Utshovসর্গ 105
105.1
স তেন তু তথা ক্রোধাৎ কাকুত্স্থেনার্দিতো রণে ।
রাবণঃ সমরশ্লাঘী মহাক্রোধমুপাগমৎ ।। ৬.১০৫.১ ।।
105.2
স দীপ্তনয়নো রোষাচ্চাপমায়ম্য বীর্যবান্ ।
অভ্যর্দয়ৎ সুসঙ্ক্রুদ্ধো রাঘবং পরমাহবে ।। ৬.১০৫.২ ।।
105.3
বাণধারাসহস্রৈস্তৈঃ স তোয়দ ইবাম্বরাৎ ।
রাঘবং রাবণো বাণৈস্তটাকমিব পূরয়ৎ ।। ৬.১০৫.৩ ।।
105.4
পূরিতঃ শরজালেন ধনুর্মুক্তেন সংয়ুগে ।
মহাগিরিরিবাকম্প্যঃ কাকুত্স্থো ন প্রকম্পতে ।। ৬.১০৫.৪ ।।
105.5
স শরৈঃ শরজালানি বারয়ন্ সমরে স্থিতঃ ।
গভস্তীনিব সূর্যস্য প্রতিজগ্রাহ বীর্যবান্ ।। ৬.১০৫.৫ ।।
105.6
ততঃ শরসহস্রাণি ক্ষিপ্রহস্তো নিশাচরঃ ।
নিজঘানোরসি ক্রুদ্ধো রাঘবস্য মহাত্মনঃ ।। ৬.১০৫.৬ ।।
105.7
স শোণিত সমাদিগ্ধঃ সমরে লক্ষ্মণাগ্রজঃ ।
দৃষ্টঃ ফুল্ল ইবারণ্যে সুমহান্ কিংশুকদ্রুমঃ ।। ৬.১০৫.৭ ।।
105.8
শরাভিঘাতসংরব্ধঃ সো ঽপি জগ্রাহ সায়কান্ ।
কাকুত্স্থঃ সুমহাতেজা যুগান্তাদিত্যতেজসঃ ।। ৬.১০৫.৮ ।।
105.9
ততো ঽয়োন্যং সুসংরব্ধাবুভৌ তৌ রামরাবণৌ ।
শরান্ধকারে সমরে নোপালক্ষয়তাং তদা ।। ৬.১০৫.৯ ।।
105.10
ততঃ ক্রোধসমাবিষ্টো রামো দশরথাত্মজঃ ।
উবাচ রাবণং বীরঃ প্রহস্য পরুষং বচঃ ।। ৬.১০৫.১০ ।।
105.11
মম ভার্যা জনস্থানাদজ্ঞানাদ্রাক্ষসাধম ।
হৃতা তে বিবশা যস্মাত্তস্মাত্ত্বং নাসি বীর্যবান্ ।। ৬.১০৫.১১ ।।
105.12
ময়া বিরহিতাং দীনাং বর্তমানাং মহাবনে ।
বৈদেহীং প্রসভং হৃত্বা শূরো ঽহমিতি মন্যসে ।। ৬.১০৫.১২ ।।
105.13
স্ত্রীষু শূর বিনাথাসু পরদারাভিমর্শক ।
কৃত্বা কাপুরুষং কর্ম শূরো ঽহমিতি মন্যসে ।। ৬.১০৫.১৩ ।।
105.14
ভিন্নমর্যাদ নির্লজ্জ চারিত্রেষ্বনবস্থিত ।
দর্পান্মৃত্যুমুপাদায় শূরো ঽহমিতি মন্যসে ।। ৬.১০৫.১৪ ।।
105.15
শূরেণ ধনদভ্রাত্রা বলৈঃ সমুদিতেন চ ।
শ্লাঘনীয়ং যশস্যং চ কৃতং কর্ম মহত্ত্বয়া ।। ৬.১০৫.১৫ ।।
105.16
উত্সেকেনাভিপন্নস্য গর্হিতস্যাহিতস্য চ ।
কর্মণঃ প্রাপ্নুহীদানীং তস্যাদ্য সুমহৎ ফলম্ ।। ৬.১০৫.১৬ ।।
