Utshovসর্গ 117
117.1
স উবাচ মহাপ্রাজ্ঞমভিগম্য প্লবঙ্গমঃ ।
রামং বচনমর্থজ্ঞো বরং সর্বধনুষ্মতাম্ ।। ৬.১১৭.১ ।।
117.2
যন্নিমিত্তো ঽয়মারম্ভঃ কর্মণাং চ ফলোদয়ঃ ।
তাং দেবীং শোকসন্তপ্তাং মৈথিলীং দ্রষ্টুমর্হসি ।। ৬.১১৭.২ ।।
117.3
সা হি শোকসমাবিষ্টা বাষ্পপর্যাকুলেক্ষণা ।
মৈথিলী বিজয়ং শ্রুত্বা তব হর্ষমুপাগমৎ ।। ৬.১১৭.৩ ।।
117.4
পূর্বকাৎ প্রত্যয়াচ্চাহমুক্তো বিশ্বস্তয়া তয়া ।
ভর্তারং দ্রষ্টুমিচ্ছামি কৃতার্থং সহলক্ষ্মণম্ ।। ৬.১১৭.৪ ।।
117.5
এবমুক্তো হনুমতা রামো ধর্মভৃতাং বরঃ ।
অগচ্ছৎ সহসা ধ্যানমীষদ্বাষ্পপরিপ্লুতঃ ।। ৬.১১৭.৫ ।।
117.6
দীর্ঘমুষ্ণং বিনিশ্বস্য মেদিনীমবলোকয়ন্ ।
উবাচ মেঘসঙ্কাশং বিভীষণমুপস্থিতম্ ।। ৬.১১৭.৬ ।।
117.7
দিব্যাঙ্গরাগাং বৈদেহীং দিব্যাভরণভূষিতাম্ ।
ইহ সীতাং শিরস্স্নাতামুপস্থাপয় মা চিরম্ ।। ৬.১১৭.৭ ।।
117.8
এবমুক্তস্তু রামেণ ত্বরমাণো বিভীষণঃ ।
প্রবিশ্যান্তঃপুরং সীতাং স্বাভিঃ স্ত্রীভিরচোদয়ৎ ।। ৬.১১৭.৮ ।।
117.9
দিব্যাঙ্গরাগা বৈদেহি দিব্যাভরণভূষিতা ।
যানমারোহ ভদ্রং তে ভর্তা ত্বাং দ্রষ্টুমিচ্ছতি ।। ৬.১১৭.৯ ।।
117.10
এবমুক্তা তু বেদেহী প্রত্যুবাচ বিভীষণম্ ।
অস্নাতা দ্রষ্টুমিচ্ছামি ভর্তারং রাক্ষসাধিপ ।। ৬.১১৭.১০ ।।
117.11
তস্যাস্তদ্বচনং শ্রুত্বা প্রত্যুবাচ বিভীষণঃ ।
যদাহ রাজা ভর্তা তে তত্তথা কর্তুমর্হসি ।। ৬.১১৭.১১ ।।
117.12
তস্য তদ্বচনং শ্রুত্বা মৈথিলী ভর্তৃদেবতা ।
ভর্তৃভক্তিব্রতা সাধ্বী তথেতি প্রত্যভাষত ।। ৬.১১৭.১২ ।।
117.13
ততঃ সীতাং শিরস্স্নাতাং যুবতীভিরলঙ্কৃতাম্ ।
মহার্হাভরণোপেতাং মহার্হাম্বরধারিণীম্ ।। ৬.১১৭.১৩ ।।
117.14
আরোপ্য শিবিকাং দীপ্তাং পরার্ধ্যাম্বরসংবৃতাম্ ।
রক্ষোভির্বহুভির্গুপ্তামাজহার বিভীষণঃ ।। ৬.১১৭.১৪ ।।
117.15
সো ঽভিগম্য মহাত্মানং জ্ঞাত্বা ঽপি ধ্যানমাস্থিতম্ ।
প্রণতশ্চ প্রহৃষ্টশ্চ প্রাপ্তং সীতাং ন্যবেদয়ৎ ।। ৬.১১৭.১৫ ।।
117.16
তামাগতামুপশ্রুত্য রক্ষোগৃহচিরোষিতাম্ ।
হর্ষো দৈন্যং চ রোষশ্চ ত্রয়ং রাঘবমাবিশৎ ।। ৬.১১৭.১৬ ।।
117.17
ততঃ পার্শ্বগতং দৃষ্ট্বা সবিমর্শং বিচারয়ন্ ।
বিভীষণমিদং বাক্যমহৃষ্টং রাঘবো ঽব্রবীৎ ।। ৬.১১৭.১৭ ।।
117.18
রাক্ষসাধিপতে সৌম্য নিত্যং মদ্বিজয়ে রত ।
বৈদেহী সন্নিকর্ষং মে শীঘ্রং সমুপগচ্ছতু ।। ৬.১১৭.১৮ ।।
117.19
স তদ্বচনমাজ্ঞায় রাঘবস্য বিভীষণঃ ।
