Utshovসর্গ 111
111.1
অথ সংস্মারয়ামাস রাঘবং মাতলিস্তদা ।
অজানন্নিব কিং বীর ত্বমেনমনুবর্তসে ।। ৬.১১১.১ ।।
111.2
বিসৃজাস্মৈ বধায় ত্বমস্ত্রং পৈতামহং প্রভো ।
বিনাশকালঃ কথিতো যঃ সুরৈঃ সো ঽদ্য বর্তত ।। ৬.১১১.২ ।।
111.3
ততঃ সংস্মারিতো রামস্তেন বাক্যেন মাতলেঃ ।
জগ্রাহ সশরং দীপ্তং নিশ্বসন্তমিবোরগম্ ।। ৬.১১১.৩ ।।
111.4
যমস্মৈ প্রথমং প্রাদাদগস্ত্যো ভগবানৃষিঃ ।
ব্রহ্মদত্তং মহাবাণমমোঘং যুধি বীর্যবান্ ।। ৬.১১১.৪ ।।
111.5
ব্রহ্মণা নির্মিতং পূর্বমিন্দ্রার্থমমিতৌজসা ।
দত্তং সুরপতেঃ পূর্বং ত্রিলোকজয়কাঙ্ক্ষিণঃ ।। ৬.১১১.৫ ।।
111.6
যস্য বাজেষু পবনঃ ফলে পাবকভাস্করৌ ।
শরীরমাকাশময়ং গৌরবে মেরুমন্দরৌ ।। ৬.১১১.৬ ।।
111.7
জাজ্বল্যমানং বপুষা সুপুঙ্খং হেমভূষিতম্ ।
তেজসা সর্বভূতানাং কৃতং ভাস্করবর্চসম্ ।। ৬.১১১.৭ ।।
111.8
সধূমমিব কালাগ্নিং দীপ্তমাশীবিষং যথা ।
পরনাগাশ্ববৃন্দানাং ভেদনং ক্ষিপ্রকারিণম্ ।। ৬.১১১.৮ ।।
111.9
দ্বারাণাং পরিঘাণাং চ গিরীণামপি ভেদনম্ ।
নানারুধিরসিক্তাঙ্গং মেদোদিগ্ধং সুদারুণম্ ।। ৬.১১১.৯ ।।
111.10
বজ্রসারং মহানাদং নানাসমিতিদারণম্ ।
সর্ববিত্রাসনং ভীমং শ্বসন্তমিব পন্নগম্ ।। ৬.১১১.১০ ।।
111.11
কঙ্কগৃধ্রবলানাং চ গোমায়ুগণরক্ষসাম্ ।
নিত্যং ভক্ষ্যপ্রদং যুদ্ধে যমরূপং ভয়াবহম্ ।। ৬.১১১.১১ ।।
111.12
নন্দনং বানরেন্দ্রাণাং রক্ষসামবসাদনম্ ।
বাজিতং বিবিধৈর্বাজৈশ্চারুচিত্রৈর্গরুত্মতঃ ।। ৬.১১১.১২ ।।
111.13
তমুত্তমেষুং লোকানামিক্ষ্বাকুভয়নাশনম্ ।
দ্বিষতাং কীর্তিহরণং প্রহর্ষকরমাত্মনঃ ।। ৬.১১১.১৩ ।।
111.14
অভিমন্ত্র্য ততো রামস্তং মহেষুং মহাবলঃ ।
বেদপ্রোক্তেন বিধিনা সন্দধে কার্মুকে বলী ।। ৬.১১১.১৪ ।।
111.15
তস্মিন্ সন্ধীয়মানে তু রাঘবেণ শরোত্তমে ।
সর্বভূতানি বিত্রেসুশ্চচাল চ বসুন্ধরা ।। ৬.১১১.১৫ ।।স রাবণায় সঙ্ক্রুদ্ধো ভৃশমায়ম্য কার্মুকম্ ।চিক্ষেপ পরমায়ত্তস্তং শরং মর্মঘাতিনম্ ।। ৬.১১১.১৬ ।।
111.16
স বজ্র ইব দুর্ধর্ষো বজ্রিবাহুবিসর্জিতঃ ।
কৃতান্ত ইব চাবার্যো ন্যপতদ্রাবণোরসি ।। ৬.১১১.১৭ ।।
111.17
স বিসৃষ্টো মহাবেগঃ শরীরান্তকরঃ শরঃ ।
বিভেদ হৃদয়ং তস্য রাবণস্য দুরাত্মনঃ ।। ৬.১১১.১৮ ।।
111.18
