Utshovসর্গ 112
112.1
ভ্রাতরং নিহতং দৃষ্ট্বা শয়ানং রামনির্জিতম্ ।
শোকবেগপরীতাত্মা বিললাপ বিভীষণঃ ।। ৬.১১২.১ ।।
112.2
বীর বিক্রান্ত বিখ্যাত বিনীত নয়কোবিদ ।
মহার্হশয়নোপেত কিং শেষে ঽদ্য হতো ভুবি ।। ৬.১১২.২ ।।
112.3
বিক্ষিপ্য দীর্ঘৌ নিশ্চেষ্টৌ ভুজাবঙ্গদভূষিতৌ ।
মুকুটেনাপবৃত্তেন ভাস্করাকারবর্চসা ।। ৬.১১২.৩ ।।
112.4
তদিদং বীর সম্প্রাপ্তং ময়া পূর্বং সমীরিতম্ ।
কামমোহপরীতস্য যত্তে ন রুচিতং বচঃ ।। ৬.১১২.৪ ।।
112.5
যন্ন দর্পাৎ প্রহস্তো বা নেন্দ্রজিন্নাপরে জনাঃ ।
ন কুম্ভকর্ণো ঽতিরথো নাতিকায়ো নরান্তকঃ ।ন স্বয়ং ত্বমমন্যেথাস্তস্যোদর্কো ঽয়মাগতঃ ।। ৬.১১২.৫ ।।
112.6
গতঃ সেতুঃ সুনীতানাং গতো ধর্মস্য বিগ্রহঃ ।
গতঃ সত্ত্বস্য সঙ্ক্ষেপঃ প্রস্তাবানাং গতির্গতা ।। ৬.১১২.৬ ।।
112.7
আদিত্যঃ পতিতো ভূমৌ মগ্নস্তমসি চন্দ্রমাঃ ।
। ৬.১১২.৭ ।।
112.8
চিত্রভানুঃ প্রশান্তার্চির্ব্যবসায়ো নিরুদ্যমঃ ।
অস্মিন্নিপতিতে ভূমৌ বীরে শস্ত্রভৃতাং বরে ।। ৬.১১২.৮ ।।
112.9
কিং শেষমিব লোকস্য হতবীরস্য সাম্প্রতম্ ।
রণে রাক্ষসশার্দূলে প্রসুপ্ত ইব পাংসুষু ।। ৬.১১২.৯ ।।
112.10
ধৃতিপ্রবালঃ প্রসহাগ্র্যপুষ্পস্তপোবলঃ শৌর্যনিবদ্ধমূলঃ ।
রণে মহান্ রাক্ষসরাজবৃক্ষঃ সম্মর্দিতো রাঘবমারুতেন ।। ৬.১১২.১০ ।।
112.11
তেজোবিষাণঃ কুলবংশবংশঃ কোপপ্রসাদাপরগাত্রহস্তঃ ।
ইক্ষ্বাকুসিংহাবগৃহীতদেহঃ সুপ্তঃ ক্ষিতৌ রাবণগন্ধহস্তী ।। ৬.১১২.১১ ।।
112.12
পরাক্রমোত্সাহবিজৃম্ভিতার্চির্নিশ্বাসধূমঃ স্ববলপ্রতাপঃ ।
প্রতাপবান্ সংয়তি রাক্ষসাগ্নির্নির্বাপিতো রামপয়োধরেণ ।। ৬.১১২.১২ ।।
112.13
সিংহর্ক্ষলাঙ্গূলককুদ্বিষাণঃ পরাভিজিদ্গন্ধনগন্ধহস্তী ।
রক্ষোবৃষশ্চাপলকর্ণচক্ষুঃ ক্ষিতীশ্বরব্যাঘ্রহতো ঽবসন্নঃ ।। ৬.১১২.১৩ ।।
112.14
বদন্তং হেতুমদ্বাক্যং পরিমৃষ্টার্থনিশ্চয়ম্ ।
