Utshovসর্গ 113
113.1
রাবণং নিহতং শ্রুত্বা রাঘবেণ মহাত্মনা ।
অন্তঃপুরাদ্বিনিষ্পেতূ রাক্ষস্যঃ শোককর্শিতাঃ ।। ৬.১১৩.১ ।।
113.2
বার্যমাণাঃ সুবহুশো বেষ্টন্ত্যঃ ক্ষিতিপাংসুষু ।
বিমুক্তকেশ্যো দুঃখার্তা গাবো বত্সহতা ইব ।। ৬.১১৩.২ ।।
113.3
উত্তরেণ বিনিষ্ক্রম্য দ্বারেণ সহ রাক্ষসৈঃ ।
প্রবিশ্যায়ো ধনং ঘোরং বিচিন্বন্ত্যো হতং পতিম্ ।। ৬.১১৩.৩ ।।
113.4
রাজপুত্রেতি বাদিন্যো হা নাথেতি চ সর্বশঃ ।
পরিপেতুঃ কবন্ধাঙ্কাং মহীং শোণিতকর্দমাম্ ।। ৬.১১৩.৪ ।।
113.5
তা বাষ্পপরিপূর্ণাক্ষ্যো ভর্তৃশোকপরাজিতাঃ ।
করেণ্ব ইব নর্দন্ত্যো বিনেদুর্হতয়ূথপাঃ ।। ৬.১১৩.৫ ।।
113.6
দদৃশুস্তং মহাবীর্যং মহাকায়ং মহাদ্যুতিম্ ।
রাবণং নিহতং ভূমৌ নীলাঞ্জনচয়োপমম্ ।। ৬.১১৩.৬ ।।
113.7
তাঃ পতিং সহসা দৃষ্ট্বা শয়ানং রণপাংসুষু ।
নিপেতুস্তস্য গাত্রেষু চ্ছিন্না বনলতা ইব ।। ৬.১১৩.৭ ।।
113.8
বহুমানাৎ পরিষ্বজ্য কাচিদেনং রুরোদ হ ।
চরণৌ কাচিদালিঙ্গ্য কাচিৎ কণ্ঠে ঽবলম্ব্য চ ।। ৬.১১৩.৮ ।।
113.9
উদ্ধৃত্য চ ভুজৌ কাচিদ্ভূমৌ স্ম পরিবর্ততে ।
হতস্য বদনং দৃষ্ট্বা কাচিন্মোহমুপাগমৎ ।। ৬.১১৩.৯ ।।
113.10
কাচিদঙ্কে শিরঃ কৃত্বা রুরোদ মুখমীক্ষতী ।
স্নাপয়ন্তী মুখং বাষ্পৈস্তুষারৈরিব পঙ্কজম্ ।। ৬.১১৩.১০ ।।
113.11
এবমার্তাঃ পতিং দৃষ্ট্বা রাবণং নিহতং ভুবি ।
চুক্রুশুর্বহুধা শোকাদ্ভূয়স্তাঃ পর্যদেবয়ন্ ।। ৬.১১৩.১১ ।।
113.12
যেন বিত্রাসিতঃ শক্রো যেন বিত্রাসিতো যমঃ ।
যেন বৈশ্রবণো রাজা পুষ্পকেণ বিয়োজিতঃ ।। ৬.১১৩.১২ ।।
113.13
গন্ধর্বাণামৃষীণাং চ সুরাণাং চ মহাত্মনাম্ ।
ভয়ং যেন মহদ্দত্তং সো ঽয়ং শেতে রণে হতঃ ।। ৬.১১৩.১৩ ।।
113.14
অসুরেভ্যঃ সুরেভ্যো বা পন্নগেভ্যো ঽপি বা তথা ।
ন ভয়ং যো বিজানাতি তস্যেদং মানুষাদ্ভয়ম্ ।। ৬.১১৩.১৪ ।।
113.15
অবধ্যো দেবতানাং যস্তথা দানবরক্ষসাম্ ।
হতঃ সো ঽয়ং রণে শেতে মানুষেণ পদাতিনা ।। ৬.১১৩.১৫ ।।
113.16
যো ন শক্যঃ সুরৈর্হন্তুং ন যক্ষৈর্নাসুরৈস্তথা ।
সো ঽয়ং কশ্চিদিবাসত্ত্বো মৃত্যুং মর্ত্যেন লম্ভিতঃ ।। ৬.১১৩.১৬ ।।
113.17
এবং বদন্ত্যো বহুধা রুরুদুস্তস্য তাঃ স্ত্রিয়ঃ ।
ভূয় এব চ দুঃখার্তা বিলেপুশ্চ পুনঃপুনঃ ।। ৬.১১৩.১৭ ।।
113.18
অশৃণ্বতা চ সুহৃদাং সততং হিতবাদিনাম্ ।
মরণায়াহৃতা সীতা ঘাতিতাশ্চ নিশাচরাঃ ।। ৬.১১৩.১৮ ।।
113.19
এতাঃ সমমিদানীং তে বয়মাত্মা চ পাতিতাঃ ।
ব্রুবাণো ঽপি হিতং বাক্যমিষ্টো ভ্রাতা বিবীষণঃ ।ধৃষ্টং পরুষিতো মোহাত্ত্বয়া ঽ ঽত্মবধকাঙ্ক্ষিণা ।। ৬.১১৩.১৯ ।।
113.20
যদি নির্যাতিতা তে স্যাৎ সীতা রামায় মৈথিলী ।
ন নঃ স্যাদ্ ব্যসনং ঘোরমিদং মূলহরং মহৎ ।। ৬.১১৩.২০ ।।
113.21
বৃত্তকামো ভবেদ্ভ্রাতা রামো মিত্রকুলং ভবেৎ ।
বয়ং চাবিধবাঃ সর্বাঃ সকামা ন চ শত্রবঃ ।। ৬.১১৩.২১ ।।
113.22
ত্বয়া পুনর্নৃশংসেন সীতাং সংরুন্ধতা বলাৎ ।
রাক্ষসা বয়মাত্মা চ ত্রয়ং তুল্যং নিপাতিতম্ ।। ৬.১১৩.২২ ।।
113.23
ন কামকারঃ কামং বা তব রাক্ষসপুঙ্গব ।
দৈবং চেষ্টয়তে সর্বং হতং দৈবেন হন্যতে ।। ৬.১১৩.২৩ ।।
113.24
বানরাণাং বিনাশো ঽয়ং রক্ষসাং চ মহাহবে ।
তব চৈব মহাবাহো দৈবয়োগাদুপাগতঃ ।। ৬.১১৩.২৪ ।।
113.25
নৈবার্থেন ন কামেন বিক্রমেণ ন চাজ্ঞয়া ।
শক্যা দৈবগতির্লোকে নিবর্তয়িতুমুদ্যতা ।। ৬.১১৩.২৫ ।।
113.26
বিলেপুরেবং দীনাস্তা রাক্ষসাধিপয়োষিতঃ ।
কুরর্য ইব দুঃখার্তা বাষ্পপর্যাকুলেক্ষণাঃ ।। ৬.১১৩.২৬ ।।
113.27
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে ত্রয়োদশোত্তরশততমঃ সর্গঃ ।
। ১১৩ ।।