Utshovসর্গ 101
101.1
তস্মিন্ প্রতিহতে ঽস্ত্রে তু রাবণো রাক্ষসাধিপঃ ।
ক্রোধং চ দ্বিগুণং চক্রে ক্রোধাচ্চাস্ত্রমনন্তরম্ ।। ৬.১০১.১ ।।
101.2
ময়েন বিহিতং রৌদ্রমন্যদস্ত্রং মহাদ্যুতিঃ ।
উত্স্রষ্টুং রাবণো ঘোরং রাঘবায় প্রচক্রমে ।। ৬.১০১.২ ।।
101.3
ততঃ শূলানি নিশ্চেরুর্গদাশ্চ মুসলানি চ ।
কার্মুকাদ্দীপ্যমানানি বজ্রসারাণি সর্বশঃ ।। ৬.১০১.৩ ।।
101.4
মুদ্গরাঃ কূটপাশাশ্চ দীপ্তাশ্চাশনয়স্তথা ।
নিষ্পেতুর্বিবিধাস্তীক্ষ্ণা বাতা ইব যুগক্ষয়ে ।। ৬.১০১.৪ ।।
101.5
তদস্ত্রং রাঘবঃ শ্রীমানুত্তমাস্ত্রবিদাং বরঃ ।
জঘান পরমাস্ত্রেণ গান্ধর্বেণ মহাদ্যুতিঃ ।। ৬.১০১.৫ ।।
101.6
তস্মিন্ প্রতিহতে ঽস্ত্রে তু রাঘবেণ মহাত্মনা ।
রাবণঃ ক্রোধতাম্রাক্ষঃ সৌরমস্ত্রমুদৈরয়ৎ ।। ৬.১০১.৬ ।।
101.7
ততশ্চক্রাণি নিষ্পেতুর্ভাস্বরাণি মহান্তি চ ।
কার্মুকাদ্ভীমবেগস্য দশগ্রীবস্য ধীমতঃ ।। ৬.১০১.৭ ।।
101.8
তৈরাসীদ্গগনং দীপ্তং সম্পতদ্ভিরিতস্ততঃ ।
পতদ্ভিশ্চ দিশো দীপ্তাশ্চন্দ্রসূর্যগ্রহৈরিব ।। ৬.১০১.৮ ।।
101.9
তানি চিচ্ছেদ বাণৌঘৈশ্চক্রাণি স তু রাঘবঃ ।
আয়ুধানি চ চিত্রাণি রাবণস্য চমূমুখে ।। ৬.১০১.৯ ।।
101.10
তদস্ত্রং তু হতং দৃষ্ট্বা রাবণো রাক্ষসাধিপঃ ।
বিব্যাধ দশভির্বাণৈ রামং সর্বেষু মর্মসু ।। ৬.১০১.১০ ।।
101.11
স বিদ্ধো দশভির্বাণৈর্মহাকার্মুকনিস্সৃতৈঃ ।
রাবণেন মহাতেজা ন প্রাকম্পত রাঘবঃ ।। ৬.১০১.১১ ।।
101.12
ততো বিব্যাধ গাত্রেষু সর্বেষু সমিতিঞ্জয়ঃ ।
রাঘবস্তু সুসঙ্ক্রুদ্ধো রাবণং বহুভিঃ শরৈঃ ।। ৬.১০১.১২ ।।
101.13
এতস্মিন্নন্তরে ক্রুদ্ধো রাঘবস্যানুজো বলী ।
লক্ষ্মণঃ সায়কান্ সপ্ত জগ্রাহ পরবীরহা ।। ৬.১০১.১৩ ।।
101.14
তৈঃ সায়কৈর্মহাবেগৈ রাবণস্য মহাদ্যুতিঃ ।
ধ্বজং মনুষ্যশীর্ষং তু তস্য চিচ্ছেদ নৈকধা ।। ৬.১০১.১৪ ।।
101.15
সারথেশ্চাপি বাণেন শিরো জ্বলিতকুণ্ডলম্ ।
জহার লক্ষ্মণঃ শ্রীমান্ নৈর্ঋতস্য মহাবলঃ ।। ৬.১০১.১৫ ।।
101.16
তস্য বাণৈশ্চ চিচ্ছেদ ধনুর্গজকরোপমম্ ।
লক্ষ্মণো রাক্ষসেন্দ্রস্য পঞ্চভির্নিশিতৈঃ শরৈঃ ।। ৬.১০১.১৬ ।।