রামঃ শোকসমাবিষ্টমিত্যুবাচ বিভীষণম্ ।। ৬.১১২.১৪ ।।
112.15
নায়ং বিনষ্টো নিশ্চেষ্টঃ সমরে চণ্ডবিক্রমঃ ।
অত্যুন্নতমহোত্সাহঃ পতিতো ঽয়মশঙ্কিতঃ ।। ৬.১১২.১৫ ।।
112.16
নৈবং বিনষ্টাঃ শোচ্যন্তে ক্ষত্রধর্মমবস্থিতাঃ ।
বৃদ্ধিমাশংসমানা যে নিপতন্তি রণাজিরে ।। ৬.১১২.১৬ ।।
112.17
যেন সেন্দ্রাস্ত্রয়ো লোকাস্ত্রাসিতা যুধি ধীমতা ।
তস্মিন্ কালসমায়ুক্তে ন কালঃ পরিশোচিতুম্ ।। ৬.১১২.১৭ ।।
112.18
নৈকান্তবিজয়ো যুদ্ধে ভূতপূর্বঃ কদাচন ।
পরৈর্বা হন্যতে বীরঃ পরান্ বা হন্তি সংয়ুগে ।। ৬.১১২.১৮ ।।
112.19
ইয়ং হি পূর্বৈঃ সন্দিষ্টা গতিঃ ক্ষত্রিয়সম্মতা ।
ক্ষত্রিয়ো নিহতঃ সঙ্খ্যে ন শোচ্য ইতি নিশ্চয় ।। ৬.১১২.১৯ ।।
112.20
তদেবং নিশ্চয়ং দৃষ্ট্বা তত্ত্বমাস্থায় বিজ্বরঃ ।
যদিহানন্তরং কার্যং কল্প্যং তদনুচিন্তয় ।। ৬.১১২.২০ ।।
112.21
তমুক্তবাক্যং বিক্রান্তং রাজপুত্রং বিভীষণঃ ।
উবাচ শোকসন্তপ্তো ভ্রাতুর্হিতমনন্তরম্ ।। ৬.১১২.২১ ।।
112.22
যো ঽয়ং বিমর্দেষু ন ভগ্নপূর্বঃ সুরৈঃ সমেতৈঃ সহ বাসবেন ।
ভবন্তমাসাদ্য রণে বিভগ্নো বেলামিবাসাদ্য যথা সমুদ্রঃ ।। ৬.১১২.২২ ।।
112.23
অনেন দত্তানি সুপূজিতানি ভুক্তাশ্চ ভোগা নিভৃতাশ্চ ভৃত্যাঃ ।
ধনানি মিত্রেষু সমর্পিতানি বৈরাণ্যমিত্রেষু চ যাপিতানি ।। ৬.১১২.২৩ ।।
112.24
এষোহিতাগ্নিশ্চ মহাতপাশ্চ বেদান্তগঃ কর্মসু চাগ্র্যবীর্যঃ ।
এতস্য যৎ প্রেতগতস্য কৃত্যং তৎ কর্তুমিচ্ছামি তব প্রসাদাৎ ।। ৬.১১২.২৪ ।।
112.25
স তস্য বাক্যৈঃ করুণৈর্মহাত্মা সম্বোধিতঃ সাধু বিভীষণেন ।
আজ্ঞাপয়ামাস নরেন্দ্রসূনুঃ স্বর্গীয়মাধানমদীনসত্ত্বঃ ।। ৬.১১২.২৫ ।।
112.26
মরণান্তানি বৈরাণি নির্বৃত্তং নঃ প্রয়োজনম্ ।
ক্রিয়তামস্য সংস্কারো মমাপ্যেষ যথা তব ।। ৬.১১২.২৬ ।।
112.27
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে দ্বাদশোত্তরশততমঃ সর্গঃ ।
। ১১২ ।।