তূর্ণমুত্সারণে যত্নং কারয়ামাস সর্বতঃ ।। ৬.১১৭.১৯ ।।
117.20
কঞ্চুকোষ্ণীষিণস্তত্র বেত্রজর্জরপাণয়ঃ ।
উত্সারয়ন্তঃ পুরুষাঃ সমন্তাৎ পরিচক্রমুঃ ।। ৬.১১৭.২০ ।।
117.21
ঋক্ষাণাং বানরাণাং চ রাক্ষসানাং চ সর্বশঃ ।
বৃন্দান্যুত্সার্যমাণানি দূরমুত্সসৃজুস্তদা ।। ৬.১১৭.২১ ।।
117.22
তেষামুত্সার্যমাণানাং সর্বেষাং ধ্বনিরুত্থিতঃ ।
বায়ুনোদ্বর্তমানস্য সাগরস্যেব নিস্বনঃ ।। ৬.১১৭.২২ ।।
117.23
উত্সার্যমাণাংস্তান্ দৃষ্ট্বা সমন্তাজ্জাতসম্ভ্রমান্ ।
দাক্ষিণ্যাত্তদমর্ষাচ্চ বারয়ামাস রাঘবঃ ।। ৬.১১৭.২৩ ।।
117.24
সংরব্ধশ্চাব্রবীদ্রামশ্চক্ষুষা প্রদহন্নিব ।
বিভীষণং মহাপ্রাজ্ঞং সোপালম্ভমিদং বচঃ ।। ৬.১১৭.২৪ ।।
117.25
কিমর্থং মামনাদৃত্য ক্লিশ্যতে ঽয়ং ত্বয়া জনঃ ।
নিবর্তয়ৈনমুদ্যোগং জনো ঽয়ং স্বজনো মম ।। ৬.১১৭.২৫ ।।
117.26
ন গৃহাণি ন বস্ত্রাণি ন প্রাকারাস্তিরস্ক্রিয়াঃ ।
নেদৃশা রাজসত্কারা বৃত্তমাবরণং স্ত্রিয়াঃ ।। ৬.১১৭.২৬ ।।
117.27
ব্যসনেষু ন কৃচ্ছ্রেষু ন যুদ্ধেষু স্বয়ংবরে ।
ন ক্রুতৌ ন বিবাহে চ দর্শনং দুষ্যতি স্ত্রিয়াঃ ।। ৬.১১৭.২৭ ।।
117.28
সৈষা যুদ্ধগতা চৈব কৃচ্ছ্রে চ মহতি স্থিতা ।
দর্শনে ঽস্যা ন দোষঃ স্যান্মত্সমীপে বিশেষতঃ ।। ৬.১১৭.২৮ ।।
117.29
তদানয় সমীপং মে শীঘ্রমেনাং বিভীষণ ।
সীতা পশ্যতু মামেষা সুহৃদ্গণবৃতং স্থিতম্ ।। ৬.১১৭.২৯ ।।
117.30
এবমুক্তস্তু রামেণ সবিমর্শো বিভীষণঃ ।
রামস্যোপানয়ৎ সীতাং সন্নিকর্ষং বিনীতবৎ ।। ৬.১১৭.৩০ ।।
117.31
ততো লক্ষ্মণসুগ্রীবৌ হনুমাংশ্চ প্লবঙ্গমঃ ।
নিশম্য বাক্যং রামস্য বভূবুর্ব্যথিতা ভৃশম্ ।। ৬.১১৭.৩১ ।।
117.32
কলত্রনিরপেক্ষৈশ্চ ইঙ্গিতৈরস্য দারুণৈঃ ।
অপ্রীতমিব সীতায়াং তর্কয়ন্তি স্ম রাঘবম্ ।। ৬.১১৭.৩২ ।।
117.33
লজ্জয়া ত্ববলীয়ন্তী স্বেষু গাত্রেষু মৈথিলী ।
বিভীষণেনানুগতা ভর্তারং সা ঽভ্যবর্তত ।। ৬.১১৭.৩৩ ।।
117.34
সা বস্ত্রসংরুদ্ধমুখী লজ্জয়া জনসংসদি ।
রুরোদাসাদ্য ভর্তারমার্যপুত্রেতি ভাষিণী ।। ৬.১১৭.৩৪ ।।
117.35
বিস্ময়াচ্চ প্রহর্ষাচ্চ স্নেহাচ্চ পতিদেবতা ।
উদৈক্ষত মুখং ভর্তুঃ সৌম্যং সোম্যতরাননা ।। ৬.১১৭.৩৫ ।।
117.36
অথ সমপনুদন্মনঃক্লমং সা সুচিরমদৃষ্টমুদীক্ষ্য বৈ প্রিয়স্য ।
বদনমুদিতপূর্ণচন্দ্রকান্তং বিমলশশাঙ্কনিভাননা তদানীম্ ।। ৬.১১৭.৩৬ ।।
117.37
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে সপ্তদশোত্তরশততমঃ সর্গঃ ।
। ১১৭ ।।