101.17
নীলমেঘনিভাংশ্চাস্য সদশ্বান্ পর্বতোপমান্ ।
জঘানাপ্লুত্য গদয়া রাবণস্য বিভীষণঃ ।। ৬.১০১.১৭ ।।
101.18
হতাশ্বাদ্বেগবান্ বেগাদবপ্লুত্য মহারথাৎ ।
ক্রোধমাহারয়ত্তীব্রং ভ্রাতরং প্রতি রাবণঃ ।। ৬.১০১.১৮ ।।
101.19
ততঃ শক্তিং মহাশক্তির্দীপ্তাং দীংপ্তাশনীমিব ।
বিভীষণায় চিক্ষেপ রাক্ষসেন্দ্রঃ প্রতাপবান্ ।। ৬.১০১.১৯ ।।
101.20
অপ্রাপ্তামেব তাং বাণৈস্ত্রিভিশ্চিচ্ছেদ লক্ষ্মণঃ ।
অথোদতিষ্ঠৎ সন্নাদো বানরাণাং তদা রণে ।। ৬.১০১.২০ ।।
101.21
সা পপাত ত্রিধা চ্ছিন্না শক্তিঃ কাঞ্চনমালিনী ।
সবিস্ফুলিঙ্গা জ্বলিতা মহোল্কেব দিবশ্চ্যুতা ।। ৬.১০১.২১ ।।
101.22
ততঃ সম্ভাবিততরাং কালেনাপি দুরাসদাম্ ।
জগ্রাহ বিপুলাং শক্তিং দীপ্যমানাং স্বতেজসা ।। ৬.১০১.২২ ।।
101.23
সা বেগিতা বলবতা রাবণেন দুরাসদা ।
জজ্বাল সুমহাঘোরা শক্রাশনিসমপ্রভা ।। ৬.১০১.২৩ ।।
101.24
এতস্মিন্নন্তরে বীরো লক্ষ্মণস্তং বিভীষণম্ ।
প্রাণসংশয়মাপন্নং তূর্ণমভ্যবপদ্যত ।। ৬.১০১.২৪ ।।
101.25
তং বিমোক্ষয়িতুং বীরশ্চাপমায়ম্য লক্ষ্মণঃ ।
রাবণং শক্তিহস্তং বৈ শরবর্ষৈরবাকিরৎ ।। ৬.১০১.২৫ ।।
101.26
কীর্যমাণঃ শরৌঘেণ বিসৃষ্টেন মহাত্মনা ।
স প্রহর্তুং মনশ্চক্রে বিমুখীকৃতবিক্রমঃ ।। ৬.১০১.২৬ ।।
101.27
মোক্ষিতং ভ্রাতরং দৃষ্ট্বা লক্ষ্মণেন স রাবণঃ ।
লক্ষ্মণাভিমুখস্তিষ্ঠন্নিদং বচনমব্রবীৎ ।। ৬.১০১.২৭ ।।
101.28
মোক্ষিতস্তে বলশ্লাঘিন্ যস্মাদেবং বিভীষণঃ ।
বিমুচ্য রাক্ষসং শক্তিস্ত্বয়ীয়ং বিনিপাত্যতে ।। ৬.১০১.২৮ ।।
101.29
এষা তে হৃদয়ং ভিত্ত্বা শক্তির্লোহিতলক্ষণা ।
মদ্বাহুপরিঘোত্সৃষ্টা প্রাণানাদায় যাস্যতি ।। ৬.১০১.২৯ ।।
101.30
ইত্যেবমুক্ত্বা তাং শক্তিমষ্টঘণ্টাং মহাস্বনাম্ ।
ময়েন মায়াবিহিতামমোঘাং শত্রুঘাতিনীম্ ।। ৬.১০১.৩০ ।।
101.31
লক্ষ্মণায় সমুদ্দিশ্য জ্বলন্তীমিব তেজসা ।
রাবণঃ পরমক্রুদ্ধশ্চিক্ষেপ চ ননাদ চ ।। ৬.১০১.৩১ ।।
101.32
সা ক্ষিপ্তা ভীমবেগেন শক্রাশনিসমস্বনা ।
শক্তিরভ্যপতদ্বেগাল্লক্ষ্মণং রণমূর্ধনি ।। ৬.১০১.৩২ ।।
