Utshovসর্গ 103
103.1
লক্ষ্মণেন তু তদ্বাক্যমুক্তং শ্রুত্বা স রাঘবঃ ।
সন্দধে পরবীরঘ্নো ধনুরাদায় বীর্যবান্ ।রাবণায় শরান্ ঘোরান্ বিসসর্জ চমূমুখে ।। ৬.১০৩.১ ।।
103.2
অথান্যং রথমারুহ্য রাবণো রাক্ষসাধিপঃ ।
অভ্যদ্রবত কাকুত্স্থং স্বর্ভানুরিব ভাস্করম্ ।। ৬.১০৩.২ ।।
103.3
দশগ্রীবো রথস্থস্তু রামং বজ্রোপমৈঃ শরৈঃ ।
আজঘান মহাঘোরৈর্ধারাভিরিব তোয়দঃ ।। ৬.১০৩.৩ ।।
103.4
দীপ্তপাবক সঙ্কাশৈঃ শরৈঃ কাঞ্চনভূষণৈঃ ।
নির্বিভেদ রণে রামো দশগ্রীবং সমাহিতম্ ।। ৬.১০৩.৪ ।।
103.5
ভূমৌ স্থিতস্য রামস্য রথস্থস্য চ রক্ষসঃ ।
ন সমং যুদ্ধমিত্যাহুর্দেবগন্ধর্বদানবাঃ ।। ৬.১০৩.৫ ।।
103.6
ততঃ কাঞ্চনচিত্রাঙ্গঃ কিঙ্কিণীশতভূষিতঃ ।
তরুণাদিত্যসঙ্কাশো বৈডূর্যময়কূবরঃ ।। ৬.১০৩.৬ ।।
103.7
সদশ্বৈঃ কাঞ্চনাপীডৈর্যুক্তঃ শ্বেতপ্রকীর্ণকৈঃ ।
হরিভিঃ সূর্যসঙ্কাশৈর্হেমজালবিভূষিতৈঃ ।। ৬.১০৩.৭ ।।
103.8
রুক্মবেণুধ্বজঃ শ্রীমান্ দেবরাজরথো বরঃ ।
দেবরাজেন সন্দিষ্টো রথমারুহ্য মাতলিঃ ।। ৬.১০৩.৮ ।।
103.9
অভ্যবর্তত কাকুত্স্থমবতীর্য ত্রিবিষ্টপাৎ ।
। ৬.১০৩.৯ ।।
103.10
অব্রবীচ্চ তদা রামং সপ্রতোদো রথে স্থিতঃ ।
প্রাঞ্জলির্মাতলির্বাক্যং সহস্রাক্ষস্য সারথিঃ ।। ৬.১০৩.১০ ।।
103.11
সহস্রাক্ষেণ কাকুত্স্থ রথো ঽয়ং বিজয়ায় তে ।
দত্তস্তব মহাসত্ত্ব শ্রীমান্ শত্রুনিবর্হণ ।। ৬.১০৩.১১ ।।
103.12
ইদমৈন্দ্রং মহচ্চাপং কবচং চাগ্নিসন্নিভম্ ।
শরাশ্চাদিত্যসঙ্কাশাঃ শক্তিশ্চ বিমলা শিতা ।। ৬.১০৩.১২ ।।
103.13
আরুহ্যেমং রথং বীর রাক্ষসং জহি রাবণম্ ।
ময়া সারথিনা রাজন্ মহেন্দ্র ইব দানবান্ ।। ৬.১০৩.১৩ ।।
103.14
ইত্যুক্তঃ সম্পরিক্রম্য রথং সমভিবাদ্য চ ।
আরুরোহ তদা রামো লোকান্ লক্ষ্ম্যা বিরাজয়ন্ ।। ৬.১০৩.১৪ ।।
103.15
তদ্বভূবাদ্ভুতং যুদ্ধং তুমুলং রোমহর্ষণম্ ।
রামস্য চ মহাবাহো রাবণস্য চ রক্ষসঃ ।। ৬.১০৩.১৫ ।।
103.16
স গান্ধর্বেণ গান্ধর্বং দৈবং দৈবেন রাঘবঃ ।
অস্ত্রং রাক্ষসরাজস্য জঘান পরমাস্ত্রবিৎ ।। ৬.১০৩.১৬ ।।
103.17
অস্ত্রং তু পরমং ঘোরং রাক্ষসং রাক্ষসাধিপঃ ।
সসর্জ পরমক্রুদ্ধঃ পুনরেব নিশাচরঃ ।। ৬.১০৩.১৭ ।।
103.18
তে রাবণধনুর্মুক্তাঃ শরাঃ কাঞ্চনভূষণাঃ ।
অভ্যবর্তন্ত কাকুত্স্থং সর্পা ভূত্বা মহাবিষাঃ ।। ৬.১০৩.১৮ ।।
103.19
তে দীপ্তবদনা দীপ্তং বমন্তো জ্বলনং মুখৈঃ ।
