Utshovসর্গ 100
100.1
মহোদরমহাপার্শো হতৌ দৃষ্ট্বা তু রাক্ষসৌ।
তস্মিংশ্চ নিহতে বীরে বিরূপাক্ষে মহাবলে।আবিবেশ মহান্ ক্রোধো রাবণং তং মহামৃধে ।। ৬.১০০.১ ।।
100.2
সূতং সঞ্চোদয়ামাস বাক্যং চেদমুবাচ হ ।
। ৬.১০০.২ ।।
100.3
নিহতানামমাত্যানাং রুদ্ধস্য নগরস্য চ।
দুঃখমেষো ঽপনেষ্যামি হত্বা তৌ রামলক্ষ্মণৌ ।। ৬.১০০.৩ ।।
100.4
রামবৃক্ষং রণে হন্মি সীতাপুষ্পফলপ্রদম্।
প্রশাখা যস্য সুগ্রীবো জাম্ববান্ কুমুদো নলঃ ।। ৬.১০০.৪ ।।
100.5
মৈন্দশ্চ দ্বিবিদশ্চৈব হ্যঙ্গদো গন্ধমাদনঃ।
হমূমাংশ্চ সুষেণশ্চ সর্বে চ হরিয়ূথপাঃ ।। ৬.১০০.৫ ।।
100.6
স দিশো দশ ধোষেণ রথস্যাতিরথো মহান্।
নাদয়ন্ প্রয়য়ৌ তূর্ণং রাঘবং চাভ্যবর্তত ।। ৬.১০০.৬ ।।
100.7
পূরিতা তেন শব্দেন সনদীগিরিকাননা।
সঞ্চচাল মহী সর্বা সবরাহমৃগদ্বিপা ।। ৬.১০০.৭ ।।
100.8
তামসং স মহাঘোরং চকারাস্ত্রং সুদারুণম্।
নির্দদাহ কপীন্ সর্বাংস্তে প্রপেতুঃ সমন্ততঃ ।। ৬.১০০.৮ ।।
100.9
উত্পপাত রজো ঘোরং তৈর্ভগ্নৈঃ সম্প্রধাবিতৈঃ।
ন হি তত্সহিতুং শেকুর্ব্রহ্মণা নির্মিতং স্বয়ম্ ।। ৬.১০০.৯ ।।
100.10
তান্যনীকান্যনেকানি রাবণস্য শরোত্তমৈঃ।
দৃষ্ট্বা ভগ্নানি শতশো রাঘবঃ পর্যবস্থিতঃ ।। ৬.১০০.১০ ।।
100.11
ততো রাক্ষসশার্দূলো বিদ্রাব্য হরিবাহিনীম্।
স দদর্শ ততো রামং তিষ্ঠন্তমপারজিতম্ ।। ৬.১০০.১১ ।।
100.12
লক্ষ্মণেন সহ ভ্রাত্রা বিষ্ণুনা বাসবং যথা।
আলিখন্তমিবাকাশমবষ্টভ্য মহদ্ধনুঃ।পদ্মপত্রবিশালাক্ষং দীর্ঘবাহুমরিন্দমম্ ।। ৬.১০০.১২ ।।
100.13
ততো রামো মহাতেজাঃ সৌমিত্রিসহিতো বলী।
বানরাংশ্চ রণে ভগ্নানাপতন্তং চ রাবণম্ ।। ৬.১০০.১৩ ।।
100.14
সমীক্ষ্য রাঘবো হৃষ্টো মধ্যে জগ্রাহ কার্মুকম্ ।
। ৬.১০০.১৪ ।।
100.15
বিস্ফারয়িতুমারেভে ততঃ স ধনুরুত্তমম্।
মহাবেগং মহানাদং নির্ভিন্দন্নিব মেদিনীম্ ।। ৬.১০০.১৫ ।।
100.16
রাবণস্য চ বাণৌঘৈরামবিস্ফারিতেন চ।
শব্দেন রাক্ষসাস্তে চ পেতুশ্চ শতশস্তদা ।। ৬.১০০.১৬ ।।
100.17
তয়োঃ শরপথং প্রাপ্তো রাবণো রাজপুত্রয়োঃ।
স বভৌ চ যথা রাহুঃ সমীপে শশিসূর্যয়োঃ ।। ৬.১০০.১৭ ।।
100.18
তমিচ্ছন্ প্রথমং যোদ্ধুং লক্ষ্মণো নিশিতৈঃ শরৈঃ।
মুমোচ ধনুরায়ম্য শরানগ্নিশিখোপমান্ ।। ৬.১০০.১৮ ।।
