Utshovসর্গ 119
119.1
এবমুক্তা তু বৈদেহী পরুষং রোমহর্ষণম্ ।
রাঘবেণ সরোষেণ ভৃশং প্রব্যথিতা ঽভবৎ ।। ৬.১১৯.১ ।।
119.2
সা তদশ্রুতপূর্বং হি জনে মহতি মৈথিলী ।
শ্রুত্বা ভর্তৃবচো রূক্ষং লজ্জয়া ব্রীডিতা ঽভবৎ ।। ৬.১১৯.২ ।।
119.3
প্রবিশন্তীব গাত্রাণি স্বান্যেব জনকাত্মজা ।
বাক্ছল্যৈস্তৈঃ সশল্যেব ভৃশমশ্রূণ্যবর্তয়ৎ ।। ৬.১১৯.৩ ।।
119.4
ততো বাষ্পপরিক্লিষ্টং প্রমার্জন্তী স্বমাননম্ ।
শনৈর্গদ্গদয়া বাচা ভর্তারমিদমব্রবীৎ ।। ৬.১১৯.৪ ।।
119.5
কিং মামসদৃশং বাক্যমীদৃশং শ্রোত্রদারুণম্ ।
রূক্ষং শ্রাবয়সে বীর প্রাকৃতঃ প্রাকৃতামিব ।। ৬.১১৯.৫ ।।
119.6
ন তথা ঽস্মি মহাবাহো যথা ত্বমবগচ্ছসি ।
প্রত্যয়ং গচ্ছ মে যেন চারিত্রেণৈব তে শপে ।। ৬.১১৯.৬ ।।
119.7
পৃথক্স্ত্রীণাং প্রচারেণ জাতিং তাং পরিশঙ্কসে ।
পরিত্যজেমাং শঙ্কাং তু যদি তে ঽহং পরীক্ষিতা ।। ৬.১১৯.৭ ।।
119.8
যদ্যহং গাত্রসংস্পর্শং গতা ঽস্মি বিবশা প্রভো ।
কামকারো ন মে তত্র দৈবং তত্রাপরাধ্যতি ।। ৬.১১৯.৮ ।।
119.9
মদধীনং তু যত্তন্মে হৃদয়ং ত্বয়ি বর্ততে ।
পরাধীনেষু গাত্রেষু কিং করিষ্যাম্যনীশ্বরা ।। ৬.১১৯.৯ ।।
119.10
সহসংবৃদ্ধভাবাচ্চ সংসর্গেণ চ মানদ ।
যদ্যহং তে ন বিজ্ঞাতা হতা তেনাস্মি শাশ্বতম্ ।। ৬.১১৯.১০ ।।
119.11
প্রেষিতস্তে যদা বীরো হনুমানবলোককঃ ।
লঙ্কাস্থা ঽহং ত্বয়া বীর কিং তদা ন বিসর্জিতা ।। ৬.১১৯.১১ ।।
119.12
প্রত্যক্ষং বানরেন্দ্রস্য তদ্বাক্যসমনন্তরম্ ।
ত্বয়া সন্ত্যক্তয়া বীর ত্যক্তং স্যাজ্জীবিতং ময়া ।। ৬.১১৯.১২ ।।
119.13
ন বৃথা তে শ্রমো ঽয়ং স্যাৎ সংশয়ে ন্যস্য জীবিতম্ ।
সুহৃজ্জনপরিক্লেশো ন চায়ং নিষ্ফলস্তব ।। ৬.১১৯.১৩ ।।
119.14
ত্বয়া তু নরশার্দূল ক্রোধমেবানুবর্ততা ।
লঘুনেব মনুষ্যেণ স্ত্রীত্বমেব পুরস্কৃতম্ ।। ৬.১১৯.১৪ ।।
119.15
অপদেশেন জনকান্নোত্পত্তির্বসুধাতলাৎ ।
মম বৃত্তং চ বৃত্তজ্ঞ বহু তে ন পুরস্কৃতম্ ।। ৬.১১৯.১৫ ।।
119.16
ন প্রমাণীকৃতঃ পাণির্বাল্যে বালেন পীডিতঃ ।
মম ভক্তিশ্চ শীলং চ সর্বং তে পৃষ্ঠতঃ কৃতম্ ।। ৬.১১৯.১৬ ।।
119.17
এবং ব্রুবাণা রুদতী বাষ্পগদ্গদভাষিণী ।
অব্রবীল্লক্ষ্মণং সীতা দীনং ধ্যানপরং স্থিতম্ ।। ৬.১১৯.১৭ ।।
119.18
চিতাং মে কুরু সৌমিত্রে ব্যসনস্যাস্য ভেষজম্ ।