রামমেবাভ্যবর্তন্ত ব্যাদিতাস্যা ভয়ানকাঃ ।। ৬.১০৩.১৯ ।।
103.20
তৈর্বাসুকিসমস্পর্শৈর্দীপ্তভোগৈর্মহাবিষৈঃ ।
দিশশ্চ সন্ততাঃ সর্বাঃ প্রদিশশ্চ সমাবৃতাঃ ।। ৬.১০৩.২০ ।।
103.21
তান্ দৃষ্ট্বা পন্নগান্ রামঃ সমাপতত আহবে ।
অস্ত্রং গারুত্মতং ঘোরং প্রাদুশ্চকে ভয়াবহম্ ।। ৬.১০৩.২১ ।।
103.22
তে রাঘবশরা মুক্তা রুক্মপুঙ্খাঃ শিখিপ্রভাঃ ।
সুপর্ণাঃ কাঞ্চনা ভূত্বা বিচেরুঃ সর্পশত্রবঃ ।। ৬.১০৩.২২ ।।
103.23
তে তান্ সর্বান্ শরান্ জঘ্নুঃ সর্পরূপান্ মহাজবান্ ।
সুপর্ণরূপা রামস্য বিশিখাঃ কামরূপিণঃ ।। ৬.১০৩.২৩ ।।
103.24
অস্ত্রে প্রতিহতে ক্রুদ্ধো রাবণো রাক্ষসাধিপঃ ।
অভ্যবর্ষত্তদা রামং ঘোরাভিঃ শরবৃষ্টিভিঃ ।। ৬.১০৩.২৪ ।।
103.25
ততঃ শরসহস্রেণ রামমক্লিষ্টকারিণম্ ।
অর্দয়িত্বা শরৌঘেণ মাতলিং প্রত্যবিধ্যত ।। ৬.১০৩.২৫ ।।
103.26
চিচ্ছেদ কেতুমুদ্ধিশ্য শরেণৈকেন রাবণঃ ।
পাতয়িত্বা রথোপস্থে রথাৎ কেতুং চ কাঞ্চনম্ ।ঐন্দ্রানপি জঘানাশ্বান্ শরজালেন রাবণঃ ।। ৬.১০৩.২৬ ।।
103.27
তং দৃষ্ট্বা সুমহত্কর্ম রাবণস্য দুরাত্মনঃ ।
বিষেদুর্দেবগন্ধর্বা দানবাশ্চারণৈঃ সহ ।। ৬.১০৩.২৭ ।।
103.28
রামমার্তং তদা দৃষ্ট্বা সিদ্ধাশ্চ পরমর্ষয়ঃ ।
ব্যথিতা বানরেন্দ্রাশ্চ বভূবুঃ সবিভীষণাঃ ।। ৬.১০৩.২৮ ।।
103.29
রামচন্দ্রমসং দৃষ্ট্বা গ্রস্তং রাবণরাহুণা ।
প্রাজাপত্যং চ নক্ষত্রং রোহিণীং শশিনঃ প্রিয়াম্ ।। ৬.১০৩.২৯ ।।
103.30
সমাক্রম্য বুধস্তস্থৌ প্রজানামশুভাবহঃ ।
। ৬.১০৩.৩০ ।।
103.31
সধূমপরিবৃত্তোর্মিঃ প্রজ্বলন্নিব সাগরঃ ।
উত্পপাত তদা ক্রুদ্ধঃ স্পৃশন্নিব দিবাকরম্ ।। ৬.১০৩.৩১ ।।
103.32
শস্ত্রবর্ণঃ সুপরুষো মন্দরশ্মির্দিবাকরঃ ।
অদৃশ্যত কবন্ধাঙ্কঃ সংসক্তো ধূমকেতুনা ।। ৬.১০৩.৩২ ।।
103.33
কোসলানাং চ নক্ষত্রং ব্যক্তমিন্দ্রাগ্নিদৈবতম্ ।
আক্রম্যাঙ্গারকস্তস্থৌ বিশাখামপি চাম্বরে ।। ৬.১০৩.৩৩ ।।
103.34
দশাস্যো বিংশতিভুজঃ প্রগৃহীতশরাসনঃ ।
অদৃশ্যত দশগ্রীবো মৈনাক ইব পর্বতঃ ।। ৬.১০৩.৩৪ ।।
103.35
নিরস্যমানো রামস্তু দশগ্রীবেণ রক্ষসা ।
নাশক্নোদভিসন্ধাতুং সায়কান্ রণমূর্ধনি ।। ৬.১০৩.৩৫ ।।
103.36
স কৃত্বা ভ্রুকুটিং ক্রুদ্ধঃ কিঞ্চিৎ সংরক্তলোচনঃ ।
জগাম সুমহাক্রোধং নির্দহন্নিব চক্ষুষা ।। ৬.১০৩.৩৬ ।।
103.37
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে ত্র্যুত্তরশততমঃ সর্গঃ ।
। ১০৩ ।।