101.33
তামনুব্যাহরচ্ছক্তিমাপতন্তীং স রাঘবঃ ।
স্বস্ত্যস্তু লক্ষ্মণায়েতি মোঘা ভব হতোদ্যমা ।। ৬.১০১.৩৩ ।।
101.34
রাবণেন রণে শক্তিঃ ক্রুদ্ধেনাশীবিষোপমা ।
মুক্তা ঽ ঽশূরস্যভীতস্য লক্ষ্মণস্য মমজ্জ সা ।। ৬.১০১.৩৪ ।।
101.35
ন্যপতৎ সা মহাবেগা লক্ষ্মণস্য মহোরসি ।
জিহ্বেবোরগরাজস্য দীপ্যমানা মহাদ্যুতিঃ ।। ৬.১০১.৩৫ ।।
101.36
ততো রাবণবেগেন সুদূরমবগাঢয়া ।
শক্ত্যা নির্ভিন্নহৃদয়ঃ পপাত ভুবি লক্ষ্মণঃ ।। ৬.১০১.৩৬ ।।
101.37
তদবস্থং সমীপস্থো লক্ষ্মণং প্রেক্ষ্য রাঘবঃ ।
ভ্রাতৃস্নেহান্মহাতেজা বিষণ্ণহৃদয়ো ঽভবৎ ।। ৬.১০১.৩৭ ।।
101.38
স মুহূর্তমনুধ্যায় বাষ্পব্যাকুললোচনঃ ।
বভূব সংরব্ধতরো যুগান্ত ইব পাবকঃ ।। ৬.১০১.৩৮ ।।
101.39
ন বিষাদস্য কালো ঽয়মিতি সঞ্চিন্ত্য রাঘবঃ ।
চক্রে সুতুমুলং যুদ্ধং রাবণস্য বধে ধৃতঃ ।সর্বয়ত্নেন মহতা লক্ষ্মণং সন্নিরীক্ষ্য চ ।। ৬.১০১.৩৯ ।।
101.40
স দদর্শ ততো রামঃ শক্ত্যা ভিন্নং মহাহবে ।
লক্ষ্মণং রুধিরাদিগ্ধং সপন্নগমিবাচলম্ ।। ৬.১০১.৪০ ।।
101.41
তামপি প্রহিতাং শক্তিং রাবণেন বলীয়সা ।
যত্নতস্তে হরিশ্রেষ্ঠা ন শেকুরবমর্দিতুম্ ।। ৬.১০১.৪১ ।।
101.42
অর্দিতাশ্চৈব বাণৌঘৈঃ ক্ষিপ্রহস্তেন রক্ষসা ।
। ৬.১০১.৪২ ।।
101.43
সৌমিত্রিং সা বিনির্ভিদ্য প্রবিষ্টা ধরণীতলম্ ।
। ৬.১০১.৪৩ ।।
101.44
তাং করাভ্যাং পরামৃশ্য রামঃ শক্তিং ভয়াবহাম্ ।
বভঞ্জ সমরে ক্রুদ্ধো বলবান্ বিচকর্ষ চ ।। ৬.১০১.৪৪ ।।
101.45
তস্য নিষ্কর্ষতঃ শক্তিং রাবণেন বলীয়সা ।
শরাঃ সর্বেষু গাত্রেষু পাতিতা মর্মভেদিনঃ ।। ৬.১০১.৪৫ ।।
101.46
অচিন্তয়িত্বা তান্ বাণান্ সমাশ্লিষ্য চ লক্ষ্ণমম্ ।
অব্রবীচ্ছ হনূমন্তং সুগ্রীবং চৈব রাঘবঃ ।। ৬.১০১.৪৬ ।।
101.47
লক্ষ্মণং পরিবার্যেহ তিষ্ঠধ্বং বানরোত্তমাঃ ।
। ৬.১০১.৪৭ ।।
101.48
পরাক্রমস্য কালো ঽয়ং সম্প্রাপ্তো মে চিরেপ্সিতঃ ।
পাপাত্মা ঽয়ং দশগ্রীবো বধ্যতাং পাপনিশ্চয়ঃ ।কাঙ্ক্ষতঃ স্তোককস্যেব ঘর্মান্তে মেঘদর্শনম্ ।। ৬.১০১.৪৮ ।।
101.49
অস্মিন্ মুহূর্তে ন চিরাৎ সত্যং প্রতিশৃণোমি বঃ ।