100.19
তান্মুক্তমাত্রানাকাশে লক্ষ্মণেন ধনুষ্মতা।
বাণান্ বাণৈর্মহাতেজা রাবণঃ প্রত্যবারয়ৎ ।। ৬.১০০.১৯ ।।
100.20
একমেকেন বাণেন ত্রিভিস্ত্রীন্ দশভির্দশ।
লক্ষ্মণস্য প্রচিচ্ছেদ দর্শয়ন্ পাণিলাঘবম্ ।। ৬.১০০.২০ ।।
100.21
অভ্যতিক্রম্য সৌমিত্রিং রাবণঃ সমিতিঞ্জয়ঃ।
আসসাদ ততো রামং স্থিতং শৈলমিবাচলম্ ।। ৬.১০০.২১ ।।
100.22
স সঙ্খ্যে রামমাসাদ্য ক্রোধসংরক্তলোচনঃ।
ব্যসৃজচ্ছরবর্ষাণি রাবণো রাঘবোপরি ।। ৬.১০০.২২ ।।
100.23
শরধারাস্ততো রামো রাবণস্য ধনুশ্চ্যুতাঃ।
দৃষ্ট্বৈবাপততঃ শীঘ্রং ভল্লান্ জগ্রাহ সত্বরম্ ।। ৬.১০০.২৩ ।।
100.24
তান্ শরৌঘাংস্ততো ভল্লৈস্তীক্ষ্ণৈশ্চিচ্ছেদ রাঘবঃ।
দীপ্যমানান্ মহাঘোরান্ ক্রুদ্ধানাশীবিষানিব ।। ৬.১০০.২৪ ।।
100.25
রাঘবো রাবণং তূর্ণং রাবণো রাঘবং তদা।
অন্যোন্যং বিবিধৈস্তীক্ষ্ণৈঃ শরৈরভিববর্ষতুঃ ।। ৬.১০০.২৫ ।।
100.26
চেরতুশ্চ চিরং চিত্রং মণ্ডলং সব্যদক্ষিণম্।
বাণবেগান্ সমুত্ক্ষিপ্তাবন্যোন্যমপারজিতৌ ।। ৬.১০০.২৬ ।।
100.27
তয়োর্ভূতানি বিত্রেসুর্যুগপৎ সম্প্রয়ুধ্যতোঃ।
রৌদ্রয়োঃ সায়কমুচোর্যমান্তকনিকাশয়োঃ ।। ৬.১০০.২৭ ।।
100.28
সন্ততং বিবিধৈর্বাণৈর্বভূব গগনং তদা।
ঘনৈরিবাতপাপায়ে বিদ্যুন্মালাসমাকুলৈঃ ।। ৬.১০০.২৮ ।।
100.29
গবাক্ষিতমিবাকাশং বভূব শরবৃষ্টিভিঃ ।
। ৬.১০০.২৯ ।।
100.30
মহাবেগৈঃ সুতীক্ষ্ণাগ্রৈর্গৃধ্রপত্রৈঃ সুবাজিতৈঃ।
শরান্ধকারং তৌ ভীমং চক্রুতুঃ সমরং তদা।গতে ঽস্তং তপনে চাপি মহামেঘাবিবোত্থিতৌ ।। ৬.১০০.৩০ ।।
100.31
বভূব তুমুলং যুদ্ধমন্যোন্যবধকাঙ্ক্ষিণোঃ।
অনাসাদ্যমচিন্ত্যং চ বৃত্রবাসবয়োরিব ।। ৬.১০০.৩১ ।।
100.32
উভৌ হি পরমেষ্বাসাবুভৌ শস্ত্রবিশারদৌ।
উভাবস্ত্রবিদাং মুখ্যাবুভৌ যুদ্ধে বিচেরতুঃ ।। ৬.১০০.৩২ ।।
100.33
উভৌ হি যেন ব্রজতস্তেন তেন শরোর্ময়ঃ।
ঊর্ময়ো বায়ুনা বিদ্ধা জগ্মুঃ সাগরয়োরিব ।। ৬.১০০.৩৩ ।।
100.34
ততঃ সংসক্তহস্তস্তু রাবণো লোকরাবণঃ।
নারাচমালাং রামস্য ললাটে প্রত্যমুঞ্চত ।। ৬.১০০.৩৪ ।।
100.35
রৌদ্রচাপপ্রয়ুক্তাং তাং নীলোত্পলদলপ্রভাম্।
শিরসা ধারয়ন্ রামো ন ব্যথাং প্রত্যপদ্যত ।। ৬.১০০.৩৫ ।।
100.36