105.17
শূরো ঽহমিতি চাত্মানমবগচ্ছসি দুর্মতে ।
নৈব লজ্জা ঽস্তি তে সীতাং চোরবদ্ ব্যপকর্ষতঃ ।। ৬.১০৫.১৭ ।।
105.18
যদি মত্সন্নিধৌ সীতা ধর্ষিতা স্যাত্ত্বয়া বলাৎ ।
ভ্রাতরং তু খরং পশ্যেস্তদা মত্সায়কৈর্হতঃ ।। ৬.১০৫.১৮ ।।
105.19
দিষ্ট্যা ঽসি মম দুষ্টাত্মংশ্চক্ষুর্বিষয়মাগতঃ ।
অদ্য ত্বাং সায়কৈস্তীক্ষ্ণৈর্নয়ামি যমসাদনম্ ।। ৬.১০৫.১৯ ।।
105.20
অদ্য তে মচ্ছরৈশ্ছিন্নং শিরো জ্বলিতকুণ্ডলম্ ।
ক্রব্যাদা ব্যপকর্ষন্তু বিকীর্ণং রণপাংসুষু ।। ৬.১০৫.২০ ।।
105.21
নিপত্যোরসি গৃধ্রাস্তে ক্ষিতৌ ক্ষিপ্তস্য রাবণ ।
পিবন্তু রুধিরং তর্ষাচ্ছরশল্যান্তরোত্থিতম্ ।। ৬.১০৫.২১ ।।
105.22
অদ্য মদ্বাণভিন্নস্য গতাসোঃ পতিতস্য তে ।
কর্ষন্ত্বন্ত্রাণি পতগা গরুত্মন্ত ইবোরগান্ ।। ৬.১০৫.২২ ।।
105.23
ইত্যেবং সংবদন্ বীরো রামঃ শত্রুনিবর্হণঃ ।
রাক্ষসেন্দ্রং সমীপস্থং শরবর্ষৈরবাকিরৎ ।। ৬.১০৫.২৩ ।।
105.24
বভূব দ্বিগুণং বীর্যং বলং হর্ষশ্চ সংয়ুগে ।
রামস্যাস্ত্রবলং চৈব শত্রোর্নিধনকাঙ্ক্ষিণঃ ।। ৬.১০৫.২৪ ।।
105.25
প্রাদুর্বভূবুরস্ত্রাণি সর্বাণি বিদিতাত্মনঃ ।
প্রহর্ষাচ্চ মহাতেজাঃ শীঘ্রহস্ততরো ঽভবৎ ।। ৬.১০৫.২৫ ।।
105.26
শুভান্যেতানি চিহ্নানি বিজ্ঞায়াত্মগতানি সঃ ।
ভূয় এবার্দয়দ্রামো রাবণং রাক্ষসান্তকৃৎ ।। ৬.১০৫.২৬ ।।
105.27
হরীণাং চাশ্মনিকরৈঃ শরবর্ষৈশ্চ রাঘবাৎ ।
হন্যমানো দশগ্রীবো বিঘূর্ণহৃদয়ো ঽভবৎ ।। ৬.১০৫.২৭ ।।
105.28
যদা চ শস্ত্রং নারেভে ন ব্যকর্ষচ্ছরাসনম্ ।
নাস্য প্রত্যকরোদ্বীর্যং বিক্লেবেনান্তরাত্মনা ।। ৬.১০৫.২৮ ।।
105.29
ক্ষিপ্তাশ্চাপি শরাস্তেন শস্ত্রাণি বিবিধানি চ ।
ন রণার্থায় বর্তন্তে মৃত্যুকালে ঽভিবর্ততঃ ।। ৬.১০৫.২৯ ।।
105.30
সূতস্তু রথনেতা ঽস্য তদবস্থং সমীক্ষ্য তম্ ।
শনৈর্যুদ্ধাদসম্ভ্রান্তো রথং তস্যাপবাহয়ৎ ।। ৬.১০৫.৩০ ।।
105.31
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে পঞ্চোত্তরশততমঃ সর্গঃ ।
। ১০৫ ।।