অরাবণমরামং বা জগদ্দ্রক্ষ্যথ বানরাঃ ।। ৬.১০১.৪৯ ।।
101.50
রাজ্যনাশং বনে বাসং দণ্ডকে পরিধাবনম্ ।
বৈদেহ্যাশ্চ পরামর্শং রক্ষোভিশ্চ সমাগমম্ ।। ৬.১০১.৫০ ।।
101.51
প্রাপ্তং দুঃখং মহদ্ঘোরং ক্লেশং চ নিরয়োপমম্ ।
অদ্য সর্বমহং ত্যক্ষ্যে নিহত্বা রাবণং রণে ।। ৬.১০১.৫১ ।।
101.52
যদর্থং বানরং সৈন্যং সমানীতমিদং ময়া ।
সুগ্রীবশ্চ কৃতো রাজ্যে নিহত্বা বালিনং রণে ।। ৬.১০১.৫২ ।।
101.53
যদর্থং সাগরঃ ক্রান্তঃ সেতুর্বদ্ধশ্চ সাগরে ।
সো ঽয়মদ্য রণে পাপশ্চক্ষুর্বিষয়মাগতঃ ।। ৬.১০১.৫৩ ।।
101.54
চক্ষুর্বিষয়মাগম্য নায়ং জীবিতুমর্হতি ।
দৃষ্টিং দৃষ্টিবিষস্যেব সর্পস্য মম রাবণঃ ।। ৬.১০১.৫৪ ।।
101.55
স্বস্থাঃ পশ্যত দুর্ধর্ষা যুদ্ধং বানরপুঙ্গবাঃ ।
আসীনাঃ পর্বতাগ্রেষু মমেদং রাবণস্য চ ।। ৬.১০১.৫৫ ।।
101.56
অদ্য রামস্য রামত্বং পশ্যন্তু মম সংয়ুগে ।
ত্রয়ো লোকাঃ সগন্ধর্বাঃ সদেবাঃ সর্ষিচারণাঃ ।। ৬.১০১.৫৬ ।।
101.57
অদ্য কর্ম করিষ্যামি যল্লোকাঃ সচরাচরাঃ ।
সদেবাঃ কথয়িষ্যন্তি যাবদ্ভূমির্ধরিষ্যতি ।সমাগম্য সদা লোকে যথা যুদ্ধং প্রবর্তিতম্ ।। ৬.১০১.৫৭ ।।
101.58
এবমুক্ত্বা শিতৈর্বাণৈস্তপ্তকাঞ্চনভূষণৈঃ ।
আজঘান দশগ্রীবং রণে রামঃ সমাহিতঃ ।। ৬.১০১.৫৮ ।।
101.59
অথ প্রদীপ্তৈর্নারাচৈর্মুসলৈশ্চাপি রাবণঃ ।
অভ্যবর্ষত্তদা রামং ধারাভিরিব তোয়দঃ ।। ৬.১০১.৫৯ ।।
101.60
রামরাবণমুক্তানামন্যোন্যমভিনিঘ্নতাম্ ।
শরাণাং চ শরাণাং চ বভূব তুমুলঃ স্বনঃ ।। ৬.১০১.৬০ ।।
101.61
তে ভিন্নাশ্চ বিকীর্ণাশ্চ রামরাবণয়োঃ শরাঃ ।
অন্তরিক্ষাৎ প্রদীপ্তাগ্রা নিপেতুর্ধরণীতলে ।। ৬.১০১.৬১ ।।
101.62
তয়োর্জ্যাতলনির্ঘোষো রামরাবণয়োর্মহান্ ।
ত্রাসনঃ সর্বভূতানাং সম্বভূবাদ্ভুতোপমঃ ।। ৬.১০১.৬২ ।।
101.63
স কীর্যমাণঃ শরজালবৃষ্টিভির্মহাত্মনা দীপ্তধনুষ্মতা ঽর্দিতঃ ।
ভয়াৎ প্রদুদ্রাব সমেত্য রাবণো যথা ঽনিলেনাভিহতো বলাহকঃ ।। ৬.১০১.৬৩ ।।
101.64
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে একোত্তরশততমঃ সর্গঃ ।
। ১০১ ।।