মিথ্যোপঘাতোপহতা নাহং জীবিতুমুত্সহে ।। ৬.১১৯.১৮ ।।
119.19
অপ্রীতস্য গুণৈর্ভর্তুস্ত্যক্তায়া জনসংসদি ।
যা ক্ষমা মে গতির্গন্তুং প্রবেক্ষ্যে হব্যবাহনম্ ।। ৬.১১৯.১৯ ।।
119.20
এবমুক্তস্তু বৈদেহ্যা লক্ষ্মণঃ পরবীরহা ।
অমর্ষবশমাপন্নো রাঘবাননমৈক্ষত ।। ৬.১১৯.২০ ।।
119.21
স বিজ্ঞায় ততশ্ছন্দং রামস্যাকারসূচিতম্ ।
চিতাং চকার সৌমিত্রির্মতে রামস্য বীর্যবান্ ।। ৬.১১৯.২১ ।।
119.22
অধোমুখং তদা রামং শনৈঃ কৃত্বা প্রদক্ষিণম্ ।
উপাসর্পত বৈদেহী দীপ্যমানং হুতাশনম্ ।। ৬.১১৯.২২ ।।
119.23
প্রণম্য দেবতাভ্যশ্চ ব্রাহ্মণেভ্যশ্চ মৈথিলী ।
বদ্ধাঞ্জলিপুটা চেদমুবাচাগ্নিসমীপতঃ ।। ৬.১১৯.২৩ ।।
119.24
যথা মে হৃদয়ং নিত্যং নাপসর্পতি রাঘবাৎ ।
তথা লোকস্য সাক্ষী মাং সর্বতঃ পাতু পাবকঃ ।। ৬.১১৯.২৪ ।।
119.25
যথা মাং শুদ্ধচারিত্রাং দুষ্টাং জানাতি রাঘবঃ ।
তথা লোকস্য সাক্ষী মাং সর্বতঃ পাতু পাবকঃ ।। ৬.১১৯.২৫ ।।
119.26
কর্মণা মনসা বাচা যথা নাতিচরাম্যহম্ ।
রাঘবং সর্বধর্মজ্ঞং তথা মাং পাতু পাবকঃ ।। ৬.১১৯.২৬ ।।
119.27
আদিত্যো ভগবান্ বায়ুর্দিশশ্চন্দ্রস্তথৈব চ ।
অহশ্চাপি তথা সন্ধ্যে রাত্রিশ্চ পৃথিবী তথা ।যথান্যে ঽপি বিজানন্তি তথা চারিত্রসংয়ুতাম্ ।। ৬.১১৯.২৭ ।।
119.28
এবমুক্ত্বা তু বৈদেহী পরিক্রম্য হুতাশনম্ ।
বিবেশ জ্বলনং দীপ্তং নিস্সঙ্গেনান্তরাত্মনা ।। ৬.১১৯.২৮ ।।
119.29
জনঃ স সুমহাংস্ত্রস্তো বালবৃদ্ধসমাকুলঃ ।
দদর্শ মৈথিলীং তত্র প্রবিশন্তীং হুতাশনম্ ।। ৬.১১৯.২৯ ।।
119.30
সা তপ্তনবহেমাভা তপ্তকাঞ্চনভূষণা ।
পপাত জ্বলনং দীপ্তং সর্বলোকস্য সন্নিধৌ ।। ৬.১১৯.৩০ ।।
119.31
দদৃশুস্তাং মহাভাগাং প্রবিশন্তীং হুতাশনম্ ।
সীতাং কৃত্স্নাস্ত্রয়ো লোকাঃ পুণ্যামাজ্যাহুতীমিব ।। ৬.১১৯.৩১ ।।
119.32
প্রচুক্রুশুঃ স্ত্রিয়ঃ সর্বাস্তাং দৃষ্ট্বা হব্যবাহনে ।
পতন্তীং সংস্কৃতাং মন্ত্রৈর্বসোর্ধারামিবাধ্বরে ।। ৬.১১৯.৩২ ।।
119.33
দদৃশুস্তাং ত্রয়ো লোকা দেবগন্ধর্বদানবাঃ ।
শপ্তাং পতন্তীং নিরয়ে ত্রিদিবাদ্দেবতামিব ।। ৬.১১৯.৩৩ ।।
119.34
তস্যামগ্নিং বিশন্ত্যাং তু হাহেতি বিপুলস্বনঃ ।
রক্ষসাং বানরাণাং চ সম্বভূবাদ্ভুতোপমঃ ।। ৬.১১৯.৩৪ ।।
119.35
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে একোনবিংশত্যুত্তরশততমঃ সর্গঃ ।
। ১১৯ ।।