Utshovসর্গ 115
115.1
তে রাবণবধং দৃষ্ট্বা দেবগন্ধর্বদানবাঃ ।
জগ্মুঃ স্বৈস্বৈর্বিমানৈস্তে কথয়ন্তঃ শুভাঃ কথাঃ ।। ৬.১১৫.১ ।।
115.2
রাবণস্য বধং ঘোরং রাঘবস্য পরাক্রমম্ ।
সুয়ুদ্ধং বানরাণাং চ সুগ্রীবস্য চ মন্ত্রিতম্ ।। ৬.১১৫.২ ।।
115.3
অনুরাগং চ বীর্যং চ সৌমিত্রের্লক্ষ্মণস্য চ ।
কথয়ন্তো মহাভাগা জগ্মুর্হৃষ্টা যথাগতম্ ।। ৬.১১৫.৩ ।।
115.4
রাঘবস্তু রথং দিব্যমিন্দ্রদত্তং শিখিপ্রভম্ ।
অনুজ্ঞায় মহাভাগো মাতলিং প্রত্যপূজয়ৎ ।। ৬.১১৫.৪ ।।
115.5
রাঘবেণাভ্যনুজ্ঞাতো মাতলিঃ শক্রসারথিঃ ।
দিব্যং তং রথমাস্থায় দিবমেবারুরোহ সঃ ।। ৬.১১৫.৫ ।।
115.6
তস্মিংস্তু দিবমারূঢে সুরসারথিসত্তমে ।
রাঘবঃ পরমপ্রীতঃ সুগ্রীবং পরিষস্বজে ।। ৬.১১৫.৬ ।।
115.7
পরিষ্বজ্য চ সুগ্রীবং লক্ষ্মণেন প্রচোদিতঃ ।
পূজ্যমানো হরিশ্রেষ্ঠৈরাজগাম বলালয়ম্ ।। ৬.১১৫.৭ ।।
115.8
অব্রবীচ্চ তদা রামঃ সমীপপরিবর্তিনম্ ।
সৌমিত্রিং সত্যসম্পন্নং লক্ষ্মণং দীপ্ততেজসম্ ।। ৬.১১৫.৮ ।।
115.9
বিভীষণমিমং সৌম্য লঙ্কায়ামভিষেচয় ।
অনুরক্তং চ ভক্তং চ মম চৈবোপকারিণম্ ।। ৬.১১৫.৯ ।।
115.10
এষ মে পরমঃ কামো যদীমং রাবণানুজম্ ।
লঙ্কায়াং সৌম্য পশ্যেয়মভিষিক্তং বিবীষণম্ ।। ৬.১১৫.১০ ।।
115.11
এবমুক্তস্তু সৌমিত্রী রাঘবেণ মহাত্মনা ।
তথেত্যুক্ত্বা তু সংহৃষ্টঃ সৌবর্ণং ঘটমাদদে ।। ৬.১১৫.১১ ।।
115.12
তং ঘটং বানরেন্দ্রাণাং হস্তে দত্ত্বা মনোজবান্ ।
আদিদেশ মহাসত্ত্বান্ সমুদ্রসলিলানয়ে ।। ৬.১১৫.১২ ।।
115.13
ইতি শীঘ্রং ততো গত্বা বানরাস্তে মহাবলাঃ ।
আগতাস্তজ্জলং গৃহ্য সমুদ্রাদ্বানরোত্তমাঃ ।। ৬.১১৫.১৩ ।।
115.14
ততস্ত্বেকং ঘটং গৃহ্য সংস্থাপ্য পরমাসনে ।
ঘটেন তেন সৌমিত্রিরভ্যষিঞ্চদ্বিভীষণম্ ।। ৬.১১৫.১৪ ।।
115.15
লঙ্কায়াং রক্ষসাং মধ্যে রাজানং রামশাসনাৎ ।
বিধিনা মন্ত্রদৃষ্টেন সুহৃদ্গণসমাবৃতম্ ।অভ্যষিঞ্চৎ স ধর্মাত্মা শুদ্ধাত্মানং বিভীষণম্ ।। ৬.১১৫.১৫ ।।
115.16
তস্যামাত্যা জহৃষিরে ভক্তা যে চাস্য রাক্ষসাঃ ।
দৃষ্ট্বা ঽভিষিক্তং লঙ্কায়াং রাক্ষসেন্দ্রং বিভীষণম্ ।। ৬.১১৫.১৬ ।।
115.17
স তদ্রাজ্যং মহৎ প্রাপ্য রামদত্তং বিভীষণঃ ।
প্রকৃতীঃ সান্ত্বয়িত্বা চ ততো রামমুপাগমৎ ।। ৬.১১৫.১৭ ।।
115.18
অক্ষতান্ মোদকান্ লাজান্ দিব্যাঃ সুমনসস্তদা ।
আজহ্রুরথ সংহৃষ্টাঃ পৌরাস্তস্মৈ নিশাচরাঃ ।। ৬.১১৫.১৮ ।।
115.19
স তান্ গৃহীত্বা দুর্ধর্ষো রাঘবায় ন্যবেদয়ৎ ।
মঙ্গল্যং মঙ্গলং সর্বং লক্ষ্মণায় চ বীর্যবান্ ।। ৬.১১৫.১৯ ।।
115.20
কৃতকার্যং সমৃদ্ধার্থং দৃষ্ট্বা রামো বিভীষণম্ ।
প্রতিজগ্রাহ তৎ সর্বং তস্যৈব প্রিয়কাম্যয়া ।। ৬.১১৫.২০ ।।
115.21
ততঃ শৈলোপমং বীরং প্রাঞ্জলিং পার্শ্বতঃ স্থিতম্ ।
অব্রবীদ্রাঘবো বাক্যং হনুমন্তং প্লবঙ্গমম্ ।। ৬.১১৫.২১ ।।
115.22
অনুমান্যং মহারাজমিমং সৌম্য বিভীষণম্ ।
। ৬.১১৫.২২ ।।
115.23
গচ্ছ সৌম্য পুরীং লঙ্কামনুজ্ঞাপ্য যথাবিধি ।
প্রবিশ্য রাবণগৃহং বিজয়েনাভিনন্দ্য চ ।। ৬.১১৫.২৩ ।।
115.24
বৈদেহ্যৈ মাং কুশলিনং সসুগ্রীবং সলক্ষ্মণম্ ।
আচক্ষ্ব জয়তাং শ্রেষ্ঠ রাবণং চ ময়া হতম্ ।। ৬.১১৫.২৪ ।।
115.25
প্রিয়মেতদুদাহৃত্য মৈথিল্যাস্ত্বং হরীশ্বর ।
প্রতিগৃহ্য চ সন্দেশমুপাবর্তিতুমর্হসি ।। ৬.১১৫.২৫ ।।
115.26
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে পঞ্চদশোত্তরশততমঃ সর্গঃ ।
। ১১৫ ।।