অথ মন্ত্রানভিজপন্ রৌদ্রমস্ত্রমুদীরয়ন্।
শরান্ ভূয়ঃ সমাদায় রামঃ ক্রোধসমন্বিতঃ।মুমোচ চ মহাতেজাশ্চাপমায়ম্য বীর্যবান্ ।। ৬.১০০.৩৬ ।।
100.37
তে মহামেঘসঙ্কাশে কবচে পতিতাঃ শরাঃ।
অবধ্যে রাক্ষসেন্দ্রস্য ন ব্যথাং জনয়ংস্তদা ।। ৬.১০০.৩৭ ।।
100.38
পুনরেবাথ তং রামো রথস্থং রাক্ষসাধিপম্।
ললাটে পরমাস্ত্রেণ সর্বাস্ত্রকুশলো রণে ।। ৬.১০০.৩৮ ।।
100.39
তে ভিত্ত্বা বাণরূপাণি পঞ্চশীর্ষা ইবোরগাঃ।
শ্বসন্তো বিবিশুর্ভূমিং রাবণপ্রতিকূলিতাঃ ।। ৬.১০০.৩৯ ।।
100.40
নিহত্য রাঘবস্যাস্ত্রং রাবণঃ ক্রোধমূর্চ্ছিতঃ।
আসুরং সুমহাঘোরমস্ত্রং প্রাদুশ্চকার হ ।। ৬.১০০.৪০ ।।
100.41
সিংহব্যাঘ্রমুখাশ্চান্যান্ কঙ্ককাকমুখানপি।
গৃধ্রশ্যেনমুখাংশ্চাপি শৃগালবদনাংস্তথা ।। ৬.১০০.৪১ ।।
100.42
ঈহামৃগমুখাংশ্চান্যান্ ব্যাদিতাস্যান্ ভয়ানকান্।
পঞ্চাস্যান্ লেলিহানাংশ্চ সসর্জ নিশিতান্ শরান্ ।। ৬.১০০.৪২ ।।
100.43
শরান্ খরমুখাংশ্চান্যান্ বরাহমুখসংস্থিতান্।
শ্বানকুক্কুটবক্ত্রাংশ্চ মকরাশীবিষাননান্ ।। ৬.১০০.৪৩ ।।
100.44
এতানন্যাংশ্চ মায়াবী সসর্জ নিশিতান্ শরান্।
রামং প্রতি মহাতেজাঃ ক্রুদ্ধঃ সর্প ইব শ্বসন্ ।। ৬.১০০.৪৪ ।।
100.45
আসুরেণ সমাবিষ্টঃ সো ঽস্ত্রেণ রঘুনন্দনঃ।
সসর্জাস্ত্রং মহোত্সাহঃ পাবকং পাবকোপমঃ ।। ৬.১০০.৪৫ ।।
100.46
অগ্নিদীপ্তমুখান্ বাণান্ তথা সূর্যমুখানপি।
চন্দ্রার্ধচন্দ্রবক্ত্রাংশ্চ ধূমকেতুমুখানপি ।। ৬.১০০.৪৬ ।।
100.47
গ্রহনক্ষত্রবক্ত্রাংশ্চ মহোল্কামুখসংস্থিতান্।
বিদ্যুজ্জিহ্বোপমাংশ্চান্যান্ সসর্জ নিশিতান্ শরান্ ।। ৬.১০০.৪৭ ।।
100.48
তে রাবণশরা ঘোরা রাঘবাস্ত্রসমাহতাঃ ।
। ৬.১০০.৪৮ ।।
100.49
বিলয়ং জগ্মুরাকাশে জগ্মুশ্চৈব সহস্রশঃ ।
। ৬.১০০.৪৯ ।।
100.50
তদস্ত্রং নিহতং দৃষ্ট্বা রামেণাক্লিষ্টকর্মণা।
হৃষ্টা নেদুস্ততঃ সর্বে কপয়ঃ কামরূপিণঃ।সুগ্রীবপ্রমুখা বীরাঃ পরিবার্য তু রাঘবম্ ।। ৬.১০০.৫০ ।।
100.51
ততস্তদস্ত্রং বিনিহত্য রাঘবঃ প্রসহ্য তদ্রাবণবাহুনিস্সৃতম্।
মুদা ঽন্বিতো দাশরথির্মহাহবে বিনেদুরুচ্চৈর্মুদিতাঃ কপীশ্বরাঃ ।। ৬.১০০.৫১ ।।
100.52
ইত্যার্ষে শ্রীমদ্রামায়ণে বাল্মীকীয়ে আদিকাব্যে শ্রীমদ্যুদ্ধকাণ্ডে শততমঃ সর্গঃ ।
। ১০০ ।।