Utshovসর্গ 118
118.1
তাং তু পার্শ্বস্থিতাং প্রহ্বাং রামঃ সম্প্রেক্ষ্য মৈথিলীম্ ।
হৃদয়ান্তর্গতক্রোধো ব্যাহর্তুমুপচক্রমে ।। ৬.১১৮.১ ।।
118.2
এষা ঽসি নির্জিতা ভদ্রে শত্রুং জিত্বা ময়া রণে ।
পৌরুষাদ্যদনুষ্ঠেয়ং তদেতদুপপাদিতম্ ।। ৬.১১৮.২ ।।
118.3
গতো ঽস্ম্যন্তমমর্ষস্য ধর্ষণা সম্প্রমার্জিতা ।
অবমানশ্চ শত্রুশ্চ ময়া যুগপদুদ্ধৃতৌ ।। ৬.১১৮.৩ ।।
118.4
অদ্য মে পৌরুষং দৃষ্টমদ্য মে সফলঃ শ্রমঃ ।
অদ্য তীর্ণপ্রতিজ্ঞত্বাৎ প্রভবামীহ চাত্মনঃ ।। ৬.১১৮.৪ ।।
118.5
যা ত্বং বিরহিতা নীতা চলচিত্তেন রক্ষসা ।
দৈবসম্পাদিতো দোষো মানুষেণ ময়া জিতঃ ।। ৬.১১৮.৫ ।।
118.6
সম্প্রাপ্তমবমানং যস্তেজসা ন প্রমার্জতি ।
কস্তস্য পুরুষার্থো ঽস্তি পুরুষস্যাল্পতেজসঃ ।। ৬.১১৮.৬ ।।
118.7
লঙ্ঘনং চ সমুদ্রস্য লঙ্কায়াশ্চাবমর্দনম্ ।
সফলং তস্য তচ্ছ্লাধ্যং মহৎ কর্ম হনূমতঃ ।। ৬.১১৮.৭ ।।
118.8
যুদ্ধে বিক্রমতশ্চৈব হিতং মন্ত্রয়তশ্চ মে ।
সুগ্রীবস্য সসৈন্যস্য সফলো ঽদ্য পরিশ্রমঃ ।। ৬.১১৮.৮ ।।
118.9
নির্গুণং ভ্রাতরং ত্যক্ত্বা যো মাং স্বয়মুপস্থিতঃ ।
বিভীষণস্য ভক্তস্য সফলো ঽদ্য পরিশ্রমঃ ।। ৬.১১৮.৯ ।।
118.10
ইত্যেবং ব্রুবতস্তস্য সীতা রামস্য তদ্বচঃ ।
মৃগীবোত্ফুল্লনয়না বভূবাশ্রুপরিপ্লুতা ।। ৬.১১৮.১০ ।।
118.11
পশ্যতস্তাং তু রামস্য ভূয়ঃ ক্রোধো ব্যবর্ধত ।
প্রভূতাজ্যাবসিক্ত্স্য পাবকস্যেব দীপ্যতঃ ।। ৬.১১৮.১১ ।।
118.12
স বদ্ধ্বা ভ্রুকুটীং বক্ত্রে তির্যক্প্রেক্ষিতলোচনঃ ।
অব্রবীৎ পরুষং সীতাং মধ্যে বানররক্ষসাম্ ।। ৬.১১৮.১২ ।।
118.13
যৎ কর্তব্যং মনুষ্যেণ ধর্ষণাং পরিমার্জতা ।
তৎ কৃতং সকলং সীতে শত্রুহস্তাদমর্ষণাৎ ।। ৬.১১৮.১৩ ।।
118.14
নির্জিতা জীবলোকস্য তপসা ভাবিতাত্মনা ।
অগস্ত্যেন দুরাধর্ষা মুনিনা দক্ষিণেব দিক্ ।। ৬.১১৮.১৪ ।।
118.15
বিদিতশ্চাস্তু তে ভদ্রে যো ঽয়ং রণপরিশ্রমঃ ।
স তীর্ণঃ সুহৃদাং বীর্যান্ন ত্বদর্থং ময়া কৃতঃ ।। ৬.১১৮.১৫ ।।
118.16
রক্ষতা তু ময়া বৃত্তমপাবদং চ সর্বশঃ ।
প্রখ্যাতস্যাত্মবংশস্য ন্যঙ্গং চ পরিরক্ষতা ।। ৬.১১৮.১৬ ।।
118.17
প্রাপ্তচারিত্রসন্দেহা মম প্রতিমুখে স্থিতা ।
দীপো নেত্রাতুরস্যেব প্রতিকূলা ঽসি মে দৃঢম্ ।। ৬.১১৮.১৭ ।।
118.18
তদ্গচ্ছ হ্যভ্যনুজ্ঞাতা যথেষ্টং জনকাত্মজে ।
এতা দশ দিশো ভদ্রে কার্যমস্তি ন মে ত্বয়া ।। ৬.১১৮.১৮ ।।
118.19
কঃ পুমান্ হি কুলে জাতঃ স্ত্রিয়ং পরগৃহোষিতাম্ ।
তেজস্বী পুনরাদদ্যাৎ সুহৃল্লেখ্যেন চেতসা ।। ৬.১১৮.১৯ ।।
118.20
রাবণাঙ্কপরিভ্রষ্টাং দৃষ্টাং দুষ্টেন চক্ষুষা ।
কথং ত্বাং পুনরাদদ্যাং কুলং ব্যপদিশন্ মহৎ ।। ৬.১১৮.২০ ।।
118.21
তদর্থং নির্জিতা মে ত্বং যশঃ প্রত্যাহৃতং ময়া ।
নাস্তি মে ত্বয্যভিষ্বঙ্গো যথেষ্টং গম্যতামিতঃ ।। ৬.১১৮.২১ ।।
118.22
ইতি প্রব্যাহৃতং ভদ্রে ময়ৈতৎ কৃতবুদ্ধিনা ।
লক্ষ্মণে ভরতে বা ত্বং কুরু বুদ্ধিং যথাসুখম্ ।। ৬.১১৮.২২ ।।
118.23
সুগ্রীবে বানরেন্দ্রে বা রাক্ষসেন্দ্রে বিভীষণে ।
নিবেশয় মনঃ সীতে যথা বা সুখমাত্মনঃ ।। ৬.১১৮.২৩ ।।
118.24
ন হি ত্বাং রাবণো দৃষ্ট্বা দিব্যরূপাং মনোরমাম্ ।
মর্ষয়েত চিরং সীতে স্বগৃহে পরিবর্তিনীম্ ।। ৬.১১৮.২৪ ।।
118.25
ততঃ প্রিয়ার্হশ্রবণা তদপ্রিয়ং প্রিয়াদুপশ্রুত্য চিরস্য মৈথিলী ।
মুমোচ বাষ্পং সুভৃশং প্রবেপিতা গজেন্দ্রহস্তাভিহতেব সল্লকী ।। ৬.১১৮.২৫ ।।
118.26
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে অষ্টাদশোত্তরশততমঃ সর্গঃ ।
। ১১৮ ।।