রুধিরাক্তঃ স বেগেন জীবিতান্তকরঃ শরঃ ।
রাবণস্য হরন্ প্রাণান্ বিবেশ ধরণীতলম্ ।। ৬.১১১.১৯ ।।
111.19
স শরো রাবণং হত্বা রুধিরার্দীকৃতচ্ছবিঃ ।
কৃতকর্মা নিভৃতবৎ স্বতূণীং পুনরাগমৎ ।। ৬.১১১.২০ ।।
111.20
তস্য হস্তাদ্ধতস্যাশু কার্মুকং তৎ সসায়কম্ ।
নিপপাত সহ প্রাণৈর্ভ্রশ্যমানস্য জীবিতাৎ ।। ৬.১১১.২১ ।।
111.21
গতাসুর্ভীমবেগস্তু নৈর্ঋতেন্দ্রো মহাদ্যুতিঃ ।
পপাত স্যন্দনাদ্ভূমৌ বৃত্রো বজ্রহতো যথা ।। ৬.১১১.২২ ।।
111.22
তং দৃষ্ট্বা পতিতং ভূমৌ হতশেষা নিশাচরাঃ ।
হতনাথা ভয়ত্রস্তাঃ সর্বতঃ সম্প্রদুদ্রুবুঃ ।। ৬.১১১.২৩ ।।
111.23
নর্দন্তশ্চাভিপেতুস্তান্ বানরা দ্রুময়োধিনঃ ।
। ৬.১১১.২৪ ।।
111.24
দশগ্রীববধং দৃষ্ট্বা বিজয়ং রাঘবস্য চ ।
অর্দিতা বানরৈর্হৃষ্টৈর্লঙ্কামভ্যপতন্ ভয়াৎ ।গতাশ্রয়ত্বাৎ করুণৈর্বাষ্পপ্রস্রবণৈর্মুখৈঃ ।। ৬.১১১.২৫ ।।
111.25
ততো বিনেদুঃ সংহৃষ্টা বানরা জিতকাশিনঃ ।
বদন্তো রাঘবজয়ং রাবণস্য চ তদ্বধম্ ।। ৬.১১১.২৬ ।।
111.26
অথান্তরিক্ষে ব্যনদৎ সৌম্যস্ত্রিদশদুন্দুভিঃ ।
দিব্যগন্ধবহস্তত্র মারুতঃ সসুখো ববৌ ।। ৬.১১১.২৭ ।।
111.27
নিপপাতান্তরিক্ষাচ্চ পুষ্পবৃষ্টিস্তদা ভুবি ।
কিরন্তী রাঘবরথং দুরবাপা মনোরমা ।। ৬.১১১.২৮ ।।
111.28
রাঘবস্তবসংয়ুক্তা গগনে ঽপি চ শুশ্রুবে ।
সাধু সাধ্বিতি বাগগ্র্যা দৈবতানাং মহাত্মনাম্ ।। ৬.১১১.২৯ ।।
111.29
আবিবেশ মহাহর্ষো দেবানাং চারণৈঃ সহ ।
রাবণে নিহতে রৌদ্রে সর্বলোকভয়ঙ্করে ।। ৬.১১১.৩০ ।।
111.30
ততঃ সকামং সুগ্রীবমঙ্গদং চ মহাবলম্ ।
চকার রাঘবঃ প্রীতো হত্বা রাক্ষসপুঙ্গবম্ ।। ৬.১১১.৩১ ।।
111.31
ততঃ প্রজগ্মুঃ প্রশমং মরুদ্গণা দিশঃ প্রসেদুর্বিমলং নভো ঽববৎ ।
মহী চকম্পে ন হি মারুতো ববৌ স্থিরপ্রভশ্চাপ্যভবদ্দিবাকরঃ ।। ৬.১১১.৩২ ।।
111.32
ততস্তু সুগ্রীববিভীষণাদয়ঃ সুহৃদ্বিশেষাঃ সহলক্ষ্মণাস্তদা ।
সমেত্য হৃষ্টা বিজয়েন রাঘবং রণে ঽভিরামং বিধিনা হ্যপূজয়ন্ ।। ৬.১১১.৩৩ ।।
111.33
স তু নিহতরিপুঃ স্থিরপ্রতিজ্ঞঃ স্বজনবলাভিবৃতো রণে ররাজ ।
রঘুকুলনৃপনন্দনো মহৌজাস্ত্রিদশগণৈরভিসংবৃতো যথেন্দ্রঃ ।। ৬.১১১.৩৪ ।।
111.34
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে একাদশোত্তরশততমঃ সর্গঃ ।
। ১১১ ।।