रहृष्टवत् ।। ६.१२७.३ ।।
Evamuktastu ramena bharadvajo mahamunih
Pratyuvacha raghushreshtham smitapurvam prahrishtavat
127.4
पङ्कदिग्धस्तु भरतो जटिलस्त्वां प्रतीक्षते ।
पादुके ते पुरस्कृत्य सर्वं च कुशलं गृहे ।। ६.१२७.४ ।।
Pankadigdhastu bharato jatilastvam pratikshate
Paduke te puraskritya sarvam cha kushalam grihe
127.5
त्वां पुरा चीरवसनं प्रविशन्तं महावनम् ।
स्त्रीतृतीयं च्युतं राज्याद्धर्मकामं च केवलम् ।पदातिं त्यक्तसर्वस्वं पितुर्वचनकारिणम् ।। ६.१२७.५ ।।
Tvam pura chiravasanam pravishantam mahavanam
Stritritiyam chyutam rajyaddharmakamam cha kevalam, padatim tyaktasarvasvam piturvachanakarinam
127.6
सर्वभोगैः परित्यक्तं स्वर्गच्युतमिवामरम् ।
दृष्ट्वा तु करुणा पूर्वं ममासीत् समितिञ्जय ।। ६.१२७.६ ।।
Sarvabhogaih parityaktam svargachyutamivamaram
Drishtva tu karuna purvam mamasit samitinjaya
127.7
कैकेयीवचने युक्तं वन्यमूलफलाशिनम् ।
। ६.१२७.७ ।।
Kaikeyivachane yuktam vanyamulaphalashinam
127.8
साम्प्रतं सुसमृद्धार्थं समित्रगणबान्धवम् ।
समीक्ष्य विजितारिं त्वां मम प्रीतिरनुत्तमा ।। ६.१२७.८ ।।
Sampratam susamriddhartham samitraganabandhavam
Samikshya vijitarim tvam mama pritiranuttama
127.9
सर्वं च सुखदुःखं ते विदितं मम राघव ।
। ६.१२७.९ ।।
Sarvam cha sukhaduhkham te viditam mama raghava
127.10
यत्त्वया विपुलं प्राप्तं जनस्थानवधादिकम् ।
ब्राह्मणार्थे नियुक्तस्य रक्षितुः सर्वतापसान् ।। ६.१२७.१० ।।
Yattvaya vipulam praptam janasthanavadhadikam
Brahmanarthe niyuktasya rakshituh sarvatapasan
127.11
रावणेन हृता भार्या बभूवेयमनिन्दिता ।
मारीचदर्शनं चैव सीतोन्मथनमेव च ।। ६.१२७.११ ।।
Ravanena hrita bharya babhuveyamanindita
Marichadarshanam chaiva sitonmathanameva cha
127.12
कबन्धदर्शनं चैव पम्पाभिगमनं तथा ।
सुग्रीवेण च ते सख्यं यच्च वाली हतस्त्वया ।। ६.१२७.१२ ।।
Kabandhadarshanam chaiva pampabhigamanam tatha
Sugrivena cha te sakhyam yachcha vali hatastvaya
127.13
मार्गणं चैव वैदेह्याः कर्म वातात्मजस्य च ।
विदितायां च वैदेह्यां नलसेतुर्यथा कृतः ।। ६.१२७.१३ ।।
Marganam chaiva vaidehyah karma vatatmajasya cha
Viditayam cha vaidehyam nalaseturyatha kritah
127.14
यथा वा दीपिता लङ्का प्रहृष्टैर्हरियूथपैः ।
सपुत्रबान्धवामात्यः सबलः सहवाहनः ।। ६.१२७.१४ ।।
Yatha va dipita lanka prahrishtairhariyuthapaih
Saputrabandhavamatyah sabalah sahavahanah
127.15
यथा विनिहतः सङ्ख्ये रावणो देवकम्टकः ।
समागमश्च त्रिदशैर्यथा दत्तश्च ते वरः ।सर्वं ममैतद्विदितं तपसा धर्मवत्सल ।। ६.१२७.१५ ।।
Yatha vinihatah sankhye ravano devakamtakah
Samagamashcha tridashairyatha dattashcha te varah, sarvam mamaitadviditam tapasa dharmavatsala
127.16
अहमप्यत्र ते दद्मि वरं शस्त्रभृतां वर ।
अर्ध्यमद्य गृहाणेदमयोध्यां श्वो गमिष्यसि ।। ६.१२७.१६ ।।
Ahamapyatra te dadmi varam shastrabhritam vara
Ardhyamadya grihanedamayodhyam shvo gamishyasi
127.17
तस्य तच्छिरसा वाक्यं प्रतिगृह्य नृपात्मजः ।
बाढमित्येव संहृष्टो धीमान् वरमयाचत ।अकाले फलिनो वृक्षाः सर्वे चापि मधुस्रवाः ।। ६.१२७.१७ ।।
Tasya tachchhirasa vakyam pratigrihya nripatmajah
Badhamityeva sanhrishto dhiman varamayachata, akale phalino vrikshah sarve chapi madhusravah
127.18
फलान्यमृतकल्पानि बहूनि विविधानि च ।
भवन्तु मार्गे भगवन्नयोध्यां प्रति गच्छतः ।। ६.१२७.१८ ।।
Phalanyamritakalpani bahuni vividhani cha
Bhavantu marge bhagavannayodhyam prati gachchhatah
127.19
तथेति च प्रतिज्ञाते वचनात् समनन्तरम् ।
अभवन् पादपास्तत्र स्वर्गपादपसन्निभाः ।। ६.१२७.१९ ।।
Tatheti cha pratigyate vachanat samanantaram
Abhavan padapastatra svargapadapasannibhah
127.20
निष्फलाः फलिनश्चासन् विपुष्पाः पुष्पशालिनः ।
शुष्काः समग्रपत्रास्ते नगाश्चैव मधुस्रवाः ।। ६.१२७.२० ।।
Nishphalah phalinashchasan vipushpah pushpashalinah
Shushkah samagrapatraste nagashchaiva madhusravah
127.21
सर्वतो योजनास्तिस्रो गच्छतामभवंस्तदा ।
। ६.१२७.२१ ।।
Sarvato yojanastisro gachchhatamabhavanstada
127.22
ततः प्रहृष्टाः प्लवगर्षभास्ते बहूनि दिव्यानि फलानि चैव ।
कामादुपाश्नन्ति सहस्रशस्ते मुदा ऽन्विताः स्वर्गजितो यथैव ।। ६.१२७.२२ ।।
Tatah prahrishtah plavagarshabhaste bahuni divyani phalani chaiva
Kamadupashnanti sahasrashaste muda nvitah svargajito yathaiva
127.23
इत्यार्षे श्रीमद्रामायणे वाल्मीकीये आदिकाव्ये श्रीमद्युद्धकाण्डे सप्तविंशत्युत्तरशततमः सर्गः ।
। १२७ ।।
Ityarshe shrimadramayane valmikiye adikavye shrimadyuddhakande saptavinshatyuttarashatatamah sargah